ISHCAY Jatun Guerra wichan, juc oficial nazi shuntacashgan Testigucunata gaparayparaj nergan: “Pipis Inglaterra y Francia naciuncunata atacayta mana munaptiquega, ¡lapayquicuna wanupäcunqui!”. Laduncunacho achca soldaducuna SS nishganpita armancunawan vistishga captinpis, hermanunchicunaga cäsucärerganchu. ¡Alapa mana manchacojmi cargan! Paycunanola lapan Jehovapa testiguncunaga guerraman pelianapaj aywanchichu. Cay mundupa peliancunachoga jaticanchichu, wanuchimänanchipaj nimaptinchipis.

1. LAPAN DIOSPA SIRVEJNINCUNAGA JUC NACIUNLAPITAMI CASHGA

Unaychoga, quiquin Jehovami acrargan Israel nación marcan cananpaj. Paycunata nergan “canquipaj cuyashä runacuna. Waquin runacunata cuyashäpita masmi cuyashayqui” (Éx. 19:5). Jina maycho tiyananpäpis pachata goycurgan. Jehová israelitacunata mandaptin waquin naciuncunawan peliananpaj, Israel masincunata atacajchu ni wanuchejpischu. a

Canan wichanga, Jehovapa sirvejnincuna caycan “maytsay trïbu runakuna, maytsay marka runakuna y tukuy idiömata rimaq runakunami” (Apoc. 7:9). Guerraman aywaptenga, hermanuncunawan peliapacuycanman y wanuchinmanpis.

 2. JEHOVÁ ISRAELITACUNATA MANDARGAN GUERRAMAN AYWANANPAJ

Unaychoga, quiquin Jehová israelitacunata mandaj maycho y imaytaj peliananpaj. Tantiarinapaj, cananeo runacuna supaycunata adurapäcoj, jucwan jucwan cacur melanaypaj ruraycunata rurapäcoj, wamrancunatapis wanuchipäcoj. Chayraycurmi Jehová israelitacunata nergan ushacächinanpaj. Jehová chayta mandargan cananeo runacuna israelitacunata mana pantachipäcunanpämi (Lev. 18:24, 25). Dios Aunishgan Pachacho israelitacuna cawaycaptinna, öraga Jehová permitergan enemiguncunapita defendicärinanpaj (2 Sam. 5:17-25). Ichanga Jehová permitirganchu quiquincuna decidir guerraman aywananpaj o manapis. Paycuna quiquincuna munashganno guerraman aywaptin Jehová yanapajchu y pasaypa mana alimanmi chayaj (Núm. 14:41-45; 2 Crón. 35:20-24).

Canan wichanga, lapan runacunata Jehová mandannachu guerraman aywapäcunanpaj. Naciuncunaga quiquincunalapaj yarpar peliapäcun, y manami Diospächu yarpan. Öraga peliapäcun naciunnin más jatun cananpaj munar, guellayraycur o politicaraycurpis. Ichanga ¿ima nishwantaj Diospa jutincho creenciancunata defendinanpaj, o Diospa enemigunta ushacächinanpaj guerracho peliapäcushganta niptenga? Paycuna rurashganpis Diospa ricaynincho mana alimi caycan. Jehovami nin rasunpa caj sirvejnincunataga quiquinmi chapaycunga y ichiclachomi contrancho caycajcunataga lapanta ushacächenga Armagedón guerracho (Apoc. 16:14, 16). Cay guerrachoga cielucho caycaj ejercitunmi peliapäcunga, manami cay Pachacho caycaj sirvejnincunachu (Apoc. 19:11-15).

3. ISRAELITACUNAGA MANAMI WANUCHEJCHU JEHOVATA ASHEJCUNATAGA

Unaychoga, guerraman aywaj israelitacunaga Diosman yäracojcunataga laquipajmi, ichanga Jehová pïcunataj wanuchinanpaj nishgalantami wanuchej. Chayta tantianapaj ishcaylata ricärishun. Jericó marcata ushacächinanpaj mandashga captinpis, Rahabtawan familiantaga manami wanucherganchu paycuna Jehovaman yäracushganraycur  (Jos. 2:9-16; 6:16, 17). Nircur ichic tiempo pasariptinla, Gabaón marcacho tiyaj runacunata mana wanucherganchu Diosta respetapäcushganraycurmi (Jos. 9:3-9, 17-19).

