1. ¿Ima ruranapätaj yarpashwan edayashgana carga?

EDAYASHGANA carga, öraga nishwan ‘unaynoga Diosta sirvinapaj mana calpä cannachu’. Rasunmi chayga, jovincunapano calpayqui mana captinpis, gamga achca tiempo Diospa marcancho ima aycachopis yanapacushcanqui y yachayniyoj canqui; chayraycur mozo jipashcunata yanapanquimanmi paycunapis congregaciuncho imacunachopis yanapacunanpaj y cargucunata chasquinanpäpis. Juc anciano wauguilanchi cayno nin: “Edayashgana taricuptëpis, alapa cushicurgä calpayoj jovincunata ricar, paycunaga carguta chasquinanpaj listula caycargan”.

2. ¿Imapitataj canan yachacushun?

² Pasajcho yachacurganchi jovincunaga edayashga hermanunchicunapita alapa yachacushganta. Cananmi yachacushun imanomi edayashga hermanunchicunaga humilde car, ‘yanapaycalämay’ nin; agradecido car y yanapacoj carpis jovincunawan juc shongula congregaciuncho arupäcun.

3. 1) Filipenses 2:3, 4 wilacushganno, ¿imanotaj juc humilde runaga? 2) ¿Imanotaj juc cristiano canga humilde captenga?

³ Edayashga hermanunchicunaga humilde canman jovincunata yanapänanpaj. Humilde cajcunaga waquincunatami más yachajtano rican (leiriy Filipenses 2:3, 4). Chauras cay humilde hermanucunaga imatapis rurananpäga Bibliatarämi shumaj tantiapanman, imapis ruracänanpäga  manami ninchu ‘lapanpis noga yarpashgänomi ruracanman’ nir (Ecl. 7:10). Achca watapana Diosta sirvishga carpis musyapäcunmi cay munducho imacunapis pasaycashganta; congregaciunchopis jucnopana imapis ruracaycämunman, chaychopis calpachacärinmi paycuna (1 Cor. 7:31).

4. ¿Imanotaj congregaciuncunata watucaj hermanucunaga unay levitacunano carcaycan?

⁴ Edayashga hermanunchicunaga humilde carmi musyapäcun unaynola imatapis rurayta mana puedishganta. Congregaciuncunata watucaj hermanucunaga 70 wataman chayarga Diospa marcancho juc cargutanami chasquipäcun. Unay caj cargunta alapa cuyarpis cushi cushilami yanapacärin mushoj caj carguncunachona. Ichanga nipäcunman ‘cay cargulacho wanushgäcama Diosta sirvishaj’ pero paycunaga musyapäcunmi jovincunana yanapacunanpaj ali cashganta. Chayta rurarga unay Israel marcacho levitacunanomi rurarcaycan, paycunaga 50 wataman chayarga mananash levitacunano tabernaculucho yanapacamojnachu. Chaypitaga manami laquicärejchu, cushi cushilami levita jovincunata yanapacoj (Núm. 8:25, 26). Chaynolami canan wichan achca congregaciuncunata mana watucarpis wauguilanchicunaga cushi cushilami jinan congregaciunnincho yanapacaycämun.

5. ¿Imatataj yachacunchi waugui Danpita y warminpita?

 ⁵ Dan jutiyoj wauguilanchish 23 watacunapa congregaciunta watucar sirvirgan, paypita canan parlarishun. 70 wataman chayarga precursor especialnona sirvinanpaj nipäcurgan. ¿Imanotaj warminwan chaycho yanapacuycan? Payga nin congregaciunninchoshi imayca ruranapaj caycan: hermanucunata yanapan pogunanpaj y may chaycho yachachicunanpaj, carcilchopis imano yachachicärinanpaj. Edayashga hermanuläcuna Diospa marcanpita carguta chasquishga carpis o manapis, gamcunapäga imayca caycan ruranayquipaj. Chaypäga cuentata gocärinayqui ima tiempucho cawaycashganchita y congregaciuncho imacunacho yanapacunapaj alapa yarpachacäriptiqui.

6. ¿Imanirtaj ali canman waquincunata ‘yanapaycalämay’ niptinchi? Mä tantiachicamuy.

⁶ Pipis waquincunata ‘yanapaycalämay’ niptenga alimi caycanman, cushi cushilachi cawacunman. Chayno caj runaga juc bicicletawan aywaycaj runa japuymi caycanman, imanomi montarashgala aywaycaptin rumicunawan troncucunawan tincurir bicicletanpita bajarir tangaylapa apan, chaynolami edayashga wauguinchicuna Diosta sirviycashgancho imacunapis yuriptenga jucnopana Diosta sirvir galaycunga, y waquincuna yanapänantapis mañacongami (Filip. 4:5).

