1. ¿Imanotaj yäracuypaj runaga?

 YÄRACUYPAJ runaga aunicushganta imaypis cumplinmi y rasunpa cajtami parlan (Sal. 15:4). ‘Payga yäracuypämi’ waquincuna nipäcun. Hermanucunapis noganchipita chayno yarpapäcunanpaj munanchi. Hermanunchicuna noganchiman yäracunanpaj, ¿imacunataj yanapämäshun?

2. ¿Imanotaj yäracuypaj cashganchita ricachicunchi?

² Yäracamay niptinchilachu waquincunaga noganchiman yäracunga. Chayga caycan guellaynomi: tarinapäga sasami, ichanga raslami ograycushwan. Jehová ichanga imaypis yäracuypämi “llapan rurashanmi musyachimanchi alli cashanta” (Sal. 33:4). Jina pay rurashganno rurananchipämi munan (Efes. 5:1). Cay yachachicuychomi ricashun waquin Jehovapa sirvejnincuna imanotaj Taytan Jehovano yäracuypaj cargan. Jina parlashun pichga yanapacuycunapita waquincuna noganchiman yäracunanpaj.

3, 4. 1) ¿Imanotaj profeta Danielga yäracuypaj cashganta ricächicurgan? 2) ¿Imatataj tapucushwan?

³ Daniel jutiyoj profetapitaga yachacunapämi caycan. Babilonia marcaman preso apacäriptinpis, walca tiempulachomi yäracuypaj cashganta ricacargan. Chayga masraj ricacargan Jehovapa yanapacuyninwan rey Nabucodonosorpa sueñunta tantiachiptin. Juc cutichomi chay reyta juc sasa wilacuyta wilananpaj cargan, chayga cargan: Jehová  chay reywan rabiashga caycashganpita. Nabucodonosor mana ali geniuyoj cashganta musyar Danielga wilananpaj valurcharcunanrämi cargan (Dan. 2:12; 4:20-22, 25). Tiempuwan auquinna caycaptin yapaymi ricacargan yäracuypaj cashganta, rey Babiloniupa wasinpa tapiancho guelgaraycajcunata tantiachiptin (Dan. 5:5, 25-29). Nircur rey Darío mandäshejnincunawan cuentata gocurgan Daniel ‘más yarpaysapa cashganta’. Chaymi waquincuna achäquita ashirpis “Daniel alli runa captin imatapis mana tariranchu” (Dan. 6:3, 4). Aumi, Jehovata mana reguej autoridäcunapis musyarganmi Daniel yäracuypaj runa cashganta.

⁴ Danielpita yachacushganchimanno caycunata tapucushun: “Jehovata mana reguej runacuna, ¿imataj nogapita nipäcun? ¿Yäracuypaj y lapan ruranäpaj cashganta cumplishgätacu yarpan?”. Chayno cananpaj calpachacuptinchega Taytalanchi Jehovatami alabaycanchi.

5. ¿Imanirtaj Hananiaspitaga pï maypis yäracuypaj cashganta yarpaj?

⁵ Jesús manaraj shamuptin 455 watacho, gobernador Nehemiasmi Jerusalenpa murällanta sharcachir, chay marcata ricananpaj yäracuypaj waquin autoridäcunata churargan. Jucnin cajga cargan Hananías. “Payga caran alli runa llapantapis cumlej yäracuna. Waquin runacunapita masmi Tayta Diostapis rispitaj” (Neh. 7:2). Jehovata cuyashpan y imalachopis laquichiyta mana munarmi rurananpaj cashgantaga  shumajmi cumplej. Noganchipis Hananiasno captinchega Jehovata shumaj sirvinapaj yäracuypämi cashun.

6. ¿Imanotaj Tiquicuga ricächicurgan Pablupa yäracuypaj amigun cashganta?

⁶ Apóstol Pablupa yäracuypaj yanagajnin Tiquicupita yachacushun. Pablo presuno wasincho wichgaraycaptin Tiquicumi shumaj yanapargan, chaymi paypita nergan: “Payga allimi yanapämasha Jesucristupa willacuyninta willacuptë” (Efes. 6:21, 22). Éfeso y Colosas marcacunacho caycaj hermanucunata cartacushganta apananlapachu yäracurgan sinoga shacyächinanpaj y shogananpäpis yäracurganmi. Tiquicuga yarpächimanchi yäracuypaj y ali hermano cajcunaman, paycunaga Jehovawan amigo canapaj yanapämanchi (Col. 4:7-9).

7. ¿Imanotaj ali yanapämanchi congregaciunninchipita ancianucuna y siervo ministerialcuna?

⁷ Canan wichanpis agradecicuyculanchimi yäracuypaj ancianucuna y siervo ministerialcuna rurashgancunataga. Danielno, Hananiasno y Tiquicunopis calpachacärinmi shumaj yanapacunanpaj. Tantiarinapaj, pulan semanacho reuniunman aywaptinchi manami yarpachacunchichu ‘¿imalapis pishiycanchuraj?’ nir. Ancianucunapis agradecicärinmi yachachicunanpaj caycaj panicuna y wauguicuna shumaj preparacuptin. Jina ushanan semanacho reuniunpaj estudiantinchita invitaptinchi manami yarpachacunchichu ‘¿piraj discursuta ruranga?’ nir. Chaynolami yachachicunapaj publicaciuncunapis caycänanpaj segurumi caycanchi. Aumi, chay yäracuypaj hermanucunaga alimi yanapämanchi. Chaypitaga Jehovatami agradecicuyculanchi. Y noganchega, ¿yäracuypaj cashganchita imanotaj ricächicushwan?

