1, 2. ¿Imataj ruraptinchiraj Bibliapita shumaj yachacurcushwan? Tantiachicamuy.

 JUC wasita rantiyta munarga, ¿imataraj ruranquiman? ¿Chay wasipa fotunta ricarlachuraj jucla rantinquiman? ¿O quiquiquichuraj shumaj ricayta munanquiman? Aumi, quiquiqui aywaycur-rämi musyapacunqui chay wasi wajtapa ruripa imano caycashganta. Jina capaz tapucunquimanpis chay wasi imano sharcachishga cashganta, chaynopa shumaj musyaycur-raj chay wasita rantinqui o manapis.

² Chaynolami rurashwan Bibliata leishganchi horapis. Bibliapa yachachicuynincunapita parlar, juc estudioso runa nergan “chicancaray o jatuncaray y ali cimientuyoj wasino cashganta”. Chauraga Biblia wilacushganta shumaj yachacunapäga janalan janalanpaga ama leicachärishwanchu. Chayta rurarga Bibliapa más alinnin caj yachachicuycunata manami shumaj musyashunchu (Heb. 5:12). Imanomi juc wasita shumaj ricapanchiraj rantinapaj, chaynolami Bibliapita yachacurpis, yachachicuynincuna jucnin jucninwan tincuchishwan. Imaman yäracunanchipäga manami jinaylapitachu canman, sinoga shumaj tantiarcunanchiraj imanir chayman yäracunanchi.

3. ¿Imata rurananpaj cristiano masincunata Pablo consejargan, y imanir? (Efesios 3:14-19).

³ Diospa Palabran ima ayca wilacushganta shumaj yachacurcunapäga,  pacaraycajno yachachicuycunata ashinanchi. Apóstol Pabluga cristianucunata consejargan empeñuwan Diospa Palabranpita yachacurga “tantiyacunquipaj [...] may anchumi, may carumi, may rurimi, may altumi” cashganta. Chayta rurar yäracuyninga “shumaq sapitsashqa yörano y ali cimientushqa wayino” canman cargan (leiriy Efesios 3:14-19). Noganchipis canan ricärishun imacunata rurartaj Bibliapita shumaj yachacurcushwan, chaynopa alinnin caj yachachicuycunata tarinapaj.

4. ¿Imatataj rurashwan Jehovaman masraj guelicunapaj? Juc ishcay ejemplucunatapis churamuy.

⁴ Cristianucunaga galanancho yachacushganchilawanga conformacunchichu. Manchäga Diospa Palabrancho pacaraycajno yachachicuycunata ashinanchi shumaj tantiarcunapaj (1 Cor. 2:9, 10). Chaymi ali canman maygan temalapitapis yachacurcunayquipaj, chayta rurarga Diosman masraj guelicunqui. Shumaj yachacuy unay sirvejnincunata Jehová cuyashpan imano cuidashganta, chayta rurarga gampis seguro caycanqui Jehová cuidashunayquipaj cajpita. Jina yachacunquimanpis unaycho israelitacuna Jehovata imano adurashganpita y canan wichan imano payta aduranchi. Jinamanpis yachacunquimanmi Jesús cay Pachacho caycar ima profeciacuna cumplicushganta.

5. ¿Imapita mastaraj yachacuyta munanquiman?

⁵ Bibliapita shumaj yachacuyta munarga, ¿maygan yachachicuycunata ashinquiman? “ Imacunapita Bibliacho yachacunapaj” nej recuadrucho waquilan temacuna yurimun, chaypitaga waquin hermanunchicunapis shumajmi yachacurcushga. Chay temacunapita yachacurcunayquipaj caycan Índice de las publicaciones Watch Tower y la Guía de estudio para los testigos de Jehová nishgan. Chayta rurarga ali yäracoj runaman ticranqui y “TAYTA DIOSTA reqir  payta mantsakunaykipaq tantiyakunki” (Prov. 2:4, 5). Cananga ricärishun Bibliapa waquilan shumaj yachachicuynincunata.

6. 1) ¿Ima nishwantaj Jehovapa munayninpita? 2) ¿Imanirtaj ninchi Jehovapa munayninga manami ratulapächu cashganta? (Efesios 3:11).

⁶ Yarpachacushun ima nintaj Biblia Diospa munayninpita. Cayman yarpäshun: gamshi maylamanpis aywayta munanqui, ichanga ima chapapis captenga guelanäcunqui aywanayquipaj. Pero chay sitiuman imanopapis chayayta munarga ima chapacuna captinpis jinala imaycataraj ruranqui chay sitiuman chayanayquipaj. Chaynolami Jehovapa munayninpis ruracänanpäga imapis michäcunchu, y payga chaypita Palabrancho mayna wilamashcanchina (Efes. 3:11). Aumi, imapis munashganno y “yarpashqanno kananpaqmi lapantapis TAYTA DIOS kamashqa” (Prov. 16:4). Pay rurashganga manami ratulapächu caycan. ¿Imataj caycan paypa munayninga? Y, ¿imataj rurashga cumplinanpaj?