7. ¿Imatataj rurargan Barzilái juc carguta chasquinanpaj caycaptin?

⁷ Unay wichan Barzilái, jutiyoj runatash 80 watayoj caycaptin rey David tronunman gayachimurgan carguta gonanpaj. Payga manash chasquirganchu chay carguta edayashga cashganraycur, Kimham mozuta gayachimunanpaj nergan (2 Sam. 19:35-37). Barzilainomi edayashga wauguicunaga cushicärin jovincuna carguta chasquipäcuptin.

8. ¿Davidga ‘quiquïraj cayta rurashaj’ nirganchuraj Diospa wasinta sharcachinanpaj caycaptin?

⁸ Unaycho rey Davidga Jehovapa wasinta sharcachiyta munargan pero chayta Salomón rurananpaj Jehová niptenga manash piñacurganchu. Chaypa trucanga ganas ganasla churin Salomonta yanapargan (1 Crón. 17:4; 22:5). Davidga manami nirganchu ‘mozucunaga manami jaticamunmanchu cay trabajucho, quiquïrämi cayta aruchïman’ nir (1 Crón. 29:1). Payga musyarganmi Jehová bendeciptinraj lapanpis camacashganta. Davidnomi cay edayashga cristianucunaga unay cargunta jaguirishga carpis congregaciuncho imalachopis yanapacurcaycan; musyapäcunmi Jehovapa bendiciunninga jovincunachopis caycananpaj cajta.

9. ¿Imatataj rurargan Shigeo wauguilanchi Sucursalta ricajcunawan arur?

⁹ Shigeo jutiyoj wauguinchipis Davidnolami ali shongu runa cargan, paytaga 30 watayoj caycaptinshi Sucursalta ricajcunawan arupäcunanpaj nipäcurgan. 2004 watachona Sucursalta ricajcunata diriginapaj carguta chasquergan. Tiempuwanga cuentatash gocurgan unayno manana aruycashganta, chaymi Jehovata ruwacurgan ‘calpalä alapa cannachu, jovincuna cay cargucho arunman’ nir. Cananga aruycanräshi Sucursalta ricajcunawan pero manana diriginapaj caj carguwanga. Chauras ali caycan Barzilái, David y Shigeo wauguilanchi rurashganno  ruranapaj. Paycunaga nipäcurganchu ‘quiquïrämi cayta wacta ruräman, jovincunaga yachantacu’ nir. Chauras jovincunaga yaracunapaj caycan, calpancunawanga alapami yanapacamunman (Prov. 20:29).

10. ¿Imanotaj soguyashgana hermanunchicuna congregaciuncho jovincunata rican?

¹⁰ Soguyashgana hermanunchicunaga cushishgalami Jehovapa bediciunnintano jovincunata rican. Ichanga unayno arupäcunnachu pero cushicärinmi congregaciuncho ganas ganasla jovincuna yanapacamushganta ricar.

11. ¿Imatataj Rut 4:13-16 tantiachicun edayashga hermanunchicunata jovincuna yanapänanpaj cajpita?

¹¹ Biblia wilacun ali shongu Noemí jutiyoj warmipaj, payga agradecida carshi juc viuda jipash yanapänanta jaguirgan, jutin cargan Rut. Payga Noemita nergan wanushgancama yanagänanpaj y chaynomi cargan (Rut 1:7, 8, 18). Ishcancunami Belén marcapa aywacärergan y jucnin jucnin yanapanacuypa cawapäcurgan (leiriy Rut 4:13-16). Edayashga hermanunchicunapis ali shongulanwanmi Noemí rurashgannola rurapäcun.

12. ¿Imanotaj Pabluga agradecido runa cargan?

¹² Apóstol Pablupis agradecido runa cargan. Juc cutichomi Filipos hermanucuna yanapargan, chaypitaga ‘gracias’ nirmi guelgapargan (Filip. 4:16). Timoteo mozutapis alapa agradecicurgan (Filip. 2:19-22). Roma carcilman apaycaptinpis Diostaga agradecicurganmi shacyächicoj wauguicunawan tincushganpita (Hech. 28:15). Pabluga may chaycho Diospita yachachicur y  congregaciuncunata shacyächir purergan. Ichanga pipis ‘yanaparcushayqui’ niptenga chasquicurganmi, manami ali tucurganchu.

13. ¿Imata rurartaj edayashga hermanucuna agradecicunman jovincuna alapa arushganpita?

