¡HUY! ¿Sulaʼ tijan kkebʼan ri winaq? ¡Tijan kkeya uqʼij jun chiköp rech qʼan pwäq! ¿Suche tijan kkebʼan wariʼ?

Chiʼ ri Moisés naj chi ubʼanom pa ri juyubʼ (jïbʼ), are waʼ xkebʼij: ‹Qetaʼm täj su xubʼan ri Moisés. Chaqabʼanaʼ jun qaDios rech kojresaj bʼi waral›.

‹Utz laʼ›, xchaʼ ri Aarón, ri rachalal ri Moisés. ‹Chikʼamaʼ lo chwe ronojel ri qʼan pwäq kʼo iwukʼ.› Chiʼ xkebʼan wariʼ ri winaq, Aarón xujaʼrisaj tekʼuriʼ xubʼan jun chiköp che ri qʼan pwäq. Tekʼuriʼ are waʼ xkebʼij ri winaq: ‹¡Are waʼ ri qaDios, che xojresaj lo Egipto!› Xechaʼ, tekʼuriʼ xeʼok che ubʼanik jun nimqʼij, rech xkeya uqʼij ri jun chiköp rech qʼan pwäq.

Chiʼ ri Jehová xril wariʼ, sibʼalaj xpe royowal. Are wariʼ xubʼij che Moisés: ‹Jat chanim. Ri tinamit xeʼok che ubʼanik itzelal. Xkesach ri täq nutaqonik xuqujeʼ tijan kkeya uqʼij jun chiköp rech qʼan pwäq›.

Tekʼuriʼ ri Moisés xqaj bʼi chanim. Chiʼ kʼo chi naqaj, are waʼ xrilo. ¡Ri winaq tijan kebʼixonik xuqujeʼ tijan kexojowik chirij ri jun chiköp! Sibʼalaj xpe royowal ri Moisés, rumal wariʼ xukʼaq lo ri kebʼ tzʼalam täq abʼaj che tzʼibʼatal wi ri täq taqonik chuwäch, wariʼ xepaxik. Tekʼuriʼ xujaʼrisaj ri jun chiköp. Wariʼ xubʼan junam kkaʼy ulew.

Ri tinamit xkebʼan jun nimalaj itzelal. Rumal laʼ ri Moisés xubʼij chike ri achijabʼ che kketzukuj ri kichʼichʼ. ‹Ri itzel täq winaq che xkeya uqʼij ri jun chiköp rajawaxik kekamik›, xchaʼ. ¡Rumal laʼ ri täq achijabʼ xkekamsaj 3.000 täq winaq! Wariʼ kukʼutu che rajawaxik kqachajej qibʼ, che xaq xiw Jehová kqaya uqʼij are ta ri dioses che e qastzij täj.