Biblia tantiachicushganta ricärishun.

Hechos 24:15 nin: “Cawarachimongami alli rurajta, mana allita ruraj cajtapis”. Alita rurajcunaga manaraj wanurmi Jehovata cäsucärergan, chaymi libro de la vida nishgancho jutincuna guelgaraycan (Mal. 3:16). Mana alita rurajcuna ichanga, manaraj wanur Jehovata shumaj reguinanpaj mana atiparganchu, y jutincunapis cawanapaj librucho mana escribiraycanchu.

Juan 5:28, 29 textucunapis tantiachicun Hechos 24:15 parlaycashganpita. Jesusga nergan: “Alli cajcunaga imaycamapis Tayta Diospa ñaupancho cawananpaj cawarimonga. Juchallata rurasha cajcunami ichanga fisyuchöpis jusgasha canallanpaj cawarimonga”. Alita rurajcunaga manaraj wanurmi alicunata rurargan y jutincunapis libro de la vidacho escribiraycan, chaymi paycunaga cawananpaj cawarimunga. Mana alita rurajcunami ichanga mana alicunata rurargan, chaymi paycunaga juiciupämi cawarimunga. Jutincunaga libro de la vidacho mana guelgaraycanrächu, chaymi paycunaga juzgashga capäcunanpämi cawarimunga. Chay wichanchomi, Jehovata reguinanpaj y sirvinanpäpis yachachishga capäcunga, chaynopa jutincunapis libro de la vidacho guelgarashga cananpaj.

Apocalipsis 20:12, 13 textucuna tantiachicun lapan cawarimojcunami librucho guelgaraycajcunata cäsucärinanpaj caycanga, chayga caycan mushoj leycunami. Y mana cäsucojcunaga imaycamapis ilgächishgami canga (Is. 65:20).

Daniel 12:2 wilacun waquin wanushgacunami “kawarimunqa imayyaqpis kawapäkunanpaq y wakinnami kawarimunqa imayyaqpis nakapäkunanpaq” pasaypa pengaycho cananpaj. Cay textuga tantiachicun último pruebacho waquincuna imaycamapis cawapäcunanpaj, y waquincunanami pasaypa pengaycho cananpaj. Chauraga Waranga Watacuna ushacaptin waquincuna imaycamapis cawapäcunga, y waquincunaga imaycamapis ilgächishga canga (Apoc. 20:15; 21:3, 4).

Chay ishcay grupo cawarimojcunata tincuchishwan juc naciunman cawananpaj aywaj jäpa runacunawan. Alita rurajcunaga caycan visa nishgan documentuta chasquej jäpa runacunano, chay documentuwan arunanpaj, wasin cananpaj y mascunata rurananpäpis camacan. Mana alita rurajcuna ichanga caycan turista japuy o walca tiempulapaj visa nishgan documentuta chasquej jäpa runacunano. Chay naciuncho cawayta munarga autoridäcuna camacächishgan leycunatami cäsucärinan. Chaynolami, paraisucho cawayta munarga Diospa Gobiernunpa leycunatami cäsucärinan, y alita ruraj runano cawacärishgantapis ricachicunan. Naga jäpa runacunapita parlashganchipita ima visa nishgan chasquiptinpis tiempuwan waquincuna chay naciuncho cawapäcunanpaj quedacunga, waquincunanami gargushga capäcunga. Chayga canga chay mushoj naciuncho imano comportacärishganpitami. Chaynolami, chay ishcay grupo cawarimojcunapis paraisucho cawapäcunanpaj o mana cawapäcunanpäpis mana jaguicoj cashganpita y ima rurapäcushganpitami canga.

Jehovaga manami laquipäcoj Dioslachu caycan, sinoga imaypis alita ruraj Diospis caycanmi (Deut. 32:4; Sal. 33:5). Cuyacoj cashganta ricachicunga alita rurajcunata y mana alita rurajcunata cawarachimuptinmi, jina payga shuyaranga cawarimojcuna ima ali cashganta y ima mana ali cashganta leynincunata cäsucärinanpaj. Jehovata cuyajcuna y cäsucojcunalami paraisuchoga imaycamapis cawapäcunga.