1. ¿Jehoás, Uzías y Josías imacunapataj pasargan?

 WAMRALARAJ o jovinlaraj cashpayqui Diospa marcanta gobernaptiquega, ¿imanoraj canman? Manachi facilchu canman ¿au? Biblia wilacamun Jehoás ganchis watayoj caycaptin, Uzías 16 watayojpita y Josías pusaj watayoj charaycaptin Judá marcapa reynin capäcushganta. Chasquishgan cargucunata ali cumplipäcunanpaj sasa captinpis, yanapacuycuna caycarganmi ali cajcunata rurapäcunanpaj.

2. ¿Imata ruranapätaj yanapämäshun Jehoás, Uzías y Josías rurashganga?

² Jehoás, Uzías y Josías cashganno rey mana captinchipis, paycuna ali cajta y mana ali cajcunata rurapäcushganpita achcami caycan yachacunapaj. Chay yachacushganchicunaga yanapämäshun ali amigucunata acrananchipaj, humilde cananchipaj y imaypis Jehovata ashinanchipaj.

3. ¿Imatataj Jehoás rurargan Jehoiadá ali consejashganraycur?

³ Jehoás rurashganno ali cajcunata acray. Itilaraj caycaptin, taytanmi wanurgan. Chaymi sacerdote Jehoiadá wamrantano uywargan y Jehovapita yachachicurgan. Jehoiadá ali consejashganta cäsucur Jehoás ali cajcunata acrargan, Jehovalata sirvirgan y israelitacunatapis yanapargan Jehovata sirvinanpaj. Jina Diospa templuntapis alchachergan (2 Crón. 24:1, 2, 4, 13, 14).

4. ¿Imanirtaj ali caycan Jehovata cäsucuyga? Katia y Anastasia pasashganpita parlacaramuy (Proverbios 2:1, 10-12).

⁴ Taytayquicuna o pilapis Bibliapita yachaycächishuptiquega  juc shumaj regaluta goshushgayquinomi caycan (leiriy Proverbios 2:1, 10-12). Taytacunaga tucuynopami wamrancunata yachachinman alicunata acrananpaj. Chaytaga rurargan Katia jutiyoj cristianapa taytan. Payshi cada junaj escuelaman apashgancho Bibliapita parlapaj. Katia wilacun: “Taytä rurashganga yanapämargan escuelächo ima problemacunatapis vencinäpaj”. Ichanga imaraj canman taytayquicuna Bibliawan nishuptiqui ‘cayta ruray’ o ‘cayta ama ruraychu’, y chayraycur munashgayquitaga rurayta puedinquinachu. Anastasia cristianapa taytancunapis chayta rurargan, ichanga paycunaga Anastasiata shumaj tantiachergan chay rurashgancunaga ali caycänanpaj cashganta. Pay nin: “Tantiargä taytäcuna rurashgancunaga cuyamashganraycur cashganta imapitapis chapämänanpaj”.

5. Ali cajcunata acraptiquega, ¿imanotaj Jehová y taytayquicuna ricacunga? (Proverbios 22:6; 23:15, 24, 25).

⁵ Taytayquicuna Bibliawan consejashushgayquita cäsucuptiquega paycuna cushicärenga, y masga Jehovata cushichinqui. Jina paywan imaycamapis amigo cayta puedinqui (leiriy Proverbios 22:6; 23:15, 24, 25). Chayta munaptiquega calpachacuy Jehoás rurashganno ruranayquipaj.

6. ¿Jehoás pïcunatataj cäsucurgan, y chayraycur imamantaj chayargan? (2 Crónicas 24:17, 18).

⁶ Jehoás mana alicunata rurashgantaga ama ruraychu. Jehoiadá wanushganpita, Jehoasga Jehovata mana cuyaj Judacho mandajcunapa consejuncunata cäsucuyta galaycurgan, paycunaga mana ali amigucuna cargan (leiriy 2 Crónicas 24:17, 18; Prov. 1:10). Chayta rurashganpita mana alicunaman chayargan, y primun Zacarías corrigiptinpis Jehoasga piñashga caycar wanuchinanpaj mandargan (2 Crón. 24:20, 21; Mat. 23:35). Upa runano lutanta rurargan. Galananlacho alicunata rurarpis, tiempuwanga runa wanuchejman ticrargan y Jehovapa contranmanpis churacargan. Chaymi sirvejnincunala payta wanuchergan (2 Crón. 24:22-25). ¡Jehovata y Diosta cuyajcunata cäsucurga manachi mana alicunamanga chayanmanchu cargan! Jehoás rurashganpita, ¿imataj yachacunquiman?

