E jujun chke ri upatanelabʼ ri Dios kkichomaj we kʼo upatan ri tiempo y ri chuqʼabʼ che kkikoj che unimaxik ri kubʼij ri Biblia (Salmo 73:2, 3). Weneʼ xkimaj ubʼanik jastaq che utz ta kril ri Jehová. Tekʼuriʼ, kkikʼuʼ (kkowaj) ri utz taj che tajin kkibʼano rech ri e nikʼaj chik qachalal re ri congregación kkichomaj che e sukʼ, are kʼu qastzij taj.

 Wajun kʼutunem riʼ bʼanom rech keʼutoʼ ri tajin kkibʼan ri utz taj, are kʼu kkaj kkikʼex ri kikʼaslemal.

Pa wajun kʼutunem kqil na wariʼ:

•  ¿Jas kraj kubʼij ukʼamik bʼi kebʼ kʼaslemal?

•  We kebʼ nukʼaslemal in kʼamom bʼik, ¿la kraj kubʼij wariʼ che in itzel winaq?

•  ¿Jas kinkunik kinbʼano rech kebʼ ta chi nupalaj?

•  Ri kkichomaj ri nikʼaj chi alabʼom alitomabʼ

 Ukʼamik bʼi kebʼ kʼaslemal, kraj kubʼij che are chiʼ at kʼo kukʼ winaq che kkipatanij ta ri Jehová kabʼan jastaq che awetaʼm che utz taj. Are kʼu are chiʼ at kʼo kukʼ ri qachalal re ri congregación kabʼan che awibʼ che jetaneʼ qas kawaj kapatanij ri Jehová. Jetaneʼ che amaqʼel akojom jun akʼoj.

 «Are chiʼ je kabʼano, kakʼuʼ jastaq pa ri kebʼ akʼaslemal; je wariʼ kʼo ta jun qas retaʼm awach. Tajin kabʼan molom tzij chke konojel» (Erin).

 ¿La awetaʼm wariʼ? Ukʼamik bʼi kebʼ kʼaslemal xuqujeʼ kraj kubʼij che kabʼan jastaq chkʼuyal che awetaʼm che ri Jehová utz taj krilo.

 «Are chiʼ kʼateʼ 14 nujunabʼ xinmaj rilik itzel taq wachbʼal pa internet. Chkiwach nikʼaj chik kinbʼano che itzel kwil ri pornografía, are kʼu in wetaʼm che qastzij taj» (Nolan).

 Texto re ri Biblia che katutoʼo: «Man kʼo ta jachin jun kkunik keʼupatanij kebʼ ajawibʼ, rumal rech chi kretzelaj na uwach ri jun, kuloqʼoqʼej kʼu na ri jun chik, o krukʼaj ribʼ rukʼ ri jun, man nim ta kʼu kril wi ri jun chik» (Mateo 6:24).

 Je taj. Qastzij che e jujun winaq kkaj taj kkinimaj ri kubʼij ri Biblia. Are kʼu, ¿la qas are laʼ ri tajin kakʼulmaj? O kʼo chi nikʼaj rumal, junam rukʼ wariʼ:

•   Kaxibʼij awibʼ rumal che at junam ta kukʼ ri e nikʼaj chi alabʼom alitomabʼ.

•   Kanaʼ che kʼo más jastaq katkunik kabʼan kukʼ ri awachiʼl pa ri tijobʼal chuwach ri kabʼan kukʼ ri qachalal pa ri congregación.

•   Kanaʼo che katkun taj kanimaj ronojel ri utaqanik ri Dios.

 «Wilom che e jujun chke ri kikʼamom bʼi kebʼ kikʼaslemal utz kkinaʼ kekʼojiʼ kukʼ ri keniman ta che ri Dios. Rumal che kkaj keqaj chkiwach ri e nikʼaj chik apastaneʼ ri rajawaxik kkibʼano» (David).

 Are kʼu uchomaxik wariʼ kuya ta bʼe chawe che kakʼam bʼi kebʼ akʼaslemal. Xaneʼ kukʼut chqawach jasche jun utz ala o ali kukʼam bʼi kebʼ ukʼaslemal. We are laʼ ri tajin kakʼulmaj at, ¿jas katkunik kabʼano?

1.  1. Qas chatchoman chrij ri tajin kabʼan pa ri akʼaslemal kimik. Chachomaj: «¿La qas are wariʼ ri kwaj kinbʼan pa ri nukʼaslemal? We kinya ta kan ubʼanik wariʼ, ¿jas kinkʼulmaj na?».

    Texto re ri Biblia che katutoʼo: «Ri utz kchomanik kril ri sayowem [...] ri man utz ta kchomanik kutaqej ri ubʼe kqajbʼex kʼu rumal ri winaqchiʼ» (Proverbios 27:12).

2.  2. Chabʼij che jun chik ri tajin kakʼulmaj. Chatzijoj ri tajin kakʼulmaj che ri atat, ri anan o che jun awachiʼl che qas kunimaj ri utaqanik ri Jehová. Sibʼalaj kekikot riʼ we kataʼ tobʼanik chke, y nim katkil wi rumal che kawaj kabʼan ri utz.

    «Sibʼalaj kʼax xinbʼan che utzijoxik che jun winaq ri tajin kinbʼano. Are kʼu sibʼalaj xinkikotik are chiʼ xbʼitaj wumal» (Nolan).

    Texto re ri Biblia che katutoʼo: «Jachin ri keʼusach utzaʼm ri makaj man utz ta kel na; areʼ kʼu ri keʼuqʼalajisaj kutanabʼaʼ kʼu kibʼanik, ksach na umak» (Proverbios 28:13).

3.  3. Chnaʼtaj chawe che kariq kʼax we utz ta ri xachaʼ ubʼanik. Chnaʼtaj chawe che we xakʼuʼ ri tajin kabʼano chkiwach ri atat anan y chkiwach ri qachalal re ri congregación, rajawaxik tiempo rech kkikubʼsaj chi jumul kikʼuʼx chawij. Y weneʼ pa jun tiempo ri atat anan y ri e kʼamal bʼe re ri congregación kkiya ta bʼe chawe che kabʼan jujun jastaq. Chataqej ri kbʼix chawe y amaqʼel «utz [chat]bʼin pa ronojel» (Hebreos 13:18).

    Texto re ri Biblia che katutoʼo: «Chayaʼ axikin che ri noʼj ri kyaʼ chawe chakʼamowaj kʼut ri pixbʼenik we je kabʼan waʼ katux na ajnoʼj» (Proverbios 19:20).

4.  4. Qas chakojoʼ che ri Dios katuloqʼoqʼej. Rumal che ri Jehová katraj, qas kril ronojel ri kabʼano. Rumal laʼ, ri areʼ retaʼm we kebʼ apalaj y kʼax kbʼe che. Are kʼu ri areʼ sibʼalaj kel ukʼuʼx chawe y kraj katutoʼ rech kabʼan ri kqaj chuwach (1 Pedro 5:7).

    Texto re ri Biblia che katutoʼo: «Ri Ajawaxel kril ronojel ri kkʼulmataj cho ronojel ri uwach ulew, rech kuya kichuqʼabʼ ri qas kkikubʼaʼ kikʼuʼx chrij areʼ» (2 Crónicas 16:9).