1, 2. 1) Hebreo cristianucunata Pablo cartacuptin, ¿imanotaj cawarcaycargan? 2) ¿Imanirtaj Pablo escribimushgan cartaga alapa ali cargan?

 JESÚS wanushganpita ichic tiempulachomi hebreo cristianucunapäga nacay tiempo galaycurgan. Jerusalencho camacashgan congregaciunpäpis chiquicojcuna contranman sharcupäcurgan (Hech. 8:1). 20 watacunano pasarcuptenga Jesuspa gatejnincunaga alapa muchuyraycu nacapäcurgan (Hech. 11:27-30). Ichanga 61 wata wichanpa alapa mana yarpachacur alimi cawarcaycargan. Chay tiempucho Pablo escribimushgan cartaga alipämi cargan.

² Chayno captinpis alapa nacananpaj tiempuga chayamunanpäna caycargan, chaymi apóstol Pablo escribimushgan cartachoga ali consejucuna cargan aguantapäcunanpaj. Jerusalén marca ushacänanpäga Jesús wilacushgannola pasananpaj caycargan (Luc. 21:20). Ichanga Judeacho cristianucuna ni quiquin Pablo musyarganchu imay junaj pasananpaj cajta. Pero chay tiempo chayamunanyaj riccha ricchala caycar masraj yäracärinan cargan (Heb. 10:25; 12:1, 2).

3. ¿Imanirtaj Pablo cartacushgan canan wichanpis yanapämanchi?

³ Canan wichanpis chay jinanpa nacanapaj tiempo chayamunanpäna caycan (Mat. 24:21; Apoc. 16:14, 16).  Imanomi unay wichanpis Pablo consejacushgan alapa yanapacurgan chaynolami noganchicunatapis yanapämäshun. Mä juc ishcaylapita yachacushun.

“ICHIC-ICHICLLATA YACHACUSHALLANCHÏWANGA AMA CACUSHUNCHU”

4. ¿Imataj sasa cargan cristianuman ticraj judiucunapaj? (Dibujutapis ricay).

⁴ Pablo cartacushgan hebreucunaga unay religiunninta jaguirirmi cristianumanna ticrapäcushganpita imayca sasacunapami pasapäcurgan. Unayga judiucuna Dios acrashgan runacunami cargan. Jerusalenchoga templupis caycargan y chaycho reycunapis Diospa jutincho gobernapäcamoj. Judiucunaga Moisés escribishgan Leytami cäsucärej y pushacoj religiosucuna nishgantapis. Costumbrincuna cargan imata micunanpaj o mana, circuncisión nishganpita y jäpa runacunatapis imano ricapäcunanpaj. Pero tiempuwan Jesús wanushgan wichanpitaga templucho mananami Jehovaga chasquergannachu sacrificiucunata. Chay cambiucunata ricarga cristianumanna ticraj judiucunapäga sasa imachi cargan (Heb. 10:1, 4, 10). Quiquin apóstol Pedrupäpis, sasami cargan jucnopana Diosta sirvinanpaj (Hech. 10:9-14; Gál. 2:11-14). Aumi, jucnopana Diosta adurapäcushganraycu waquin pushacoj religiosucunaga rabiacärirgan y chiquir galaycärergan.

5. Waquincunaga ‘cristiano cä’ nirpis, ¿imata rurapäcoj?

⁵ Hebreo cristianucunataga pasaypami chiquipäcurgan. Waquincuna cargan pushacoj religiosucuna ‘gamcuna Diospa contrancho carcaycanqui’ nipäcoj cajcuna. Y waquincunana ‘cristiano cä’ nirpis unay costumbrincunata jinala rurapäcojraj, chaytaga rurapäcoj pipis chiquinanta manchacur  imachi (Gál. 6:12). ¿Imata rurar-raj cay cristianucuna Jehovata sirviycarla carcaycanman cargan?

