1. Congregaciunpita pipis gargushga captenga, ¿imanoraj familian ricacunman?

PIPIS congregaciunpita gargushga captenga familiancuna mayraj laquicushpan nacan. Hilda * jutiyoj paninchi cayno nin: “41 watacunano casaracushga caycar, runalä wanucurgan. Chaychoga sellama laquicurgä; pero, wamralä congregaciunpita gargushga captin, warmintapis churincunatapis jaguirir aywacuptenga masraj shongulä nanaycurgan”.

2, 3. ¿Ima nintaj Salmo 78:40, 41, sirvejnincuna raquicäcuptin Jehová imano ricacushganpita?

² Pasaypachi Jehová laquicurgan camashgan angelcuna paypa contrancho sharcur raquicäriptenga (Jud. 6). Unay Israel marcan mana casucoj cashganpitapis mayraj laquicurgan (leiriy Salmo 78:40, 41). Cuyashgayqui familiayqui mana arrepenticushpan aywacuptenga Taytalanchi Jehovapis laquicunmi. Payga musyanmi laquesacunapa pasashgayquita y laquiparmi yanapaycushunqui.

³ Canan yachacushun imatataj rurashwan Jehová yanapämänanchipaj maygan castanchilapis congregaciunpita gargushga captin. Jina yachacushun imanotaj yanapashwan gargushga cajcunapa familiancunata. Pero naupataga imata mana yarpänapaj cajta yachacurishun.

4. ¿Imanotaj achca taytacuna ricacun wamrancuna Jehovapita raquicaptin?

⁴ Maygan mozulapis mana arrepenticushpan aywacuptenga waquin taytacunaga ‘¿manachuraj shumaj yanapashcächu?’ nir tapucärin. Luke jutiyoj wauguinchipa wamran gargushga cargan, chaypita payga cayno nin: “Culpäraycur  aywacushgantami yarpargä. Chacaypapis shumaj punurgächu. Wagaylapitami shongöpis nanargan”. Chaynolami Elizabeth jutiyoj panipis pasargan, paypis cayno yarparshi galaycurgan: “¿Imatataj payraycur rurashcächu? Ichanga ali caminucho purinanpaj shumaj yachachishcächu”.

5. Pipis congregaciunpita raquicäcuptenga, ¿nishwanchuraj jucpa culpan cashganta?

⁵ Yarpäshun, Jehovaga camamashcanchi imatapis acranapaj quiquinchipita cashganta. Chauras casucunapaj o mana casucunapaj quiquinchipita canga. Waquin jovincunaga japalancuna Diosta sirvir galaycärergan, cananga mana yamacaypa Jehovata sirvircaycan. Waquincunaga wamralaraj cashganpita Testigo familiancunawanmi ashmashga capäcurgan, pero tiempuwanga Jehovatami jaguiripäcushga. Aumi, Jehovata sirvinapaj o manapis quiquinchipita caycan (Jos. 24:15). Taytacuna, wamrayquicuna congregaciunpita gargushga captenga nipäcuychu ‘culpämi cashga’ nir.

6. ¿Imanotaj mozucunaga ricacun taytancuna Diosta jaguiripäcuptin?

⁶ Öraga tayta cajcunami congregaciunpita gargushga capäcun (Sal. 27:10). Chayno captenga wamrancunanami alapa nacan. Esther jutiyoj pani cayno wilacun: “Papanë Diospita raquicäcuriptenga alapami wagargä. Manami ichiclapa ichiclapachu Diosta jaguiycargan, quiquinmi munargan Paypita raquicäcunanpaj. Papanëtaga alapami cuyayculä. Chaymi congregaciunpita gargushga captenga ‘cananga imanoraj cawaynin canga’ nirmi yarpachacurgä. Laquesalapita cawaynë sasa ticracurergan”.

