1, 2. ¿Imanirtaj Jehová camamashcanchi waquincunata yanapänanchipaj?

 JEHOVÁ camamashcanchi waquincunata yanapar cushishga cananchipaj (Hech. 20:35). Cushicunchimi pipis yanapämaptinchi pero masga cushicunchi pitapis yanapaptinchi. Chayno cananchipaj Jehová camamashganchega alapa alimi.

² Chaymi cushishgala cawacuyta munar quiquinchipitami canga waquincunata yanapacur cawanapaj. Imalachopis waquincunata yanapaptinchi cushishgala cawacushun. Alapa cushicunchimi chayno Jehová camamashganchipita (Sal. 139:14).

3. ¿Imanirtaj Bibliaga nin “cushishgala cawacoj” Dios cashganta?

³ Bibliaga nin yanapacojcunaga cushishgalami cawacun, chaymi taytalanchi Jehovapis “cushishgala cawacoj Diosmi” (1 Tim. 1:11, TNM). Diosninchipitami imaycacunata chasquiycanchi chaymi apóstol Pablo nishgannopis “Tayta Dios yanapamaptintsiraqmi kawantsipis y purintsipis” (Hech. 17:28). Caytapis Bibliaga nin: “Tayta Diosninchëga llapantapis alli cajcunallatami gomanchi” (Sant. 1:17, TDI).

4. ¿Imataj rurashwan más cushishgala canapaj?

⁴ ¿Imataj rurashwan más cushishgala canapaj? Jehovano cuyacoj y yanapacoj cashwan (Efes. 5:1). Yachacushun  imatataj rurashwan waquincunata yanapacurga mana valuramashganchino sienticuptinchi. Chaycunapita yachacurga waquincunata mana ajayaypa cushi cushila yanapacurla caycäshun.

JEHOVANO YANAPACOJ CASHWAN

5. ¿Ima necesitashganchicunataj Jehová gomanchi?

⁵ Jehová yanapacoj car necesitashganchicunata gomanchi. Imaycata mana gomaptinchipis payga imatapis faltachimäshunchu, chaymi micunanchipaj y visticunanchipaj ropanchitapis charanchi y maycho pununanchipäpis caycan (Sal. 4:8; Mat. 6:31-33; 1 Tim. 6:6-8). Chay lapanta, taytalanchi Jehová mana munaycarga mana gomanchichu. ¿Imaraycurtaj noganchipaj chayta ruran?

6. ¿Imataj yachacunchi Mateo 6:25, 26 textucunapita?

⁶ Cuyamashpanchimi Jehovaga imatapis faltachimanchichu. Mä yachacushun Mateo 6:25, 26 (leiriy) textucunacho Jesús imata tantiachicushganta. Chaycho pishgucunapita parlar Jesús cayno nergan: “Paykunaqa manami murukuntsu ni cosechantsu ni pirwakuntsu”. Chauraga, ¿imanotaj cawan? Caytapis Jesús nergan: “Jana patsacho kaykaq Taytaykimi mikuyta kamaripan. Tayta Diospaqqa pishqukunapitapis masmi välipäkunki”. Chauraga Jesús yachachicurgan ima uywacunapitapis más valej cashganchita. Pishgucunata cuidar masrächi noganchitapis cuidamäshun. Taytalanchi Jehová cuyapämashpanchimi imatapis faltachimäshunchu (Sal. 145:16; Mat. 6:32).

7. ¿Imacunata rurartaj Jehová yanapacoj cashgannola cashwan? (Fotucunatapis ricay).

⁷ Noganchipis Jehová cuyacoj cashgannola runacunata yanapanchi. Maygan hermanulapis, ¿micuyta o ropanlatapis tarinanpäga sasachu caycan? Chayno captenga Jehovaga shonguyquita yatarcunmanmi payta yanapanayquipaj. Jehovapa testiguncuna listumi caycanchi may chaycho ima desgraciacunapa pasaptin yanapacunapaj. COVID-19 gueshya wichanga waquin hermanunchicunaga imaycata apachicush necesitaycajcunapaj. Y waquin cajcunaga guellayninwan yanapacush may chaycho desgraciacunapa pasajcunata yanapacunanpaj.  Hebreos 13:16 texto nin: “Mana qonqaypa alikunata rurapäkunki. Jukniki jukniki imalawanpis yanapanakunki. Tsayno kawarmi Tayta Dios munashqan sacrificiukunata payman apaqno kaykantsi”, cay texto nishgannolami lapancuna rurapäcurgan.

8. ¿Imacunata rurananchipätaj poderninta Jehová gomanchi? (Filipenses 2:13).

