1. ¿Imata munartaj öraga aroj masinchicuna y estudiaj masinchicunapis tapupämanchi?

 MAYGANLAPIS aroj masiquicuna o estudiaj masiquipis creenciayquicunapita tapupäshuptiquega capaz waquincunano öraga manchacunquimanmi. Pilapis chaycunata tapupämaptinchega capaz öraga Bibliapita yachachicushwanmi. Jina cuentatapis gocunchi imano runa cashganta y noganchipita imata yarpaycashgantapis. Ichanga waquincunaga Testigucunapita mana alicunata wiyashganraycur, creencianchicunapita rimanacuyta munar capaz tapupämäshunmi, chayno captenga ama manchacushwanchu (Hech. 28:22). Bibliaga nimanchi “ultimo tiempucho” cawaycashganchita, chaymi runacunaga “tumpakuq” y “ali ruraqkunapa contran sharkuq” (2 Tim. 3:1, 3).

2. ¿Imanirtaj jucla rabiacoj runa cashwanchu?

² Pilapis imaman yäracushgayquicuna yangala cashganta nishuptiquega, ¿imaraj yanapäshunqui rimanacuyman mana chayanayquipaj?. Chaypäga jucla mana piñacoj runa canayqui. Waquincuna yäracushgayquiraycur ashlipäshuptiquipis geniuyquita dominanayqui (Prov. 16:32). Öraga chayta ruranapaj sasa captinpis calpachacunquimanmi mana piñacoj runa canayquipaj. Ichanga pilapis rimanacuyta munar creenciayquicunapita tapupäshuptiqui, ¿imacunaraj yanapäshunquiman mana rabiacunayquipaj? Y wamrayquicuna captenga, ¿imanotaj paycunata yanapanquiman yäracuyninpita ali shimilapa parlapänanpaj? Ricärishun.

3. ¿Pipis jucla mana rabiacuptenga nishwanchuraj débil runa cashganta? (2 Timoteo 2:24, 25).

³ Pipis jucla mana rabiacuptenga nishwanchu débil runa cashganta. Imapis sasaman ticracuriptin jucla mana rabiacunapäga calpachacunanchirämi. Y chaypäga Jehovapa espiritun yanapämanchimi (Gál. 5:22, 23). Pipis juc chúcaro cawalluta manshuman ticrachiptenga, manami ninanchu chay cawallu calpaynaj o débil cashganta. Chaypa trucan manshuna caycarpis jinala calpayoj caycan. Chaynolami geniunta controlaj runapis alapa sinchi cashganta ricächicun. Y chayno cananpäga manami quiquinchicunalapitachu caycan, sinoga Jehovapa yanapacuyninwanrämi geniunchita controlayta puedishun. Chaymi achca Testigucuna geniunta controlashpan piwanpis rimanacuyman manami chayapäcunchu, chayta ricar waquincunaga Testigucunata respetar galaycärin (leiriy 2 Timoteo 2:24, 25). ¿Imataraj ruranquiman jucla mana rabiacoj runa canayquipaj?

4. ¿Imataj yachacunchi Isaac rurashganpita?

⁴ Bibliaga wilamanchi jucla mana rabiacoj runacunapita. Guerar pampacho Isaac tiyaycaptin, uyshancunapaj yacuyoj pozucunata ojtichimurgan, ichanga filisteo runacuna pasaypa chiquishpan ojtishgan pozuncunata pampaycurgan. Isaac chaycunaraycur peliananpaj trucan juc ladupana aywacurgan y mushoj pozucunata ojtichimurgan (Gén. 26:12-18). Chayta ricaycur filisteocunaga nipäcurgan chaycho caycaj yacuga paycunapita cashganta. Chay jinanpa pasaycarpis, Isaacga mana jucla rabiacurganchu (Gén. 26:19-25). ¿Imataj yanapargan chayno runa cananpaj? Taytancunachi chayno capäcorgan. Abrahanga piwanpis jaucala cawacoj runa cargan y maman Sarapis pacienciacoj y piwanpis ali goyäcoj warmi cargan (1 Ped. 3:4-6; Gén. 21:22-34).

