1. ¿Imataj shamoj tiempupaj shuyaränapaj Jehová aunimashganchi?

 JEHOVAGA imaycamapis cawacunapämi aunimashganchi. Waquincunaga espiritunomi mana wanuypa cawapäcunga (1 Cor. 15:50, 53). Chaychica runacunami ichanga cay Pachacho mana nacaypa y mana gueshyaypa imaycamapis cawapäcunga (Apoc. 21:3, 4). Cielucho cawanapaj captin o cay Pachacho cawanapaj captinpis, lapanchimi chaytaga shongupita agradecicuyculanchi.

2. ¿Shamoj tiempupaj shuyarashganchega rasunpachuraj cumplicanga, imanir?

² Shamoj tiempupaj shuyaränapaj Biblia niptenga, parlaycan convencido caycänapaj cumplicunanpaj cashganta. Chay aunicuycuna Jehovapita shamuptinmi seguro caycanchi cumplicunanpaj cajta (Rom. 15:13). Imacuna promitishganta y cumplishgantapis musyanchimi (Núm. 23:19). Chaynomi, Jehovaga shamoj tiempupaj aunicushgantaga rurayta munanmi, ni ima ni pipis michäcuyta puedinchu. Shuyarashganchega manami yarpayninchilachochu caycan sinoga imaycacunami caycan rasunpa cumplicunanpaj cajta.

3. ¿Imataj cay yachachicuycho ricärishun? (Salmo 27:14).

³ Taytalanchi Jehová cuyamashpanchimi payman yäracunapaj munan (leiriy Salmo 27:14). Shamoj tiempupaj Jehová aunishganman yäracuptinchega imayca pruebacunatami aguantashun, jina valurwan y cushi cushila shuyaräshun. Cay yachachicuychomi ricärishun shamoj tiempupaj shuyarashganchiman yarpararga imanotaj chapämanchi. Naupata ricärishun imanirtaj ninchi shamoj tiempupaj shuyarashganchega juc anclano y juc cascuno cashganta. Nircur ricärishun imanotaj shamoj tiempupaj shuyarashganchiman masraj yäracushwan.

4. ¿Imanirtaj shamoj tiempupaj shuyaraycashganchega juc anclano caycan? (Hebreos 6:19).

⁴ Hebreos cristianucunata apóstol Pablo cartacamushganchomi shamoj tiempupaj shuyaraycashganchita juc anclawan tincuchergan (leiriy Hebreos 6:19). Cada cadalami lamarpa viajargan y ricargan juc barco caypa wacpa mana aywacunanpaj anclancuna yanapashganta. Juc cutichomi viajaycaptin locu wayra galacuycurgan, y ricarganmi barcuta manejajcuna anclacunata jitargärishganta, barco rumicunawan mana tacacänanpaj (Hech. 27:29, 39-41). Imanomi juc ancla barco mana talpucänanpaj yanapan, chaynolami shamoj tiempupaj shuyaraycashganchi yanapämanchi Jehovapita mana raquicänapaj problemacunapa pasarpis. Shamoj tiempupaj Jehová promitishgancunata cumplinanpaj yarparaycarga, yanapämanchi locu wayra japuy problemacunata aguantanapaj. Yarpäshun Jesús nishganpita gaticachashga canapaj (Juan 15:20). Chauraga shamoj tiempucho Jehovapa bendiciunnincunata chasquinapaj cajman yarparaycarga yanapämäshun voluntäninta rurar caycänapaj.

5. Wanunanpaj captin, ¿imanotaj Jesusta yanapargan shamoj tiempupaj shuyaraycashganga?

⁵ Jesusga fiyupa wanunanpaj cashganta musyaycarpis shuyaraycashganmi yanapargan Taytan Jehovata fiel cananpaj. 33 wata Pentecostés junajcho, apóstol Pedruga juc Salmupita Jesuspaj parlaycashganpita wilacurgan, imanomi Jesusga nacaycunapa pasarpis jaucala y yäracuycarla caycänapaj cashganta. Chay Salmuga cayno nin: “Tayta gam yanapämaptiqui allimi goyäshaj. Wañojcuna pamparashanchöga ama cachaycamanquichu. ¡Acrashayquipa cuerpun ismunantaga manami dëjanquipächu! [...] Gampa ñaupayquichöga amatar cushicuyllami caycan” (Hech. 2:25-28; Sal. 16:8-11). Wanunanpaj cashganta musyaycarpis, Jesusga convencidumi caycargan Tayta Jehová cawarachimunanpaj y ladunman cutinanpaj cajta (Heb. 12:2, 3).

