1. “Tayta Diosta nistaqkuna” Jesús niptenga, ¿ima niytataj munaycargan, y chayga imanotaj yanapämanchi cushishga cawanapaj?

 RASUNPA cushicuyga manami ratulapächu, sinoga imaycamapis cushishga cawanapämi caycan. Jesús juc jircacho yachachicuptin imano cushicunapaj nergan: “Kushishqami kawapäkunqa Tayta Diosta nistaqkuna” (Mat. 5:3). Jesusga musyarganmi Jehovata pasaypa reguiyta y adurayta munashganchita, y chayno camashga cashganchitapis. Chaypämi Bibliaga parlaycan “Tayta Diosta nistaqkuna” niptin. Jehovaga cushishga Diosmi, chaymi sirvejnincunapis cushishga cawapäcunmanmi (1 Tim. 1:11).

2, 3. 1) ¿Pïcuna mastaj Jesús nishganno cushishga cawapäcunman? 2) ¿Imapitataj canan yachacurishun, y imanirtaj chaypita yachacushwan?

² ¿Shuyarashwanrächuraj ni ima problemapis mana cananpaj cushishga cawacunapaj? Manami. Jircacho yachachicuptin Jesús almiraypaj nergan “llaquicuycajcunaga” cushicunmanmi alapa juchayoj sienticuptin o mana alicunapa pasaycaptinpis. Jina nergan “Tayta Dios munashanno allita rurashanpita ñacachisha cajcunaga” o Jesuspa discipulun cashganraycur ashlishga captin cushicunmanmi (Mat. 5:4, 10, 11). Ichanga, ¿rasunpachu chaycunapa pasar cushishga cawacushwan?

³ Jesusga yachachicurgan cushishga cawacunapäga manami shuyarashwanrächu ni ima problemapis mana cananpaj, sinoga Diospita yachacuycänanchi y payman masraj guelicunanchi (Sant. 4:8). ¿Imanotaj chayta ruranchi? Cay yachachicuychomi  ricärishun quimsa yanapacuycunata imano rasunpa cushishga cawanapaj.

4. ¿Maygantaj punta caj yanapacuy rasunpa cushishga cawanapaj? (Salmo 1:1-3).

⁴ PUNTA CAJ YANAPACUY: Rasunpa cushishga cawacunapäga Bibliapitami shumaj yachacunanchi. Uywacuna y runacunapis cawananpäga micuytarämi micunan. Ichanga runacunala Bibliapita shumaj yachacuyta puedinchi y chayta rurananchi. Chaymi Jesús cayno nergan: “Manami micuyllawanchu runaga cawan. Chaypa ruquenga Tayta Dios nishancunata wiyacurpis cawanmi” (Mat. 4:4). Chauraga waran waran Bibliata leinanchipaj calpachacushwan. Salmuta escribej runa cayno nergan: “Kushishqami kawan [...] Tayta Diospa leyninkunata kushishqami cäsukun. Tsakaypapis junaqpapis tsay leykunalatami yarparaykan” (leiriy Salmo 1:1-3).

5, 6. 1) ¿Imapitataj Bibliacho yachacushwan? 2) ¿Imanotaj yanapämanchi Bibliata leiptinchi?

⁵ Jehová cuyamashpanchimi Palabrancho nimanchi imataj ruranapaj cushishgala cawanapaj. Tantiachimanchi imanirtaj cawayta gomashcanchi, imanotaj paywan amigo cashwan y imataj rurashwan juchanchicunata perdunamänanchipäpis. Jina musyachimanchi shamoj tiempucho shumaj caway cananpaj cajta (Jer. 29:11). Caycunapita Bibliacho yachacurmi shongunchi achicyarcunrämi.