5. ¿Maxence imano runa cananpätaj taytancuna yachachergan?

⁵ Canan wichan taytacunapis wamrancunata yachachinman jucla mana rabiacoj capäcunanpaj. Maxence 17 watayoj caycaptin imapa pasashganta ricärishun. Payga escuelancho y predicacionchopis rabiacoj runacunawanshi parlapacärej. Taytancunaga pacienciawan yachachinan cargan paypis jucla mana rabiacoj runaman mana ticrananpaj. Taytancuna nipäcun: “Wamräga shumaj tantiarcushga, calpachacuptinraj geniunta contrulananpaj cashganta”. ¡Cananga Maxence jucla mana rabiacunnachu, chayga alapa alimi!

6. ¿Imanirtaj Diosta mañacunanchiraj jucla mana rabiacunanchipaj?

⁶ Imaraj canman pilapis Jehovapita lutancunata parlaptin o Biblia yachachicushgancunapita burlacuptin. Chayno captenga, mana rabiacuylapa parlapänapaj Jehovata ruwacushun espíritu santunta gomananchipaj. ¿Y imataraj rurashwan yapaycho más shumajraj parlapänapaj cashganta cuentata gocurga? Jehovata yapay ruwacushun y shumaj yarpachacushwan yapaycho imata ninapaj. Chayno ruraptinchega, Jehová espiritunwan yanapämäshun mana rabiacuylapa pilatapis ali shimilapa parlapänapaj.

7. Bibliapita waquin textucunata umachicurcuptinchega, ¿imapätaj yanapämanchi? (Proverbios 15:1, 18).

⁷ Bibliapita waquin textucunata umachicurcuptinchega yanapämashwanmi imapis sasaman ticracuriptin ali shimilapa parlananchipaj. Diospa espiritunga yarpächimäshunmi leishganchi textucunata (Juan 14:26). Proverbios librucho achca consejucuna  caycan yanapämänanchipaj piwanpis jaucala goyäcunapaj (leiriy Proverbios 15:1, 18). Jinamanpis tantiachimanchi chay consejucunata cäsucurga ima alicunata tarinanchipaj (Prov. 10:19; 17:27; 21:23; 25:15).

8. ¿Imamantaj yarpachacushwan pilapis creencianchicunapita tapupämaptinchi?

⁸ Alapa alimi caycan pipis tantiacoj captenga (Prov. 19:11). Chayno runaga geniunta shumaj controlacun pipis creenciancunapita imaycata tapupar galaycuptin. ¿Manachu carucho caycaj jircacunapaga, puntalan ricacämun? ¿Imanir? Waquin jircacuna chaparaycaptinmi. Chaynolami pipis creencianchicunapita tapupämaptinchega, manami musyanchichu imata munartaj tapupaycämanchi. Chaymi ali canman manaraj contestarga yarpachacunanchiraj imanirtaj tapupaycämanchi (Prov. 16:23).

9. ¿Tantiacoj runa cashpan imataj Gedeón rurargan?

⁹ Gedeón pasashganman yarpachacushun. Juc cuticho madianitacunawan peliaj aywananpaj mana wilacushganpita, Efraín tribupita runacuna Gedeonta rabiawan parlapargan. ¿Imanirtaj chayno parlapargan? ¿Ali tucoj runacuna cashganraycurchuraj?,  o ¿waquin tribucunapita más importante cashganta yarparchuraj? Imano captinpis Gedeonga tantiacoj runa cashganraycur ali shimilapa contestargan. Chayno parlapaptinmi paycunaga cushicärergan (Juec. 8:1-3).

10. ¿Imatataj cuentaman churananchi pilapis creencianchicunapita tapupämaptinchi? (1 Pedro 3:15).