¹³ Edayashga wauguiläcuna, gamcunapis gracias ninquimanmi congregaciuncho mozucuna yanapacamushganpita. Öraga nishunquipämi ‘yanaparcushayqui, imalayquitapis rantipäshayqui’ nir, chaypitaga manachi ninquichu ‘ama, ama’. Jehová yanapäshushgayquitanomi chasquicunquiman. Jovincunaga yanasayquimanpis ticrarinmanmi y ali canga Jehovata masraj cuyananpaj yanapaptiquega. Paycunataga yapay yapaypis ninquimanmi congregaciuncho shumaj yanapacaycämushganta. Imacunapapis pasashgayquicho imano aguantashgayquipita wilapaptiquega alimi canga. Chay lapanta ruraptiquega Jehovatami agradecicuycanqui congregaciunninman jovincunata apamushganpita (Col. 3:15; Juan 6:44; 1 Tes. 5:18).

14. ¿Imano yanapacoj runataj cargan David? Tantiachicamuy.

¹⁴ Edayashga hermanunchicunaga rey Davidpitapis yachacunmanmi yanapacoj capäcunanpaj. Davidga imaycancunawan yanapacurgan Diospa wasinta sharcachinapaj (1 Crón. 22:11-16; 29:3, 4). Lapan trabajuga Salomonpa maquincho caycargan, chayno captinpis Davidga yanapacurganmi. Diospa wasinta sharcachiycho arunayquipaj mana camäpacurga, jucnopapis yanapacunapaj caycanmi: guellayninchita apachicur. Waquin soguyashgana hermanunchicunaga cushi cushilami jovincunata wilapan imacunapa pasarpis Dioslaman yaracushganta, chayga alimi caycan.

15. ¿Imanopataj Timoteuta Pablo yanapargan?

¹⁵ Apóstol Pablupis yanapacoj runami cargan. Timoteo mozuta nergan may chaypa viajar yanagänanpaj y Diospita yachachicunanpäpis shumaj tantiachergan (Hech. 16:1-3). Chayno yanapacushganraycurmi Timoteuga ali yachachicoj y tantiachicoj runaman ticrargan (1 Cor. 4:17). Nircurpis Pablo yachachishgannola waquincunatapis shumaj yachachergan.

16. ¿Imanirtaj Shigeo wauguinchega waquincunata shumaj yachachergan?

¹⁶ Pablunolami canan wichan edayashga cristianucunapis cushi cushila jovincunata yachachin congregaciuncho shumaj yanapacärinanpaj. Naga parlashganchi Shigeo wauguinchega cushi cushilash yachachergan Sucursalta ricajcunacho aroj jovincunata. Chaycho ricacämurgan Diospa Gobiernunman alapa yarpachacushganta. Chaymi cargunta jaguinanpäna caycaptenga listuna juc waugui caycargan paypa trucancho yaycunanpaj. 45 watapami Shigeo wauguinchega Sucursalta ricar yanapacurgan; chaycho lapan yachacushgancunataga parlapanchi jovincunata. Cayno hermanucunaga Diospa bendiciunninmi caycan.

17. ¿Imano runa canapätaj parlaycämun Lucas 6:38 texto?

¹⁷ Edayashga hermanuläcuna, gamcunachomi ricacämun Jehovalapaj cawanapaj aunicushganchega cushicuypaj cashganta. Jehová mandashushgayquicunalatami imaypis rurapäcushcanqui, chaypis cushicuypämi. Canan wichan Diospa marcancho imacunapis jucnopana ruracaptenga  cushishgalami chasquicärinqui. Edayashgana carpis ichanga chaylaraj bautizacushcanqui, chayno captinpis cushishgalachi wilacunayquipaj caycan imano Jehovata reguishgayquipita. Jovincunapis cushishgalachi wiyapäcunga cawayniquicunacho lapan yachacushgayquicunata. “Pï-maytapis goycuptiquega” o yanapacuptiquega, Jehovaga bendiciunninta “goycushunquipaj” (leiriy Lucas 6:38).

18. ¿Imanotaj edayashga cajcuna jovincunawan yanapanacärinman?

¹⁸ Edayashga cajcuna jovincunawan juntacaptenga jucnin jucnincunami yanapanacärin (Rom. 1:12). Edayashga cajcunaga yachaj y tantiaj capäcun, jovincuna ichanga imatapis rurananpaj calpasapa capäcun. Taytalanchi Jehovaga mayraj cushicun edayashgacunapis jovincunapis juc shongula arupäcuptin. Congregaciunpäpis juc bendición caycan.