1. ¿Imacunataj cushicuypaj canga Jesús mandacamur galaycuptin?

 WARANGA Watapa Jesús mandacamur galaycuptin y wanushgacuna cawarimuptin, chayga ¡alapa cushicuypächi canga! Mayna cuyashganchi castanchicuna cawarimunanpaj munanchi. Jehovapis chaytami munan (Job 14:15). ¡Mayraj cushicushun castanchiwan yapay tincurir! Pasashgan yachachicuycho ricashganchinopis alita rurashgancunaga libro de la vida nishgancho jutincuna escribiraycaptinmi paycunaga cawananpämi cawarimunga (Hech. 24:15; Juan 5:29). Cuyashganchi cajcuna imachi puntataga cawarimunga. * Chaymanpis mana alita rurajcuna manaraj wanur, Jehovata reguirganchu ni sirvirganpischu, paycunaga juiciupämi cawarimunga.

2, 3. 1) ¿Imanotaj canga Isaías 11:9, 10 textucuna nishganno, imaypis mana yachachicushganchino yachachicunapaj cajpita? 2) ¿Imatataj cay yachachicuycho yachacushun?

² Cay lapan cawarimojcunaga yachacunanpäga achcami caycanga (Is. 26:9; 61:11). Chaymi imaypis mana yachachicushganchinomi yachachicunapaj caycanga (leiriy Isaías 11:9, 10). Mana alita rurajcunaga caycunapita yachacunanpämi caycanga: Jesucristupita, Diospa Gobiernunpita, Jesús wanushganpita, Jehovapa jutin respetashga cananpaj y payla derechuyoj mandacamunanpaj cashganpitapis. Alita  rurajcunapis Diospa Palabranpita mayraj yachacunanpaj caycanga. Paycunapita waquincunaga wanurgan Diospa Palabranpita lapan librucunata escribiyta mana ushacaptinraj. Chauraga alita rurajcuna y mana alita rurajcunapis imaycataraj yachacunanpaj caycanga.

³ Cay yachachicuychomi cay tapucuycunapita parlarcushun: ¿imanotaj imaypis mana yachachicushganchino yachachicushun?, ¿imataj pasanga yachachishga cananpaj chasquejcunata? y ¿imataj pasanga mana chasquejcunata? Chaycunata musyayta munanchimi. Chauraga Daniel y Apocalipsis librucunapita waquin profeciancunaga yanapämäshun cawarimunanpaj wichan cajcunapita tantianapaj. Puntataga, almiraypaj Daniel 12:1, 2 profeciapita parlarcushun.

4, 5. ¿Imataj Daniel 12:1 wilacun ushanan wichancho ima pasananpaj cajpita?

⁴ (Leiriy Daniel 12:1). Daniel libruga wilamanchi último tiempucho ima pasananpaj cajpita. Tantiarinapaj, Daniel 12:1 wilamanchi “angilkunapa mandaqnin Miguel” payga Jesucristumi, y Diospa marcanpa favorninchomi ichiraycan. Cay profeciaga cumplicur galaycurgan 1914 watacho, Jesucristo cielucho mandacur galaycuptin.

⁵ Ichanga caytapis Danielta nergan: Jesús Diospa marcanpa favornin sharcuptin wichan, “runakuna fiyupa nakaycho karmi lakikärinqa. Kay patsacho nacionkuna kashqanpita patsa imaypis manami tsayjinanpa nakaykuna y lakikuykunapis kashqatsu”. Fiyupa nacayga caycan “gran tribulación” nishgan, Mateo 24:21 texto nishgannopis. Jesusga Diospa marcanpa favorninpa sharcunga Armagedón guerra galaycuptinmi. Apocalipsis libruga paycunapita parlar nin yupaytapis mana atipaypaj chaychicaj runacuna gran tribulación nishganta cawaycar pasashganta (Apoc. 7:9, 14).

6. ¿Imataj canga yupaytapis mana atipaypaj chaychicaj runacuna gran tribulación nishganta cawaycar pasaptin, y imanirtaj chayta ninchi? (Cay revistachopis ricäriy “Liejcuna tapucärishgan” yachacuycho, chaycho parlan cay Pachacho cawarimojcunapita).

⁶ (Leiriy Daniel 12:2). ¿Imaraj pasanga yupaytapis mana atipaypaj chaychicaj runacuna gran tribulación nishganta cawaycar pasaptinna? Cay profeciaga tantiachicun wanushgacuna cawarimunanpämi. Chaytaga juc tiempucho tantiashcanchi wasin wasin yachachicushganchita casi chawacächishga cashganpita, nircur masraj yachachicunanpaj calpachacärishgan cajpita. * Ichanga Mushoj Pachacho wanushgacuna cawarimunanpämi parlaycan, ¿imanirtaj chayta ninchi? Job 17:16 texto “allpaman” nerga, tantiachicun pipis wanuptin uchcucho pampashga cananpämi. Chauraga Daniel 12:2 parlaycan wanushgacuna rasunpa tuluyoj y aychayoj cawarimunanpämi. Chayga canga gran tribulación nishgan y Armagedón ushacaptinmi.