¹⁰ Öraga maygan estudiaj masinchi o aroj masinchi tapupämashwan imanirtaj Biblia nishganno cawacushganchipita. Creencianchicunapita ali tantiachicuyta munarpis, alimi canman paycuna creishgancunata respetaptinchi (leiriy 1 Pedro 3:15). Chaymi creencianchicunapita tapupämaptinchega juzgaycämashganchitanoga ricashwanchu. Chaypa trucanga cuentata gocushwan imaman yarpachacushganta, chaynoparaj musyashwan imano ali shimilapa contestanapaj. Chayta ricarga quiquincunami cuentata gocärenga imaman creishgancuna luta cashganta. Waquincuna ashlipämaptinchipis alichi canman calpachacunanchipaj ali shimilapa contestanapaj (Rom. 12:17).

11, 12. ¿Imamanraj puntata yarpachacushwan pilatapis manaraj contestarga? Wilacamuy imanotaj chayga yanapanman parlar siguinapaj. (Fotutapis ricay).

¹¹ Imaraj canman maygalan aroj masinchi tapupämaptinchi imanir cumpleañuta mana rurashganchipita. ¿Imamantaj naupataga yarpachacushwan? ¿Payga yarpanchuraj chayta mana ruranapaj pilapis michaycämashganchita? ¿Yarpachacunchuraj aroj masinchicuna cushish cananta mana munashganchita? Imano captinpis agradecicushwan aroj masinchicunapaj yarpachacushganta y waquincunawan jaucala arucuyta munashganchitapis nirishwan. Chayta ruraptinchega yapaycho cumpleañospita Biblia ima nishganta wiyaytapis munanmanchi.

¹² Chaynolami rurashwan ima temalapitapis rimanacuyman mana chayanapaj. Capaz öraga estudiaj masinchicuna nimashwan olgupura warmipura cacojcunata Testigucuna mana ali ricashganta. Chayno niptenga, ¿jucla yarpashwanchuraj payga Testigucunapita mana ali yarpashganta? ¿Maygan amigunlapis o familianlapis chaynochuraj capäcun? O ¿Yarpanchuraj Testigucuna paycunata chiquishganta? Chayno captenga tantiachicushwanmi lapan runacunapaj yarpachacushganchita y cada uno acrashganchitapis respetashganchita (1 Ped. 2:17). b Chayta rurarga capaz Bibliapita parlapaptinchi shumaj wiyamashwanmi.

13. ¿Imanoraj pilatapis yanapashwan Diosman creishganchi yangala cashganta nimaptinchi?

¹³ Pilapis creencianchiwan acuerducho mana captenga, ¿jucla nishwanchuraj payga Bibliapa contrancho caycashganta? (Tito 3:2). Juc estudiaj masiqui ‘loco imachi caycanqui Diosman creinayquipaj’ nishuptiqui, ¿jucla ninquimanchuraj pay evoluciunpita lapan musyashganta? Capaz yarpashgapischu chaycunaman. Chauraga rimanacuyman chayanayquipaj trucanga juc tapucuyta ruray yarpachacunanpaj. Jina Dios ima camashgancunapita jw.org paginacho caycaj juc temapita juc enlacitapis apachicunquiman. Chayta ruraptiquega capaz maygan temalapitapis o videulapitapis parlapacuyta munanman. Pitapis respetuwan trataptinchega noganchipita alitana yarpar galaycunga.

14. Estudiaj masin Testigucunapita mana alita yarpaptin, ¿imataj Niall rurashga yanapänanpaj?

¹⁴ Ricärishun Niall jutiyoj mozo estudiaj masinta yanapashganta Testigucunapita  mana alita mana yarpänanpaj. Niall nin: “Estudiaj masëga imaypis nimaj cienciaman mana creishgäta, sinoga Bibliacho caycaj luta wilacuycunaman”. Estudiaj masinga manashi wiyayta munarganchu Niall creenciancunapita tantiachicuyta munaptin. Chauraga Niall nergan jw.org paginaman yaycunanpaj, “La Biblia y la ciencia” nishganpita leinanpaj. Estudiaj masin chayta rurashganta cuentata gocurga, Niall mozupäga más facilnami cargan pitaj camamashganchipita parlapänanpaj. Noganchipis chaycunata rurarga alimi canga.