6. ¿Imata rurananpätaj hebreo cristianucunata Pablo nergan? (Hebreos 5:14-6:1).

⁶ Apóstol Pabluga cristiano masincunata cartacushgancho nergan Diospa Palabranta masraj tantiacärinanpaj (leiriy Hebreos 5:14-6:1). Diospa Palabranpita tantiachicurmi apóstol Pablo nergan cristianucunapa aduraciunninga unay judiucuna adurapäcushganpita más alila cashganta. a Pabluga musyarganmi cristianucuna luta yachachicuycunata mana chasquicärinanpäga, Diospa Palabrantaraj ali tantiacärinan cargan.

7. ¿Ima sasacunapataj canan wichanpis pasaycanchi?

⁷ Unay cristianucunatanolami canan wichan cay mundo runacunapis lutan yachachicuycunata chasquinanchita munapäcun. Contranchicho parlarmi ashlipämanchi, caway vidanchicho Diosta cäsucushganchiraycurpita ‘lutancunata ruraycanqui’ nimanchi. Cay mundo runacuna yarpashgancunaga mana tincunchu Jehová yarpashgancunawan (Prov. 17:15). Chaymi riccha ricchala caycänanchi luta yachachicojcuna ima nimashganchitapis mana cäsucunapaj, pajta pantarpis pantarachimashwan sinoga (Heb. 13:9).

8. ¿Imatataj rurashwan ali cristiano canapaj?

⁸ Apóstol Pablumi cristiano masincunata consejargan ali cristiano cananpaj. ¿Imatataj noganchicunapis paycunanola rurashwan? Unay yachacushganchicunalawan mana cacur y Jehovapita masraj yachacur, pay yarpashganno yarpänanchi. Bautizacushgana carpis chaytami ruraycashwan. Aumi, lapanchicunami ali yarpachacurcur Bibliapita yachacur siguishwan (Sal. 1:2). Chayta ruraptinchega Pablo nishgannopis yäracushganchega mana juchoj gaganomi caycanga (Heb. 11:1, 6).

“YÄRACUSHANCHÏPITAMI SALBASHANA CAYCANCHI”

9. ¿Imanirtaj yäracärinanraj cargan hebreo cristianucuna?

⁹ Judea marcaga ushacänanpäna caycargan, chaymi cristianucunaga salvacuyta munarga yäracunanraj cargan (Heb. 10:37-39, TDI). Gatejnincunataga mayna Jesús nergan Jerusalenta soldaducuna tumaparaycajta ricapäcuptenga jircacunapa gueshpir aywacärinanpaj, chayno wilacushgantaga Jerusalenpa cuchuncho chacracho tiyaj cristianucunapis cäsucärinanmi cargan (Luc. 21:20-24). Chay tiempucho runacuna aywapäcoj murallashga marcaman pacacunanpaj. Pero Jesusga nergan jircacunapa gueshpicärinanpaj, chaymi cristianucunaga yäracärinanraj cargan Jesús mandacushganta cäsucunanpaj.

10. ¿Imatataj ali yäracoj cristianucuna rurapäcunan cargan? (Hebreos 13:17).

¹⁰ Jina chay cristianucunapis yaracärinanmi cargan Jesús acrashgan congregaciunta pushananpaj hermanucunaman. Chay pushacoj hermanucunaga tantiachicurganchi imay y imano jircacunapa gueshpir aywacärinanpaj  (leiriy Hebreos 13:17). Hebreos 13:17 textucho “cäsukäriy” niptenga manami parlaycämunchu mala gana cäsucunapaj, sinoga pipis mandamaptinchi yäracur ganas ganasla cäsucunapämi. Ushanan tiempo manaraj chayamuptinmi lapan cristianucuna yäracärinan cargan ancianucunaman. Ali cawacur caycaptin cäsucäriptenga, más facilchi canman cäsucärinanpaj nacay tiempuchopis.