⁶ Musyanchimi Bibliacho achca consejucuna cashganta ali cawanapaj, y cäsucuptinchega rasunpa cushishga canchi. Chaymi  problemacunaraycur nitipacash o laquishga caycarga, masraj tiempunchita shumaj camacächishwan Bibliata leinapaj y leishganchiman yarpachacunapaj. Jesús nergan: “Chaypa ruquenga cushisha cawanga Tayta Dios willacachishanta wiyar rurajcunami” (Luc. 11:28).

7. ¿Imanotaj tiempunchita shumaj provechashwan Bibliata leiptinchi?

⁷ Diospa Palabranta leirga “shumajraj gustapashwan” leishganchita. ¿Imanotaj chayta ruranchi? Cayman yarpäshun: pilapis más gustamashganchi micuytashi garamanchi, ichanga apurado caycar o problemanchicunaman yarparaycar milpuypa milpuypa micucurcunchi. Cuentata gocunapäga rasla micuyta ushashcanchi y ‘gustapaypäraj micöman cargan’ nir yarpanchi. Bibliata leiptinchipis chaynolami pasamashwan. Öraga apurado caycar Diospa Palabranwan yachachimashganchicunata gustapashwanchu. Chaymi tiemputa jorgushwan gustapaylapa Bibliata leinapaj, imano pasashgancunaman yarpar, voznincunata wiyaycashganchino y leishganchiman ali yarpachacurpis. Chayta ruraptinchega más cushishga cashun.

8. ¿Imataj ruraycan tantiaj y yäracuypaj esclavo Jesús mandashganta cumplinanpaj? (notatapis ricäriy).

⁸ Jesús tantiaj y yäracuypaj esclavuta acrashga espiritual micuyta gomänanchipaj, y ali sacsashgami caycanchi (Mat. 24:45). b Y chay micuyta preparananpäga imaypis Bibliawanmi ruran (1 Tes. 2:13). Gomashganchicunaga yanapämanchi Jehová munashganta y ima yarpashganta musyanapaj Biblia wilamashganchino. Chaymi revistacuna Wilacamoj y ¡Ricchayna!, y jw.org paginacho yargamushganta leinchi. Jina reuniuncunaman manaraj aywar shumajraj preparacunchi, y quilla quilla ricanchi JW Broadcasting^® programata waquin rimaycunacho. Chay lapanta shumaj provecharga yanapämäshun rasunpa cushicuyta tarinapaj y ishcay cajta ruranapaj.

9. ¿Maygantaj ishcay caj yanapacuy rasunpa cushishga cawanapaj?

⁹ ISHCAY CAJ YANAPACUY: Rasunpa cushishga canapäga Jehová nimashganchicunata cäsucushun. Juc salmuta escribejga nergan: “Kushishqami kaykan TAYTA DIOSTA mantsakur pay munashqanno kawaqkunaqa” (Sal. 128:1). Jehovata manchacur ninanmi payta shongupita respetashganchiraycur ni yarpaylapis yarpanchichu chiquishganta ruranapaj (Prov. 16:6). Chaymi jinala calpachacushun Jehová Bibliacho nimashganchita cäsucunapaj (2 Cor. 7:1). Jehová cuyashganta cäsucuptinchega y pay chiquishganta mana ruraptinchega cushishgami goyäshun (Sal. 37:27; 97:10; Rom. 12:9).

10. Jehová ima munashganta musyarpis, ¿imataraj más rurashwan? (Romanos 12:2).

¹⁰ (Leiriy Romanos 12:2). Capaz pilapis musyan Jehová derechuyoj cashganta imataj ali y imataj mana ali cashganta ninanpaj, ichanga Dios nishgantapis cäsucunanmi. Tantiarinapaj, juc chofer musyanman autoridäcuna leycunata goshgan rasla o despaciula manejananpaj. Ichanga chay leycunata cäsucuyta munanmanchu. Chaymi ley nishganpitapis más rasla manejaycun. Chauraga noganchipis Jehová nimashganchicuna ali cashganta yarpaptinchega rurayninchicunachomi ricachicushunpaj (Prov. 12:28). David chaynomi yarpargan, chaymi Jehovata nergan: “Munashqaykino kawanäpaqmi ali nänipa pushaykämanki. Nawpaykichöqa imaypis kushishqalami kawaykä. Alawqa kaq makikiwanmi  imaypis bendicionnikita churaykämunki” (Sal. 16:11).

