1. ¿Ima regalucunatataj Jesús goycalämashganchi?

 JESUSNOGA manami pipis imayca alicunata rurashgachu waquincunapaj. Cay Pachacho pay caycar poderninwan milagrucunata rurash y achca runacunatapis yanapacush (Luc. 9:12-17). Y noganchiraycu wanushganga juc jatun regalunomi cashga (Juan 15:13). Wanushganpita yapay cawarimurga jinalami yanapaycämashganchi gatejnincunata, aunicushgannolami Taytan Jehovata mañacushga santu espiritunwan yachachimänänchipaj y consuelamänänchipaj (Juan 14:16, 17; 16:13). Reuniuncunachopis paymi yachachimanchi may chaycho Bibliapita yachachicunapaj (Mat. 28:18-20).

2. ¿Pïcunataj noganchipaj regaluno caycan? (Efesios 4:7, 8).

² Juc regalo maspis caycanmi Jesús gomashganchipita, chaypitami Pablo escribimurgan Jesús cieluman wicharcurshi runacunata regalutano gomashganchi (leiriy Efesios 4:7, 8, TNM). Pablo tantiachicurgan cay runacuna congregaciuncho imayca ruraycunacho yanapacunanpaj (Efes. 1:22, 23; 4:11-13). Canan wichan regalunchicunano caycan siervo ministerialcuna, ancianucuna y congregaciuncunata watucamojcunapis. a Paycunaga lapanchinopis juchayojlami carcaycan (Sant. 3:2). Ichanga Jesús jucnin jucninpis cuyashga hermanulanchicunawan yanapämanchi.

3. ¿Imanotaj yanapashwan regalutano Jesús gomashganchi hermanucunata?

³ Cay runacunata Jesús regalutano gomashganchi congregaciuncho shacya shacyala caycänanchipaj (Efes. 4:12). Lapanchipis  paycunataga yanapashwan carguncunata cumplinanpaj. Imanomi Diospa wasinta sharcachinanpaj waquincunala chaycho arupäcun y waquincunana yanapacun imalawanpis. Chay japuylami lapanchicuna rurayninchiwan o parlayninchiwan yanapashwan siervo ministerialcunata, ancianucunata y watucamoj hermanucunatapis. Paycuna arushgan, ¿imanotaj yanapämanchi? Y lapan rurashgancunapita, ¿imanotaj agradecicushun? Chaycunapitami yachacushun.

SIERVO MINISTERIALCUNA YANAPACÄRINMI

4. Naupa caj cristianucunapa tiempuncho, ¿imacunachotaj yanapacärej siervo ministerialcuna?

⁴ Naupa caj cristianucunapa tiempuncho waquin hermanucuna carguta chasquirgan siervo ministerialcunano yanapacunanpaj (1 Tim. 3:8). 1 Corintios 12:28 textucho Pablo capazchi paycunapaj parlar imatapis ali camacächej hermanucuna cashganta nergan. Chauraga paycuna alimi yanapacaramoj ancianucuna congregaciuncho masraj yachachicunanpaj y shacyächicunanpaj, capazchi paycunaga Diospa palabranpita copiacunata rurapäcoj o chay aruypaj ima pishishgantapis ashej aywapäcoj.

5. ¿Ima ruraycunachotaj siervo ministerialcuna canan wichan yanapacun?

⁵ Canan wichanga, ¿imatataj rurapäcun siervo ministerialcuna congregaciuncho? (1 Ped. 4:10). Waquincunaga congregaciuncho donaciuncunata shuntamun, maycho predicanapaj camacächin, publicaciuncunata aypunanpaj mañacaramun, audio y videucho yanapacärin, Salunman shamojcunatapis chasquipäcun y Diospa wasintapis shumajyächin. Chayno ali yanapacaramuptinrämi congregaciuncho imapis ali camacan (1 Cor. 14:40). Jina waquin siervo ministerialcunapis pulan semana y semana ushay reuniuncho ali yachachicaramun y predicanapaj grupuchopis yanapacärin. Öraga maygan ancianulatapis yanagan hermanucunata watucar shacyächinanpaj.

6. ¿Imanirtaj agradecicunchi siervo ministerialcuna yanapacushganpita?

