1. ¿Imanotaj Pedro ricacurgan Jesuspa naupancho caycar?

 PEDRO warayta alapa arurpis manami juc pescadulatapis charirganchu. Chaura Jesús nergan: “Mas washa läduman büquikita apaykur rednikita mashtapäkuy pescädukunata tarimunaykipaq” (Luc. 5:4). Jesús nishganpita dudaycarpis Pedruga cäsucurganmi, chaura redninpis rachicashganyaj pescaducunata charipäcurgan. Chaura juc milagro cashganta ricar, Pedruwan waquincunaga pasaypa manchacärergan, y Pedruga Jesusta nergan: “Tayta, nawpäpita witikulay. Jutsasapa runami kä” (Luc. 5:6-9). Payga yarparganchi Jesuspa naupancho cayta mana merecishganta.

2. Pedro imapa pasashganpita yachacuptinchega, ¿imataj cuentata gocunchi?

² Pedro nishganga rasunmi, ‘juchasapa runami cargan’. Bibliaga wilamanchi achca cuticunacho pantashganta. ¿Gampis Pedrunochu ricacunqui? ¿Cada cadala imalachopis pantarcur jinala luchaycanquichu chayman yapay mana ishquinayquipaj? Chayno captenga, jinala calpachacunayqui y Pedro rurashganpita yachacunquiman. Jehová munarga Pedro imacunacho pantashgancunata Palabrancho manami churanmanchu cargan, ichanga chaycho caycan noganchi yachacunanchipaj (2 Tim. 3:16, 17). Pedro noganchino pantaj y sentimientuyoj runa cashganpita yachacurga, cuentata gocunchi Jehovaga manami shuyaranchu sirvejnincuna juchaynaj runacuna cananchita. Payga shuyaran imalachopis  pantarcuptinchi guepaman mana cutinapaj, sinoga jinala sirviycänapaj.

3. ¿Imanirtaj guepaman cutishwanchu?

³ ¿Imanirtaj imalachopis pantarcurga guepaman cutishunchu? Pipis tucapacoj cananpäga canga achca watacunacho yachacushganpitarämi. Puntalachoga capaz achca cuticunacho pantaycushga, ichanga cutin cutin yachacurga más shumajna tucayta yachacurgan. Jina ali tucapacoj captinpis juc ishcay cuticunacho pantaycungarämi. Ichanga chayraycurga ‘manami tucashänachu’ nerga yarpangachu. Chaynolami noganchiwanpis canman. Öraga achca watacunapana juchaman mana ishquishga carpis, capaz ilajpita juchasapa cashganchiraycur imalachopis pantarcushwanmi. Chayno captenga, guepaman ama cutishunchu. Taytalanchi Jehovaga listo caycan yanapämänanchipaj (1 Ped. 5:10). Ricärishun imataj Pedruta yanapargan guepaman mana cutinanpaj. Achca cuticunacho pantarcuptinpis Jesusga paywan cuyapäcoj cargan, chayga noganchitapis yanapämäshun Jehovata sirviycarla caycänapaj.

4. ¿Imatataj Pedruga nergan quiquinpita, y imanotaj Jesús shacyächergan? (Lucas 5:5-10).

⁴ Bibliaga manami wilacunchu imanir Pedro “jutsasapa runami kä” nishganta (leiriy Lucas 5:5-10). Cawaynincho jatun juchacunata rurashganraycur yarparchi chayno nergan. Jesusga ricarganmi Pedro quiquinpita seguro mana caycar manchacushganta. Chayno captinpis Jesusga musyarganmi ali shongu cashpan cäsucoj cananpaj. Chaymi cuyacuywan cayno nergan: “Ama mantsakaytsu”. Chayta wiyarga Pedruga alapachi cushicurgan, chaymi tiempuwan wauguinwan Andrés trabajunta jaguiriycur Jesuspa discipuluncunaman ticrapäcurgan. Chayta rurashganraycur, achca bendiciuncunata tarergan (Mar. 1:16-18).

