1. Pedro wanunanpaj ichiclana pishiycaptin, ¿imataj rurargan Jehovapa yanapacuyninwan?

 APÓSTOL Pedruga achca watacunapa Jehovata sirvirgan, Jesustapis yanagargan runacunata yachachicur, mana judío caj runacunatapis predicayta galaycurgan y chay wichan cristianucunata Pushajcunano yanapacurgan. Ichiclana pishiycaptin wanunanpaj 62 y 64 watacuna wichan Jehovapa yanapacuyninwan ishcay cartacunata cristiano masincunata cartacamurgan, 1 y 2 Pedro nishgan. Payga munarganmi wanushgana caycaptinpis cartacamushgancuna yäracoj masincunata yanapänanpaj (2 Ped. 1:12-15).

2. ¿Imanirtaj Pedro cartacamushganga alapa alimi cargan?

² Pedro cartancunata escribimushgan wichan cristianucunaga tucuy pruebacunaraycur alapa nacarcaycargan (1 Ped. 1:6). Chay wichan congregaciuncho waquin fiyu runacunaga lutancunata yachachicur galaycärergan y waquincunata pantachiyta munargan juchata rurar cawapäcunanpaj (2 Ped. 2:1, 2, 14). Jerusalencho tiyaj cristianucunapis ichiclacho ricanman cargan Jerusalén marca y templuntapis Romapita soldaducuna ushacächishganta (1 Ped. 4:7). Chaymi Pedro cartacamushganga chay wichan cristianucunata yanapargan pruebacunata aguantananpaj y shamoj watacunapaj camaricushgala carcaycänanpaj. b

3. ¿Imanirtaj Pedro cartacamushgancunapita yachacunanchi?

 ³ Pedro cartacamushgancuna unay cristianucunapaj captinpis, Jehovaga munargan Palabrancho escribishga o guelgashga quedacunanpaj y chaypitaga noganchipis yachacunchimi (Rom. 15:4). Cawashganchi tiempuga öraga manami facilchu Jehovata sirvinapaj y runacunaga juchalata rurar cawapäcun. Jina ichiclacho Jerusalenta y templuntapis pasashganpita más sasa nacaycunaparämi pasashwan. Chauraga Pedro escribishgan cartacunapitaga yachacushun imano camaricushgala carcaycänapaj Jehovapa junajninpita, runacunata mana manchacunapaj y cristiano masinchicunawanpis alapa cuyanacunapaj. Cay yachachicuycunaga ancianucunatapis yanapangami yäracoj masincunata ali cuidananpaj.

4. ¿Imacuna pasaptintaj öraga dudar galaycushwan? (2 Pedro 3:3, 4).

⁴ Runacunaga manami yäracärinchu shamoj tiempupaj Biblia wilacushganta. Jehovapa testiguncunaga achca watacunapanami wilacuycanchi cay mundupa ushacaynin chayamunanpaj, chayta wiyar capaz waquin runacunaga burlacur galaycärinman, ‘chayga manami rasunpachu canga’ nipäcunmanpis (leiriy 2 Pedro 3:3, 4). Pilapis predicaciuncho, trabajunchicho o familianchi chayno nimaptinchega capaz dudarpis galaycushwanchi. Chayno captenga, ¿imaraj yanapämashun? Ricärishun Pedro nishganta.  

5. ¿Imanirtaj yäracunchi cay mundupa ushacaynin rasunpa chayamunanpaj cajta? (2 Pedro 3:8, 9).

⁵ Waquincunaga ‘imayraj Jehová cay mundupa ushacayninta apamunga’ nir yarpapäcunman. Ichanga Pedruga yarpächimanchi imano Jehová tiempupita yarpashganta, payga manami runacunanochu yarpan (leiriy 2 Pedro 3:8, 9). Paypäga waranga watacunaga juc junajnolami caycan, jina pacienciacoj cashpan mana munanchu pipis wanunanta. Chaymi yäracunchi cay mundupa ushacaynin rasunpa chayamunanpaj cajta. Chay tiempo chayamunancama cushi cushila runacunata yachachicuycashwan.

6. ¿Imacunaman yarpachacurtaj camaricushgala shuyaycashwan Jehovapa junajninta? (2 Pedro 3:11, 12).

