1. Malaquías 3:16 textucho nishganno, ¿ima librutaj unaypita Jehová escribiycargan, y imataj chaycho escribiraycan?

 JEHOVAGA achca watapana juc shumaj librucho juticunata escribiycan y galaycushga unay Abelpa jutinwan (Luc. 11:50, 51). * Tiempo pasashganmanno más juticunata escribirgan, y canancamaga chaychica juticunanami escribiraycan. Bibliachoga ‘libro de la vida’ nirmi jutichipan (leiriy Malaquías 3:16; Apoc. 3:5; 17:8).

2. ¿Pïcunapa jutincunataj chay librucho caycan, y imatataj rurashwan jutinchipis chay librucho caycänanpaj?

² Cay shumaj libruchoga Jehovata respetajcunata y jutinta cuyajcunapa jutincunami guelgaraycan. Paycunapitaga waquincuna cielucho cawapäcunga y waquincunana cay Pachacho imaycamapis cawapäcunga. Cay libruchoga jutinchi guelgaraycanga Jehovawan amistäninchita sinchiyächiptinchi y Jesús wanushganman yäracuptinchi (Juan 3:16, 36). Lapanchimi munayculanchi chay librucho jutinchi guelgaraycänanpaj ¿au?

3, 4. 1) ¿Imaycamapis cawacushunchuraj chay librucho jutinchi canan guelgaraycaptenga? 2) ¿Imatataj yachacushun cay y gatejnin yachachicuycho?

³ Cay librucho jutinchi guelgaraycaptenga, ¿imaycamapis cawacunapächuraj caycan? Chayta musyanapäga yarparcushun Éxodo 32:33 textucho Jehová Moisesta ima nishganta: “Libröpitaga illgächishaj pipis conträ juchata ruraj cajllatami”. Chayga niycan chaycho caycaj juticunaga ilgächishga canmanmi, Jehová lapizwan guelgashgannomi caycan (Apoc.  3:5). Chay librucho jutinchicuna imaycamapis guelgaraycänanpäga calpachacushwanmi Jehová munashganno cawanapaj.

⁴ Öraga caynochi tapucunchi: ¿Ima nintaj Biblia chay librucho juticuna guelgaraycashganpita y mana guelgaraycaj juticunapitapis? ¿Imaytaj imaycamapis cawapäcunga chay librucho caycaj jutincunapa cajcuna? ¿Imataj pasanga Jehovata mana reguir wanojcunata? ¿Chay librucho jutincuna guelgaraycanchuraj? Cay yachachicuycho y gatejninchopis chaypita parlarcushun.

¿PÏCUNAPA JUTINCUNATAJ LIBRUCHO CAYCAN?

5, 6. 1) Filipenses 4:3 textucho nishganno, ¿pïcunapa jutincunataj librucho escribiraycan? 2) ¿Imaytaj imaycamapis jutincuna escribishga canga?

⁵ ¿Pïcunapa jutincunataj chay librucho caycan? Chayta tantianapaj pichga grupucunapita parlarcushun. Cay grupucunapitaga waquincunapa jutincuna librucho caycan y waquincunapana mana.

⁶ Naupa caj grupuga cielucho Jesuswan gobernajcunami caycan. ¿Libro de la vida nishgancho jutincunaga guelgaraycannacu? Aumi. Filipos marcacho yanagajnincunata Pablo nishganno cielupaj aywajcunapa jutincunaga librucho escribiraycannami (leiriy Filipenses 4:3). Ichanga jutincuna ilgächishga mana cananpäga wanushgancamami Jehovalata sirvinman. Paycuna manaraj wanuptin o jatun nacay manaraj galaycuptin Jehová sellaycuptenga jutincunaga librucho imaycamapis caycanga (Apoc. 7:3).

7. Yupaytapis mana atipaypaj cajcunapaj jutincuna librucho imaycamapis escribishga cananpaj tantianapäga, ¿imanotaj Apocalipsis 7:16, 17 yanapämanchi?

