1. ¿Imanotaj Jehová cuyapan sirvejnincunata?

 JEHOVAGA altantulami caycan imacunapa pasashganchipita, Payga musyanmi imataj laquichimanchi y imataj cushichimanchipis (Sal. 37:18). Nacaycarpis Jehovata sirviptinchega payga cushicunmi, ‘cay wamralä jinala sirviycäman’ ninmi. Y mana chaylachu, shacyächimashpanchi listo caycan yanapämänanchipaj.

2. ¿Imatataj Jehová ruran laquishga caycajcunata yanaparcunanpaj y imatataj rurashwan yanapämänanchipaj?

² Pasaypa laquicuycarla cawajcunapaj parlarmi, Salmo 147:3 nin Jehovaga ‘gueriyoj cajcunatapis jampinmi’. Cay texto ali tantiachicun imano Jehová cuyapaylapa yanapan shonguncho pasaypa laquicuycajcunata. Pero, ¿imatataj rurashun yanapämänanchipäga? Imanomi juc doctor pipis gueshyanpita cachacänanpäga ‘caytapis wactapis ruranqui’ nin. Chaynolami Jehovapis yanapämänanchipäga wilapämanchiraj imacunata ruranapaj, cäsucushgaga aliyarcushunmi. Canan yachacushun imatataj Jehová Palabrancho nin laquishga caycajcunata y gomashganchi consejuncunatapis imano chasquicunapaj.

 JEHOVÁ ALAPA VALURAMANCHI

3. ¿Imanirtaj waquincuna ‘nogataga manami pipis cuyamanchu’ nir yarpapäcun?

³ Canan wichan runacunapäga cuyacuyninlapis cannachu, chaymi chiquinacur desprecianacärirlami cawacärin. Helen a jutiyoj cristiana cayno wilacun: “Wamrala cashgä wichan pipis cuyapämajchu. Taytäga pasaypa fiyu cashpanmi nipäcamaj ‘upacuna, gamcuna imapäpis valinquichu’ nir”. ¿Gampis chaypacu pasashcanqui? Capazchi familiayquicho pilapis cutin cutin manacajman churar insultashushcanqui o nishushgayquipis ‘¿piraj gamtaga cuyashunquipis?’ nir. Chay lapanpa pasashga carga, ‘nogataga pilapis cuyaycalämanchu’ nirpis yarpaycanquichi.

4. ¿Imataj Jehová aunicun Salmo 34:18 textucho laquicuycajcunapaj?

⁴ Waquincuna nacachishushgayqui captinpis yarpänayqui Jehovaga cuyapäshushpayquimi valurashunqui, payga “llaquicuycajcunapa ñaupanchömi” caycan (leiriy Salmo 34:18, TDI). Unaypitana laquicuycarla caycaptiquega, cayta ama gongaychu: ali shonguyoj cashgayquita ricarmi Jehová marcanman pushashushcanqui (Juan 6:44). Y payga yanapäshunayquipaj listumi caycanga.

5. Jesús laquiparganmi despreciashga runacunata, ¿imataj yachacunchi chaypita?

⁵ Jesuspita yachacurga musyashunmi Jehová amatar cuyamashganchita. Jesús cay Pachacho caycarga despreciashga cajcunata ricarmi laquipargan (Mat. 9:9-12). Yawar apaywan gueshyaycaj warmimi juc cuticho Jesuspa ropanpa cuchulanta yataycurgan aliyänanpaj yarpar, chay horami Jesús shogargan: “Yärakamashqaykipitami aliyashqanki, hïja” nir (Mar. 5:25-34). Jesusta  reguirga Jehovatami reguiycanchi (Juan 14:9). Chauraga ama gongaychu Jehová valurashushgayquita, payga ali shonguyoj cashgayquita ricaycan y cuyar yäracushgayquitapis.

6. ¿Imataraj rurashwan mana valejno cashganchita yarpaptinchi?