6. ¿Imataj wauguinchi Leonard nergan shamoj tiempupaj shuyaraycashganchi cajpita?

⁶ Shamoj tiempupaj shuyarashganchega chaychica cristianucunatami yanapashga pruebacunapa pasar aguantananpaj. Leonard Chinn wauguinchi ima pasashganta ricärishun, payshi Inglaterra naciuncho cawaj. Punta caj Jatun guerra wichancho wauguinchi ejercituman entrenayta mana munaptinmi, carcelcho wichgarächergan. Piwanpis mana parlananpaj wichgarächergan y esclavuno arunanpaj obligargan. Payga cayno nergan: “Chaycunapa pasashgäcunata aguantanäpaj yanapämargan shamoj tiempupaj shuyaraycashgäman shumaj yarparaycänäpaj. Jesús yachachicushgan, apostulcuna y profetacuna imano cawacärishgancuna, jina Bibliapa yachachicuynincunapis yanapämanchi shamoj tiempupaj bendiciuncunata shuyaraycänapaj y calpatapis gomanchi aguantanapaj”. Leonardpäga shamoj tiempupaj shuyaraycashganga juc anclanomi cargan, noganchipäpis chaynomi canman.

7. ¿Imanotaj pruebacunapa pasar sinchiyächinchi shamoj tiempupaj shuyaraycashganchita? (Romanos 5:3-5; Santiago 1:12).

⁷ Shamoj tiempupaj bendiciuncunata shuyaraycäshunla, pruebacunata aguantaptinchi y Jehová yanapämashganchita ricar (leiriy Romanos 5:3-5; Santiago 1:12). Chauraga cananmi shuyaraycashganchipita más convencido caycanchi Bibliapita yachacur galaycushganchipitaga. Satanasga problemacunawan yamacänapämi munan, ichanga Jehovapa yanapacuyninwanga problemacunata aguantashunmi.

8. Shamoj tiempupaj shuyarashganchega, ¿imanirtaj juc cascuno caycan? (1 Tesalonicenses 5:8).

⁸ Jina Bibliaga nin shamoj tiempupaj shuyaraycashganchega juc cascuno cashganta (leiriy  1 Tesalonicenses 5:8). Juc soldaduga cascuta apan enemigun umanta mana tacaycunanpaj. Chaynolami Satanaspa luta yachachicuyninpita yarpayninchita chapänapaj yanapämanchi. Satanaspa imayca tentaciuncunaman ishquinapaj y mana ali yachachicuyninta wiyanapämi munan. Soldadupa umanta cascunmi chaparcun, chaynolami shamoj tiempupaj shuyaraycashganchega ali yarpayninchita chaparcun Jehovata sirviycarla caycänapaj.

9. ¿Imataj pasan Jehovapa aunicuynincunaman runacuna mana yäracäriptin?

⁹ Imaycamapis cawanapaj shuyaraycashganchega yanapämäshun alicunata acranapaj. Munashganchilaman yarparäcurga shuyaraycashganchita gongaycushwanmi. Yarparcushun Corinto marcacho caycaj waquin cristianucunata ima pasashganta. Yäracärirgannachu Jehová shamoj tiempupaj aunicushganman, chayga cargan wanushgacuna cawarimunanpaj cajta (1 Cor. 15:12). Chayman mana yäracojcunapita parlarmi Pabluga nergan cay caway vidalapaj cawacärishganta (1 Cor. 15:32). Canan wichanpis Jehovapa aunicuynincuna mana yäracoj runacunaga achcajmi caycan, paycunaga cay caway vidalapaj y munashgalanta rurarlami cawacärin. Noganchi ichanga Jehovapa aunicuynincunaman yäracunchi. Shamoj tiempupaj shuyaraycashganchega yarpayninchita chapämanchi juc casco japuyno, jina yanapämanchi quiquinchilaman mana yarparänapaj, chaynopa Jehovawan amistäninchitapis cuidanapaj (1 Cor. 15:33, 34).