⁸ Jehovami valurta gomanchi. Jehovaga cushi cushilami poderninta gomanchi y paypa lapan poderninwanga imapis tincunchu (leiriy Filipenses 2:13). Valurta ashir imaylapis mañacushcanquichi Jehová Diosta ¿au? Ima pruebapis captin o problemacuna yurimuptin valurcharcunayquipaj o caway vidayquicho imalapis pasaptin calpata tarinayquipaj Jehovaga contestashushcanquimi y profeta Isaiasnopis ricacushcanquichi, paymi cayno nergan: “Utikashqa runakunatapis paymi yanapan. Janjampaykachaq runakunatapis paymi kalpata qon” (Isa 40:29).

9. ¿Ima rurartaj Jehovano valurta jorgur pitapis yanapashwan? (Fotutapis ricay).

⁹ Runacunapitaga Jehovalami pitapis poderninta goycun. Chaymi alichi canman noganchipis valurta jorgur imanolapapis waquincunata yanapaptinchi, paycunapis valurcharcärinanpaj. Edayashga o gueshyaycaj hermanucunapa wasinchoga imalapis cangapämi yanapanapaj. Y Diospa Wasinta pichapacunapaj o alchachinapaj captenga encargado hermanucunata nishwan yanapacuyta munashganchipita. Chayta rurarga hermanunchicunapäga juc bendiciunmi cashun.

10. ¿Imata rurartaj waquincunata animashwan?

¹⁰ Pitapis ali shimilapa parlapaptinchega valurchacärinmanmi. ¿Musyanquichu pilapis laquishga caycashganta? Chayno carga juc cartatapis apachinquiman o celularpapis gayacurinquiman o watucojpis aywanquiman. Shongupita parlar juc ishcay palabracunalawanpis animayta puedinchimi, chayta ruraptinchega capaz paycunaga valurta charar más shacyalana ricacunga (Prov. 12:25; Efes. 4:29).

11. ¿Imataj Jehová gomanchi tantiacoj cananchipaj?

¹¹ Jehovaga yachayninta gomanchi. Discípulo Santiago cayno escribergan: “Tayta Diosninchi munashanno goyänayquipaj cashayquita mana tantiyarga mañacuy tantiyachishunayquipaj”.  Jina nerganpis: ‘Mañacuptiquega yanapäshunquipämi. Mañacoj cajtaga mana pengachiylapa yanapan’ (Sant. 1:5, TDI). Cay texto nishganno Jehovaga yachayninta gomanchi tantiacoj canapaj, mana pengachiylapa shumaj yachachimanchi. Yachayninta gomänanchipäga mañacunanchita munan (Prov. 2:1-6).

12. ¿Imanotaj waquincunata yanaparcushwan yachaj cananpaj?

¹² Jehovaga yachayninta gomanchi ali tantiaj cananchipaj, chaynolami noganchipis waquincunata yanaparcushwan yachaj cananpaj (Sal. 32:8). ¿Imanotaj chayta rurashwan? Congregaciunninchichoga chaylaraj predicaciunman yarguycajcunata shumaj yachachicushwan imano predicananpaj. Ancianucunaga yachachicun siervo ministerialcunata y waquin hermanucunatapis congregaciuncho imano yanapacunanpaj. Saluncunata y localninchicunata sharcachej y alchachej waquin yachaj hermanucuna, yachaycächin waquin cajcunapis yanapacunanpaj.

13. ¿Imanotaj waquincunata Jehovano yachachishwan?

¹³ Jehovaga manami quiquilanpächu yachaj caycan. Chaymi noganchipis payno waquincunata yachachishwan. Pitapis yachacherga manami yarpashwanchu ‘nogapita más yachaj canga’ nir. Jina manami nishwanchu ‘nogataga mana pipis yachachimashgachu, quiquilan yachacunman’ nirpis. Jehovapa sirvejnincunaga manami chaynoga yarpashwanchu. Manami janalanpäga yachachicushwanchu sinoga imaycatarämi rurashwan ali yachachicunanchipaj (1 Tes. 2:8). Chayno yachachicuptinchega “paykunapis wakinkunata yachatsinanpaq” listo caycanga (2 Tim. 2:1, 2). Jucninchi jucninchi yachachinacurga más cushishmi cashun.

¿MANA VALURAMASHGANCHINO SIENTICUPTINCHEGA?

14. Yanapacuptinchega, ¿imatataj waquincuna ruran?

¹⁴ Waquincunata y hermanunchicunata yanapaptinchega agradëcimanchimi, öraga agradëcicushpanmi waquincunaga juc notalatapis o juc cartalatapis ‘gracias’ nir escribipamanchi (Col. 3:15). Chayno agradëcimashganchipitaga cushicunchimi.

15. ¿Imamantaj yarpänanchi mana agradëcimaptinchipis?

¹⁵ Öraga waquincunata yanapaptinchi manami agradëcimanchichu jina imaycanopa yanapacushganchita mana valuramashganchino sienticushwan. Chayno captenga, ¿imataj rurashwan cushishgala caycänanchipaj? Hechos 20:35 texto nishganman yarpäshun. Waquincunata yanapanchi mana cutichimänanchita munarchu sinoga shongupita yanapänanchita munarmi, chayno rurarga jinala cushi cushila pitapis yanapacur caycäshun. Ricärishun imanotaj chayta rurashwan.

