Wamra cashgäpita yoracunata y jircacunata ricachacuyta gustamaj, chaymi familiäwan cada cadala pasiaj aywapäcoj cä tashgä marcacho gochacuna y jatun yoracuna cashgan sitiucunaman. Nircur animalcunatapis alapa cuyaj cä. ¡Lapan mishicunata y algucunata ricaycurga jucla macalacuyta munaj cä! Más watayojna cashpä, pipis animalcunata nacaycächejta ricarga laquicoj cä, chaymi uywacunata defendinanpaj caycaj runacunawan juntacurgä. Chaycho caycajcunaga nogano yarpapäcoj.

Imaycacunata rurapäcoj cä animalcunata defendinapaj. Animalcunapa garancunata ranticojcunapa y uywacunawan practicata ruraj laboraturiucunapa contrancho caycarmi protestacunata rurapäcoj cä. Nircur juc organizaciuntapis camacachipäcushgä animalcunata cuidanapaj. Caycuna alino captinpis, autoridäcunawan problemaman chayapäcushgä, achca cuticho carcelcho wichgarächimargan y juiciutapis rurapäcamashga.

Manami chaylachu, runacunata problemancunawan yanapacuyta munar Amnistía Internacional y Greenpeace nishgan organizaciuncunaman yaycushcä nacaycajcunata yanaparcunäpaj; chacaypa y junajpapis chaycho yanapacurgä. Pishipacojcunata y wacchacunatapis yanapacoj cä.

Imaycacunata ruraptïpis, tiempuwanga cuentata gocurgä, cay mundo cambiananpäga manami nogapitachu. Öraga waquin problemacunata alchayta puedirpis, waquincunaga masraj miraycurgan. Mana alicunalata ricar y pipis alchayta mana puediptinga, alapami nitipacashgano sienticurgä.

Imatapis rurayta mana puedinäpaj cajta musyarga, Diosman y Bibliamanpis yarpayta galaycurgä. Unaychoga Jehovapa testiguncunawan yachacurgä, paycuna cuyacuywan tratamaptinpis, cambiucunata ruranäpäga manami listo caycashgarächu. Canan ichanga jucnopa yarpargä.

Bibliata leir yapay galaycuptïga, guerïcunata jampiwan cupaycashgäno sienticur galaycurgä. Animalcunata shumaj cuidanapaj textucunata tariycurgä. Tantiarinapaj, Proverbios 12:10 nin: “Ali runaqa uywantapis kuyapanmi”. Nircur tantiacurgä Diosga manami culpayojchu imayca mana alicunapita. Chaypa trucanga, runacuna nacarcaycan y problemacunapis miraycushga Jehovata mana casucushganraycur. Dios amatar cuyacoj y pacienciacoj cashganta musyarga, shongüpis cuyurganrämi (Salmo 103:8-14).

Chay wichancunalacho ¿Qué enseña realmente la Biblia? libruwan yachacunäpaj mañacurgä. Chaypita Jehovapa testiguncuna watucamargan Bibliapita yachachipäcamänanpaj. Nircur Saluncunacho cashgan reuniuncunaman aywayta galaycurgä. Ichic ichiclapa Bibliapa yachachicuynincuna shongümanmi chayarcushga.

Bibliaga alapami yanapämargan cambiucunata ruranäpaj. Cigarro mucayta y upiaytapis jaguirgämi; ali shimilapa parlayta y autoridäcunatapis casucuyta galaycurgä (Romanos 13:1). Jucwan jucwan warmicunawan manana cacurgänachu, Dios munashganno cawacuyta galaycurgä.

Manami facilchu cargan yarpaynïta cambianäpaj, masraj yarparcuptï runacunata yanapananpaj organizaciuncunacho caycashgäpita. Alapami calpachacurgä  ichic ichiclapa yarpaynïta trucanäpaj. Galananchoga pensargä chay organizaciuncunata jaguiriptïga, traición cuenta cashganta. Pero cuentata gocurgä Diospa Gobiernunla runacunapa problemancunata alchananpaj, chaurasga lapan shongüwan y calpäwan runacunata Diospita yachachicuyta galaycurgä (Mateo 6:33).

Unaychoga yarpargä ishcay clase runacuna cashganta: alita rurajcuna y mana ali rurajcuna; fiyucunataga chiquej cä. Canan ichanga Biblia yachacushgäpita calpachacö lapan runacunata cuyanäpaj (Mateo 5:44). Chaymi lapan runacunata pï maytapis Diospa ali wilacuynincunata wilarcö, cay rurayga yanapacun jaucala y cushi cushila goyanäpaj y waquin runacunapis ali cawacuyta shuyaränanpaj.

Ima yarpachacuycunatapis Jehovapa maquincho cachaycuptïga, yanapäman jaucala tiyanäpaj. Cieluta y cay Pachata camajga, manami permitingachu runacuna y animalcunapis alapa nacananpaj, ni cay pachapis ushacänanpaj. Diospa Gobiernunga imayca mana alicunata ushacärachinga, fiyu runacunaga canganachu (Isaías 11:1-9). Alapami cushicö runacunata yanaparcuptï Jehovapita yachacunanpaj y paylaman yaracärinanpaj. Cay mundo cambiananpäga manami nogapitachu.