⁶ Mana valishgayquita waran waran yarpaycarga, ¿imataraj ruranquiman? Bibliacho achca textucuna parlan Jehová cuyashushgayquipita, chaycunata leir shumaj yarpachacuy (Sal. 94:19). b Yarpashgayquino imapis mana camacaptenga ama laquicuychu, Jehovaga puedishgayqui cajlata ruranayquita munan (Sal. 103:13, 14). Pipis pasaypa maltratar nacachishushgayqui carga yarpanquimanchu culpayoj cashgayquita. Jehovaga mana ali rurajcunataga juzgangami y sufrejcunataga yanapangami (1 Ped. 3:12). Sandra cristianaga wamralaraj caycar pasaypa mana ali tratashga cargan, pasashganpita cayno wilacun: “Ruwacuyparaj Jehovata mañacö ali shongu warmi cashgäta yarpächimänanpaj”.

7. Unaycho imaycacunapa pasashganchega, ¿imanotaj yanapämanchi Diosta sirvishganchicho?

⁷ Öraga gampaj sasa captinpis Jehovaga utilizaycäshunqui predicaciuncho waquincunata yanapänayquipaj (1 Cor. 3:9). Wamrala cashgayquipita imayca laquesacunapa pasashga captiquega, musyanquichi canan laquicuycajcunata imano yanapänayquipaj. Näga parlashganchi Helen cristianataga yanapäcurganshi aliyarcunanpaj, cananga alinashi caycan waquincunata yanaparcunanpaj. Paymi cayno nin: “Unayga imapäpis mana valishgäta yarpargä, canan ichanga convencida caycä Jehová cuyamashganta y waquincunatapis yanapänäpaj listo caycashgäta”. Helenga cushishgami precursora regularno Diosta sirviycan.

JEHOVÁ MUNAN PERDUNAMASHGANCHITANA YARPÄNANCHITA

8. ¿Imatataj Jehová nimanchi Isaías 1:18 textucho?

⁸ Waquin hermanucunaga pasaypa laquicärin manaraj Testigo car o Testiguna caycarpis jucha rurashganpita. Pero Jehová amatar cuyapämashpanchi perdunamänanchipaj wamranta cachamushga noganchiraycu wanunanpaj. Chaypitaga convencido caycänanchi, Jehová nimanchi: “Jutsata rurashqaykita perdonanäpaq kanan parlashun”. c Chayno captenga chipyaypa perdunamäshun (leiriy Isaías 1:18). Jehovaga unay juchanchicunata gongaycurmi alicunalata noganchipita yarparan, chaypitaga alapa agradecido caycanchi (Sal. 103:9, 12; Heb. 6:10).

9. ¿Imanirtaj jucha rurashganchicunalaman yarparaycashwanchu?

⁹ Unay jucha rurashgayquilaman yarparänayquipaj trucanga, canan alicunalata rurashgayquiman y shamoj tiempucho ima chasquinayquipaj cajman yarparay. Apóstol Pablupita yachacushun, payga selläma pësacurgan cristianucunata chiquir gaticachashganpita, pero Jehová perdunashganman yarparga cushicurganmi (1 Tim. 1:12-15). Chaymi ‘unayga cayta wacta rurargä’ nir, chaylaman yarparar laquicurgannachu ni fariseo cashganmanpis yarpar cacurgannachu (Filip. 3:4-8, 13-15). Chaypa trucanga Pabluga bendiciuncunata chasquinanpaj yarpar cushishgala Jehovata sirvirgan. Payno unay rurashgayquicunataga jucnopa ruranayquipäga puedinquinachu, pero canan Jehovata  alabashgayquipita cushicuy. Jehová ali cawayta apamunanpaj cajman masraj yarpachacuy.

10. ¿Imataraj rurashwan juchata rurarcur waquincunata nacachishga carga?