Canan wichanga, guerraman aywajcunaga Diosta sirvejcunatapis wanuchinmi y guerraman mana aywajcunatapis.

4. GUERRAMAN AYWAJ ISRAELITACUNAGA DIOS NISHGANNOMI PELIAPÄCUNMAN CARGAN

Unaychoga, israelitacunata Jehová nejmi guerracho imano peliapäcunanpaj. Tantiarinapaj, öraga Dios mandajmi maygan marcawanpis “alli goyänanchïpaj parlashun” ninanpaj (Deut. 20:10). Jina Jehová mandargan, guerraman aywajcuna campamentuncuna y quiquincunapis lapancho limpio cananpaj (Deut. 23:9-14). Jinamanpis, Jehová mandargan atacashgan marcancho warmicunata mana violananpaj y waquin marcacunapita guerraman aywajcuna rurashganno mana rurananpaj. Aumi, maygan israelitapis atacashgan marcapita juc warmiwan casaracuyta munarga juc quillatarämi shuyaränan cargan (Deut. 21:10-13).

Canan wichanga, casi lapan naciuncuna acuerduman chayashga guerraman aywarga imano peliapäcunanpaj. Chay acuerducuna guerraman mana aywajcunata chapänanpaj captinpis, guerraman aywajcunaga cada cadala manami cäsucärinchu.

5. DIOSGA MARCANRAYCUR PELIAJ

Unaychoga, achca cutimi milagrucunawan Jehovaga israelitacunata yanapargan guerracho vencipäcunanpaj. Juc cuticho Jericó marcata ushacächinanpaj yanapargan, Jehová nishganno israelitacunaga “mana chawaypa gaparparan. Chaura siudäta curalaraycaj perga juchucäcuran”. Chaynopa Jehová yanapargan Jericó ciudäta charicarcärinanpaj (Jos. 6:20). Nircurna amorreo runacunata vencipäcunanpaj yanapargan. ¿Imano? Jehovaga “jatusaj rumicunatano runtu tamyata tamyachimuran. Chay runtu tamyawanmi Israelcuna sabliwan wañuchishanpita mas aypalla wañuran” (Jos. 10:6-11).

RASUNPA CRISTIANUCUNAGA JAUCALA CAWACUNAPÄMI CALPACHACUNCHI

Yachacushganchino, canan wichanga guerra captin manami unaynochu. Chauraga ¿chayno captinlachuraj guerraman mana aywanchinachu? Manami. Tantiarinapaj Diosga unayna wilacurgan ushanan junajcunacho paypita yachacuycajcunaga “mananami guërrapäpis yachachinaconganachu” (Is. 2:2-4). Jina discipuluncunapita Cristo nergan Diosta mana cäsucojcunano mana cananpaj ni talucanmanchu cay mundupa imayca pleituncunamanpis (Juan 15:19).

Cristuga discipuluncunata manami chaylatachu yachachergan. Caytapis tantiacherganmi shonguncho pitapis mana nanaparänanpaj, mana rabiapänanpaj ni ashlipänanpäpis (Mat. 5:21, 22). Jina yachachergan piwanpis jaucala goyäcunanpaj y chiquejnincunatapis cuyananpaj (Mat. 5:9, 44).

Caypitaga ¿imataj yachacunchi? Guerraman aywaytaga manachi munanchichu. Ichanga ¿shongunchicho ichiclapis chiquipaycanchichu maygan cristiano masinchilatapis? Chayta congregaciunta raquicächinmanmi. Chauraga shongunchipita chiquinacuycunataga lapanta jorgunapaj calpachacushun (Sant. 4:1, 11).

Cristianucunaga cay mundupa pleituncunacho yanapacunapaj trucanga jucninchi jucninchi cuyanacunapaj y jaucala goyäcunapämi calpachacunchi (Juan 13:34, 35). Chauraga calpachacuycäshunla cay mundupa ima pleitunlamanpis mana talucänapaj y shuyaraycashun Jehová lapan guerracunata ushacächinanpaj junaj chayamushgancama (Sal. 46:9).