Staten Island (Nueva York) marcacho, Betelpita hermanucuna juc watapitapis más arupäcurgan WBBR radio chaycho funciunananpaj. Sharcachipäcurgan juc jatun wasita hermanucuna tiyapäcunanpaj y juc ichic wasita radio funciunananpaj. Chay lapanta ruraycur cananga listuna caycargan radio “funciunaytana” galaycunanpaj, ichanga problemacuna yurimunanpaj caycargan.

Naupataga principal caj antenataraj churapäcunan cargan. Chay antenapa largunnin 91 metrucuna cargan y chaytaga churapäcunan cargan 61 metroscunayoj ishcay posticunacho. Puntalachoga hermanucuna manami chayta rurayta puedipäcurganchu. Nircurna sï Jehovapa yanapacuyninwan lograpäcurgan. Chaycho aroj Calvin Prosser hermano cayta nergan: “Puntalacho chayta lograrga ‘noganchi sï yachaj canchi’ nirchi caycashwan. Pero hermanucunaga quiquin Jehovatami agradecicärergan yanapacuyninpita”. Ichanga problemacuna caycarganraj.

Radiucunaga chayraj yargaycämurgan, chayraycu equipucunapis shumäga carganrächu. Chay sitiucho hermanucunaga radiupa juc transmisorta mana mushojtachu tarergan. Mushoj microfunuta rantinanpaj trucan, chay wichancho yargamoj telefunupa microfunulanta utilizargan. Juc chacay febrero quillacho hermanucuna cantar galaycärergan, chay equipo funciunashganta o mana funciunashganta musyapäcunanpaj. Ernest Lowe hermano asicur yarpan hermanucuna cantaycashgan hora hermano Rutherford telefunupa gayacamushganpita. Payga Brooklynpitashi  chay radiuta wiyaycargan, chaypita Brooklynyäga carurämi caycargan. b

“¡Allau rinrilä, imataj chay bulla wiyacan!” nerganshi hermano Rutherford. Chayta wiyar hermanucunaga rasla chay transmisorta upirachergan. Pengacurpis paycunaga cushishga carcaycargan.

24 febrero, 1924 watacho, chay radio funciunayta galaycuptin hermano Rutherford juc discursucho nergan: “Cay radiuwanga Jesús mandashganno runacunatami yachachishun” nir. Chaywanga niycargan pï may runatapis, ima religiunniyoj runatapis Bibliawan shumaj tantiachinanpaj ima tiempucho cawaycashganchipita.

Chayga shumajmi cargan. 33 watapa WBBR emisorawan Jehovapa testiguncuna Bibliapita runacunata yachachergan.

1924 julio quillacho Columbus (Ohio) marcacho, jatun asambleacho Bibliata Estudiaycajcuna juntacärergan. Chay asambleaman entero mundupita shapäcamoj hermanucuna achca rimaycunacho discursucunata wiyapäcurgan: alemán, árabe, francés, griego, húngaro, Europapita norte caj ladupa rimaycunata, inglés, italiano, lituano, polaco, ruso y ucranianuchopis. Chay asambleapita waquin programacunaga radiupa pasargan. Jina Ohio State Journal periodicucho chay asambleapita informicunata jorgunanpäpis nergan.

Julio quilla, jueves 24 junajcho 5.000-pitapis más hermanucuna chay marcacho predicapäcurgan. 30.000 librucunata aypupäcurgan y achca runacuna Bibliata estudiayta galaycärergan. The Watch Tower revista nergan: “Chay junaj asambleacho runacunata predicashganchimi imapitapis más cushicuypaj cargan”.

Y viernes 25 junajcho, hermano Rutherford valurcharcur juc documentuwan denunciata rurargan religiuncunapa pushacojninta. Chay documentuwan denunciaycargan religiuncunapa, comercianticunapa y politicucunapa pushacojnincunata. Paycunaga “impidiycargan runacuna Diospa Gobiernunpita yachacärinanta y bendiciunninta chasquipäcunanpaj”, jina “denunciargan cay pushacojcuna Naciones Unidasta  yanapaycashganpita y ‘paycunawanmi Diosga voluntäninta ruraycan’ nir yarpapäcushganpita”. Bibliapita estudiaycajcunaga valientichi capäcunan cargan chay mensajita runacunata wilapäcunanpaj.

Chaypitana The Watch Tower revista nergan Columbus marcacho asamblea ruracashganga hermanunchicunapa yäracuyninta sinchiyächishganta y chayga yanapargan hermanunchicuna valurwan ima chapa captinpis Diospita yachachinanpaj. Leo Claus hermanuga caytami yarpargan: “Cay asambleapita yargurirna cushi cushila caycarganchi cay wilacuypita marcanchicho runacunata yachachinapaj”.

Octubre quillacho, Bibliapita Estudiaycajcuna Ecclesiastics Indicted (Eclesiásticos denunciados) nishgan tratado chaychicaj runacunata apachergan. Chay trataducunapa copiancunacho caycargan pushacoj religiosucunata hermano Rutherford denunciashganpita. Cleveland (Oklahoma) marcacho, hermanunchi Frank Johnson trataducunata apachergan, usharirna 20 minutuscunano yanagajnincunata shuyaraycargan. Pero payga maylachopis quedacuyta puedirganchu, vecinuncuna rabiash ashiycashganraycu. Chaymi juc iglesiacho pacacunanpaj yaycurgan. Chaycho juc predicadurpa Bibliancho y cada asientucunacho trataducunata jaguirgan. Chaypita rasla yargur waquin iglesiacunachopis chaynolami rurargan.