10. ¿Imanotaj shamoj tiempupaj shuyaraycashganchega yanapämanchi lula cajcunata mana creinapaj?

¹⁰ Casco japuy shamoj tiempupaj shuyaraycashganchega jinapis yanapämanchi Jehovata sirvir calpachacuycashganchi ‘imapäpis mana välishganta’ mana yarparänapaj. Tantiarinapaj, capaz pipis yarpanman: “Nogaga manami ali runachu cä, y shamoj tiempucho imaycamapis cawacunäpaj manami merecëchu. Jina Jehová munashganno cawacunäpäga manami camäpacöchu”. Jobpa juc amigun Elifaz chaynolami nergan: “Runaqa manami pipis jutsaynaq kantsu”. Nircur caytapis nergan: “Tayta Diosqa angilninkunamanpis manami yärakuntsu. Paypaqqa jana patsapis manami pürutsu kaykan” (Job 15:14, 15). ¡Chaymanga ama creiychu! Satanasmi chayno yarpänapaj munan. Payga musyanmi chaylaman yarparäcurga shamoj tiempupaj shuyaraycashganchiman mana yäracushunnachu. Chauraga Satanaspa lulacuyninmanga ni ichiclapis ama creishunchu, chaypa trucanga Jehovapa aunicuynincunaman masraj yäracushun. Aumi, Jehovaga shamoj tiempucho imaycamapis cawacunapaj munanmi y chayta logranapäga yanapämäshunmi (1 Tim. 2:3, 4).

11. ¿Imanirtaj Jehová shamoj tiempupaj aunicushganta cumplinanpaj mana ajayaylapa shuyarashwan?

¹¹ Öraga shamoj tiempupaj Diospa aunicuynincunaman yäracuycarla caycänapaj manami facilchu. Shamoj tiempupaj cumplicushganta mana ricar ajayacushwanchi. Imaycamapis cawaj Tayta Jehovaga manami noganchinochu tiemputa rican (2 Ped. 3:8, 9). Lapan aunicushgancunataga Pay camacächishgan tiempuchomi cumplinga, pero manami shuyarashganchi horachochu ruranga. ¿Imataj yanapämäshun shamoj tiempupaj shuyaraycashganchiman ali yäracuycänapaj, y mana ajayaylapa Dios aunicushgan cumplinanpaj shuyaraycänapaj? (Sant. 5:7, 8).

12. Hebreos 11:1, 6 nishganno, ¿imaraj yanapämäshun shuyarashganchiman masraj yäracunapaj?

¹² Jehovami aunimanchi shamoj tiempupaj lapanta cumplinanpaj, chaymi chayman yäracuycänapäga paywan más amigo cananchi. Chaymi Biblia nin shuyarashganchiman yäracunapäga Jehová cashgantami creinanchi y “payta ashiqkunata” yanapashganmanpis (leiriy Hebreos 11:1, 6). Jehová rasunpa cashganta convencido caycarga pay aunishgan promesancuna cumplinanpaj  cajmanpis yäracushun. Ricärishun imataj rurashwan Jehovawan amistäninchita masraj sinchiyächinapaj y shamoj tiempupaj shuyarashganchimanpis masraj yäracunapaj.

13. ¿Imatataj rurashwan Diospa amigun canapaj?

¹³ Jehovata mañacushun y Palabranta leishun. Jehovata mana ricarpis paywan amigo cashwanmi. Mañacuptinchi Jehovawan parlaycanchi y pay wiyamänanchipäpis yäracunchi (Jer. 29:11, 12). Payta wiyanchi Palabranta leirmi y leishganchiman yarpachacuptinchi. Jehová imano chapashganta unay fiel sirvejnincunapita musyarir, shamoj tiempupaj shuyarashganchiman masraj yäracushun. Diospa Palabrancho escribiraycajcunaga “tantiyatsimänantsipaqmi kaykan. Palabranta yachakurmi payman yärakur musyantsi promitishqankunata cumplinanpaq kashqanta” (Rom. 15:4).