7. Adanwan Eva mana cäsucuptin, ¿imatataj Jehová rurargan munayninta cumplinanpaj? (Mateo 25:34).

⁷ Adantawan Evata camaycur Jehovaga nergan: “Kay patsa juntananyaq mirapäkuy. Munaynikicho katsun pescädukuna, päriqkuna y kay patsacho lapan kawaqkunapis”, chaynopa musyachicurgan paycunapaj ima munashganta (Gén. 1:28). Adanwan Eva mana cäsucuptin Jehovaga manami nerganchu ‘cananga munashgätaga mana rurashänachu’ nir. Chaypa trucan payga cielucho jucla juc Gobiernuta camacächirgan munashganta cumplinanpaj (leiriy Mateo 25:34). Y tiempo pasariptin Jehovaga runacunata cuyashpan Wamranta cachamurgan. Jesusga Diospa Gobiernunpita yachachicurgan, y juchapita wanuypitapis salvamänanchipaj wanurgan. Nircur cawarimuptin cielucho Diosga Gobiernuncho Rey cananpaj churargan. Pero masrämi caycan yachacunanchipaj Diospa munayninpita.

8. 1) ¿Imapitataj Biblia wilacun? 2) Efesios 1:8-11 nishganno, ¿imataj Jehová logranga munaynin cumplicuptin? (Garancho caycaj dibujuta ricäriy).

⁸ Diospa munaynin cay Pachacho cumplicaptenga, jutin respetashga canga, y chaymi caycan Bibliapa más alinnin caj yachachicuy. Jehová munashganta cumplinanpäga imapis michäcungachu, pay nishganga imaypis ruracan (Is. 46:10, 11, notas; Heb. 6:17, 18). Cay Pacha cuyaylapaj paraisuman ticraptin Adanpa cäsucoj caj miraynincuna juchaynajna caycar, chaycho imaycamapis tiyapäcunga (Sal. 22:26). Y mana chaylachu, Jehovaga munaycun Pachachopis cieluchopis caycaj wamrancuna juc shongunola caycar lapancuna paylata adurapäcunanpaj (leiriy Efesios 1:8-11). ¡Alapami cushicunchi Jehová munashganta imano cumplicunanpaj cajta yachacur!

9. ¿Imatataj Biblia wilamanchi shamoj tiempupaj?

⁹ Yarpachacushun Génesis 3:15 textucho Jehová wilacushgan profeciaman. b Chaycho wilacamun imanotaj Diospa munaynin ruracänanpaj, ichanga cayga tiempuwanrämi cumplicunan cargan. Chay cumplicunanpäga Jehová Abrahanta nergan miraynincunapita Cristo yurinanpaj  (Gén. 22:15-18). 33 caj watacho Jesús wanuptin talunnincho canishga japuyno cargan (Hech. 3:13-15). Ichanga Waranga Watacunapitapis masraj pishiycanraj Satanás chipyaypa ushacächishga cananpaj (Apoc. 20:7-10). Pero chay tiempo chayamunancama Bibliaga mayna wilaycämanchi imacunataj pasananpaj cajta.

10. 1) ¿Imacunataj pasanga ichiclacho? 2) ¿Imacunataj rurashwan chay junajcunata camaricushgala shuyarpänapaj? (Ichic wilacuytapis ricay).

¹⁰ Yarpäshun imacunataj pasananpaj cajman. Bibliaga nin runacuna nipäcunga “alli goyayllami caycan” nir (1 Tes. 5:2, 3, TDI). Chayno nircaycaptinmi, ilajpita Diosta mana cäsucoj runacunaga luta religiuncunata ushacächinga, chaynopa jatun nacay galaycunga (Apoc. 17:16). Nircur “Runapa Tsurin shamunanpaq señal jana patsacho rikakämunqa”, chaycunaga almiracuypächi canga (Mat. 24:30). Jesús runacunata juzgar galaycuptin cabra nirajcunapita uysha nirajcunata raquinga (Mat. 25:31-33, 46). Satanasna pasaypa rabiashpan Diosta mana cäsucoj runacunaman mana ali yarpayta churanga Diospa sirvejnincunata ushacächinanpaj (Ezeq. 38:2, 10, 11). Chay wichancho cielupaj acrashga cajcuna lapancuna shuntacashga canga Jesuswan peliamunanpaj Armagedón guerracho, chaynopa ushacanga jatun nacay (Mat. 24:31; Apoc. 16:14, 16). c Chaypitana Jesusga Waranga Watacunapa gobernayta galaycamunga (Apoc. 20:6).