Hermano Frank corriylapa cutimurgan yanagajnincunawan tarinacunanpaj. Grifucho pacacurgan rabiashga vecinuncuna ashirpis mana tarinanpaj. Y chaylachonashi Frank hermanupa yanagajnincuna predicaciunpita cutiycämurgan y paycunawan aywacushga.

“Juc hermano yarpan, chay marcapita yarguycashganchoshi quimsa iglesiacunapa pasarshi ricargan cada iglesiacho 50 runacunano jaguipashgan trataduta leiycashganta y waquincunanashi predicadurninta ricaycächergan chay trataduta. Taytalanchi Jehovatami graciaslä nerganchi, Jehovapa contrancho churacaj runacunapita chapämashganchipita y yanapämashganchipita”.

Bibliapita Estudiaycajcuna valurcharcur juc naciuncunachopis predicapäcun. Francia norte caj ladunpa, Józef Krett hermano Polonia naciunpita runacuna minacho aruycajcunata yachachergan. Chay marcapita lapan runacunata invitapäcurgan “Ichiclachona wanojcuna cawarimunga” nej discursuta wiyapäcunanpaj. Pero juc sacerdote gatejnincunata nergan chay discursuta wiyaj mana aywananpaj. Ichanga 5.000 runacunapitapis más chay discursuta wiyapäcurgan, hasta sacerdotipis. Hermano Krett sacerdotita nergan creencianta defendinanpaj, pero payga munarganchu. Achca publicaciuncunata jaguirirmi hermanuga wilacurgan achca runacuna Diospita yachacuyta munashganpita (Amós 8:11).

Africacho, Claude Brown hermano ali wilacuycunata wilacurgan Costa de Oro (cananga jutin Ghana) naciuncho. Discursuncunawan y achca publicaciuncunata aypushganwan ali wilacuycunaga entero naciunman chayapäcurgan. Farmacia profesiunta estudiaj John Blankson, Brown hermanupa discursunta wiyarcur cuentata gocurgan Diospita rasunpa cajta tarishganta. Pay nergan: “Rasunpa cajta yachacushgäga shacyächimargan y estudiaj masëcunatapis mana manchacuypa wilapargä”.

 Juc cuticho John aywargan iglesia anglicana nishganman sacerdotita trinidadpita tapupänanpaj, payga musyargan trinidadpita yachachicuyga mana rasunpa cashganta. Sacerdotiga pasaypa rabiash gayapar gargurgan: “¡Gamga Satanaspa wamran caycanqui, aywacuy!” nir.

Wasinman cutircurna chay sacerdotita, John juc cartata escribirgan trinidadman creishganta waquin runacunapa naupancho defendinanpaj. Pero chay sacerdotiga nergan estudiaycashgan escuelapa principal caj profesorninpa oficinanman aywananpaj y chay profesorga Johnta tapurgan ‘¿sacerdotitacu escribishcanqui?’ nir.

‘Aumi’, nerganshi pay.

Y profesor nergan: ‘Sacerdotita juc cartawan disculpacuy’ nir. Pero John cayno nir juc cartata escribirgan:

“Señor, profesornëmi nimash cartacho disculpacunäpaj, nogaga chaytami rurashaj, pero lutancunata yachaycächishgayquita reconociptiquirämi”.

Profesorninshi nergan: “¿Chaynocu escribinqui?”.

Y John nergan: “Aumi, chayno escribishaj”.

Profesorna cayno nergan: “Cay gobiernupa iglesianpita sacerdotinpita contranta parlaycarga, caychoga mananachi estudianquinachu”.

Y John nergan: “Gam yachachimaptiqui imatapis mana tantiashgäta tapupaptëga, ¿manachu shumaj tantiachimanquiman?”.

Profesorga nergan: “Aumi”.

“Pero profesor, chaytami rurashcä sacerdotiwan. Tapushgäta mana contestamaptenga, ¿imanirtaj noga paywan disculpacushaj?”, nergan John.

John manami gargushgachu cargan escuelanpita, y sacerdotiwanpis disculpacurganchu.

1924 watacho lapan pasashganpita, The Watch Tower nergan: “Davidno cayno ninchi: ‘Gam callpäta yurichishcanqui’ (Salmo 18:39, TDI). Cay wataga ali watami cashga Señorninchipa yanapacuyninwan. [...] Diospa sirvejnincunaga cushi cushilami ali wilacuycunata runacunata yachachishga”.

1924 wata usharirna, hermanucuna imayca arreglucunata rurargan juc emisorapa más runacunata yachachinanpaj. Chay radiuga caycargan Chicago marcacho y jutinga cargan WORD nishgan, chay jutiga inglés rimaycho parlaycan Diospa PALABRANPITA. Chay mushoj emisoraga alapa potente captin yanapargan norte caj laducho caycaj Canadá naciunmanpis Diospa wilacuynin chayananpaj.

1925 watapäga más cushicuypaj wilacuycunata tantiananpämi caycargan. Bibliapita Estudiaycajcuna Apocalipsis capítulo 12 shumaj tantiananpaj caycargan. Chay tantiachicuyta waquinga cushishga chasquicärinman cargan, pero waquinga mana. Ali chasquejcunaga cushicärinman cargan cielucho ima pasashganta shumaj tantiar y cay Pachacho Diospa sirvejnincunata imano yanapashgantapis musyar.