7. 1) ¿Imanirtaj ninchi waquincunaga imaycamapis cawapäcunanpaj cawarimunga? 2) ¿Imanirtaj chayno cawarimojcunaga más aliraj caycan?

⁷ ¿Ima ninantaj Daniel 12:2 textucho ‘waquinnami cawarimunanpaj imayyajpis cawapäcamunanpaj’ nishganga? Chayga ninan mushoj Pachacho Jesús Waranga Watapa mandacamuptin cawarimojcunaga Jehovatawan Jesusta reguir o cada cadala  reguishpan y cäsucushpan imaycamapis cawapäcunga (Juan 17:3). Chay wichan cawarimojcunapäga más aliraj canga cay caway vidacho unaycho cawarimojcunapitaga (Heb. 11:35). ¿Imanir? Unaycho cawarimojcunaga yapaymi wanurgan.

8. ¿Imanirtaj waquincunaga “imayyaqpis nakapäkunanpaq” y “pasaypa penqaycho” cananpaj cawarimunga?

⁸ Ichanga manami lapan cawarimojcunachu Jehovapa yachachicuyninta chasquipäcungachu. Danielpa profecian nin “wakinnami kawarimunqa imayyaqpis nakapäkunanpaq [...] pasaypa penqaycho kanqa” o ushajpaj ilgächishga canga. Mana cäsucoj captinmi libro de la vida nishgancho jutincuna guelgaraycangachu, chaymi imaycamapis cawapäcungachu. Chauraga Daniel 12:2 profeciaga tantiachimanchi cawarimojcunaga Waranga Watacuna pasaptin imacunata rurashganpita juzgashga capäcunanpaj * (Apoc. 20:12). Waquincunaga imaycamapis cawapäcunga, waquincunanami mana.

9, 10. Daniel 12:3 texto nishganno, ¿ima mastaj pasacunga gran tribulación ushacaptin, y pïcunataj “chipchipyaykaq ciëlunömi atsikyanqa”?

⁹ (Leiriy Daniel 12:3). ¿Ima mastaj pasacunga jatun nacaycuna ushacaptin? Daniel 12:2 wilacushganpitapis, 3 caj versiculucho wilamanchi gran tribulación ushacaptin ima pasacunanpaj.

¹⁰ ¿Pïcunataj “chipchipyaykaq ciëlunömi atsikyanqa”? Mateo 13:43 textucho Jesús nishganmi yanapämanchi tantianapaj. Chaycho nin: “Tayta Dios munashqanno kawaqkunami itsanqa Tayta Dios mandaykashqancho intinöraq atsikyanqa”. Chaywanga Jesús parlaycargan cielupaj cajcunapämi, Jesuspa hermanuncunapaj, paycunami Diospa Gobiernuncho Jesuswan junto gobernapäcamunga (Mat. 13:38). Chauraga Daniel 12:3 parlaycan cielupaj aywajcunapämi y Waranga Watacunapa imacunata rurananpäpis.

11, 12. ¿Imatataj rurapäcunga 144.000 cajcuna Waranga Watacunapa wichan?

¹¹ Cieluman aywajcunami chaychicaj runacunata ali cawananpaj yanapacunga. Chaytaga ruranga Waranga Watacunapa Jesuswan junto arur y cay Pachacho runacunata yachachipäcuptin. 144.000 cajcunaga manami gobernangalachu sinoga sacerdoticunanopis yanapacungami (Apoc. 1:6; 5:10; 20:6). Chauraga cay Pachacho cawajcunata yanapanga jampishga cananpaj y ichic ichiclapa perfecto runaman ticrananpaj (Apoc. 22:1, 2; Ezeq. 47:12). ¡Mayraj cushicäringa cielupaj acrashgacuna chayta rurarga!

¹² ¿Pïcunaraj caycanga chaychicaj runacuna ali cawananpaj yanapashga cajcunacho? Armagedón guerrata cawaycaj pasajcuna, cawarimojcuna y chay wichan yurejcunapis. Waranga Watacuna ushacaptinna cay Pachacho cawajcunaga perfecto runanami canga. Chauraga, ¿imaytaj jutincunaga imaypis ilgächishga mana cananpaj guelgashga canga?

13, 14. ¿Imatataj ricächicunman cay Pachacho lapan cawajcuna imaycamapis cawapäcunanpaj?