14. ¿Imanirtaj yarpachacushwan Jehová waquincunapaj rurashgancunaman?

¹⁴ Jehová promitishgancuna unay cumplishgancunaman yarpachacushun. Abrahanwan Sarapaj rurashganman yarpachacushun. Paycunaga auquinna captinmi wamrayoj cananpäga manami puedirgannachu, ichanga Diosmi aunipargan wamran yurinanpaj (Gén. 18:10). ¿Abrahanga yäracurganchuraj? Bibliami nimanchi: “Abrahamga tantiyayta mana atiparpis Tayta Diosninchi aunishanman yäracuran” (Rom. 4:18). ‘Quevä wamrayoj cananpäga manami camacannachu’ nirchi juc runaga yarpaycunman, Abrahanmi ichanga Jehová aunishgan cumplinanpaj seguro caycargan. Chaynomi cashga, yäracoj y Diosta cuyaj runa captinmi pay warminwan wamrayoj ticrargan (Rom. 4:19-21). Chayno wilacuycunami claro ricachimanchi Jehová aunishgancunataga imaypis cumplishganta runacunapaj mana puedicajno captinpis.

15. ¿Imanirtaj Jehová noganchipaj mayna rurashgancunaman yarpachacushwan?

¹⁵ Jehová quiquinchipäpis rurashganman yarpachacushun. ¿Yarpachacushganchinacu  noganchipaj Diospa Palabrancho caycaj waquin aunicuycuna mayna cumplicushganta? Tantiarinapaj, Jesusmi aunicurgan Taytan Jehová ima necesitashganchita gomänanchipaj (Mat. 6:32, 33). Jinapis nergan mañacuptinchega Taytan santo espiritunta gomänanchipaj (Luc. 11:13). Chay aunicuycunata Jehová cumplirgannami. Chaymanpis yarpaycanchinachi noganchipaj ima masta cumplicushganta. Chayga caycan perdunamashganchita, shogamashganchita y Jehovaman guelicunapaj imayca ali yachachicuycunata gomashganchitapis (Mat. 6:14; 24:45; 2 Cor. 1:3). Noganchipaj imacuna rurashgancunaman yarpachacuptinchega shamoj tiempucho imata rurananpaj cajman masraj yäracushun.

16. ¿Imanirtaj shamoj tiempupaj shuyaraycashganchega alapa valej regaluno caycan?

¹⁶ Imaycamapis cawacunapaj shuyaraycashganchega Diospa regalunmi. Imanomi munayculanchi chay aunicuy cumplicunanpaj. Chayno cananpäga ni ichiclapis dudanchichu. Shamoj tiempupaj shuyaraycashganchega juc anclano yanapämanchi pruebacunata y gaticachashga captinchipis aguantanapaj, y wanunapaj captenga mana manchacunapaj. Jina juc cascunopis caycanmi, yarpayninchita chapaycun mana ali yachachicuycunapita y ali cajcunalata yarparaycänapaj. Bibliacho caycaj shamoj tiempupaj aunicuycunaga Jehovaman masraj guelicunapaj yanapämanchi, jina pay cuyamashganchitapis ricächimanchi. Shamoj tiempupaj shuyaraycashganchiman yarparaycaptinchega alapami yanapämanchi.

17. ¿Imanirtaj shamoj tiempupaj shuyaraycashganchega cushichimanchi?

¹⁷ Roma marcacho caycaj cristianucunata apóstol Pablo cartacamushgancho nergan: “Tayta Diosta shuyäkur kushi kushila kawakäriy” (Rom. 12:12). Pabluga musyarganmi Jehovata cuyar lapancho cäsucuptenga mana wanuypa cielucho cawacunanpaj shuyaraycashganpita, chaypitaga alapami cushicoj. Noganchipis shamoj tiempupaj shuyaraycashganchipitaga cushicushwanmi y chayta Jehová cumplinanpaj segurumi caycanchi. Juc Salmuta escribej nishganno: “TAYTA DIOSLLAMAN yäracoj runaga cushishami cawanga. [...] Payga aunishancunata cumlinmi” (Sal. 146:5, 6).