5. ¿Ima bendiciuncunatataj Pedro tarirgan Jesuspa discipulunman ticrashganpita?

⁵ Jesuspa discipulun cashpan, Pedruga ricargan Jesús gueshyaycajcunata alchacächishganta, supaycunata gargushganta y wanushgacunatapis cawarachimushganta (Mat. 8:14-17; Mar. 5:37, 41, 42). b Jina juc visiunchopis ricargan imano Jesús Diospa Gobiernuncho rey cananpaj cajta (Mar. 9:1-8; 2 Ped. 1:16-18). Aumi, Pedruga manachi yarparganchu chaycunata ricaycunanpaj. ¡Mayrajchi  Pedruga cushicurgan quiquinpita mana alita yarpar guepaman mana cutishganta! Jesuspa discipulunman ticraycur achca bendiciuncunata chasquergan.

6. Pedruga bendiciuncunata chasquishgana carpis, ¿nishwanchuraj manana pantashganta?

⁶ Pedro imaycata ricashga y wiyashga carpis, achca cuticunacho pantaycurganrämi. Juc cuticho Jesús tantiachicuycaptin imano nacananpaj y wanuyninwan profeciacuna cumplicunanpaj, Pedruga Jesusta olgüpargan (Mar. 8:31-33). Jina waquin apostulcunawanpis achca cuticunacho rimanacärergan pï más importante cashganta (Mar. 9:33, 34). Jesús wanushgan chacaychopis, rabiashga caycashpan juc runapa rinrinta cuchurirgan (Juan 18:10). Nircur chay chacaylacho alapa manchacushpan quimsa cuti Jesusta niegargan reguishganta (Mar. 14:66-72). Chaycunacho pantarcur icchuypa icchuyparaj wagargan (Mat. 26:75).

7. Jesús cawarircamur, ¿imataj Pedruta nergan rurananpaj?

⁷ Pedro rurashganpita laquishga caycaptinpis, Jesusga jinala musyachicurgan cuyaycashganta. Chaymi cawarircamur, Pedruta yuriparcur nergan uyshancunata cuidananpaj (Juan 21:15-17). Jesús nishganta wiyar Pedruga calpachacurgan cäsucunanpaj. Chaymi Pentecostés junajcho Pedro Jerusalencho caycaptin espíritu santuwan acrashga cargan.

8. ¿Imataj pasargan Pedro Antioquiacho caycaptin?

⁸ Espíritu santuwan acrashgana caycaptinpis, Pedruga jinala luchanman cargan juchasapa cayninwan. 36 caj watacho, Jesús shamushganpitana Pedruga ricargan mana judío caj Cornelio jutiyoj runa espíritu santuta chasquishganta. Chaywanga cuentata gocurgan Tayta Dios pï may runacunatapis chasquishganta sirvejnincuna cananpaj (Hech. 10:34, 44, 45). Chaypita pacha Pedruga mana judío cajcunawanpis micupäcoj, ichanga unaychoga chayta rurapäcunmanchu cargan (Gál. 2:12). Waquin judío caj cristianucunaga mana judío cajcunawanga micupäcojchu. Chaymi juc cuticho Antioquiaman Pedro chayaycur mana judío caj cristianucunawan micupäcuyta munarganchu, judío caj cristianucuna mana jamurpänanpaj. Chayta ricaycur apóstol Pabluga waquincunapa naupancho Pedruta olgüpargan (Gál. 2:13, 14). Chayno Pantarpis, Pedruga Jehovata imaypis jaguirganchu. ¿Imataj yanapargan?

9. Juan 6:68, 69 nishganno, ¿imataj Pedro rurargan waquincuna Jesusta jaguiriptinpis?

⁹ Pedrutaga imapis Jehovapita raquichirganchu. Juc cuticho Jesús yachachicushganta waquin discipuluncuna mana tantiaycur payta jaguiriycur aywacärergan, Pedro ichanga mana (leiriy Juan 6:68, 69). Payga waquincunapa naupancho Jesusta nergan: “Nishqaykikunaqa mana ushakaq kawayta taripäkunäpaqmi kaykan”.

