1934 watacho yurishgä. Taytäcuna Suiza naciunpita tiyananpaj aywargan minacuna caycaj Timmins marcapaj, Ontario (Canadá) naciuncho. 1939 watacho, mamänë Wilacamoj revistata leiyta galaycurgan y Jehovapa testiguncunapa reuniunnincunamanpis aywargan y ichic tiempulacho bautizacurgan. Payga nogata y hermanöcunatapis reuniuncunaman apamaj.

Mamänë Testigo cashganpita papänë alapa rabiacuptinpis, Jehovata sirviyta imaypis jaguirganchu. Jinala Jehovata sirvirgan Canadá naciuncho autoridäcuna Jehovapa testiguncunapa contrancho sharcuptinpis, 1940 wata wichan. Papänë cutin cutin rabiacurir nanaparaptinpis mamänë ali shimilapa y respetulawan parlapaj. Ali rurashganta ricar hermanöcunawan decidishgä Jehovata sirvinapaj. Tiempuwanna papänë cuyacuylapa tratamar galaycuptin alapa cushicärirgä.

1950 watachona agosto quillacho Nueva York marcacho jatun asambleaman aywargä. Chaycho may chay naciunpita achca hermanucunata reguirgä, waquin cajcuna Galaad escuelaman aywapäcurgan; paycuna Jehovata cushi cushila sirvishganta wiyar nogapis Jehovapaj mastaraj rurayta munargä. Unaypitana lapan tiempöwan Jehovata sirviyta munargä, ichanga chay hora masraj valurcharcurgä. Chaymi wasëchona caycar jinan hora solicitudta apachicurgä precursor regularno yanapacunäpaj. Sucursalpita nipäcamargan ‘mä puntataga bautizacuyraj’ nir. Chaymi bautizacurgä 1 de octubre 1950 watacho. Juc quilla  pasariptinna precursor regularno yanapacur galaycurgä y Kapuskasing marcaman mandamargan, chay marcaga wasëpita carumi caycargan.

1951 watacho Betelpita hermanucuna wilacärergan francés rimajcuna Quebec marcacho yanapacunanpaj, chaychomi walcala Testigucuna caycargan. Nogaga inglés y francés rimayta musyargä, chaymi yanapacunäpaj nergä y Rouyn marcaman mandamargan. Chaycho pitapis reguirgächu, näga wilacushgäno juc direcciunlata charargä. Chayno captinpis shumajmi cashga, Marcelwan ali amigucuna cargä, Quebec marcacho chuscu wata cushi cushila sirvirgä, y tiempuwan precursor especialno yanapacur galaycurgä.

Quebec marcacho caycar invitamargan 26 caj clase Galaad Escuelaman aywanäpaj, South Lansing (Nueva York) marcacho. Chayta musyar alapa cushicurgä. Galaad Escuelapita yargushgä 12 de febrero 1956 watacho y nimargan Ghana, b (África) marcaman aywanäpaj. Manaraj aywar, Canadá marcaman cutirgä documentöcuna yargunanyaj shuyaränäpaj. ‘Ras yargungana’ nir yarpargä.

Ichanga documentöcuna yargunancama ganchis quilla Toronto marcacho caycargä. Chay wichan Cripps familiapa wasincho tiyargä. Chaychomi Sheila warmi wamranwan reguinacur galaycärergä. Paywan casaracunäpaj yarpaptë, documentö yargamurgan. Chay hora Sheilawan Diosta mañacur decidipäcurgä mandamashgan naciunman aywanäpaj, ‘chauraga cartanacushun, capazchi tiempuwan casaracushun’ nir parlashganchi. Chayta ruranapaj laquicuypaj captinpis, tiempuwan cuentata gocushcanchi ali cashganta.

Barcupa, trenpa y aviunpapis juc quilla viajashgäpita, Ghana naciuncho Accra marcaman chayashcä. Achca  congregaciuncunata watucunäpaj Ghana, Costa de Marfil y Togo naciuncunapa viajanämi cargan, chaypäga Betel hermanucuna carruta gomargan. Japalä viajarpis cushi cushilami watucoj aywargä.