11, 12. 1) ¿Imapitataj cuidacushwan yarpachacushga y guelanashga caycarga? 2) ¿Imanotaj yanapämanchi Filipenses 4:8 cushicunapaj cajcunata shumaj acranapaj?

¹¹ Yarpachacushga o guelanashga caycaptinchi öraga ima cushicuylatapis ashishwan problemanchicunata gonganapaj, y chayga alimi. Pero cuidacushwanmi Jehová chiquishgancunata ni imatapis mana ruranapaj (Efes. 5:10-12, 15-17).

¹² Filipos marcacho caycaj cristianucunata apóstol Pablo cartacamushgancho nergan imaypis yarpachacunanpaj ali cajcunaman, limpio cajcunaman, alabaypaj cajcunaman y cuyacoj canapaj cajcunamanpis (leiriy Filipenses 4:8). Cushicunapaj cajcunapita Pablo mana parlaycaptinpis chayga yanapämashwanmi cushicushganchi hora shumaj acranapaj. Mä cayta ali tantiarcunapaj ali cajcunaman nishgancho trucarcächishun “canciuncunawan”, “peliculacunawan”, “librucunawan” y “internetpa puclacunawanpis”. Chaynopa tantiacushun Jehovapa ricaynincho maygantaj ali caycan y maygantaj mana ali caycan. Jehovapa mandamientuncunata cäsucur cawacuytami munanchi (Sal. 119:1-3). Chaynopa ali conciencianchiwan gatejnin cajta ruranapaj listo caycäshun cushishga cawanapaj (Hech. 23:1).

13. ¿Maygantaj quimsa caj yanapacuy rasunpa cushishga cawanapaj? (Juan 4:23, 24).

¹³ QUIMSA CAJ YANAPACUY: Ima rurayninchicunapitapis Jehovata puntaman churanapaj calpachacunanchi. Jehovami camamashcanchi, chaymi payta aduranapaj caycan (Apoc. 4:11; 14:6, 7). Chauraga pay munashganno adurananchi ‘santu espíritu munangannuy y Diospita rasuncag cangannuy’ canman (leiriy Juan 4:23, 24, Ambo Pasco). Diospa santo espiritun pushamänanchipaj munanchi, chaynopa Palabrancho nishganno aduraycunapaj. Jehovalata aduraycashwan tiyashganchi naciuncho autoridäcuna michäcuptinpis. Canan wichan 100 hermanucunapitapis masraj wichgaraycan Jehovapa testigun captilanmi. c Chayno captinpis lapan puedishganta ruran Diosta mañacunanpaj, Bibliapita yachacunanpaj waquincunata Diospita y Gobiernunpita wilananpaj y chaycuna rurashganpita cushicärin. Ashlimaptinchipis gaticachämaptinchipis cushishgami caycanchi Jehová noganchiwan caycashganta y bendecimänanchipaj cajta musyarir (Sant. 1:12; 1 Ped. 4:14).

14. ¿Imataj pasargan Tayikistán naciunpita juc wauguita, y imanir?