10. ¿Imanirtaj ninchi Jesús Pedruta cuyashganta? (Dibujutapis ricay).

¹⁰ Jesusga Pedruta manami cachaycurganchu. Pachacho caycaptin wanunanpaj chacaycho, Jesusga musyargan Pedruwan waquin apostulcuna payta cacharinanpaj. Chayno captinpis Jesusga wilacurgan Pedro valurcharcur yapay payta gatiränanpaj (Luc. 22:31, 32). Jesusga tantiarganmi alita rurayta munaptinchipis ‘quiquinchicunalapitaga manami camäpacushunchu’ (Mar. 14:38). Chaymi Pedro niegashga captinpis, Jesusga jinala payta cuyaycargan. Y cawarircamur Pedruta yuripargan (Mar. 16:7; Luc. 24:34;  1 Cor. 15:5). Chayta ricar Pedrutaga yanaparganchi laquicuycarpis guelanashga mana caycänanpaj.

11. ¿Imanotaj Pedruga musyargan Jehová imaypis cuidananpaj cajta?

¹¹ Juc cuticho, Jesús cawarimushgana caycar Pedrutawan waquin discipuluncunata yanapargan chaychicaj pescaducunata charipäcunanpaj (Juan 21:4-6). Chayta ricaycur Pedruga tantiargan lapan necesitashgancunata Jehová mana pishichinanpaj. Jina yarparganchi Jesús aunishganta, pipis Diospa Gobiernunta puntaman churaptenga Jehová lapan munashgancunatapis camaripänanpaj cajta (Mat. 6:33). Chayta musyaycur Pedruga arucuycarla caycänanpaj trucan más calpachacurgan runacunata yachachicunanpaj. Chaymi 33 wata, Pentecostés fiestacho valurwan yachachicushganraycur chaychicaj runacuna bautizacärergan (Hech. 2:14, 37-41). Tiempuwanga samaritanocunata y mana judío cajcunatapis yanapargan Jesuspa discipuluncunaman ticrananpaj (Hech. 8:14-17; 10:44-48). Jehovaga Pedruwanmi achca runacunata yanapargan sirvejnincunaman ticrananpaj.

12. ¿Imataj Pedrupita yachacunchi achca watacunapa juchasapa cayninchiwan luchaycarga?

¹² Noganchitapis Jehovaga yanapämanchimi guepaman mana cutinapaj. Öraga achca watacunapana imalawanpis luchaycarga más sasarämi canman aguantanapaj. Ichanga imacunacho pantashganchicuna Pedro rurashganpita más peor-raj captinpis, Jehovaga listumi caycan calpanwan yanapämänanchipaj (Sal. 94:17-19). Juc cristiano masinchi Bibliapita manaraj yachacur, achca watacunapa olgu runa masincunawanshi cacurgan. Chayta canan jaguirishgana captinpis, juchasapa cayninwanga jinala luchaycanrämi. ¿Imataj yanapargan guepaman mana cutinanpaj? Payga nin: “Jehová calpanta goman, y espiritunpa yanapacuyninwan [...] calpachacö guepaman mana cutiypa [...] ali caj nänilapa purinäpaj”. Caytapis nin: “Jehovaga yanapämanmi, [...] pantarcuptëpis shacyächiman valurcharcunäpaj”.

13. ¿Imataj Pedrupita yachacunchi? (Hechos 4:13, 29, 31; fotutapis ricay).

