1. ¿Imanirtaj runaga mana musyannachu pïmanpis yäracunanpaj?

 DIABLUPA maquincho caycaj munduchoga pïmanpis mana yäracuypämi. Cutin cutinmi jatun negocianticuna, autoridäcuna y pushacoj religiosucunapis munashganta rurashganraycur waquincunaga yäracunnachu. Jina achcajmi vecinuncunaman, amiguncunaman y familiancunamanpis yäracärinnachu. Chayno cananpaj Bibliaga unayna wilacurgan último tiempuchoga runacunaga mana cuyapäcoj, tumpacoj, amiguncunata contranman entregaj cananpaj. Runacunaga Diablunomi cangapaj mana yäracuypaj (2 Tim. 3:1-4; 2 Cor. 4:4).

2. 1) ¿Pïmantaj lapan shongunchiwan yäracushwan? 2) ¿Imataraj pipis tapucunman?

² Rasunpa cristianucunami ichanga Jehovamanmi lapan shongunchiwan yäracunchi (Jer. 17:7, 8). Cuyamashganchita y yanapämänanchipaj cajta convencido caycanchi (Sal. 9:10). Jesucristumanpis yäracunchi payga noganchiraycur wanurgan (1 Ped. 3:18). Jina cada cadalami ricanchi Bibliapa wilacuynin yäracuypaj cashganta (2 Tim. 3:16, 17). Chauraga musyanchimi Jehovaman, Jesusman y Bibliamanpis yäracunapaj. Chayno captinpis öraga pipis tapucunman, ¿hermanucunaga yäracuypächuraj caycan? Au yäracushwanmi, ¿imanir?

3. ¿Imataj pasaypa cushicunapaj caycan? (Marcos 10:29, 30).

³ Taytalanchi Jehovaga pushaycalämashcanchi cay Pachacho caycaj familiancho caycänapaj. Chaymi imayca bendiciuncunata chasquinchi (leiriy Marcos 10:29, 30). Entero Pachachomi Jehovata cuyaj y cäsucoj hermanunchicunaga  caycan. Hermanunchicunataga naupalapitanami cuyayculanchi ima marcapita captin, ima idiumata parlaptin, visticushgan y costumbrincuna tucuynopa captinpis. Lapanpitapis juntula Jehovalata adurashganchipitami masraj cushichimanchi (Sal. 133:1).

4. ¿Imanirtaj hermanunchicunata necesitanchi?

⁴ Unaypitapis cananmi masraj hermanunchicunawanga juc shongunola caycashwan. Aumi, paycunaga yanapaycalämanchimi sasacunapa pasaptinchi (Rom. 15:1; Gál. 6:2). Jina shacyächimanchi Jehovata sirviycarla caycänapaj y Jehovawan más amigo canapäpis (1 Tes. 5:11; Heb. 10:23-25). Satanasta y maquincho caycaj runacunata vencinapaj hermanunchicuna mana captenga alapa laquicuypächi caycunman. Ichiclachona pay y maquincho caycaj runacuna Diospa sirvejnincunata gaticachämäshun. Chay hora cushishgami caycäshun hermanunchicunawan juntula caycashganchipita.

5. ¿Imanirtaj waquincunaga hermanucunaman yäracunnachu?

⁵ Ichanga pilapis ninman ‘nogapäga hermanucunaman yäracunäpäga sasami’. ¿Imanir? Öraga juc hermano amigunta shonguncho caycashganta wilaycunman, y payna waquincunata wilaycun. O aunishgantapis manami ruranchu. O congregaciuncho pilapis parlayninwan o rurayninwan laquichimashwanmi. Chauraga, ¿imaraj yanapämäshun hermanunchicunaman yäracur siguinapaj?

6. ¿Imanotaj yanapämanchi cuyacoj carga hermanunchicunaman masraj yäracunapaj? (1 Corintios 13:4-8).