⁷ Ishcay caj grupuchoga caycan yupaytapis mana atipaypaj runacuna. ¿Libro  de la vida nishgancho jutincunaga escribiraycannacu? Aumi. ¿Armagedón guerrata cawaycar pasaptenga librucho jinalachuraj jutincuna escribiraycanga? Aumi (Apoc. 7:14). Jesús paycunapita nergan uysha japuy captinmi imaycamapis cawayta taripäcunga (Mat. 25:46). Armagedonta cawaycar pasaycarpis manami juclaga imaycamapis cawayta taripäcungarächu. Jutincunaga lapizwan escribiraycashgannomi caycanga. Jesusmi Waranga Watacuna mandacamuptin “paycunataga uyshacunatano ricanga. Imaypis mana yacunänanpaj Paymi cawachicoj chuya yacuman pushanga”. Jesucristo pushananpaj jaguejcuna y Jehovalata sirvejcunaga jutincuna librucho imaycamapis caycänanpaj escribishga canga (leiriy Apocalipsis 7:16, 17).

8. ¿Pïcunapa jutincunataj librucho escribiraycanchu, y imataj paycunata pasanga?

⁸ Quimsa caj grupuchoga caycan cabra japuy cajcuna y Armagedonchomi ushacächishga canga. Jutincunaga cawananpaj librucho manami escribiraycanchu. Chaymi Jesús nergan, paycuna ushacächishga captenga manami imaypis cawapäcungachu (Mat. 25:46). Apóstol Pablupis cayno nergan: “Mana wiyacujcunata ushyaypa illararachinga” (2 Tes. 1:9 Biblia Panao; 2 Ped. 2:9). Chaynolami ninchi unay o canan adrede Diospa contrancho imatapis rurajcunapita. Paycunapis ushacächishga captenga manami imaypis cawapäcungachu (Mat. 12:32; Mar. 3:28, 29; Heb. 6:4-6). Canan parlarcushun ishcay grupucunapita cay Pachacho cawananpaj.

CAWARIMOJ CAJCUNA

9. ¿Ima ishcay grupucunataj cay Pachacho cawapäcunga, y imanirtaj chay grupucuna igualchu caycan? (Hechos 24:15).

⁹ Bibliaga nimanchi ishcay grupucuna cay Pachacho imaycamapis cawapäcunmanmi, chay grupucunachoga caycan ‘alita rurajcuna’ y ‘mana alita rurajcunapis’ (leiriy Hechos 24:15). ‘Alita rurajcunachoga’ caycan wanushgancama Jehovalata sirvejcunami. Y ‘mana alita rurajcunachoga’ caycan Jehovata mana sirvishgan cajcuna, y cawashgan wichan Jehovapa ricaynincho mana alicunatami rurapäcurgan. Chauraga chay grupucuna cawarimunanpaj captinpis, ¿libro de la vida nishganchoga jutincuna escribiraycanchuraj? Cayta tantianapäga cay grupucunapita jucnin jucninpita shumaj yachacushun.

10. ¿Imanirtaj ‘ali rurajcuna’ cawapäcunga, y waquincunaga imanotaj yanapäcunga? (Cay revistachopis ricäriy “Liejcuna tapucärishgan” yachacuycho, chaycho parlan cay Pachacho cawarimojcunapita).

¹⁰ Chuscu caj grupuchoga caycan ‘alita rurajcunami’. Paycunapa jutincunaga manaraj wanuptinmi libro de la vida nishgancho mayna escribiraycargan. ¿Jutincunaga ilgangachuraj wanupäcuptin? Manami, jutincunaga caycan Jehovapa yarpayninchomi. “Diosga manami wañojcunapa Diosninchu. Payga cawaycajcunapa Diosninmi. Paypäga llapanpis cawaycanmi” (Luc. 20:38). Chayga ninan mushoj Pachacho cawarimuptin cawanapaj libruchoga jutincuna guelgaraycangami. Ichanga lapizwanno escribiraycashgannomi canga (Luc. 14:14). Waquin cawarimojcunaga principinomi yanapacunga, chaymi Biblia nin: “Paykunata mandäshishunaykipaq maytsay markakunamanpis churankipaq” (Sal. 45:16).

11. ¿Imata rurananpätaj caycanga mana alita rurajcuna cawarimuptin cawanapaj librucho jutincuna escribishga cananpaj?