¹³ Pedro cutin cutin runacunata manchacurpis, Jehovapa yanapacuyninta ashirgan valurcharcunanpaj (leiriy Hechos 4:13,  29, 31). Noganchipis chayta rurashwan runacunata mana manchacunapaj. Ricärishun Horst cristiano mozuta pasashganta, payga Alemania naciunchomi tiyargan. Escuelancho waquincunata manchacurshi paypis “¡Hitler salvamajninchi!” nirshi saludargan. Chayta musyaycur taytancuna gayapänanpaj trucan, paywan Jehovata mañacärergan valurcharcunanpaj. Chaura Jehovaman yäracushpan y taytancunapa yanapacuyninwanmi, Horst cristianuga tiempuwan runacunata manana manchacurgannachu. Payga nin: “Jehovaga imaypis japalätaga manami cachamarganchu”. c

14. ¿Imanotaj ancianucunaga laquishga o guelanashga caycajcunata shacyächinman?

¹⁴ Jehovawan Jesusga noganchitapis manami jaguimäshunchu. Pedro Jesusta niegashgana captin, ¿yarparganchuraj discipulun manana cananpaj? ¿O valurcharcurganchuraj jinala Jesusta gatiränanpaj? Imano captinpis, Jesusga mayna Taytanta Pedrupaj ruwacushga cargan yäracuynin mana ushacänanpaj. Nircur Pedruta nergan paypaj mañacushganta y mandargan cristiano masincunatapis shacyächinanpaj (Luc. 22:31, 32). ¡Jesús nishganta wiyarga Pedruga alapachi cushicurgan! Noganchipis cawayninchichoga shumajraj yarpachacunanchi imatapis rurayta munarga. Chaypäga Jehová cuyacoj ancianucunawan shacyächimanchi imaypis ali cajcunalata acranapaj (Efes. 4:8, 11). Achca watapana ancianuno yanapacoj Paul cristianuga, calpachacun waquincunata shacyächinanpaj. Maygan hermanulanchi laquishga o guelanashga caycashganta ricarga, jucla yarpächin imano Jehová marcanman  pushamushganta, paycunata cuyashganta y imaypis mana jaguirinanpaj cajta. Chayta rurashganpita cay ancianuga ricashga achca hermanucuna Jehovapa yanapacuyninwan valurcharcushganta cushi cushila sirvinanpaj.

15. ¿Imanotaj Horst mozuga Pedruwan cuentata gocurgan Mateo 6:33 nishganga rasunpa cashganta?

¹⁵ Ama gongashunchu Pedrutawan waquin apostulcunata lapan necesitashgancunata Jehová camaripashganta. Noganchitapis chaynolami yanapämäshun paylata sirviptinchega (Mat. 6:33). Ishcay caj Jatun Guerra usharcuptin, Horst cristianuga precursorno yanapacuytash munargan. Ichanga pobre cashganraycur yarpachacurganshi imano mantenicunanpaj. ¿Imataj rurargan? Congregaciunninta watucamoj waugui visitaycaptin, payshi Jehovaman yäracur calpachacurgan waran waran predicananpaj. Chay semana usharcuptin almirashga quedacurgan watucamoj waugui guellayta goycuptin. Chay guellayga ayparganshi achca quillacunacho precursorno yanapacunanpaj. Chayta ricaycur Horst cristianuga cuentata gocurgan Jehová payta cuidashganta. Chaypitana calpachacurgan imaypis Jehovapa voluntäninta puntaman churananpaj (Mal. 3:10).

16. ¿Imanirtaj ali caycan Pedro cartacamushgancunapita yachacunapaj?

¹⁶ ¡Pedruga alapachi cushicurgan Jesús payta mana jaguirishganpita! Jesusga Pedruta yachachergan ali apóstol cananpaj y waquin cristiano masincunatapis yanapänanpaj. Y chaypitaga imayca caycan noganchipis yachacunapaj. Chay shumaj yachachicuycunaga tarinchi unay congregaciuncunata Pedro cartacamushgancho. Gatejnin yachacuycho ricärishun Pedro cartacamushgancunapita ima ali yachachicuycunata tarinchi noganchipaj y imanotaj yanapämanchi cawayninchicho.