8. ¿Imanotaj waquincunapa vidanta respetaycashwan yanapacuptinchipis? (Proverbios 11:13).

⁸ Hermanunchicunataga cuyanchimi y yanapanapämi yarpachacunchi. Chayno captinpis yarpachacächishganta mana wilamaptinchega manami obligashwanchu wilamananchipaj. Apostolcuna cawashgan wichan congregaciunchopis tulu shimi runacunaga carganmi, paycunaga waquincunapa vidanta musyayta munaj y lutala parlapacärej (1 Tim. 5:13). Paycunano cayta munanchichu. Cayman yarparcushun, waquincunata mana wilapänanchipaj yäracur pilapis shonguncho caycajta wilamanchi. Tantiarinapaj, juc pani ima gueshyawan caycashganta o ima pruebacunapa pasaycashganta wilamanchi y waquincunata mana wilanapaj nimanchi. Aumi, chayno captenga manami wilacushwanchu (leiriy Proverbios 11:13). * ¿Imacunachotaj más upälacushwan?

9. ¿Imanotaj familiacho lapancuna yäracuypaj canman?

⁹ Familiacho. Jucnin jucninmi yachacunman mana wilacunanpaj cashganta upälacunanpaj. Tantiarinapaj, warminpita costumbrin asicuypaj cashganta juc runa yarpanman. Ichanga manachi waquincunataga chaypita wilacunchu ¿au? Warminta cuyar mana pengacächinanpaj ni laquichinanpäpis yarpanchu (Efes. 5:33). Taytacunaga yarpapäcunman joven wamrancunaga respetuwan tratananpaj munashganta. Chauraga pantashgancunapita waquincunata manami wilacunmanchu (Col. 3:21).  Wamrancunapis upälacuyta yachacunmanmi maygan familiantapis mana pengacächinanpaj (Deut. 5:16). Familiacho lapancuna upälacunanpaj calpachacuptenga jaucala y juc yarpayla cawapäcunga.

10. ¿Imanotaj juc ali amiguga? (Proverbios 17:17).

¹⁰ Amigucunawan. Imaylapis lapanchimi shongunchicho caycaj ali amiguta wilayta munanchi. Ichanga öraga sasami. ¿Imanir? Shongunchicho caycaj waquincunata wilanapaj yachacashga mana caycaptinchi. Valurcharcur juc amiguta wilaptinchi nircur waquincunapis musyashganta wiyarga pasaypami laquicunchi. Ichanga mayraj agradecicunchi juc ali amiguta wilapashganchita waquincunata mana wilapaptin. ¡Chayga ali amigumi! (Leiriy Proverbios 17:17).

11. 1) ¿Imanotaj ancianucuna warmincunawan yäracuypaj cashganta ricächicun? 2) ¿Imataj yachacunchi hermanucuna wilacushganta warminta mana wilapaj ancianupita? (Fotutapis ricay).

¹¹ Congregaciuncho. Ancianucuna hermanucunapita musyashganta waquincunata mana wilacuptin ‘wayra chayananta chapajno, löcu wayrapita pacacunanomi’ caycan (Is. 32:2). Musyanchimi paycunawan imapitapis parlaptinchega manami waquincunataga wilacungachu. Jina waquincunapita mana wilacunanpaj cashganta wilamänanchipaj manami niycanchichu. Y warmincunata agradecicuyculanchi hermanucunapita musyashganta wilacunanpaj mana tapupaptin. Cushicuypämi ancianucuna warmincunata mana wilapaptin hermanucuna yarpachacächishganpita wilashganta. Juc ancianupa warmin nergan: “Agradecicömi runä imatapis mana wilamaptin hermanucunata shacyächishganta o Jehovawan más amigo cananpaj yanapashganta, ni jutincunalatapis mana wilamashganta. Nogapäga alimi, yanapacuyta mana puedishgächo imatapis mana nimaptin. Chaynopa lapan hermanucunata igualpa ricä. Y musyämi shongücho caycajta runäta wilaptëga  manami waquincunata wilangachu”. Chauraga yäracuypaj cashganchita lapancuna yarpapäcunanpaj munanchi. Chayno canapaj pichga yanapacuycunata ricärishun.

12. Tantiachicamuy imanirtaj cuyacoj carga yäracuypaj cashun.

¹² Yäracuypaj canapäga cuyacoj cashwan. Más ali mandamientucuna ishcay cashganta Jesús nergan, Jehovata cuyanapaj y runa masinchitapis (Mat. 22:37-39). Pipitapis más yäracuypäga Jehovami caycan y payta cuyaptinchimi payno canapaj calpachacunchi. Jina hermanunchicunata cuyashpanchimi imacunapa pasashgantaga wilamashganchita manami waquincunata wilapanchichu. Imapis pengacächinanpaj o laquichinanpaj captenga imaypis wilacushunchu (Juan 15:12).