¹⁴ Canan wichan waquin hermanucuna pasashgan yachachimanchi chay quimsa yanapacuycunata practicaman churaptinchi rasunpami cushicushwan, imacunapa pasarpis. 19 watayoj Yovidón Boboyónov wauguipita parlarcushun. Payga Tayikistán naciuncho tiyan. 2019 wata, octubre quilla 4 junajcho wasinpita apacärirgan ejercituman aywayta mana munashganraycur. Suwacoj runatano tratargan y achca quillacunapa wichgarächirgan. Achca naciuncunapa noticieruncunami chay autoridäcuna rurashganman mana ali caycashganta wilacärirgan. Jina soldado cananpaj jurachinanpäraj y soldaduno vesticunanpaj mana munaptinmi magashga cashganta wilacärirgan. Nircur condenargan y cárcel japuy sitiuman mandargan esclavuno  arunanpaj, chaypita chay naciunpa presidentin camacächergan juc ordinta chay wauguita librina cachaycunanpaj. Chay lapancunapa pasar Yovidón wauguiga Jehovata cachaycurganchu y cushishgami caycargan. ¿Imataj yanapargan? Jinala Diospita yachacunanpaj calpachacushganmi.

15. ¿Imanotaj Yovidón wauguiga carcelcho caycaptinpis jinala Bibliapita yachacuycargan?

¹⁵ Carcelcho caycaptin, Bibliata ni publicaciunta mana chararpis, Yovidón wauguiga jinalami Bibliapita yachacuycargan. ¿Imanotaj chayta rurargan? Hermanucunami micuycunata apapashgan bolsacho, cada junajpaj acracämushga textuta escribipäcoj. Chaynopa Yovidón cada junaj Bibliata leir y leishganman yarpachacoj. Carcelpita yargamur sasa pruebacunapa manaraj pasajcunata cayno consejacurgan: “Canan libre caycaptiquëga tiempuyquita shumaj provechaycuy Jehovaman masraj guelicunayquipaj. Chaypäga Bibliatami mana gongaypa leinayqui y publicaciunninchicunatapis”.

16. ¿Imata rurananpätaj Yovidón calpachacurgan?

¹⁶ Wauguinchi Yovidón Jehová nishgantami cäsucurgan. Mana alicunaman yarpachacunanpaj y chaycunata rurananpaj trucan Jehovamanmi y paypaj ima ali cashganmanpis  yarpachacurgan. Tiempunta raquej Jehová rurashgancunata ricananpaj y chayman yarpachacunanpaj. Cada tutami ricchaj pishgucunata cantaycajta wiyar, y pagaspana quillata y goylarcunatapis arcaraj. Pay nergan: “Chay lapan Jehovapa regaluncunaga asircachimaj y cushichimajmi”. Jehová camashgancunata y paypita yachacunapaj gomashganchicunata valuraptinchega cushishgami cawanchi y chayga calpatami gomanchi aguantanapaj.

17. Yovidón pasashganno pasajcunata, ¿imanotaj 1 Pedro 1:6, 7 texto nishganga yanapanman?

¹⁷ Yovidón wauguiga Jehovapa aduraciunninta puntaman churashga. Payga musyarganmi Jehová munashganno cawananpaj más ali cashganta. Jesús nergan: “Tayta Diosllatami aduranqui, payllatami sirbinqui” (Luc. 4:8). Mandajcuna y soldaducunapis munapäcurgan Yovidón Jehovata sirviyta jaguirinanpaj. Payga chacaypa junajpa Jehovata shongupita mañacoj calpata goycunanpaj, aguantananpaj y Payta mana cachaycunanpäpis. Suwacojno fiyupa trataycaptinpis payga Jehovata jaguirirganchu. Yovidón wauguita apacäriptin, magapäcuptin y carcelcho wichgarächiptinpis payga cushishgami caycargan. ¿Imanir? Jehovaman yäracuynin masraj sinchiyaptinmi (leiriy 1 Pedro 1:6, 7).

18. ¿Imacunata rurartaj cushishgala caycäshun?

¹⁸ Jehovaga musyanmi runacuna rasunpa cushishga cawananpaj ima necesitashganta. Cay yachacuycho quimsa yanapacuycunata yachacushganchino practicaman churaptinchega, jinala cushishgami caycäshun. Chauraga noganchipis nishun: “¡TAYTA DIOSMAN yärakuq runakuna kushishqami kawarkaykan!” (Sal. 144:15).