Liejcuna tapucärishgan
¿Israelitacuna chunyaj jircacho puripäcushgancho, manä y codorniscunalatachuraj micupäcurgan?
40 watapa israelitacuna chunyaj jircacunapa puripäcushgancho waran waran manäta micupäcurgan (Éx. 16:35). Jinamanpis ishcay cuticho Jehová codorniscunata gorgan micupäcunanpaj (Éx. 16:12, 13; Núm. 11:31). Chayno captinpis öraga israelitacunapaj juc micuycunapis carganmi.
Öraga pachäcunanpaj sitiucunaman Jehová pushargan, chaychomi yacutapis micuycunatapis taripäcoj (Núm. 10:33). Jucnin cargan Elim sitio, chaycho cargan “12 puquiucuna y 70 palmeracuna”, chay palmeracunapa achca wayuyninchi cargan (Éx. 15:27). Juc libro wilacun chaycho maychicaj palmeracuna cashganpita; “chaymi achca runacuna wayuyninta micupäcun, aceititapis jorgumun y lantucunpis”.
Israelitacunaga capazchi Farán a guechwa pampacho pachäcorgan. Juc librupis cayno wilacun, “chay sitiupa largunnin midin 130 kilómetros, jina Sinaí desiertupita más cuyaylapaj jatun y reguish puquiumi caycan”. Chay libro caynopis nin; “chay guechwa pampapa cuchunman manaraj chayarshi cuyaylapaj puquiu caycan, chaychomi achca palmeracuna can. Cay puquiupa largunnin 4,8 kilómetros midin, chay puquiuman chayanapäga 610 metrusrämi lamarpita wichanan. Edén huertano cuyaylapaj caycan, unaypitanashi achca runacuna aywapäcun chay palmerapa wayuyninta micupäcunanpaj”.
Farán nishgan unay puquiu cashgancho palmeracuna wayuycan
Egiptupita israelitacuna yargupäcuptin tantapaj masata y maticunatapis apacärergan, capazchi trigutapis y aceititapis. Chayno captinpis chaycunaga ichic tiempulapächi cargan, jinapis “qatipäkurqan uyshakunata, cabrakunata y tsaytsika wäkakunatapis” (Éx. 12:34-39). Chay desiertucho sasa caway cashganraycurchi chaychica uywacuna wanupäcurgan, pero waquin uywacunapa aychantaga micupäcurganchi, y waquin uywacunatana Jehovapaj y lutan dioscunapäpis sacrificiuta rupachipäcojchi (Hech. 7:39-43). b Imano captinpis israelitacunaga uyshata y wäcacunatapis uywapäcojmi, chaytaga musyanchi mana cäsucoj israelitacunata Jehová cayno niptin: “Wamraykikuna chusku chunka (40) wata uywankunawan chunyaq jirkapa puripäkunqa” (Núm. 14:33). Chaychi lechipis y aychapis cargan, ichanga 3 millones runacunapänoga manachi ayparganchu. c
¿Maypitataj yacuta y micuyta jorgupäcurgan uywacunapaj? d Chay wichancho capaz tamyaraycur guewacuna winaj chunyaj jircacho. Perspicacia para comprender las Escrituras librucho “Arabia” nishgan cajcho wilacun 3.500 watacuna pasajcho “Arabia marcacho cananpita más yacu cashganta”. Caynopis nin: “Arabiacho chaquish guechwa pampacuna y ragracunapis cashganga, ricächimanchi unaycho tamyashganraycur achca yacu chaycunacho juntacashganta. Chayno captinpis chunyaj jircacunacho imapis carganchu (Deut. 8:14-16). Jehová yacuta mana garaptenga quiquincuna y uywancunapis wanunmanchi cargan (Éx. 15:22-25; 17:1-6; Núm. 20:2, 11).
Jehovaga manä micuywan israelitacunata cawachergan, chaymi Moisesga paycunata cayno nergan: “Manami tantata mikulartsu runa kawan, sinöqa TAYTA DIOS lapan nishqankunata cäsukurmi kawan” (Deut. 8:3).
a Ricäriy La Atalaya del 1 de mayo de 1992, páginas 24 y 25.
b Bibliaga wilacun ishcay cuticho israelitacunaga Jehovapaj uywacunata rupachishganta chunyaj jircacho caycar. Punta caj cargan sacerdoticunata acrapäcuptin y ishcay caj cargan pascuata rurapäcuptin. Chay ishcancunaga 1512 watacho Jesús manaraj shamuptin cargan, israelitacuna Egiptupita chaylaraj yargamushganpita (Lev. 8:14–9:24; Núm. 9:1-5).
c 40 watacuna ushananpäna caycaptin israelitacuna guerrapita apacärergan chaychicaj uywacunata (Núm. 31:32-34). Chayno captinpis Jehová Aunishgan Pachaman yaycunancama israelitacunaga manätami más micupäcurgan (Jos. 5:10-12).
d Jehovaga israelitacunata nergan quiquincunalapaj manäta shuntapäcunanpaj, uywancunaga chayta micurganchu (Éx. 16:15, 16).