11. ¿Imanirtaj cananlapitana masraj yäracushwan?

¹¹ Unay hebreo cristianucunanolami ali yäracoj cayta munanchi. Canan wichan Diosman mana criyicojcunaga asipämanchi ‘cay mundupa ushacaynin chayaycämunna’ nir yachachicuptinchi (2 Ped. 3:3, 4). Bibliaga tantiachicunmi alapa nacanapaj tiempucho imacuna pasananpaj cajta, ichanga ima mascuna pasananpaj cajtaga mana musyanchirächu. Chaymi seguro caycashwan Jehová mana alicunata ushacächinanpaj hora chayamunanpaj y cuidamänanchipaj cajpitapis (Hab. 2:3).

12. Jatun nacay wichan, ¿imatataj rurashwan salvacunanchipaj?

¹² Jinamanpis masraj yäracushwan Jehová acrashgan ‘yärakuypaq y tantiyakuq esclavo’ canan wichan imano pushaycämashganchiman (Mat. 24:45). Imanomi hebreo cristianucuna wilacuycunata chasquipäcurgan Jerusalenta, Roma soldaducuna tumaparaycaptin chaynolami jatun nacay galaycuptenga chasquishunchi salvacunanchipaj wilacuycunata. Cananmi tiempo caycan, pushacoj hermanulanchicunaman yäracunapaj. Canancush acuerducho mana caycar mala gana cäsucuycashwan, alapa jatun nacay wichanga más sasarächi canga cäsucunapaj.

13. ¿Imanirtaj cristianucunaga cäsucunan cargan Hebreos 13:5 nishganta?

¹³ Jatun nacay manaraj chayamuptin hebreo cristianucunaga Diosta sirvir guellaylapaj mana wanur charashgancunalawan contentacunan cargan (leiriy Hebreos 13:5). Waquincunaga más unayna guellaypis micuypis mana aypashganpita nacashgami cargan (Heb. 10:32-34). Diospita wilacunanpäga imaycacunata aguantashga captinpis, waquincunaga imanpis mana pishinanpaga capazchi guellaylata ashir cacuycargan, Jerusalén ushacashga captin cristianucunataga guellaynin manami salvanmanchu cargan (Sant. 5:3). Jina pipis guellaylapaj wanurga sasachi canman cargan wasincunata y imaycancunatapis jaguirir gueshpicunanpaj.

14. Ali yäracoj runa carga, ¿imataraj rurashun?

¹⁴ Jehová cay munduta ushacächinanpaj cajman yäracuptinchi guellaylata ashinanchipäga manami yarparaycäshunchu. Jatun nacay chayamuptenga, guellayga manami valengachu. Bibliaga nimanchi Jehová fiyu runacunata ushacächinanpaj junaj, runacuna “qellaynintapis cällikunaman mashtarinqa”, cuentatami gocärenga “qellayninpis ni qorinpis” mana salvananpaj cajta (Ezeq. 7:19). Imaycacunataraj ashinanchipaj trucanga charashganchicunalawanmi contentacushwan, chaynopa familianchicunawan junto Jehovata sirvinanchipaj. Jina pipa jaganmanpis yaycushwanchu  ni munashgalanchita rurar cacushwanchu. ‘Caynëcunami wacnëcunami caycan’ nirpis caycashwanchu (Mat. 6:19, 24). Ushacay chayamushganyaj Diosman yäracushganchi o guellayman yäracushganchi ricacämunga.

“AGUANTAPÄCUNAYQUIRÄMI”

15. ¿Imanirtaj cristianucunaga imaycataraj aguantanan cargan?