7. Waquin jovincunapa taytancuna Diospita raquicar aywacärin, ¿imanotaj chay jovincunata Jehová rican?

⁷ Jovincuna, taytayquicuna Jehovapita raquicashga carga, Taytalanchi Jehová y noganchi cristiano masiquicunapis laquicunchimi. Diosninchega cuyapäshunquimi y cushishgami caycan casucushpayqui paylata sirvishgayquipita. Gamcunapis manami ninquimanchu ‘culpäraycur taytäcuna congregaciunta jaguirir aywacärish’ nir. Naga nishganchino quiquinchipitami canga Jehovata sirvinapaj o manapis. Diosta sirvinapaj aunicushga carga y bautizacushgana carga ‘jucnin jucninmi imata rurananpag cagtapis yarpachracunman’ (Gál. 6:5, Ambo Pasco Biblia).

8. Castanchicuna gargushga captenga, ¿imataraj ruraycashwan congregaciunman cutimushgancama? (“ Jehovaga cuticamunayquita munan” recuadruta ricäriy).

⁸ Cuyashganchi castanchi congregaciunpita gargushga captenga, yarpachacuycarlami caycanchi ‘cutimungana, cutimungana’ nir. Manaraj cutimushgancamaga calpachacushwanmi espiritual cajcho ali caycänapaj. Lapanchopis Diosta casucuycarla caycarga alimi canga waquin familianchipaj y gargushga cajtapis yanapanmanmi. Yaracuyninchi sinchi captenga valurtami charashun imatapis aguantanapaj. Canan yachacushun imata rurartaj yaracuyninchita masraj miraycachishwan.

9. ¿Imaraj yanapäshunqui yaracuyniqui masraj winananpaj? (“ Castayqui Jehovata jaguirishga carga, cay textucunami yanapäshunqui” recuadruta ricäriy).

⁹ Tiempunchita camacächir Diospita yachacunapaj calpachacurga alapa alimi canga quiquinchipaj y familianchipäpis. Chaymi Diospa Palabranta tantiapärir tantiapärir leicuycashwan y reuniunninchimanpis mana gongaypa yaycushwan. Joanna jutiyoj paninchipita parlarcushun. Taytanwan paninga congregaciunpitash gargushga capäcurgan. Chaypita payga cayno wilacun: “Jaucalami ricacö Abigaíl, Ester, Job, José y Jesuspita yachacuptëga. Rurashgancunaman yarparga shonguläta cushircachinmi y masraj calpachacuyta munä. JW Broadcasting programacho caycaj canciuncunapis alapami yanapäman”.

10. ¿Imatataj rurashwan laquicushganchi hora Salmo 32:6-8 texto wilacushganno?

¹⁰ Laquicushpayquega shonguyquita mashtapaycur Jehovata mañacuy. Chaycho wilapay yanapäshunayquipaj, tantiaj runa ticrachishunayquipaj y maypa aywanayquipäpis pushaycushunayquipaj (leiriy Salmo 32:6-8). Öraga sasano canman lapantaraj wilapänayquipäga. Jehovaga musyanmi shonguyquicho y umayquicho ima cashganta; payga amatar cuyashunqui y quiquinmi nishunqui lapanta wilapänayquita (Éx. 34:6; Sal. 62:7, 8).

11. Pipis gargushga captenga, ¿imanotaj chaycho ricacämun Jehová cuyacoj cashgan Hebreos 12:11 texto nishganno? (“ Pipis gargushga captenga, Jehová cuyacoj cashganmanmi yarpachacushwan” recuadruta ricäriy).