⁶ Pedruga nimanchi camaricushgala carcaycänapaj Jehovapa junajninpita (leiriy 2 Pedro 3:11, 12). Chaytaga ruranchi cada cadala yarpachacuptinchi mushoj Pachacho imano cawacunapaj cajman. ¿Ricacunquinachu jaucala o tranquilula goyaycashgayquita y mishqui micuycunata micuycashgayquita? ¿Yarpachacunquichu cuyashga castayquicuna wanushganpita cawarircamur chasquishgayquita y unay runacunatapis canan wichan profeciacuna imano cumplicuycashganta tantiachishgayquita? Cay lapanman yarpachacurga riccha ricchala shuyarcaycanqui Jehovapa junajninta y cay mundupa ushacaynintapis. Musyanchinami ichiclacho imacuna pasananpaj cajta, chaymi luta yachachicuycunawan pantachimänanchita jaguishunchu (2 Ped. 3:17).

7. ¿Runacunata manchacurga imaraj pasamashwan?

⁷ Jehovapa junajnin caylachona caycashganta musyar waquin runacunatapis Diospa ali wilacuynincunata yachachicuyta munanchi. Ichanga öraga runacunata manchacur chaycunapita parlapayta munanchichu. Chaytaga Pedrutapis pasargan, Jesusta juzganan chacaycho payga manami nirganchu Jesuspa discipulun cashganta y quimsa  cuticunacho niegargan payta reguishganta (Mat. 26:69-75). Ichanga tiempuwanga manami manchacurgannachu, chaymi cayno nergan: “Pitapis ama mantsakärinkitsu ni chikishuptikipis lakikärinkitsu” (1 Ped. 3:14). Noganchipis Pedruno runacunata manami manchacushwanchu.

8. ¿Imaraj yanapämäshun runacunata mana manchacunapaj? (1 Pedro 3:15).

⁸ ¿Imaraj yanapämäshun runacunata mana manchacunapaj? Pedruga nimanchi “Jesucristo ämuyki kashqanta” yarparay (leiriy 1 Pedro 3:15). Señorninchi Jesusga poderyoj Rey cielucho caycan. Chauraga pilatapis predicanayquipaj manchacurga yarparay Reyninchi Jesús cielucho gobernaycämushganta chaychicaj angelnincunawan. Ama gongaychu paytaga “kay patsachöpis y jana patsachöpis lapanpaq munayniyuq kananpaqmi Tayta Dios” churashqanta, y quiquinpis nergan: “Noqaqa qamkunawanmi imaypis kaykäshaq kay patsa ushakänanyaq” (Mat. 28:18-20). Pedruga consejamanchi imaypis listo caycänapaj imaman yäracushganchicunapita parlapänapaj. ¿Munanquimanchuraj trabajuyquicho, escuelayquicho o maycho caycarpis pilatapis Diospita parlapayta? Chayno captenga, yarparay imano chayta ruranayquipaj y cutin cutinmi yachacuy imata ninayquipaj. Jina Jehovata mañacuy valurcharcunayquipaj  y yäracuy pay yanapäshunayquipaj runacunata mana manchacunayquipaj (Hech. 4:29).

9. ¿Pedruga imaypis cuyacojchuraj cargan? (Dibujutapis ricay).

⁹ Pedruga yachacurganmi shongupita cuyacoj cananpaj. Payga wiyarganmi Jesús cayno nishganta: “Qamkunata kuyashqäno jukniki juknikipis kuyanakärinki. Kay nishqäkunaqa mushuq mandamientumi kaykan” (Juan 13:34). Ichanga tiempuwan waquincuna jamurpänanta manchacur, Pedruga mana judío cajcunawan micuyta munarganchu. Chaymi apóstol Pabluga nergan Pedruga ishcay cära cashganta (Gál. 2:11-14). Pablo olgüpashganta chasquiycur Pedruga cambiarganmi. Chaymi cartacamushgancunacho nergan manami shimilapitachu cuyacoj cashganchita ninapaj, sinoga rurayninchicunachomi ricacämunman.

10. ¿Imaraj yanapämäshun familianchita cuyashganchino hermanunchicunatapis cuyanapaj? (1 Pedro 1:22).