⁶ Cuyacoj carga waquincunaman yäracushunmi. 1 Corintios 13 caj capituluchomi achca wilacuycuna caycan cuyacoj canapaj,  chayga yanapämäshun waquincunaman masraj yäracunapaj (leiriy 1 Corintios 13:4-8). Tantiarinapaj 4 caj versiculucho nin: “Ima kaptinpis pacienciakuntsimi y pïmaytapis alimi rikantsi”. Juchata ruraptinchipis Taytalanchi Jehovaga jucla rabiacunchu, payga pacienciacojmi. Noganchipis pilapis rurayninwan o parlayninwan laquichimaptinchega jucla piñacushwanchu. 5 caj versiculuna nin “manami rabyanchu; pitapis manami nanaparanchu”. Maygan hermanulatapis nanaparaycarla caytaga manami munanchichu. Eclesiastés 7:9 textuna wilacun ‘imapitapis juclaga ama rabiacunapaj’. Chaypa trucanga Efesios 4:26 nishganno rurananchi: “Qoyaytaqa ama rabyashqala kakäriytsu”.

7. ¿Imanotaj yanapämäshun Mateo 7:1-5 textucunacho caycaj tantiachicuycuna, hermanunchicunaman masraj yäracunapaj?

⁷ Hermanunchicunaman masraj yäracunapäga Jehová paycunata ali nawilanwan ricashganno noganchipis hermanunchicunata ricashun. Jehová paycunata cuyapanmi y juchancunata yarparaycarla cacunchu (Sal. 130:3). Hermanunchicuna pantashgancunalaman yarparaycänapaj trucanga, alita rurashgancunata yarparaycäshun y masraj rurananpaj puedishganmanpis (leiriy Mateo 7:1-5). ‘Payga mana ali ruraytami munan’ nir yarpänapaj trucanga ali cajta rurananpämi yarpanchi, porque cuyacoj carga lapantami creishun (1 Cor. 13:7). Chayga manami ninanchu mana reguir paycunaman yäracushganchita, sinoga mayna ricachimashcanchi paycuna yäracuypaj cashganta, chayga alimi caycan Jehovapa nawinpaj. *

8. ¿Imataraj ruranquiman waquincunaman masraj yäracunayquipaj?

⁸ Pilamanpis yäracunapäga tiempuwanrämi canga. ¿Imataraj ruranquiman waquincunaman masraj yäracunayquipaj? Reuniuncunacho paycunawan parlay shumaj reguinayquipaj. Yachachicushgayqui hora yanagäshunayquipaj niriy. Paycunawan pacienciacuy y mañacushgayquita ruraptenga yäracuypaj cashganta yarpay. Juc cristiano masiquita shumaj mana reguirga manachi shonguyquicho caycajtaga wilacunquichu. Ichanga ichiclapa ichiclapa payta reguiptiquega shonguyquicho ima cashgantapis wilacunquinachi (Luc. 16:10). Y yäracushgayqui cristiano masiqui laquichishuptiquega, ¿imataraj ruranquiman yapay yäracunayquipaj? Payman yäracushänachu ninayquipaj trucanga tiempo pasananpaj jaguiy. Chayno pasashga captinpis waquincunamanga jinala yäracuycay. Chaypäga yachacushun Biblia wilacushgan Diosta sirvejcunapita, paycunatapis waquincuna laquichergan. ¿Imataraj rurapäcurgan waquincunaman yäracuycarla caycänanpaj?

9. 1) ¿Imatataj Ana rurargan Elipa wamrancuna mana alicunata ruraptinpis? 2) ¿Imatataj yachacunqui Anapita? (Dibujutapis ricay).

⁹ ¿Congregaciuncho pilapis carguyoj caycar mana alipa tratashushcanquichu? Chayno captenga Ana pasashganta yanapäshunquimi. Pay cawashgan wichanga Diospa Palabranpita yachachicunanpaj más autoridäyoj Elí jutiyoj sumo sacerdotimi caycargan. Wamrancuna ichanga mana alicunata rurapäcoj, sacerdoticunano caycarpis jucwan jucwan punucärej, pero Taytan Eliga shumaj corrigejchu. Chayno captinpis Jehovaga  Elita cargunpita jucla jorgurganchu. ¿Y imatataj Ana rurargan? Jinala Elí sumo sacerdotino sirviycaptinpis Anaga tabernaculuman Jehovata adurananpaj aywaycarganlami. Pasaypa laquishga Ana mañacuycaptinmi, Eliga shumaj cuentata mana gocur shincatashga warmitano ricar mana alipa tratargan (1 Sam. 1:12-16). Chayno captinpis, Anaga Jehovata aunipargan wamran yuriptenga tabernaculuman apananpaj. Aumi, Samuelta chaycho sirvinanpaj y Elí ricananpäpis aparganmi (1 Sam. 1:11). ¿Y Elipa wamrancunaga corregiypächu caycargan? Aumi, y Jehová tiempulanchomi corregirgan (1 Sam. 4:17). Chaycamaga Jehová Anata bendicirgan juc wamrawan y Samuel nir jutichipargan (1 Sam. 1:17-20).