¹¹ Pipis gargushga cananpaj ancianucuna wilacuptenga, mana piñacurmi chasquicunanchi. Yarpäshun, quiquin Jehovami imatapis  ruranapaj consejuta gomanchi, chaynopa payga yanapämanchi y gargushga cajcunatapis yanapanmi (leiriy Hebreos 12:11). Öraga waquincuna nipäcunman ‘imanirtaj congregaciunpita gargupäcush, ancianucunaga lutanta rurapäcush’ nir, pero chayno parlarga manachi pitapis yanapangachu. Noganchega manami shumaj musyanchichu imaraycur pipis gargushga cashganta. Chaymi ancianucunaman yaracunanchi, paycunaga Biblia nishganno y Jehovapaj juzgaycashgannomi juzgapäcun (2 Crón. 19:6).

12. ¿Ima nintaj waquincuna castancuna gargushga captinpis Jehovata casucushganpita?

¹² Familiayqui gargushga cananpaj ancianucuna wilacushganta respetaptiquega cuticamunanpämi yanapacaycämunquiman. Naga parlashganchi Elizabeth paninchi caytapis ninmi: “Wamrä gargushga cashganraycur paywan manana parlanapäga sasami cargan. Pero cuticamurnami payga wilacurgan ‘alimi gargapäcamashga’ nir, jina tiempuwan nergan Jehová anyapashganpita alicunata yachacushganta. Quiquëpis yachacushcämi, chaypita Jehovata alapa agradecicö”. Mark jutiyoj runanpis cayno nin: “Tiempuwanpis wamrä wilacamurgan cuticamunanpaj ima yanapashganpita. Yanaparganshi Jehovata y ancianucunata casucoj cashganchi. Chaypitaga nogacunapis alapa agradecicärë”.

13. ¿Imaraj yanapäshunquiman castayquiraycur laquishga caycarga?

¹³ Yanapacoj cristianucunawan juntacarga ali yarpayniyoj runamanmi ticranqui (Prov. 12:25; 17:17). Naga parlashganchi Joanna panipis cayno nin: “Japalämi ricacurgä. Pero Diosta cuyaj amiguläcunawan juntacarga yanapämarganmi”. Y maygan hermanulapis laquishga caycaptiqui masraj laquichishuptiquega, ¿imataraj ruranquiman?

14. ¿Imanirtaj ali shongulanchiwan jucninchi jucninchi ali perdunanacushwan?

¹⁴ Hermanunchicunawanga jucla piñacushwanchu. Öraga lutanpapis parlarcamashwanmi (Sant. 3:2). Lapanchipis juchasapami canchi, chaymi öraga waquincuna imatapis nimäshunchu o parlapämaptinchëga pantarpis pantarinmanmi. Pablo cayno nishganta ama gongashunchu: “Jucniqui-jucniquipis pasinsacuy. Jagayächinacur-imarga perdunanacuy” (Col. 3:13). Juc paninchipa castanshi congregaciunpita gargushga cargan, chaypita payga cayno wilacun: “Hermanucuna ima nimashgancunacho öraga pantarejmi, chaychomi Jehová alapa yanapämargan pitapis mana nanaparänäpaj”. Canan parlarcushun imanotaj yanapacushwan congregaciuncho laquishga caycaj familiacunata.

15. Chaylaraj congregaciunpita pipis aywacushga carga, ¿imanotaj castancunata yanapashwan?

¹⁵ Cuyapaylapami parlapashwan gargushga cajcunapa familiancunata. Míriam jutiyoj paninchish congregaciunman aywayta  munajchu castan gargushga cashgan wichan. Cayno nin: “‘Imataraj nipäcamanga’ nirmi caycargä. Amiguläcunapis noganopis laquishga caycar imachi imaypis lutancunataga parlapämajchu. Japaläga ricacushcächu. Graciaslä nëmi paycunata”. Juc panipis cayno nin: “Wamralä congregaciunta jaguishgan wichanga, shacyächicoj hermanucunami shapäcamurgan. Waquincuna upälala cacurpis nogawanmi wagapäcurgan, shacyächicoj palabracunatapis apachipäcamargan. Lapan rurashgancunaga sellama yanapämargan”.

16. ¿Imanotaj lapanchipis laquishga caycaj familiacunata yanapashwan?