15. ¿Imataraj taytacuna rurapäcunman wamrancuna ali shimilapa creenciancunata tantiachinanpaj?

¹⁵ Taytacunaga wamrancunata shumaj yachachinman ali shimilapa parlapänanpaj pilapis creenciancunaraycur rimanacuyta munaptin (Sant. 3:13). Diosta aduranapaj horachomi waquin taytacunaga wamrancunawan shumaj yachacun imano creenciancunata defendinanpaj. Jinamanpis wamrancunata yachachipäcunman mana rabiacuylapa parlapänanpaj, chaynopa waquincuna maslata yachacuyta munananpaj (“ Taytacunaga wasincho wamrancunata yachachishganga yanapangami” recuadruta ricay).

16, 17. Jovincuna taytancunawan wasincho yachacushganga, ¿imanotaj yanapanga creenciancunata defendinanpaj?

¹⁶ Familianchiwan yachacushganchega jovincunata yanapanga creenciancunapita shumaj tantiachicunanpaj, jina quiquincuna imaman creishgancunapitapis seguro caycänanpaj. Chaypäga jw.org paginacho caycan “Jóvenes” nishgan yanapacuy, chaycho yurimun “Ponlo por escrito” nishgan ruraycuna jovincunapaj. Chaycunaga jovincunata  yanapan yäracuynin masraj mirananpaj y quiquincuna creenciancunapitapis tantiachicunanpaj. Lapanchipis chaycunapita y “Los jóvenes preguntan” nishganpita yachacurga, musyashunmi imano creencianchicunapita pï maytapis ali shimilapa parlapänanchipaj.

¹⁷ Matthew jovinga familianwan Diosta aduranapaj horachoshi cutin cutin yachacurgan escuelancho pipis creenciancunapita tapupaptin imano contestananpaj. Payga nin: “Taytämi juc estudiaj masëpita ruraj y pay imalatapis tapupämaptenga, yachacushgämanno contestaj cä. Diosman yäracushgäpita quiquë seguro caycarga, yanapämanmi waquincunata mana manchacuypa ali shimilapa contestanäpaj”.

18. Colosenses 4:6 nishganno, ¿imanotaj runacunata creencianchicunapita parlapashwan?

¹⁸ Creencianchicunapita ali claruta tantiachiptinchipis waquincunaga öraga chasquimashwanchu. Ichanga ali shimilapa parlapaptinchega capazchi wiyamashwanpis (leiriy Colosenses 4:6). ¿Manachu pilawanpis pelotawan puclarga, despaciula pasananchi puclar siguinanpaj? Ichanga toscuypa o fuertipa pasaptinchega capazchi puclaytapis munanganachu. Chaynolami runacunapis ali chasquimäshun o mastaraj wiyaytapis munanga creencianchicunapita ali shimilapa parlapaptinchega. Ichanga pipis rimanacuylata munaptenga, witicurishwanmi (Prov. 26:4). Pero caycanrämi ali shongu runacuna. Paycunaga wiyayta munapäcunmi.

19. ¿Imaraj pasanga creencianchicunata ali shimilapa defindiptinchi?

¹⁹ Canan ricashganchino, alapa alimi caycan jucla mana rabiacoj runa captinchega. Pipis rimanacuyta munaptin o creencianchicunapita mana alicunata parlaptenga Jehovata mañacuy jucla mana rabianächishunayquipaj. Chayta rurarga piwanpis rimanacuymanga manami chayashunchu. Respetulawan y ali shimilapa parlapaptinchega runacunaga imaman creishganchipita y noganchipitapis manami lutantaga yarpanganachu. Chauraga pipis creencianchicunapita tapushuptiquega, tantiachinayquipaj “imaypis kamarikushqala karkaykay” (1 Ped. 3:15). ¡Ama gongaychu jucla mana rabiacojcunaga sinchimi capäcun!