¹¹ Ushanapaj, pichga caj grupupita parlarcushun: “mana ali rurajcunapita”. Jehovapa mandatunta manaraj reguir cawaynincho Jehová munashganno rurapäcurganchu. Chaymi libro de la vida nishgancho jutincunaga  guelgaraycanchu. Ichanga cawarimuptin chay libruchoga jutincuna escribishga canmanmi, Diosga chaypämi cawarachimunga. Waquincunaga manaraj wanur pasaypa mana alicunatami rurapäcurgan, chaymi cawarimuptin aliraj yanapänapaj caycanga. Chauraga paycuna Jehová munashganno cawacunanpaj yachacärinanpämi caycanga. Chay lapan runacunata imaypis mana yachachicushganchino, shumaj yachachishga cananpaj Diospa Gobiernunmi camacächenga.

12. 1) ¿Pïcunataj mana ali rurajcunata yachachenga? 2) ¿Imaraj pasanga pipis yachacushganta mana cäsucuptin?

¹² ¿Pïcunataj mana ali rurajcunata yachachipäcunga? Yupaytapis mana atipaypaj cajcuna y alita rurajcunami. ¿Mana alita rurajcuna imata rurananpätaj caycanga jutincuna libro de la vida nishgancho escribishga cananpaj? Jehovapa amigun cananpaj calpachacärinan y paylata sirvinanpäpis aunicärinan. Jesuswan junto gobernaycajcunaga altantumi caycanga chay runacuna ima cambiucunatapis rurapäcushganta (Apoc. 20:4). Pipis chay yanapacuyta chasquicuyta mana munaptenga juclami wanuchishga canga pachac watayoj caycaptinpis (Is. 65:20). Jehovawan Jesusga runacunapa shonguncho caycashganta musyanmi, chaymi pipis mana alita rurananpaj manami permitingachu (Is. 11:9; 60:18; 65:25; Juan 2:25).

CAWANANPAJ Y JUICIUPAJ CAWARIMOJCUNA

13, 14. 1) ¿Imanotaj unaycho tantiashcanchi Juan 5:29 textucho Jesús nishganta? 2) ¿Maygantaj shumaj tantiashwan chay yachachicushganpita?

¹³ Jesús cay Pachacho cawarimojcunapitapis parlargan. Cayno nergan: “Ama manchariychu-llapa. Imay junajllaga chayamongami pamparaycajcunapis rimashäta wiyanan junaj. Chayno wiyashpanmi alli cajcunaga imaycamapis Tayta Diospa ñaupancho cawananpaj cawarimonga. Juchallata rurasha cajcunami ichanga fisyuchöpis  jusgasha canallanpaj cawarimonga” (Juan 5:28, 29). Caypita Jesús parlarga, ¿imataj niycargan?

¹⁴ Unaycho tantiashcanchi Jesús nishganga paraisucho cawarimojcuna ima rurananpaj cajpita parlashganta. Cayga niycargan waquin cawarimojcuna alicunata rurananpaj y waquincunana mana alicunata rurananpaj. Tantiarcunapaj, Jesusga manami nirganchu ‘waquin cawarimojcuna ali ruranga y waquin cawarimojcunana mana ali ruranga’ nir. Jesusga parlaycargan cay caway vidacho runacuna manaraj wanur waquincunaga mana alita rurashganta y waquincunana alita rurashganta, chaytaga tantianchimi ¿au? Paraisuchoga Jehová manami permitingachu pipis mana alicunata rurananpaj. Mana alita rurajcunaga manaraj wanur imayca juchacunatami rurashga. Chauraga, ¿Jesús imataj niycargan “cawananpaj” y “fisyupaj” cawarimojcunapita parlar?

15. ¿Pïcunataj cawananpaj cawarimunga, y imanir?

¹⁵ Alita rurajcunaga manaraj wanurmi alicunata rurashga y cawanapaj libruchomi jutincuna escribiraycan, chaymi paycunaga cawarimunga cawananpämi. Alicunata rurajcuna cawarimunanpaj Juan 5:29 texto yachachicushgan tincun Hechos 24:15 textuwan. Chaypis Romanos 6:7 textuwanmi tincun, chaychoga nin: “Pipis wañur, juchata mana aparicunnachu”. Alita rurajcuna wanuptin juchancuna ilgacäcunmi y ali cajcunata rurashganmi ichanga Jehová yarparaycan (Heb. 6:10, Biblia Panao). Chayno captinpis paycuna cawarimuptin Jehovalata cäsucur siguinman, chaynopa libro de la vida nishganpita jutincuna ilgächishga mana cananpaj.