7. ¿Imano runataj amiguyquicunaga canman? (Fotutapis ricay).

⁷ Jehoás pantashganraycur ima pasashganpitaga yachacunchi imaypis Jehovata cuyaj y cäsucoj amigucunata acranapaj, chayta rurarga alimi cawacushun. Amigunchicunaga tucuy edäpitami canman. ¿Manachu  Jehoiadá auquinna caycarpis Jehoaspa amigun cargan? Chaymi amiguyquicunaman yarpar cayno tapucuy: “¿Paycunaga yanapämanchuraj Jehovaman masraj yäracunäpaj? ¿Nimanchuraj Diospa mandätuncunata cäsucunäpaj? ¿Cada cadala Jehovapitachuraj parlapacuycan y Bibliantapis leipäcunchuraj? ¿Diospa leynincunata cäsucärinchuraj? ¿Imalachopis pantarcuptëga corregimanchuraj?” (Prov. 27:5, 6, 17). Amiguyquicuna Jehovata mana cuyaptenga, paycunapita witicurinquimanmi. Ichanga Jehovata cuyaj amiguyquicunapitaga imaypis ama raquicaychu (Prov. 13:20).

8. ¿Internet-ta utilizarga imacunamantaj yarpachacunquiman?

⁸ Internetcho yargamushgan cajcunaga yanapämanchimi familianchicunawan y amigunchicunawanpis parlapacurinapaj. Ichanga achcajmi imayca rurashgancunapita ali tucur internetman churapäcun waquincuna ricärinanpaj. Gampis internet-ta utilizarga, cayno tapucunquiman: “¿Waquincuna ricamänantachu munä? ¿Imata munartaj chayta rurä? ¿Juccunata shacyächiytachu o nogapita ali parlanantachu munä? ¿Waquincunano yarpar y rurashganno nogapis imaycata rurayta galaycö?”. Nathan Knorr hermanunchipis, cayno nergan: “Runacunalata cushichinapaj imaycacunata rurarga yangalapämi canga. Ichanga Jehovata cushichiptinchega waquincunatapis cushichishunmi”.

9. ¿Imataj Uzías rurargan Jehovapa yanapacuyninwan? (2 Crónicas 26:1-5).

⁹ Uzías rurashganno ali cajcunata acray. Joven cashpanmi Uziasga humilde cargan y ‘TAYTA DIOS munashqannömi kawarqan’. Chaymi lapanchopis Jehová bendicirgan, payga 68 watacamami cawargan (leiriy 2 Crónicas 26:1-5). Payga calpachacurganmi Jerusalén marca imapitapis chapashga cananpaj, chaymi achca chiquej marcacunata vencirgan (2 Crón. 26:6-15). Jehovapa yanapacuyninwan imaycacunata rurashganta ricar Uziasga cushicurganchi (Ecl. 3:12, 13).

10. ¿Imataj Uziasta pasargan?

¹⁰ Uzías mana alicunata rurashganta ama ruraychu. Uzías rey cashpanmi pï maytapis cayta wacta rurananpaj mandacoj. Chaychi lapan munashgancunata rurananpaj yarpargan. Juc cuticho, Jehovapa templunman yaycuycur inciensuta rupachergan, chaytaga sacerdoticunalami ruranman cargan (2 Crón. 26:16-18). Chayraycur sumo sacerdote Azarías piñapaptinpis, payga alapa rabiacurgan. Uzías achca watacunapa alicunata rurashga carpis nircur pantaycurgan, y chayraycur Jehová leprawan castigargan (2 Crón. 26:19-21). ¡Humilde runa carga chayta manachi ruranmanchu nacargan!

