Ri Biblia kubʼij che Miguel —jujun kojonem kkibʼij «san Miguel» che— are jun bʼiʼaj che kbʼix che ri Jesús pa ri kaj. a Ri uTzij ri Dios kubʼij che ri Miguel xchʼojin rukʼ ri Satanás chrij ri ucuerpo ri Moisés y xtobʼan rukʼ jun ángel chiʼ xuya jun mensaje rech ri Dios che ri profeta Daniel (Daniel 10:13, 21; Judas 9). Ri Miguel kutoʼ uwiʼ ri utaqanik ri Jehová y kchʼojin kukʼ ri ukʼulel ri Dios. Rumal laʼ taqal ri bʼiʼaj che kbʼix che, che kraj kubʼij: «¿Jachin junam rukʼ ri Dios?» (Daniel 12:1; Apocalipsis 12:7).

 Chqilaʼ jasche kqabʼij che ri Jesús are ri arcángel Miguel.

•   Miguel are ri arcángel (Judas 9). Ri título arcángel kraj kubʼij «ri kʼamal kibʼe ri taqoʼnibʼ [ajkaj]» y xa kamul kriqitaj pa ri Biblia. Ri tzij arcángel kʼo pa singular, wariʼ kraj kubʼij che xa che jun ángel yaʼom wajun título riʼ. Chiʼ kʼastajisam chi ri Jesús. jun versículo kubʼij: «Are ri Ajawaxel kqaj na uloq chikaj, rukʼ taqanik, rukʼ ri uchʼabʼal jun kinimal taqoʼn ajkaj» (1 Tesalonicenses 4:​16). Wajun versículo riʼ kubʼij che ri Jesús kʼo uchʼabʼal kinimal taqoʼn ajkaj rukʼ. Rumal laʼ kojkunik kqabʼij che ri Jesús are ri arcángel Miguel.

•   Miguel are ri kʼamal kibʼe ri ángeles. «Ri Miguel xuqujeʼ ri utaqonibʼ ajkaj xechʼojin rukʼ ri dragón», kraj kubʼij, ri Itzel (Apocalipsis 12:7). Ri Miguel kʼo nim utaqanik pa ri kaj. Rumal laʼ ri Biblia kubʼij «jun chke ri taqoʼn ajkaj ri nimaʼq kiqʼij» che y «ri taqoʼn ajkaj tobʼanel ri sibʼalaj nim ubʼanik» (Daniel 10:13, 21; 12:1). Ri títulos riʼ kukʼutu che Miguel are ri «ajkʼamal kibʼe ri rajchʼojabʼ ri Dios pa ri kaj» kchaʼ jun achi pa ri Nuevo Testamento David Aune.

   Kʼo chi jun bʼiʼaj kukoj ri Biblia che ri kʼamal kibʼe ri ángeles. Kubʼij: «Are taq ri Ajaw Jesús kpe uloq chikaj, kukʼut ribʼ chqawach e rachilam ri utaqonibʼ ajkaj ri kʼo kichuqʼabʼ. Kpe na pa uxaq qʼaqʼ» (2 Tesalonicenses 1:​7, 8; Mateo 16:27). Y 1 Pedro 3:​21, 22 kubʼij: «Konojel kʼu ri e taqoʼn ajkaj, konojel ri kʼo kitaqanik, xuqujeʼ konojel ri kʼo kikunem e yoʼm chi chuxeʼ ri utaqanik ri Jesucristo». Wet ri Jesús y ri Miguel e jalan taq winaq, utz ta riʼ che ri Dios xeʼuchaʼ e kebʼ che ukʼamik kibʼe ri ángeles rumal che kuyak chʼoj riʼ chkixoʼl. Rumal laʼ rukʼ wariʼ kqachʼobʼo che ri Jesús xuqujeʼ are ri kbʼix Miguel che.

•   Ri Miguel «ktakʼatobʼ na [pa] jun joqʼotaj re kʼaxkʼol» (Daniel 12:1). Pa ri wuj re Daniel ri tzij «ktakʼatobʼ» kchʼaw chrij jun qʼatal tzij che kumaj jun chak nim ubʼanik (Daniel 11:​2-4, 21). Jesucristo, ri kbʼix «UTzij ri Dios» che, are kok na «Kajawinel ri ajawinelabʼ» rech kusachisaj kiwach ri ukʼulel ri Dios y kuchajij ri utinamit (Apocalipsis 19:11-​16). Wariʼ kbʼantaj pa ri tiempo chiʼ «kpe na nimalaj kʼaxkʼolil ri man ilom ta uloq qas are taq xtikiritaj uloq ri uwach Ulew kʼa kimik» (Mateo 24:21, 42).