13. ¿Imanotaj yanapämanchi humilde captinchi yäracuypaj runa canapaj?

¹³ Humilde captinchimi yäracuypaj cashun. Ñanpu shongu cristianuga imatapis musyashganta jucla wilacuyta munangachu (Filip. 2:3). Ni ali tucungachu mana wilacunanpaj cashganta puntata musyaptinpis. Jinamanpis humilde carga quiquinchipa yarpayninchilata parlacur purishunchu, imapitapis Biblia y publicaciuncuna mana yachachicuptenga.

14. ¿Imanotaj tantiaj cashganchega yanapämanchi yäracuypaj canapaj?

¹⁴ Shumaj tantiacoj cristianuga musyangami imay “upälla cacunan timpu” cashganta y imay “parlanan timpupis” cashganta (Ecl. 3:7). Waquin marcacunachoga nipäcun “Parlacushganchega guellay japuy cashganta y upälacushganchega gori japuy cashganta”. Chayga ninan upälacunapaj tiempo cashganta y parlacunapaj tiempo cashgantapis. Chaymi, Proverbios 11:12 textucho cayno nin: “Tantiyaj runami ichanga upälla cacun”. Juc ali tantiaj ancianupita parlarcushun, paytaga sasa cajcunacho waquin congregaciuncho yanapacunanpaj nipäcun. Juc anciano paypita cayno nin: “Payga yäracuypaj ancianumi waquin congregaciuncunacho hermanucunapa problemancunata imano yanapashganta wilacur purinchu, upälala cacun”. Shumaj tantiacoj cashganraycur congregaciunninpita anciano masincuna payman alapa yäracärin.

15. Tantiachicamuy, ¿imanotaj yanapämäshun rasun cajlata parlaptinchi yäracuypaj canapaj?

¹⁵ Rasun cajlata parlaptinchega yäracuypaj runa canapaj yanapämäshun. Imaypis rasun cajta parlaj runaga yäracuypämi (Efes. 4:25; Heb. 13:18). Tantiarinapaj, juc hermano shumaj discursuta rurananpaj juc waugui wiyananpaj ashin y imalachopis aliyarcunanpaj ninanpäpis. ¿Pitataj ashinman? ¿Wiyayta munashgalanta ninanpaj amiguta, o imalachopis aliyarcunanpaj cuyapaylapa rasun cajta ninanpaj amigutacu? Tantianchimi pitataj ninanpaj cajta ¿au? Bibliaga cayno nin: “Wakin runaqa amïguyki karpis lutanta ruraptiki manami imatapis nishunkitsu. Wakin runami itsanqa ali kawanaykipaq anyapäshunki. Jaqayänayki kaptinpis amïguyki corrigishushqaykiqa alimi kaykan” (Prov. 27:5, 6). Amigunchi corregimashganchega chasquinapaj sasa captinpis alipami caycan.

16. ¿Imanotaj tantiachimanchi Proverbios 10:19 munashgalanchita dominaptinchega ali cashganta?

¹⁶ Munashgalanchita dominayta yachacuptinchega yanapämäshun waquincuna  noganchiman yäracunanpaj. Chayga yanapämäshun upälacunapaj pipis shonguncho caycajta wilamashganchita mana wilacunapaj (leiriy Proverbios 10:19). Redes sociales nishganta utilizaptinchega munashgalanchita dominanapäga sasarämi canman, ¿imanir? Pajta cuentata mana gocur mana wilacunapaj cashganta parlaycushwanmi. Chayno captenga pïcuna musyananpaj cashganta y problemacuna yuriptenga alchanapäga imanopapis camäpacushunchu. Jina munashgalanchita dominaptinchega upälacushunmi chiquimajninchicuna hermanunchicunapita tapupämaptinchi. Cayga öraga pasacunman maygan naciunlachopis Diospita yachachicuptinchi autoridäcuna gaticachämaptinchi. Chayno pasacuptin o ima pasacuptinpis cay tantiachicuymi yanapämäshun: “Fiyu runakunapa nawpanchöpis upälakushaqmi” (Sal. 39:1). Yäracuypaj cashwan familianchiwan, amigunchiwan, hermanunchiwan y pï may runawanpis. Y chaypäga yanapämäshun munashgalanchita dominaptinchi.

17. ¿Imatataj lapanchi rurashwan congregaciuncho cada ununchi yäracuypaj canapaj?

¹⁷ Agradecicuyculanchimi Jehová cuyacoj y yäracuypaj familianman pushaycälamashganchipita. Lapanchimi cada cadala calpachacushwan jucninchi jucninchipis yäracuypaj runa canapaj. Aumi, cuyacoj canapaj, humilde canapaj, shumaj tantiacoj canapaj, rasun cajlata parlanapaj y munashgalanchita dominanapaj cada ununchi calpachacuptinchega, ichiclapis yanapacuycäshunmi congregaciuncho lapanchi yäracuypaj canapaj.