11. ¿Humilde cajcunaga imatataj ruran? (Fotucunatapis ricay).

¹¹ Uzías munayniyoj reyman ticraycur gongaycushga Jehovapa yanapacuynilanwan imaycacunata rurashganta. Caypitaga yachacunchi Jehovata sirvir imaycata rurashga carga ama gongashwanchu Jehovapa yanapacuyninlawan chay lapanta rurashganchita. Chaymi imata rurarpis ali yarguptenga, Jehovata agradecicushwan (1 Cor. 4:7). b Humilde carga waquincuna corregimaptinchipis ama piñacushunchu. Juc hermanulanchi 60 watayojpita cayno nin: “Yachacushgä lapan rurashgäcunaga Jehovapa yanapacuyninwanraj cashganta. Chaymi imalachopis pantarcuptë  pipis corregimaptenga, calpachacö mejoranäpaj y ali cristianuman ticranäpaj”. Humilde cashpanchi Jehovata cäsucurga, alimi cawacushun (Prov. 22:4).

12. Josías mozularaj caycar, ¿imatataj rurargan? (2 Crónicas 34:1-3).

¹² Josías rurashganno ali cajcunata acray. Josías mozularaj caycaptin Jehovata ashirgan. Diosninta shumaj reguiyta munargan y voluntänintapis rurayta. Paypäga manami facilchu cargan rey cananpaj; chay wichan runacunaga luta dioscunatami adurapäcoj. Chaymi valiente canman cargan rasunpa caj aduraciunta defendinanpaj. ¡Y chaytami rurargan! Casi 20 watayojla caycaptin, Judá marcacho luta dioscunata adurananpaj imaycacunata ushacächir galaycurgan (leiriy 2 Crónicas 34:1-3).

13. Jehovalata sirvinayquipaj bautizacurga, ¿imanotaj yanapäshunqui?

¹³ Gampis mozularaj caycarga, Josiasno Jehovata ashinquiman. Chaytaga ruranqui Bibliata leir y Jehová imano cashganpita yachacur. Chayga yanapäshunqui bautizacunayquipaj. ¿Cayga imanotaj yanapäshunqui cawayniquicho? Luke 14 watayojla caycar bautizacurgan, y cayno wilacun: “Cananga imapitapis más puntata Jehovata sirviyta y payta cushichiyta munä” (Mar. 12:30). Chayta rurarga imayca bendiciuncuntami tarinquipaj.

14. ¿Imataj rurapäcun waquin jovincuna Josías rurashganno?

¹⁴ ¿Jehovata sirvej jovincunaga ima sasacunapataj pasapäcun? Johan 12 watayojla caycar bautizacurgan, y estudiaj masincunash cutin cutin nipäcun cigarruta mucananpaj. Ichanga payga yarpan chayta ruraptin gueshyananpaj cajta y Jehovawan amistänintapis ushacächinanpaj cajman. Rachel jipashpis 14 watayojla caycar bautizacurgan, y pay wilacun escuelancho ima rurashganta sasacunapa pasaptin, nin: “Colegiucho yachacushgäcunaga yarpächiman Bibliacho yachacushgäcunaman. Aumi, waquin yachacushgäcunaga tincunmi Bibliacho caycaj profeciacunawan. Y pilawanpis parlapacuptëga juc textuman  yarpä chaypita parlapänapaj”. Gampis, Josías rurashganno ali yachaj y Jehovata cuyaj mozo canquiman. Chaypäga cananlapita ima sasacunatapis venciptiquega, shamoj tiempuchopis masrämi ruranqui.

15. ¿Imataj Josiasta yanapargan Jehovalata sirvinanpaj? (2 Crónicas 34:14, 18-21).