⁶ ¿Imanirtaj alapa valuranchi siervo ministerialcuna congregaciuncho yanapacushganta? Yachacushun imataj nin waquin hermanucuna. Bolivia naciunpita Beberly b hermananchega caynomi nin: “Siervo ministerialcuna yanapacushganpita reuniunta shumaj wiyä. Chaynopa cantaytapis puedë, comentayta, discursuta shumaj wiyä, videucunapita y dibujucunapitapis ali yachacö. Paycuna cuidamanchi y waquincuna zoompa conectananpaj yanapacun. Reuniunta ushariptin pichapacun, donaciuncunata shuntapäcun y publicaciuncunatapis camaripämanchi. Chaycunapita ¡alapa agradecicömi!”. Colombia naciunpita Leslie, juc ancianupa warmin cayno nin: “Siervo ministerialcunaga runäta shumajmi yanapacun. Paycuna mana yanapacuptenga runäga mas uticashga caycanman. Cushi cushila arushganpita alapa agradecicömi”. Lapanchipis cushicunchimi arushganpita (1 Tim. 3:13).

7. ¿Imata rurartaj agradecicushwan siervo ministerialcunata? (Fotutapis ricay).

⁷ Capazchi shongulanchicho agradecicuycanchi siervo ministerialcunata, pero Biblia nimanchi: Imalatapis rurar “agradëcikäriy” (Col. 3:15). Finlandia naciunpita juc anciano David jutiyoj chaytashi ruran: “Imano yanapämashganpita agradecinapäga juc tarjetata rurä o mensajilapäpis juc textuta escribir apachicö”. Pascal y Jael, Nueva Caledonia marcapita, siervo ministerialcunapa mañacärin,  Pascal nin: “Congregaciunninchicho siervo ministerialcunapaj Jehovata ruwacärë paycunawan caycänanpaj y yanapananpäpis. Chay mañacuycunata Jehová wiyanmi, chaymi congregaciunchopis Jehovapa bendiciunnin caycan” (2 Cor. 1:11).

ANCIANUCUNAGA SHUMAJ ALI ARUPÄCUN

8. Naupa caj cristianucunapa tiempuncho, ¿imanirtaj Pablo nergan ancianucuna shumaj ali arupäcushganta? (1 Tesalonicenses 5:12, 13).

⁸ Naupa cristianucunapa tiempuncho congregaciuncho ancianucuna alapa arupäcoj (leiriy 1 Tesalonicenses 5:12, 13; 1 Tim. 5:17). Paycunaga congregaciunta pushapacoj, reuniuntapis camacächej y ima decisiuncuna captin waquin ancianucunawan decidipäcoj. Hermanucunata ali shimilapa consejapäcoj chaynopa congregaciuncho Dios munashganno adurapäcunanpaj (1 Tes. 2:11, 12; 2 Tim. 4:2). Jina quiquincunapis Jehová munashganno cawapäcoj, familiantapis yanapaj chayno rurananpaj (1 Tim. 3:2, 4; Tito 1:6-9).

9. Canan wichan, ¿imatataj ancianucuna rurapäcun?

⁹ Canan wichanpis ancianucuna shumaj ali arupäcun, Diospa wilacuyninta pï maytapis wilapäcun (2 Tim. 4:5). Predicaciunchopis capäcuycan y maycho hermanucuna predicapäcunanpäpis camacächin, yachachimanchipis runacunata imano predicananchipaj chayno ali yachachicoj cananchipaj. Jina congregaciuncho ima jucha captin laquiparmi juzgapäcun. Pilapis congregaciuncho jatun juchata ruraptin ancianucunaga paycunata yanapan Jehovapita mana raquicäcunanpaj, pero paycunaga manami permitinchu congregaciuncho mana alicuna cananta (1 Cor. 5:12, 13; Gál. 6:1). Pero imapitapis masga, paycuna uysha michicojno hermanucunata shumaj ricapäcun (1 Ped. 5:1-3). Shumaj preparacurcur discursacaramun, congregaciuncho lapan hermanucunata reguinanpaj calpachacärin y jucnin jucnintapis watucamun. Waquin ancianucunaga Saluncunata sharcachishgancho y alchapacushganchopis yanapacun. Maycho imano asamblea ruracänanpaj camacächin, Comité de Enlace, Grupo de Visita a Pacientes nishgancho, mascunachopis yanapacärin. ¡Imaycacunata rurapäcun noganchipaj!