¹⁰ Pedruga nergan familianchita cuyashganchino hermanunchicunatapis cuyanapaj (leiriy 1 Pedro 1:22). Diosninchega pï may runacunatapis chasquinmi, chayga noganchitapis yachachimanchi chaynola waquincunata ricänapaj (Hech. 10:34, 35). Congregaciunpita acrashga hermanucunalata cuyaptinchega, Jesús nishganta rasunpa manami cäsucuycanchichu. Öraga capaz waquincunalawan más amigo cayta munashwanmi, Jesuspis waquin discipuluncunalawan más amigo cargan (Juan 13:23; 20:2). Chayno captinpis Pedruga yarpächimanchi familianchita cuyashganchino hermanunchicunatapis cuyanapaj, chaymi cayno nimanchi: “Yärakuq mayikikunawan kuyanakärinki” (1 Ped. 2:17).

11. ¿Imanotaj canman shongupita cuyacoj runaga?

¹¹ Pedruga consejargan “lapan shonquykiwan kuyanakäriy” nir. Chaywanga niycämanchi waquincunata cuyayta mana munarpis cuyananchipaj calpachacunanchi. ¿Imataraj ruranquiman maygan yäracoj masiqui rabianächishuptiqui? Payta cuyanayquipaj trucanga capaz chaynola cutichiyta munanquiman. Ichanga Jehovaga manami munanchu chayta ruranapaj, Jesuspis Pedruta chayta yachachergan (Juan 18:10, 11). Pedruga cayno escribergan: “Runa mayiki chikishuptikipis ama chikipäkuytsu. Ashlishuptikipis ama ashlipäkuytsu.” Sinoga “bendicionta chaskinanpaq Tayta Diosta manakärinki” (1 Ped. 3:9). Shongupita cuyacoj captiquega pipis ofendishuptiqui o rabianächishuptiquipis jinala paycunata cuyanquimi.

12. 1) Hermanunchicunata shongupita cuyarga, ¿imatataj rurashwan? 2) ¿Imataj yachacunchi Cuidemos nuestra valiosa unidad nishgan videupita?

¹² Naupa caj cartancho Pedro nergan: “Rasunpa kuyakuq runaqa imaykata ruraptinpis perdonanmi” (1 Ped. 4:8). Cayta escribiycur Pedruga yarparganchi unaycho Jesuswan perdonpita parlashganta. Payga Jesusta nergan: runa masëtaga, “¿ayka kutitaq perdonäman? ¿Qanchis kutitsuraq?”. Chayno nir Pedruga yarparganchi alita ruraycashganta. Ichanga Jesusga yachachergan ganchis chunca ganchis cuticuna o mana yupaypa perdunananpaj; chaypitaga noganchipis yachacunchimi (Mat. 18:21, 22). Juchasapa cashganchiraycur Jesús nishganta cäsucunapaj sasa captenga ama guelanäcuychu. Lapan puedishgayquimanno calpachacuy runa masiquita perdunanayquipaj, chaynopa paycunawan jaucala goyäcunayqui. c

13. ¿Imanirtaj ancianucunapäga öraga sasa canman hermanucunata ali cuidananpaj?

¹³ Jesusga cayno nergan Pedruta: “Uyshäcunata shumaq mitsinki”, y chaytaga Pedro manami gongarganchu (Juan 21:16). Gampis ancianuno yanapacurga Jesús nishganta cäsucunquiman. Ichanga imaycata ruranapaj captin sasachi canman lapanta cumplinayquipaj. Ancianucunaga familian lapan necesitashgancunata camaripan, jina espiritual cajcho y laquishga mana caycänanpäpis yanapan. Chaypitapis calpachacun imaypis predicaciunman yargunanpaj, y reuniuncunacho asambleacunacho yachachicamunanpaj preparacunanraj. Waquincunaga Hospitalcho atiendicunanpaj cajcunata y Localcunata sharcachiychopis yanapacun. Ancianucunapäga imayca ruraynincuna caycan.

14. ¿Imanirtaj ancianucuna calpachacärin yäracoj masincunata ali cuidananpaj y chaypäga imaraj yanapanman? (1 Pedro 5:1-4).

