¿La ksachisax uwach ri uwach Ulew?

TAJIN KUJAQ PA

Ri kuya ubʼixik ri Biblia

Ksachisax taj, kporox taj ni kkʼex taj. Ri Biblia kubʼij che ri Dios xubʼan ri uwach Ulew rech kekʼojiʼ winaq chuwach.

«Ri e utzalaj taq winaq kkechbʼej na ri Ulew kejeqiʼ kʼu na chuwach chbʼe qʼij saq» (Salmo 37:29).
«Xkoj la ri uwach Ulew pa kiwiʼ ri e utakʼalibʼal rech mawi jubʼiqʼ kel pa ri ukʼolbʼal» (Salmo 104:5).
«Jujun keʼalaxik jujun chik kekamik, are kʼu ri uwach Ulew mawi jubʼiqʼ kkʼextajik» (Eclesiastés 1:4).
«Ri xbʼanow ri kaj, ri are Dios xuqujeʼ Ajawaxel, ri xbʼanow ri ulew xuqujeʼ xunukʼu, ri ko xujeqebʼaʼ, ri xbʼanowik rech man xaq ta katolik xaneʼ kekʼojiʼ winaq chuwach» (Isaías 45:18).

¿La ksachisax ri uwach Ulew kumal ri winaq?

Ri Dios kuya ta bʼe che rumal ri chʼoj, ri contaminación, o nikʼaj chi jastaq che kkibʼan ri winaq kusachisaj ri uwach Ulew. Ri Biblia kubʼij che kopan na ri qʼij are taq ri Dios kusach na kiwach «ri kesachow ri uwach ulew» (Apocalipsis 11:18). ¿Jas kubʼan chke?

Ri Dios kukoj na ri uQʼatbʼal tzij che usachik kiwach ri e qʼatal taq tzij che e kunaq ta che usukʼumaxik ri uwach Ulew (Daniel 2:44; Mateo 6:9, 10). Y ri Qʼatal tzij are ri Jesucristo, ri uKʼojol ri Dios (Isaías 9:6, 7). Are chiʼ xkʼojiʼ cho ri uwach Ulew ri Jesús xkunik xuqʼatej uwach jun nimalaj kaqiqʼ jabʼ (Marcos 4:35-41). Rumal che are Qʼatal tzij re ri uQʼatbʼal tzij ri Dios, ri areʼ kkunik kusukʼumaj apachike kʼax cho ri uwach Ulew, rech kubʼan chi jumul kotzʼiʼj uwach junam rukʼ ri Edén (Mateo 19:28; Lucas 23:43).

¿La mat kubʼij ri Biblia che ri uwach Ulew ksachisax na uwach rukʼ qʼaqʼ?

Ksachisax taj, wariʼ are jun chomanik che kkibʼij ri winaq che qas ta kkichʼobʼo ri kubʼij 2 Pedro 3:7, che kubʼij: «Are kʼu ri kaj ulew ri e kʼo kimik, e chajim rumal ri utzij ri Dios kʼa pa ri qʼij re qʼatoj tzij, keporox kʼu na». Chqilampeʼ kebʼ jastaq che kojutoʼo rech qas kqachʼobʼ ri kraj kubʼij ri tzij riʼ:

Pa ri Biblia ri e tzij kaj, ulew y qʼaqʼ kʼo kʼi kraj kubʼij. Jun kʼutbʼal pa Génesis 11:1 La Biblia. Traducción del Nuevo Mundo kubʼij: «Are kʼu, ronojel ri uwach ulew xa jun chʼabʼal kechʼaw wi y junam tzij kkikojo». Waral «ri uwach ulew» are kchʼaw chkij ri winaq.
Ri contexto re 2 Pedro 3:7 kuqʼalajisaj ri kraj kubʼij «ri kaj», «ri uwach ulew» y «ri qʼaqʼ» che kya ubʼixik chilaʼ. Ri versículos 5 y 6 are kchʼaw chrij ri Nimalaj Jabʼ che xubʼan pa taq ri uqʼij ri Noé. Pa ri tiempo riʼ ri uwach Ulew xsach ta uwach. Ri xsachisax uwach pa ri Nimalaj Jabʼ are ri itzel taq winaq are ta ri uwach Ulew (Génesis 6:11). Xuqujeʼ xusachisaj uwach «ri kaj», kraj kubʼij, ri winaq che xkiqʼat tzij pa taq ri tiempo riʼ. Rumal laʼ, are ta ri planeta xsach uwach xaneʼ are ri itzel taq winaq. Ri Noé y ri ufamilia xekam ta pa ri Nimalaj Jabʼ rumal laʼ xkinojisaj chi jumul ri uwach Ulew (Génesis 8:15-18).

Junam rukʼ ri xubʼan ri Nimalaj Jabʼ pa ri utiempo ri Noé, ri «qʼaqʼ», o ri sachbʼal wachaj che kyaʼ ubʼixik pa 2 Pedro 3:7, are kusachisaj na kiwach ri itzel taq winaq are ta ri uwach Ulew che oj kʼo wi. Ri Dios kuya na jun «kʼakʼ kaj xuqujeʼ jun kʼakʼ ulew» chqe, jawiʼ «kkʼojiʼ wi na ri sukʼil» (2 Pedro 3:13). Wajun «kʼakʼ ulew» riʼ, o utz taq winaq, kekʼojiʼ na chuxeʼ jun «kʼakʼ kaj» kraj kubʼij jun kʼakʼ qʼatbʼal tzij, che are ri uQʼatbʼal tzij ri Dios. Wajun Qʼatbʼal tzij riʼ kubʼan na kotzʼiʼj che ronojel ri uwach Ulew (Apocalipsis 21:1-4).