10. ¿Imanirtaj ancianunchicunata cuyayculanchi?

¹⁰ Mayna Jehová wilacurgan ‘mana manchacunanpaj ni ogracunanpächu’ Jehovapa sirvejnincunata ancianucuna uyshantano cuidananpaj (Jer. 23:4). Finlandia naciunpita hermananchi Johanna mamanshi gueshyargan, pasashganpita cayno wilacun: “Pilatapis problemäpita wilanäpaj mana facilchu nogapäga. Juc cuticho juc anciano shumaj wiyamargan nircur nogapaj mañacurgan, nimarganpis Jehová alapa cuyamashganta. Lapan nimashgancunata mana yarparpis jaucalana sienticurgä. Necesitashgä hora Jehová mandamurgan yanapamänanpaj”. ¿Y gamtaga? ¿Imanopataj ancianuyquicuna yanapashushcanqui?

11. ¿Imacunata rurartaj ancianucunata agradecicushwan? (Fotutapis ricay).

¹¹ Jehovami munan imalatapis rurar ancianucunata arushganpita agradecicunapaj (1 Tes. 5:12, 13). Finlandia naciunpita Patricia hermananchi cayno nin: “Waquincunata ancianucuna cushishgala yanapacun, chayno captinpis uticärinmi y ima problemacunapapis pasapäcun. Maygan ancianuwanpis tincur ‘ali anciano canqui’ nirmi shacyächiylapa parlapä”. Turquía naciunpita Sara jutiyoj hermananchi cayno nin: “Congregaciuncho yanapacushganpita ancianucuna felicitananchitaj necesitan. Chaymi tarjetalata escribircur goycö,  imalatapis micunapaj invitaycö, paycunawanpis predicaj yargö”. Gampis capazchi yarpanqui juc anciano yanapashushgayquita, chayno captenga imalatapis ruray agradecicunayquipaj (1 Cor. 16:18).

CONGREGACIUNTA WATUCAMOJCUNA HERMANUCUNATA SHACYÄCHIN

12. ¿Pïcunataj más Jesús acrargan congregaciuncunata yanapänanpaj? (1 Tesalonicenses 2:7, 8).

¹² Apostulcunapa tiempuncho Jesús acrargan waquin hermanucunata congregaciuncunata watucamunanpaj. Chaymi Jerusalencho caycaj ancianucuna mandapäcurgan Bernabeta, Pabluta y waquin cristianucunatapis congregaciuncunata watucamunanpaj (Hech. 11:22). Paycunata mandargan ancianucunano y siervo ministerialcunanopis hermanucunata shacyächinanpaj (Hech. 15:40, 41). Hermanucunata yachachinanpaj y shacyächinanpaj wanunanpäpis listo caycargan (leiriy 1 Tesalonicenses 2:7, 8).

13. ¿Ima ruraycunaraj caycan congregaciuncunata watucamojcunapa?

¹³ Congregaciunta watucamojcuna cada cadalami viajapäcun, paycunaga congregaciunpita juc congregaciunman carutarämi aywapäcun. Cada semana preparacun discursamunanpaj, hermanucunata watucamun, shuntacan precursor regularcunawan, anciano y siervo ministerialcunawan y predicaciunman yargunanpäpis. Jina preparacun asambleacunacho discursamunanpäpis, precursorcunapa escuelanchopis yachachicamun, watacho juc cuti precursorcunapa reuniunta camacächin y sucursal imatapis mañacuptin jucla ruran.

14. ¿Imanirtaj valuranchi congregaciunta watucamoj hermanucuna rurashganta?