11. ¿Imaycamapis cawarga imataj rurayta munanquiman? (Dibujucunatapis ricay).

¹¹ Cananga yarpachacushun mana ushacaj cawayman. Bibliaga nin: “Tayta Dios kamakätsishqa mana ushakaq kaway kashqanta tantiyanantsipaq” (Ecl. 3:11). ¿Manachu chayga yanapämäshun Jehovata masraj reguinapaj? Acerquémonos a Jehová librucho, 319 caj paginacho cayno wilacun: “Chaychicaj watacuna o warangaypa watacuna cawarpis jinala caycangarämi Jehovapita  masraj yachacunapaj. Aumi, imaycacunarämi caycanga paypita yachacunapaj. […] Paraisucho imaycacunapita yachacunapaj captinpis, masga cada cadalami quiquin Jehovapita masraj yachacuycäshun”. Pero cananga, ¿imacunapitataj masraj Diospa Palabranpita yachacuycashwan?

12. ¿Imata rurartaj cieluta nuquircur ricashganchino canman? Tantiarcachimuy.

¹² Diospa Palabranga shumaj musyachimanchi jana pachacho Jehová alapa munayniyoj cashganta (Is. 33:5). Bibliata yachacurmi cuentata gocunchi Jehová pasaypa almiraypaj cashganta y jana pachacho angelnincunapis imano churanacushga cashganta (Is. 6:1-4; Dan. 7:9, 10; Apoc. 4:1-6). Chaymi ali canman Biblianchita leishganchi hora shumaj tantiarcunapaj Ezequiel juc visiuncho imacunata ricashganta “jana patsa kichakaptin” (Ezeq. 1:1).

13. ¿Imanotaj sienticunqui Jesús cielucho ima ruraycashganman yarpar? (Hebreos 4:14-16).

¹³ Jesús cielucho Rey y cuyapäcoj Mandaj Sacerdotino ima ruraycashganmanpis yarpäshun. Jesucristupa jutincho Jehovata “manakurqa trönuncho paywan parlaykaqnömi kaykantsi”, y “ima nakaycho kaptintsipis paymi kuyapämashpantsi yanapamäshun” (leiriy Hebreos 4:14-16). Chaymi Jehová y Jesús imano yanapaycämashganchiman ni juc junajlapis yarpayta jaguishunchu. Chayno cuyamashganchipita alapa agradecido caycarga, lapan shongupita paylata sirvishun (2 Cor. 5:14, 15).

14. Jehovawan Jesús agradecido caycarga, ¿imataj rurashwan? (Fotucunatapis ricay).

¹⁴ Jehovawan Jesús cuyamashganchipita agradecido caycarga, ¿imataraj rurashwan? Calpachacushwanmi waquincunata  yanapänapaj Jehovata sirvinanpaj y Jesuspa gatejnin cananpäpis (Mat. 28:19, 20). Apóstol Pablupis agradecido caycar chaytami rurargan. Payga musyargan Jehová munashganta “lapan runakuna ali wilakuyninta chaskikur salvashqa kanantami” (1 Tim. 2:3, 4). Chaymi imaycanopapis calpachacurgan runacunata yachachinanpaj, chaynopa “wakilanpis salvakunanpaqmi” (1 Cor. 9:22, 23).

15. Salmo 1:2 nishganno, ¿imata ruraptinchiraj cushish ricacushun?

¹⁵ Juc Salmista nergan, cushishga cawacoj runaga Diospa leynincunata cushishgami leyin, “tsakaypapis junaqpapis tsay leykunalatami yarparaykan” (Sal. 1:1-3). Chaypita parlarmi Bibliapita yachaj juc runa nergan: “Pipis Bibliata leirga cushicunmanmi Diospa consejuncunapita y chaypita yachacushganmanpis yarpachacunman, ichanga leishgancunata shumaj mana tantiaycurga fiyupa laquicunman” (Studies in the Psalms, Joseph Rotherham). Gampis cushicunquimi Biblia ima aycata wilacushganta tantiarcurga y yachachicuynincuna imano tincushganta musyar. Aumi, ¡amatar cushicuypämi Bibliacho pacaraycajno yachachicuycunata tariptinchega!

16. ¿Imapitataj yachacushun gatejnin caj yachacuycho?

¹⁶ Bibliacho pacaraycajno yachachicuycunata tarinapäga manami sasachu, lapanchimi yachacuyta puedinchi. Gatejnin caj yachacuychoga juc shumaj yachachicuytana tantiarcushun, Hebreo cristianucunata apóstol Pablo parlapargan Jehovapa templun nirajninpita, chaypita maslata yachacurga noganchipis cushicushunmi.