¹³ Pipis perfecto runa captinla manami imaycamapis cawapäcungachu. Yarpäshun Adanwan Eva rurashganta. Paycunaga juchaynaj runami capäcurgan, ichanga imaycamapis cawapäcunanpäga Jehovatami  imaypis cäsucunman cargan. Pero manami cäsucärirganchu (Rom. 5:12).

¹⁴ Yachacushganchino Waranga Watacuna ushacaptin, cay Pachacho lapan cawajcunaga perfecto runanami capäcunga. Chay lapan runacuna perfecto caycarpis, ¿Jehovapa Gobiernunlatachuraj yanapacunga? ¿O waquincunaga mana cäsucoj Adanwan Evanochuraj capäcunga? ¿Chayga imanoraj musyacanga?   

15, 16. 1) ¿Imaytaj ricachicunga lapan runacuna Jehovalata cäsucushganta? 2) ¿Imataj canga último prueba ushacaptin?

¹⁵ Waranga Watacunami Satanasga wichgarashga caycanga. Chay wichanga pitapis manami engañangachu. Ichanga Waranga Watacuna ushacaptin cacharishga canga perfecto runacunata engañananpaj. Chay pruebachomi lapan runacuna ricachicunanpaj caycanga Jehovapa jutinta respetaycanganta y Gobiernunlatachush yanapacuycanganta o manapis (Apoc. 20:7-10). Ima rurangancunapitami libro de la vidacho jutincuna imaypis guelgarashga cananpaj canga.

¹⁶ Waquincunaga mana cäsucoj Adanwan Evanomi capäcunga, paycunata Jehová mandacamunanpaj mana munangachu. ¿Imataj paycunawan pasanga? Apocalipsis 20:15 nin: “Libro de bïdacho jutincuna  mana apuntaraj cajcunataga nina rataycaj gochamanmi gaycuriran”. Aumi, mana cäsucojcunaga imaycamapis ushajpaj ilgächishga canga. Ichanga último pruebacho chaychicaj perfecto runacunapa jutincuna libro de la vidacho imaycamapis escribishga canga.

17. ¿Imataj juc ángel Danielta wilapargan ushanan tiempucho pasacunanpaj cajta? (Daniel 12:4, 8-10).

¹⁷ ¡Ichiclacho chaycuna pasananpaj yarpararga mayraj cushicunchi! Ichanga juc angelmi Danielta wilapargan ushanan tiempucho imacuna pasacunanpaj cajta (leiriy Daniel 12:4, 8-10; 2 Tim. 3:1-5). Cayno nergan: “Runakunaqa maytsaypapis aywar yachakushpanmi mas yachaq rikakärinqa”. Chauraga runacuna masraj tantiacäringa Danielpa profeciancunata. Jina angelga caytapis nergan: “Jutsa ruraqkunaqa jina jutsata rurar kawapäkutsun”, paycuna mana tantiacäringachu.

18. ¿Imatataj fiyucunata ichiclacho pasanga?

¹⁸ Fiyucunaga mana alicunalata rurarmi cawapäcun, ‘nogataga manami pipis juzgamangachu’ nirmi cacärin (Mal. 3:14, 15). Ichiclachomi juc uyshero cabracunapita uyshacunata  raquishganno, cabra japuy runacunata Jesusmi juzganga (Mat. 25:31-33). Fiyucunaga gran tribulación nishgancho wanupäcungami y mushoj Pachachopis mana cawarimungachu. Malaquías 3:16 wilacushgan libruchoga jutincuna manami caycangachu.

19. ¿Imatataj canan wichan rurashwan, y imanir? (Malaquías 3:16-18).

¹⁹ Cananmi ricächicushwan fiyu runacunano mana cawacuycashganchita (leiriy Malaquías 3:16-18). Jehovami shuntaycan ricaynincho cuyaylapaj cajcunata. ¿Manacu Jehovapa ricaynincho cuyaylapaj y alita ruraj runacunano cayta munanchi?

20. ¿Imataj Danielta Jehová aunipargan, y imanirtaj chay cumplicunanpaj munanqui?

²⁰ Almiraypaj wichanchomi cawaycanchi. Ichanga ichiclachomi imaypis mana ricashcanchi más almiraypaj cajcunami pasanga. Ichiclanami pishin lapan fiyucuna ushacänanpaj. Chaycuna pasacuptinmi Danielta Jehová aunishgantami cumplicushganta ricashun: “Ushanan junaqchömi kawarirkamur herenciaykita chaskinkipaq” (Daniel 12:13). ¿Munaycanquichu Danielwan castayquicunapis cawarimunanpaj cajta? Chauraga imaycanopapis Jehovalata cäsucunayquipaj calpachacuy, chaynopa libro de la vidacho jutiqui escribishga cananpaj.