¹⁴ Congregaciunta watucamoj hermanucuna  watucamushganpita, ¿imanotaj caycan hermanucuna? Turquía naciunpita juc hermano caynomi nin: “Watucamoj hermanunchi visitamaptinchi animäman hermanucunawan junto caycänapaj y paycunata yanapanapäpis. Achca watucamoj hermanucunata reguirgä, lapancuna wiyamargan, imaypis ricargächu ocupaduno caycashganta, achca ruraynin captinpis nogawan parlananpaj listo caycargan”. Näga parlashganchi Johanna hermananchi watucamoj hermanuwan predicaj yarguptinshi ni pilatapis tarirganchu wasincunacho, paymi nin: “Chay junaj mana gongaypajnomi cashga, chaylaraj ishcay nanäcuna juc marcapa aywacushga cargan, paycunata pasaypa laquipargämi. Watucamoj hermano cuyapaylapa nimargan canan tiempulachomi familianchipita carucho caycar laquicuycanchi, shamoj tiempucho ichanga tiempo canga paycunawan junto caycänapaj”. Congregaciunta watucamoj hermanunchi yanapamashganchipita lapanchipis chaynola cushishga sienticushganchi (Hech. 20:37-21:1).

15. 1) 3 Juan 5-8 nishganno, ¿imataraj ruranquiman congregaciunta watucamoj hermanuta valurar? (Fotutapis ricay). 2) ¿Imata rurartaj carguyoj hermanucunapa warmincunata agradecicushwan? (“ Warmincunamanpis yarpäshun” nej recuadrutapis ricay).

¹⁵ Apóstol Juan Gayo jutiyoj cristianuta mandargan pachächicoj cananpaj congregaciunta watucamoj hermanucunawan y caytami nergan: “Juk markaman aywananpaq yanapaykulanki. Tsayno ruraptikimi Tayta Diospis kushikunqa” (leiriy 3 Juan 5-8). ¿Imatataj rurashwan noganchipis paycunano? Junto micunanchipaj invitaycushun, tiempunchita shumaj camacächir chay semana predicaciunman yargushwan. Näga parlashganchi hermananchi Leslie imano agradecicushganpita cayno wilacun: “Congregaciunta watucamoj hermanupaj Jehovata mañacö  ima necesitashganta camaripänanpaj. Runäwan cartatapis escribipäcö lapanpita agradecido caycashgäta”. Ama gongashunchu paycunapis uticäcunmi y ima problemancunapis caycanmi. Öraga gueshyapäcun y laquesacunapapis pasapäcun, shacya shacyala parlapaptiqui, juc regaluta goshgayquino o mañacuyninta cutichejno caycanquiman (Prov. 12:25).

CONGREGACIUNCHO YANAPACUNANPAJ MÁS HERMANUCUNATA NECESITANCHI

16. Proverbios 3:27 nishganno, ¿imata rurananpätaj olgu caj hermanucuna yarpapäcunman?

¹⁶ Entero pachacho congregaciuncunacho yanapacunanpaj hermanucunata necesitanchi. Olgu cajcuna bautizacushgana caycarga, ¿listuchu caycanqui congregaciuncho yanapacunayquipaj? (leiriy Proverbios 3:27). ¿Calpachacuycanquicu siervo ministerialno yanapacunayquipaj? Siervo ministerialno caycarnaga, ¿ancianunopis yanapacunquiman? c ¿Caway vidayquicho ima cambiucunatapis ruranquiman Diospita Yachachicojcunapaj Escuelaman aywanayquipaj? Chay escuelaman aywaptiquega quiquin Jesús pushashojniquino canga. ‘Chaycunata quevä puedëman’ nir yarpachacurga Jehovata mañacuy. Espíritu santutapis mañacuy imalachopis yanapacunayquipaj (Luc. 11:13; Hech. 20:28).

17. Hermanunchicuna noganchiraycu rurashganpita, ¿imatataj yachachimanchi Jesuspita?

¹⁷ Cay ushanan tiempucunacho quiquin Jesusmi pushaycämanchi, regaluno caycan ali aroj hermanunchicunawan (Mat. 28:20). Reyninchi Jesús alapami cuyamanchi, imachopis yanapämänanchipaj hermanunchicunatami utilizan. Chay lapanpita imatapis rurar agradecicushun y Jehovata agradecicuytapis gongashwanchu. Paypitami “lapan alikunata” chasquinchi (Sant. 1:17).