¹⁰ Capazchi juchata rurar waquincunata nacachishcanqui. Chayraycu alapa laquicurga, ¿imataraj ruranquiman? Shongupita perdunta mañacuy nacachishgayqui cajcunata (2 Cor. 7:11). Jina Jehovata ruwacuy payta yanapänanpaj. Jehovaga gamta yanapäshunquimi y mana alita rurashgayqui cajcunatapis. Chayta rurashpayquirämi tranquilula Diosta sirvipäcunquipaj.

11. ¿Imataj yachacunchi Jonás pasashganpita? (Garancho caycaj).

¹¹ Unay juchayquicunata cachariycur Jehovapa voluntäninta rurarna caway. Profeta Jonás pasashganpita yachacushun, paytami Jehová nergan Nínive marcaman aywananpaj. Diosta cäsucunanpaj trucanga juc ladupa aywacush. Jehová Jonasta tantiachergan cuentata gocunanpaj mana alita rurashganta (Jon. 1:1-4, 15-17; 2:7-10). Jehovaga manami nerganchu ‘profetä canganachu cay runa’, más bienga nergan Nínive marcaman yapay aywananpaj y Jonás cäsucurganmi. Mana cäsucushganpitaga pësacurganmi, pero yarpayninga caycargan Jehovapa voluntäninta rurananpämi (Jon. 3:1-3).

JEHOVAGA SANTO ESPIRITUNWANMI SHACYÄCHIMANCHI

12. ¿Imanotaj Jehová yanapämanchi desgraciacunapa pasaptinchi? (Filipenses 4:6, 7).

¹² Imayca desgraciacunapa pasaptinchega Jehová shacyächimanchi santo espiritunwan. Mä ricärishun imataj pasargan Ronal y Carolina hermanunchicunata, paycunapa mayurna wamranshi quiquin wanuchicurgan. Cayno nipäcun: “Cawaynëcunachoga imaycacunapa pasapäcushcä, pero wamralä wanucuptenga más laquicuypämi cargan. Punuylatapis mana puedipäcurgächu, cutin cutin Jehovata ruwacärergä. Chaynoparaj más tranquilulana sienticärergä” (leiriy Filipenses 4:6, 7). Ima desgraciaraycu shonguyqui nanaycaptenga laquichishushgayquipita Jehovata wilapay, imay horapis ayca tiempupis Jehová wiyashunquipämi (Sal. 86:3; 88:1). Santo espiritunta imaypis mañacuy, payga imaypis yanapäshunquimi (Luc. 11:9-13).

13. ¿Imanotaj Jehová santo espiritunwan yanapämanchi jinala payta sirviycänapaj? (Efesios 3:16).

¹³ Pasaypa mana ali pasashgayquipita valurniquipis mana captenga, santo espiritunwan Jehová valurta goshunqui payta jinala sirvinayquipaj (leiriy Efesios 3:16). Flora cristiana imapa pasashganpita parlarcushun. Payga runanwan misioneruno sirviycaptin, runan juc warmiwan engañaptin divorciacärergan. Flora cayno wilacun: “‘¿Imanir-raj runä traiciunamash?’ nirla cacurgä. Chaymi santo espiritunta Jehovata mañacurgä valurcharcunäpaj. Pasashgäga pasaypa mana aguantaypajno captinpis, aliyarcunäpaj Jehová yanapämashga”. Payga convencidami caycan Jehová mana jaguirinanpaj y ladulancho imaypis caycänanpaj. Salmo 119:32 textupis yanapashgashi payta, chay texto cayno nin: “Ali yarpaykunata qomaptikimi shonqü pasaypa kushikun. Tsaymi mandamientuykikunata imaypis cäsukushaq”.

14. ¿Imatataj rurashwan Diospa santo espiritunta chasquinapaj?