¹⁵ Judeacho caway vida más mana aliman ticraycashgan wichanga, cristianucunaga yäracunanraycu imaycacunata aguantanan cargan (Heb. 10:36). Waquincunaga Diosta sirvishganraycu imaycacunapa pasapäcurgan waquincuna ichanga manaraj. Imano captinpis Pabluga wilacurganmi más sasa tiempuraj chayamunanpaj cajta y cristianucunaga Jesusno wanunanyaj aguantapäcunan cargan (Heb. 12:4). Cristianucuna miraycajta ricar waquin judiucunaga masraj chiquir galaycärergan. ¿Manachu Pabluta Jerusalencho predicaycaptin chiquejnincuna wanuchiyta munapäcurgan? 40 judiucunano cayno wilanacurgan: “‘Pabluta manaraj wañucherga ama imatapis micushunchu, ni upushunpischu’ nir” (Hech. 22:22; 23:12-14, TDI). Alapa chiquircaycaptinpis chay cristianucunaga jinalami juntacärinan, predicapäcunan y Diosmanpis masraj yäracärinan.

16. ¿Imatataj ruranan cargan hebreo cristianucuna pruebacunata aguantananpaj? (Hebreos 12:7).

¹⁶ ¿Imatataj ruranan cargan hebreo cristianucuna pruebacunata aguantananpaj? Pruebacunata aguantarga más ali cristiano cananpaj cashganman yarpänanpaj Pablo nergan (leiriy Hebreos 12:7). Jina Jehovanomi pacienciacoj y cuyapäcoj cananpämi pruebacunata aguantanan cargan. Chaynopa ali  pogushga cristiano ticrananpämi (Heb. 12:11).

17. ¿Imanirtaj Pablo musyargan pruebacunata imano aguantanapaj?

¹⁷ Pabluga shacyächiylapa valurwan pruebacunata aguantananpaj cristiano masincunata nergan. ¿Imanirtaj Pablo musyargan imano pruebacunata aguantanapaj? Payga unaycho cristianucunata chiquir gaticachargan. Cristiano captin chiquicojcuna paypa contranman churapäcurgan (2 Cor. 11:23-25). Musyarganmi pruebacuna pasaypa sasa captinpis imata ruranapaj. Pruebacunapa quiquin pasashganpita Pablo consejaycurgan quiquinchicunalaman mana yäracunapaj, sinoga Taytalanchi Jehovaman. Chaymi cayno nergan: “Dios yanapaykämaptinmi imatapis mana mantsakütsu” (Heb. 13:6).

18. ¿Imatataj pasananpaj cajta musyanchi, y cananlapita imata rurananchi?

¹⁸ Cananpis hermanunchicuna imayca pruebacunapa pasarcaycan, alichi canman paycunapa mañacuptinchi o imalatapis ruraptinchi (Heb. 10:33). Bibliaga claro wilamanchi Tayta Dios “munashqanno kawaq kaqtaqa pitapis chikir nakatsipäkunqa” (2 Tim. 3:12). Chauraga lapanchimi listo caycashwan sasa tiempo galaycamuptin ima pruebacunatapis aguantanapaj. Jehová yanapämänanchipaj cajmanpis yäracushun. Sirvejnincunata jaucalami goyächenga (2 Tes. 1:7, 8).

19. ¿Imacunatataj ruraycashwan jatun nacay tiempo manaraj galaycuptin? (Dibujutapis ricay).

¹⁹ Pablo escribishgan cartaga alimi cargan ima pasananpaj captinpis cristianucuna listo carcaycänanpaj. Payga yarpächergan Diospa Palabranta naupa yachacushgancunalawan mana contentacärinanpaj. Chaynopa luta yachachicojcunata mana cäsupar Diosman yäracuycarla carcaycänanpaj. Jina nerganpis masraj yäracur Jesustapis acrashgan pushacojcunatapis cäsucärinanpaj. Tantiachicurganpis Tayta Jehovaga permitinlami imayca pruebacunapa pasananchita. Y chay lapanta aguantaptinchega más ali cristiano cananchipämi canga. Biblia nishganta noganchipis cäsucuptinchega imacunapa pasarpis ushanancamayaj aguantashun (Heb. 3:14).