¹⁴ Pedruga waquin ancianucunata nergan: “Tayta Diosman yärakuqkunata shumaq rikapäkuy” (leiriy 1 Pedro 5:1-4). Ancianucunaga yäracoj masincunata cuyanmi, chaymi imanopapis yanapacuyta munapäcun. Ichanga achca ruraynincuna captin o utishga caycar sasachi canman lapantaraj cumplipäcunanpaj. Chayno captenga, ¿imataraj ruranquiman? Imano ricacushgayquita Jehovata wilarcuy, Pedruga nergan: “Wakinkunata yanapanaykipaq habilidäta chaskishqa kaykarqa Tayta Dios yanapashushqaykiman tupu yanapay” (1 Ped. 4:11). Congregaciuncho hermanucuna imacunapa pasashganga capaz canan wichan alchacangachu. Ichanga ama gongaychu Jesucristo gampitapis masraj rurayta puedishganta, chayga canman canan tiempucho y shamoj tiempuchopis. Jehovaga munan ancianucuna yäracoj masincunata cuyananpaj, ali pushananpaj y waquincunapa ricaynincho ali ricashga cananta.

15. ¿Imataj juc ancianuga ruran yäracoj masincunata ali cuidananpaj? (Fotutapis ricay).

¹⁵ Achca watapana ancianuno yanapacoj William cristianuga calpachacun hermanucunata ali cuidananpaj. COVID-19 gueshya galaycuptin congregaciunninpita waquin  ancianucunawan calpachacärergan altanto carcaycänanpaj grupuncho caycaj hermanucunapita. Payga nin: “Hermanunchicuna wasincunacho japalan carcaycashganraycur más fácil cashga mana alicunaman yarpar galaycunanpaj”. Chaymi juc cristiano problemacunapa pasaptin Williamga shumajla wiyan imata necesitashganta y imata yarpachacaycächishgantapis musyananpaj. Nircur juc videuta o maygan yachachicuylatapis ashin chay hermanuta yanapänanpaj. Williamga nin: “Alapa alimi caycan canan hermanunchipita altanto caycänapaj. Runacunata Jehovapita parlapänapaj calpachacushganchino, chaynolami calpachacunanchi hermanunchicunatapis cuidanapaj; chayta rurarga rasunpa caj nänipita witicuringachu”.

16. ¿Imanotaj cäsucushhwan Pedro cartacamushganta?

¹⁶ Cay yachacuychoga waquilanlata yachacushganchi Pedro cartacamushgancunapita, capazchi mayna yarpachacuycanqui imalachopis mejoranayquipaj. ¿Maslata yarpachacuyta munanquimanchuraj shamoj tiempucho imano cawacunapaj cajman? ¿Valurcharcunquimanchuraj trabajuyquicho, escuelacho o maychopis Diospita parlapänayquipaj? ¿Yarpaycanquinachu imano mastaj lapan shonguyquiwan yäracoj masiquicunata cuyanayquipaj? ¿Anciano captiquega decididuchu caycanqui lapan shonguyquiwan y empeñuwan hermanuyquicunata cuidanayquipaj? Chaycunaman yarpachacur imalachopis mejoranayquipaj captenga, ama guelanäcuychu; yarparay Tayta Dios cuyacoj cashganta y yanapäshunayquita munaycashgantapis (1 Ped. 2:3). Pedruga nimanchi “Tayta Dios yanapämäshun jutsata mana ruranantsipaq, pay munashqanno kawanantsipaq y payman shumaq yärakunantsipaq” (1 Ped. 5:10).

17. ¿Imataraj tarishun valurcharcuptinchi y Jehovata mana cachaycuptinchi?

¹⁷ Juc cuticho Pedro mana valejno ricacorgan Jesuspa naupancho caycaptin (Luc. 5:8). Ichanga Jehovawan Jesús yanapashganta ricar, Pedruga wanunancama Jesuspa discipulun cargan, chayraycur “salvamaqnintsi Señor Jesucristo” mandaycashganman yaycurgan (2 Ped. 1:11). ¡Pedro chasquishgan bendiciunga alapa shumajmi! Gampis Pedruno valurcharcuptiqui y Jehovata mana cachaycuptiquega, mana ushacaj cawayta chasquinqui. Aumi, Diosman yäracurga ‘salvacionta tarinquimi’ (1 Ped. 1:9).