16. ¿Imataj niycanchi juiciupaj cawarimojcunapita parlarga?

¹⁶ ¿Y imataj pasanga manaraj wanur mana alita rurajcunawan? Paycuna wanuptin juchancuna ilgächishga captinpis Jehovata mana reguishpan mana sirvirganchu. Chaymi libro de la vida nishgancho jutincuna mana caycanchu. Chauraga ‘mana alita rurajcuna cawarimunanpaj’ nishganga tincunmi Hechos 24:15 textuwanpis. Paycuna juiciupämi cawarimunga. * Aumi, mana alita rurajcunaga juzgashgami capäcunga ima rurashgancunapita (Luc. 22:30). Tiempuwanrämi musyacanga paycunapita pïcunapa jutincuna libro de la vidacho escribishga cananpaj. Chauraga paycuna ni ima mana ali cajcunata ruranmannachu y Jehovalata cäsucunanpaj y sirvinanpäpis aunicunanmi.

17, 18. ¿Imatataj rurapäcunga cawarimojcunaga, y Apocalipsis 20:12, 13 nishganno imapitataj juzgashga canga?

¹⁷ Unaycho ali rurajcunapita o mana ali rurajcunapita carpis, Waranga Watacuna Jesús mandacamuptin mushoj librucuna quichacaptin chaycho caycaj leycunata cäsucärinanmi. Apóstol Juanga visiuncho ricashganpita cayno nergan: “Tsaynöpis rikarqä lapan wanuq runakuna, yachaqpis mana yachaqpis, Tayta Diospa nawpancho ichirpaykaqta. Tsaypitanami librukunata Tayta Dios kichar Libru de la Vïdatapis kicharqan. Tsay librukunata rikaykurmi runakunata juzgarqan alita o mana alitapis rurashqanman tupu” (Apoc. 20:12, 13).

¹⁸ ¿Ima rurashgancunapitataj cawarimojcuna juzgashga canga? ¿Manaraj wanur rurashganpitachuraj? Manami. Paycunaga wanushgan junajchomi lapan juchancunapita perdonashga cargan. Ichanga cawarimuptinna  chay wichan ima rurashganpitami juzgashga capäcunga. Chayga canga yachacushganpita alita o mana alita rurashganman tupu. Unay Noé, Samuel, David, Danielpis alita rurajcuna caycarpis shamoj tiempuchoga Jesuspita yachacungarämi y wanushganmanpis yäracunanpaj. ¡Mana alita rurajcunaga masrächi calpachacunanpaj caycanga!

19. ¿Imaraj pasanga cäsucuyta mana munajcunata?

¹⁹ ¿Imataj pasanga cäsucuyta mana munajcunataga? Apocalipsis 20:15 texto cayno nin: “Tsaymanmi Libru de la Vïdacho jutinkuna mana qelqaraq kaq runakunatapis qaykurqan”. Aumi, chayga niycan ushajpaj ilgächishga cananpaj. ¡Chauraga imaycanopäpis calpachacushwan libro de la vida nishgancho jutinchi imaypis guelgaraycänanpaj!

20. ¿Ima ali ruraytataj Jesús mandacamushgan wichan rurapäcushun? (Garancho caycaj dibujuta ricäriy).

²⁰ Waranga Watapa Jesús mandacamuptin alapa cushicuypämi canga. Chay wichanchomi imaypis mana yachachicushganchinomi yachachicushunpaj. Jina alita rurajcuna y mana alita rurajcuna imano cawacärishganta y imano comportacärishganta pruebaman churashga canga (Is. 26:9; Hech. 17:31). ¡Imanoraj chay wichanga shumaj yachachicushun! Chaypitaga gatejnin yachachicuychonami yachacushun, jina chayta valoranapäpis tantiarcushunmi.