16. Pitapis yanaparga, ¿imamantaj yarpänanchi?

¹⁶ Pitapis yanaparga Jehovano yanapacuycanqui. Payga imaycata ruraycan waquincuna mana agradëciptinpis (Mat. 5:43-48). Pitapis yanapacurga manami shuyarashwanchu cutichimänanchita. Jehová promitimanchi yanapacushganchipita bendicimänanchipaj cajta (Luc. 6:35). Chauraga mana laquicushwanchu waquincuna mana agradëcimaptinchipis. Quiquin Jehovami bendicimäshun waquincunata cushishga yanapashganchipita (2 Cor. 9:7; Prov. 19:17).

17. Pitapis yanaparga, ¿imatataj mana yarpanquimanchu? (Lucas 14:12-14).

 ¹⁷ Jehovano jinala yanapacuycänanchipaj Lucas 14:12-14 (leiriy) nishganman yarpäshun. Alichi canman waquincunata yanapacuptiqui ‘nogapis yanapäshayqui’ nishuptiqui. Pero ¿imaraj canman pitapis yanaparcurga shongulanchicho ‘cutichimangachi’ nir yarpaptinchi? Chayno yarpaptinchi Jesús nimashganchita rurashun: cutichimänanchipaj mana puedejcunata yanaparcushun. Chayta rurarga Jehová rurashganno cushi cushila waquincunata yanapashun. Pitapis ama yanapaychu cutichishunayquitaraj munar, chayno rurarga cushi cushila pitapis yanapanqui.

18. ¿Imataj yarpashwan waquincuna mana agradëcimaptinchi?

¹⁸ ‘Payga manami agradëcicuyta yachanchu’ nir, ama yarpaychu (1 Cor. 13:7). Pilapis mana agradëcimaptinchi paypitaga mana alita yarpashwanchu, chaypa trucanga ‘agradëcicuyta gongaycushgachi’ nirchi yarpashwan. Waquincuna shonguncho agradëcicuyta munarpis capazchi pengacunman ‘gracias’ nimänanchipaj. Waquincunaga unaycho imaycanopa yanapacurgan y cananga mana yanapacuyta puedir pengacunmanmi. Imano captinpis cristiano masinchicunapitaga manami jucnopaga yarpaycashwanchu, chaypa trucanga cushishgala yanapacuycashwan (Efes. 4:2).

19, 20. ¿Imanirtaj jucla agradëcimashganchita shuyarashwanchu? (Fotucunatapis ricay).

¹⁹ Ama shuyaraychu rasla agradëcishunayquipaj cajta. Waquincunata yanapananchipaj cajpita parlarga rey Salomunga cayno nergan: “Yacuman jitariycajno carpis tantayquitaga pishipacojcunata aypuriy. Mas unayllataga gampis alli cashayquimannömi tarinquipaj” (Ecl. 11:1, TDI). Texto nishganno waquincunata yanapashganchipitaga tiempuwanga agradëcimashwanchi. Chayno pasashganpita ricärishun.

 ²⁰ Congregaciunta watucamojpa warminshi cartapa animargan juc chaylaraj paninchita Jehovata sirvir siguinanpaj. Pusaj wata pasarcuptinmi yanapashganpita cayno contestargan: “Cartapa nimashgayquega achca watapami yanapämashga caway vidacho Jehovata sirvir caycänapaj, cuyacuywan escribimashgayquega alimi cashga, pero escribimashgayqui textuga masmi shongöman chayargan”. a “Öraga imayca sasacunapa pasarga Jehovata sirviytapis munargänachu. Escribimashgayqui textuman yarparga pusaj wata pasashgancho valurta gomargan Jehovata sirvir siguinapaj”. Congregaciunta watucamojpa warmin chay cartata leir ¡alapachi cushicurgan! Capazchi pilatapis yanapaptinchi öraga manami agradëcimanchichu, tiempuwanrämi ‘gracias yanapamashgayquipita’ nimashwan.

21. ¿Imanirtaj Jehovano waquincunata yanapacuyta munanqui?

²¹ Tayta Jehová camamashcanchi waquincunata yanapar cushishga cawacunanchipaj. Hermanunchicunata yanapar cushicunchimi. Agradëcimashganchipitapis cushicunchi mana agradëcimaptinchipis, noganchi cushishga caycashwan yanapashganchipita. Imano captinpis 2 Crónicas 25:9 nishganman yarpashwan, cayno nin: “Mastami TAYTA DIOS taritsishunkipaq”. ¡Y piraj Jehovanoga imatapis camaripämashwan! Bendiciunnincunata chasquirir alapa cushicunchi. Alapa alimi canga taytalanchi Jehovano waquincunata yanapacuptinchi.