10. ¿Imanirtaj Davidga waquincunaman yäracuycarganla?

¹⁰ ¿Cuyashgayqui amiguyqui mana alipacu tratashushcanqui? Chayno captenga Davidta pasashganta yanapäshunqui. Rey caycaptin wamran Absalón contranman sharcurgan rey cananpaj, y Davidpa amigun Ahitofelpis Absalunta yanapargan. Chaycuna pasacushganga Davidtaga alapachi laquichergan. Chayno captinpis waquincunaman yäracuycarganlami y Husái amigunman yäracurgan, payga Davidpa contranman sharcojcunata yanapaycarganchu. Alimi Husaiman yäracuycargan, payga cawaynintapis peligruman churargan Davidta yanapänanpaj (2 Sam. 17:1-16).

11. ¿Imanirtaj Nabalpa ashmaynin Abigailman yäracoj?

¹¹ Jina Nabal jutiyoj rico runapa juc ashmayninman yarpay. Davidga yanagajnincunawan Nabalpa uysheruncunata suacojcunapita chapargan. Tiempuwanga imalatapis garaycunanpaj mañacurgan. Nabalga imatapis mana garananpaj nergan, chaymi Davidga pasaypa rabyacur ‘Nabalpa olgu caj ashmaynincunata lapanta wanuchinanpaj’ nergan. Juc ashmayninmi pasacushganpita Abigailta wilargan. Cawaynin peligrucho caycashganta musyarpis gueshpicunanpaj trucan Abigailman yäracurgan, tantiaj y yachaj warmi captin chay problemata alchananpaj yarpargan. Yäracushganga alipami cargan. Abigailga  mana manchacuylapa Davidta taripaj aywargan ruwacunanpaj, yarpashganta mana rurananpaj (1 Sam. 25:2-35). Jina Abigailpis yäracurgan David wiyacunanpaj cajman.

12. ¿Imanotaj ricächicurgan Jesusga waquincunaman yäracushganta?

¹² Discipuluncuna pantacuptinpis Jesusga paycunaman yäracojmi (Juan 15:15, 16). Discipuluncuna Santiago y Juan Jesús gobernamuptin laduncunacho jamacunanpaj mañacuptin, Jesusga yarparganchu paycunaga puesturaycur sirviycashganta ni discipuluncuna manana cananpaj nerganchu (Mar. 10:35-40). Preso charishgan chacaycho lapan discipuluncuna cachaycur, gueshpir aywacärergan (Mat. 26:56). Jesusmi ichanga paycunaman jinala yäracuycargan “wañungancama pay cuyaran” (Juan 13:1, Biblia Ambo Pasco). Cawarimurnami discipuluncunata mandargan may chaychopis yachachicur discipulucunata rurananpaj, y cristiano masincunata ricananpäpis churarganmi (Mat. 28:19, 20; Juan 21:15-17). Alimi paycunaman yäracurgan. Paycunapis wanushganyajmi sirvirgan. Chauraga Ana, David, Nabalpa ashmaynin, Abigaíl y Jesuspis waquincunaman yäracurgan. Paycunapita yachacunchi noganchicunapis waquincunaman yäracunapaj.

13. ¿Imanirtaj sasa canman waquincunaman yäracunapaj?

¹³ Yäracushgayqui hermanuta lapan shonguyquicho caycajta wilashcanqui, nircur ichanga waquincunapis chaypita parlaycashganta wiyanqui. Chauraga ‘chay hermanumanga mana yäracushänachu’ nirchi yarpanqui ¿au? Juc cuticho juc pani yarpachacuyninpita juc ancianuta wilaycurgan. Nircur ichanga warminmi chay panita gayargan shacyächinanpaj, ¿imanir? Runanchi pani wilacushganta cuentata mana gocur warminta wilaycurgan. Chaymi paniga chay ancianuman yäracurgannachu. Chayno captinpis paniga juc ancianutana yanapänanpaj ashirgan y paynami yanapargan lapan ancianucunaman yapay yäracunanpaj.