Sábado y domingo junajcuna asambleacunacho yanapaj cä. Asambleapaj saluncuna mana captin, lantucunanpaj hermanucunaga guerucunawan palmerapa raprancunawanpis ramädalata rurapäcoj. Micunanchipaj chaylachomi cargan uywacunata pishtananpaj y lapan hermanucunata garananpaj.

Öraga asambleacunacho imayca asicuylapaj cajcunami pasargan. Juc cuticho Herb Jennings c jutiyoj misionero discursaycämuptin, ilajpita juc toro paypa naupanpa corricachaycar pasargan. Chay toru caypa wacpa corricachashganta ricar Herb upälala quedacurgan. Chay hora, chuscu sinchi hermanucuna toruta charircur apacäriptin lapancuna pajchipäcurgan.

Ruracashgan Asambleanchipa cercalancho caycaj marcacunachomi ricächej cä La Sociedad del Nuevo Mundo en acción nej videuta, chaypäga ishcay guerucho o ishcay yoracho yuraj jacuta wataycur churaj cä. Waquincunaga primera vez peliculata ricar, ¡alapa gustaj! Videucho bautizacushganta ricar maquinta pajchipäcurgan. Videuta ricar yachacärergan lapan pachacho testigucuna juc shongula cashganchita.

Ishcay watapa Africacho caycar, Nueva York marcacho jatun asambleaman aywanäpaj invitamargan, 1958 wata. Chaycho ¡Sheilawan tincur shongüpis cushicuypita punpunyargan! Payga Quebec marcacho precursor especialno sirviycargan y chaypita asambleaman shamurgan. Cartanacur caycashcanchi y chaycho tincurna ‘casaracushun’ nergä, payga ‘aumi’ nimargan. Hermano Knorrta d cartacurir mañacurgä capaz Sheila Galaad escuelaman aywananpaj, nircur África marcaman mandananpäpis, payga ‘alimi chayga’ nimargan. Ghana naciunman Sheila chayaptinna, Accra marcacho casaracurgä 1959 watacho 3 de octubre quillacho. Jehovata puntaman churashganchipita alapa bendicimashganchi.

1961 wata mandamargan Camerún naciunman, chaycho mushoj Sucursal camacänanpaj yanapacunäpaj nimargan. Chaycho imaycacunata ruranäpaj caycargan. Sucursalta ricanapaj cargutapis gomargan, achcata yachacunärämi cargan. 1965 wata doctor nimargan Sheila gueshyaj cashganta, ‘imanoraj tayta mama chashäpis’ nir laquicärergä. Tiempuwan ichanga ‘alimi caycan’ nir yarpapäcurgä. Wamranchita ashmananchipaj Canadá naciunman aywanapaj yarpaycashganchicho, ilajpita wamranchega manaraj yurir Sheilapa pachancho wanurgan, chayga pasaypa laquicuypämi cargan.

Wanushga iti wamranchi olgu cashganta doctor nimargan. 50 watapano pasarpis, wamrä wanushganta manami gongashganchichu. Fiyupa laquicuycarpis, Camerún naciuncho jinala sirvinanchipaj decidirganchi.

Camerún hermanucuna politicaman mana talucashganpita autoridäcuna chiquir gaticachargan Jehovata mana adurananpaj. Elecciones cashgan wichan más piyurmi cargan. 1970 wata 13 de mayo quillacho autoridäcuna mana munargannachu testigucuna predicananpaj ni reuniuncunacho juntacananpäpis, jina mushoj Betel wasitapis wichgapäcurgan. Manami chaylachu, chaycho caycaj lapan misionerucunata nipäcamargan jucla aywacärinanchipaj. ‘Hermanunchicunata alapa cuyar imanoraj paycunata cuidashun’ nir yarpachacurgä.

Sojta quilla Francia Betelcho caycargä, y chay marcapita Camerún hermanucunata atiendirgä. Nircur diciembre quillacho chayta ruranapaj Nigeria naciunman mandapäcamargan. Nigeria hermanucuna cuyacuywan chasquimarganchi; paycunawan achca wata Jehovata sirvir shumajmi cashga.