¹⁶ Laquishga caycaj familiacunataga alapami yanapashwan, chaytaga manami gongashwanchu (Heb. 10:24, 25). Waquin hermanucunaga nipäcushgash ‘castä gargushga cashganraycurla waquin hermanucunaga parlapämajnachu’ nir . Chaytaga ¡imaypis rurashwanchu! Taytancunata ograshgan jovincunataga shacyächirmi masraj calpata goshwan. María paninchipita parlarcushun, paypa runanga congregaciunta jaguiycur wasinpitapis aywacurganshi; panilanchi cayno nin: “Hermanuläcunaga watucamajmi, imalatapis yanupacärerganmi, wamralätapis estudiananpaj yanapacärergan. Wagaptëpis nogawanmi wagapäcurgan. Waquincuna jamurpämar galaycuptinpis defendipäcamarganmi. Cuyapämashpanmi yanapäcamargan” (Rom. 12:13, 15).

17. ¿Imatataj ancianucuna rurapäcunman laquishga caycajcunata yanapänanpaj?

¹⁷ Ancianucuna, alapa calpachacäriy Diosta cuyaj familiacunata yanapänayquipaj. Pilapis congregaciunpita aywacushga carga, familianta yanapänapäga maquiyquicunachomi caycan (1 Tes. 5:14). Reuniuncuna manaraj galaycuptin o ushashganchona yanapänayquipaj tiempuyquicunata camacächerga alimi canga. Watucashpanchi hora paycunapaj mañacushganchipis yanapacungami. Jina tiempo canmanmi paycunawan Diospita yachachicunapaj o familianchiwanpis Diosta aduranapaj. Ancianucunaga  Jehová munashgannola uyshata michej japuymi carcaycan, chaymi cuyapar shacyachiylapa yanapacunman (1 Tes. 2:7, 8).

18. ¿Imatataj Jehová shuyaraycan gargushga cajcunapita 2 Pedro 3:9 texto wilacushganno?

¹⁸ Tayta Diosga shuyaraycan lapan runa arrepenticunantami; “payga manami munanchu pipis juchallancho wañunanta” (leiriy 2 Pedro 3:9). Pipis jatun juchata rurashga carpis Jehovaga manami ninchu naupancho wanushganona cashganta. Jehovaga lapanchipaj wanunanpämi Churinta cachamurgan, chayta imaypis gongashunchu. Cuyacoj cashpanmi shuyaraycan raquicashga cajcuna Payman cuticamunanta. Chaytaga ricanchi juc taytapa wamran aywacuptin ima pasashganpita Jesús wilacamushganchomi (Luc. 15:11-32). Gargushga cashga carpis achcajcunami cuyacoj Taytanchiman cuticäramushga, congregaciunchopis cushishgami chasquishcanchi. Wamran cuticamushganpita Elizabeth paninchi imano cushishga cashganpita cayno wilacun: “Graciaslä nëmi, ‘shuyaraycarla Jehovaman yaracuy’ nimaj shacyächicoj hermanucunata”.

19. ¿Imanirtaj Jehovaman yaracuycarla caycashwan?

¹⁹ Jehovalaman imaypis yaracushun. Payga manami imaypis lutancunata ruranapaj nimäshunchu. Laquipacoj amatar cuyapämashpanchimi jucninchi jucninchipaj yarpachacun, sirvejnincunami canchi, Payga manami imaypis jaguiramäshunchu (Heb. 13:5, 6). Naga parlashganchi Mark jutiyoj wauguipis cayno nin: “Jehovaga imaypis jaguimashcanchichu. Payga nacashganchi horami noganchiwan caycan”. Aumi, ‘Tayta Diospa poderninwanga’ imatapis vencishunmi (2 Cor. 4:7). Chauras shuyaraycarla y yaracuycarla caycashwanmi maygan castanchipis congregaciunta jaguirir aywacushga captinpis.