¹⁵ Rey Josías 26 watayoj caycar templuta alchachipäcuycashgancho tarirgan, “Moisés chaskishqan mandamientukuna qelqaraykashgan libruta”. Chay librucho ima nishganta musyar, rey Josiasga calpachacurgan Ley nishganta cäsucunanpaj (leiriy 2 Crónicas 34:14, 18-21). ¿Gampis calpachacuycanquichu Bibliayquita cada cadala leinayquipaj? Y chayta mayna ruraycarga, ¿cushishgalachu leinqui? ¿Ima mastaraj ruranquiman leishgayqui textucunata mana gonganayquipaj? 13 caj parrafucho parlashganchi Luke jovinga cuadernunchoshi guelgaj leishgancunacho ima alicunata tarishganta. ¿Gampis chayta ruraptiquega yanapäshunquimanchuraj leishgayqui textucunata yarpänayquipaj? Cada cadala Bibliayquita cushishgala leiptiquega, gänasniquipis masrächi canga Jehovata sirvinayquipaj. Rey Josiasta yanapashganno Diospa Palabranga gamtapis yanapäshunquimi alicunata ruranayquipaj.

16. ¿Imanirtaj Josiasga pantargan, y imataj chaypita yachacunchi?

¹⁶ Josías mana alicunata rurashganta ama ruraychu. Rey Josías 39 watayoj caycar mana alicunata rurashganraycur wanuyman chayargan. Jehovaman yäracunanpaj trucan quiquinman yäracurgan (2 Crón. 35:20-25). Paypitaga yachacunchi pogushga runa caycarpis o achca watapana Jehovata sirviycarpis, jinala paypa yanapacuyninta ashinanchipaj. Y, chaytaga ruranchi Jehovata mañacuptinchi, Palabranta leiptinchi y pogushga cristianucunapa consejuncunata chasquicuptinchi. Chayta ruraptinchega, cada cadala manami pantaycäshunchu y cawayninchipis ali cangapaj (Sant. 1:25).

17. ¿Imataj yachacunchi Jehoás, Uzías y Josías reycuna rurashgancunapita?

¹⁷ Jovincunapäga imaycacuna rurananpaj caycan Jehovata sirvishgancho. Jehoás, Uzías y Josías jovincuna cashgancho alicunata rurapäcurgan, chaynolami canan wichan jovincunapis alicunata rurar Jehovapa shongunta cushichiyta puedipäcunmi. Tiempuwan ichanga paycuna mana alicunata rurashganraycur nacapäcurgan. Chaymi, paycunapitaga alicunata rurashgancunapita yachacärinquiman y calpachacärinayqui paycuna imano pantashgancunaman mana pantacärinayquipaj, chayta rurarga ali cawacärinqui.

18. ¿Pïcunataj mozularaj caycar Jehovata sirvir ali cawacärirgan? (Dibujutapis ricay).

¹⁸ Bibliaga wilacunmi waquin jovincunapis Jehovaman yäracushganraycur ali ricashga cashganpita y ali cawacushganpitapis. Jucmi cargan David. Pay mozularaj caycaptin Jehovata sirvinanpaj acrargan y tiempuwanga Jehovata cuyaj rey cargan. Pay juchacunaman ishquirpis arrepenticurgan, chaymi Jehovaga ali nawilanwan payta ricargan (1 Rey. 3:6; 9:4, 5; 14:8). David ima rurashgancunapita yachacuptiquega, yanapäshunqui Jehovalata mana cachaypa sirvinayquipaj. Jina alichi canman Marcos y Timoteo rurashgancunapitapis yachacunayquipaj. Paycuna jovincunalaraj caycar calpachacärergan Jehovata tucuynopa sirvipäcunanpaj. Chayno Jehovapa shongunta cushichergan y ali cawacärergan.

19. ¿Jehovata sirvirga imanotaj cawacunquiman?

¹⁹ Canan wichan imacunata rurashgayquipitami shamoj tiempucho cawayniqui imano cananpaj canga. Quiquiqui yachashgayquilaman yäracunayquipaj trucan Jehovaman yäracuptiquega, paymi yanapäshunqui imaypis alicunata ruranayquipaj (Prov. 20:24). Maquiquichomi caycan ali y cushishga cawacunayquipaj. Jehovaga manami gonganchu payraycur lapan rurashgayquicunata sirvinapaj. Ama gongaychu, Taytalanchi Jehovaga amatar cuyayculäshunqui. ¡Jehovata sirvishganchega imapitapis más ali caycan!