1973 wata Sheila gueshyawan caycashganpita yarpachacuycargä. Nueva York asambleacho caycar payga wagaycur nimargan: “Puedïnachu. Yamacashgana caycä. Cay gueshyaga pasaypana nacaycächiman”. 14 watacunano ishcäcuna África naciuncho Jehovata sirvir caycashganchi, warmëga shumajmi yanapämashga. Chayno captinpis parlacunanchirämi cargan Canadá naciunman cutinapaj, chayno Sheila gueshyanpita aliyarcunanpaj; chayta decidinapäga Jehovata ruwacur mañacärergä. Lapan tiempuwan África naciuncho Jehovata sirvishganchita jaguirinäpaj shongüpis nanaycushgarämi.

Canadachona caycar juc amigo nimargan paywan carruta ranticoj arunäpaj Toronto marcacho. Wasita alquilashcä y lapan necesitashganchita macwa cajlata rantimushcanchi jagaman mana chayanapaj.  Walcalawan cawacuyta munarganchi lapan tiempuwan Jehovata sirviyta munar. Y ichic tiempula pasariptin chaynomi cashga.

Sábado junajcuna asambleapaj Salón sharcachiycho yanapacur galaycurgä Norval (Ontario) marcacho. Tiempuwanna, asamblea Salunpita encargado canäpaj nimargan, warmëpa saludnin alina caycaptin ‘aumi’ nergä. Chauraga 1974 wata junio quillacho chaycho tiyanapaj aywapäcurgä. Sheilapa saludnin aliyarcushganpita y yapay lapan tiempöwan Jehovata sirvishgäpita alapa cushicärergä.

Chaymi ishcay watana pasariptinna congregaciuncunata watucamoj canäpaj nimaptin ‘alimi’ nergä. Watucoj aywargä Canadá nación, Manitoba marcaman. Chaychoga pasaypa gasaycuptinpis, hermanucuna cuyamashganchita ricar “goñu goñu” caycashgäno sienticärergä. Yachacushcanchi may chay marcacho caycaptinchipis más alimi caycan Jehovata lapan shongunchiwan sirviptinchi.

Achca wata congregaciuncunata watucamojno sirvircaycaptë 1978 wata nipäcamargan Canadá Betelcho arunapaj. Chay wichanlacho imano humilde canäpaj yachacurgä. Montreal marcacho francés rimaycho discursamunäpaj invitamargan. Discursüga manami shumajchu cargan chayraycu Betelpita juc hermano consejamargan. Canan wichan chayraj cuentata gocö mana shumaj discursamoj cashgäta, ichanga consejamashganta wiyar chay hora pasaypa rabiacurgä. Paywan rimanacuymanpis chayargä y nogaga yarpargä: “Alimi discursamushcä, payga falläcunalata ricaycan” nir. Consejucunata chasquinäpaj trucan, yarpargä: “¡Pitaj pay consejamänanpaj, shumaj consejacuylatapis yachanchu!” nir.

Junajcuna pasariptin Betelpita encargado waugui nogawan parlargan. Wilacushcä rabiacushgäpita arrepentido caycashgäta, nircur consejamaj wauguita ‘disculpaycalämay’ nergä y payga cuyapaylapa ‘ama yarpachacuychu’ nimargan. Chay problemapa pasashgäpita yachacushcä humilde canäpaj (Prov. 16:18). Cutin cutin Jehovata manacushcä perdunamänanpaj. Canan decididumi caycä pilapis consejamaptin mana rabiacunäpaj.

1985 watapita 40 watacunano Canadá Betelcho caycä. Betelpita encargaducunawan arushgäga shumaj bendiciunmi cashga. 2021 wata febrero quillacho cuyashga warmilä Sheila wanushga. Saludnë mana ali caycaptinpis cushi cushila Jehovata sirvir caycä (Ecl. 5:20). Cawaynëcho imayca sasacunapaj pasashcä, ichanga 70 watacunano lapan tiempöwan Jehovata sirvishgäpita paypa shumaj bendiciunnincunata chasquirir cushi cushilami cawacushcä. Jehovata ruwacö lapan jovincuna paylata sirvinanpaj, chaynopa nogano paycunapis Jehovata sirvir cushi cushila cawapäcunanpaj.