14. ¿Imatataj juc hermanuta yanapargan yapay yäracunanpaj?

¹⁴ Juc wauguishi achca watapa ishcay ancianucunawan rabiashgala caycargan, ‘paycunaga mana yäracuypämi’ nir yarpaj. Chayshi respetashgan juc waugui nishganta yarpargan: “Enemigunchiga caycan Diablumi manami hermanunchicunachu”. Chaymi chay hermano wiyashganman yarpachacur, Jehovata ruwacurgan rabiashgala mana caycänanpaj. Tiempuwanga chay ishcay ancianucunawan amistanacärergan.

15. ¿Imanirtaj yapay yäracunapaj achca tiempuraj pasan? Pani Grete pasashganta wilacamuy.

¹⁵ ¿Imaylapis congregaciuncho yanapacuycashgayquicho mana yanapacunayquipäna nishushcanquichu? Chauraga alapachi laquicushcanqui. 1930 wata wichan Alemania naciuncho Jehovapa testiguncunata gaticachaycaptinpis, pani Grete mamanwan jinalami Jehovata sirvircaycargan. Grete panita Wilacamoj revistapita copiacunata rurananpaj pushacoj hermanucuna nergan. Chaymanshi mayapäcurgan Gretipa taytan Jehovapa testiguncunapa contrancho caycashganta. Gretipa taytan autoridäcunata wilacunanpaj manchacur, hermanucunaga Grete yanapacuycashganta mana yanapacunanpäna nergan. Y manami chaylachu, hermanucunaga Gretita ni mamantapis revistata aypujchu y tincurpis mana saludapäcojchu. Chayga Gretita alapa laquichergan y hermanucunata  perdunaycunanpaj y yapay yäracunanpaj achca tiempuraj pasargan. Aumi, chayno rurargan paycunata Jehová perdunaycushganta cuentata gocurmi. *

16. ¿Imanirtaj calpachacushwan waquincunaman yapay yäracunapaj?

¹⁶ ¿Pasashgan parrafucunacho wilacuycunata wiyacushganchino gampis pasaycanquicu? Chayno carga yapay yäracunayquipaj calpachacuy. Tiempo pasaptinpis jinala calpachacuycaptiquega alimi canga. Tantiarinapaj, juc micuy dañashuptiquega ‘cananga imatapis mana micushänachu’ ninquichu, chaypa trucanga shumajna acranqui imata micunayquipäpis. Chaynolami yäracushganchi hermano pantaptinpis waquincunamanga yäracuycäshunla, musyashganchinopis lapanchimi pantanchi. Mana yäracuycashganchiman yapay yäracunapaj calpachacuptinchega cushicushunmi y congregaciuncho waquincuna yäracunanpäpis yanapacushunmi.

17. 1) ¿Imanirtaj yäracuypaj cashganchega alapa ali? 2) ¿Imatataj ricashun gatejnin yachachicuycho?

¹⁷ Satanaspa maquincho caycajcunaga mana yäracuypächu caycan. Entero Pachacho caycaj hermanucunami ichanga yäracuypaj caycan y paycunataga cuyayculanchimi. Jucninchi jucninchi yäracushganchiraycur juc shongunola caycanchi. Ichiclacho jatun nacaycuna galacaycamuptenga jucninchi jucninchi yanapacunapaj listumi caycäshun. Pipis yäracuycashgayqui caj pantarcuptin mana yäracuptiquina ¿imataraj ruranquiman? Caycunata ruranapaj calpachacuptinchimi yapay yäracushun: ima pasacuptinpis Jehová ricashganno ricar, Bibliapa tantiachicuynincunata cäsucur, hermanucunata más cuyanapaj calpachacur y unay Jehovapa sirvejnincunapita yachacurpis. Chayno ruraptinchega más yäracuypaj amigunchicunaga achcami caycanga (Prov. 18:24). Pero quiquinchipis yäracuypämi cashwan, manami hermanunchicunalachu yäracuypaj cananpaj shuyarashwan. ¿Imatataj rurashwan waquincuna noganchiman yäracunanpaj? Chaytaga yachacushun gatejnin yachachicuychona.