¹⁴ Diospa santo espiritunta mañacurir caytana ruray: predicaciunman yarguy, reuniuncunaman ayway y ali yarpachacurcur Bibliatapis leiriy, chaynopa mañacushgayqui santo espirituta chasquinquipaj (Filip. 4:8, 9). Bibliata leishgayqui horaga unay  Diospa sirvejnincuna imapa pasaptin imano Jehová yanapashganman yarpachacuy. Näga parlashganchi Sandra cristianaga caway vidancho imayca laquesacunapa pasash, paymi cayno nin: “Bibliacho Josepita yachacuptëga shacyächimanmi. Josega waquincunapa culpanraycu nacashga captinpis Jehovapitaga manami raquicäcurganchu” (Gén. 39:21-23).

JEHOVÁ CRISTIANO MASINCHICUNAWAN CONSUELAMANCHI

15. ¿Imacunata rurartaj hermanunchicuna consuelamanchi? (Fotutapis ricay).

¹⁵ Nacaptinchega cristiano masinchicunaga ali yanapämashpanchi shacyächimäshunmi (Col. 4:11). Jehová amatar cuyamashganchega ricacämun hermanunchicuna imaycacho yanapämaptinchi, paycunaga listumi carcaycan wiyamänanchipaj y ladunchicho caycar consuelamänanchipäpis. Öraga Bibliatapis leipämanchi y Jehovatapis mañacun noganchiwan (Rom. 15:4). d Capazchi maygan hermanulapis tantiachimashwan Jehová munashganno jucnopana yarpar galaycunapaj, chaynopa tranquilula caycänanchipaj. Jina waquincunaga antojashganchi micuylatapis apapämashwanchi.

16. Waquincuna yanapämänanchipäga, ¿imatataj rurashwan?

¹⁶ Cuyashga hermanunchicuna yanapämänanchipäga  wilacuptinchirämi musyapäcunga imano caycashganchita (Prov. 17:17). Aumi, upälala cacurga manami musyangachu ima necesitashganchitapis (Prov. 14:10). Waran waran laquishgala caycaptiquega Diosta cuyaj amigucunata ashiy, capaz canman ancianucuna y warmi captiquega pogushga hermanacunapis canmanchi. Wilapay imano sienticushgayquita y imata rurar yanapäshunayquipäpis.

17. Öraga laquishgala caycaptinchi, ¿ima ruraytataj munanchi? Pero consueluta tarinapäga, ¿imatataj rurananchi?

¹⁷ Laquishga caycaptiquega pilawanpis juntacarcur parlanayquipaj sasa captinpis, calpachacuy chayta ruranayquipaj. Öraga waquin hermanunchicuna gampita lutanta parlarinmanchi (Sant. 3:2). Pero ama niychu ‘chaynola lapancuna capäcun’ nir. Jehovaga lapan hermanucunawan yanapämanchi. Depresión gueshyawan nacaj Kevin jutiyoj anciano cayno nin: “Öraga maygan amigöcunawanpis parlayta munächu”. Chayno captinpis hermanucunawan juntacaptin alinami sienticun. Amy cristianapis cayno wilacun: “Pasashgäraycu nogapäga sasami pimanpis confiacunäpaj, pero cananga hermanucunata cuyaparmi Jehovanola confiacuycä paycunaman. Chayta ruraptëga mayraj Jehová cushicun y nogaläpis”.

JEHOVAPA AUNICUYNINCUNA CONSUELAMANCHI

18. ¿Ima bendiciuncunatataj chasquishun y imacunatataj cananlapita rurashwan?

¹⁸ Ichiclachona Jehová mana alicunata ilgächenga, chauraga manana laquicushunnachu y imapis nacachimäshunnachu. Chayta musyarga cushicunchimi (Apoc. 21:3, 4). “Lapanpis mushuqna kaptin unay pasashqan kaqkunataqa pipis manami yarpanqanatsu” (Is. 65:17). Canan wichanpis nacaycunapa pasaptinchega Jehová yanapämanchi. Consuelamänanchipäga imaycacunata ruran, chaymi yanapacuyninta cushishgala chasquicuy. ¡Jehovaga gamta cuyashunqui! Chayman imaypis yarpay (1 Ped. 5:7).