CHAWILAMPEʼ ri Josué. Are wariʼ xubʼij: ‹¡Qʼij, xaq matchupik!› Tekʼuriʼ ri Qʼij xkaʼy kanoq. Naj xkanaj kan chilaʼ pa nikʼaj che ri kaj. ¡Are Jehová xubʼan wariʼ! Chqilaʼ suche Josué xraj che ri Qʼij xchup täj.

Chiʼ ri jobʼ itzel täq ajawinel rech ri tinamit Canaán xeʼok che ubʼanik chʼoj rukʼ Gabaón, ri täq gabaonitas xketaq bʼi jun achi rech kubʼij che Josué che keʼutoʼ. ‹¡Chatpe qukʼ chanim!› Xchaʼ. ‹¡Chojatoʼ! Konojel ri täq ajawinel rech ri tinamit tijan kkebʼan kʼäx chike ri täq ajpatinel awech.›

Tekʼuriʼ chanim xebʼe ri Josué rukʼ ri nikʼaj chik achijabʼ. Xebʼin ronojel jun chaqʼabʼ. Chiʼ xeʼopan pa Gabaón, ri täq ajchʼoj kech ri jobʼ ajawinel xkexibʼij kibʼ xuqujeʼ xeʼanmajik. Rumal waʼ Jehová xubʼano che xtzaq lo nimaq täq saqbʼach pa kiwiʼ, e kʼi ajchʼoj xekam rumal ri saqbʼach chuwäch ri xkekamsaj ri ajchʼoj rech Josué.

Josué xrilo che chanim tijan kubʼan qʼequʼm. Tekʼuriʼ kʼi chike ri ajchʼoj kech ri jobʼ itzel täq ajawinel xkaj xeʼanmajik. Rumal laʼ ri Josué xubʼan uchʼawem rukʼ Jehová, tekʼuriʼ xubʼij wariʼ: ‹¡Qʼij xaq matchupik!› Tekʼuriʼ ri Qʼij xchup täj, rukʼ wariʼ ri täq israelitas xekunik xkekʼis ri chʼoj tekʼuriʼ xechʼakanik.

E kʼo kʼi nikʼaj chik itzel täq ajawinel pa Canaán che itzel xkil ri utinamit ri Ajawaxel. Ri Josué xuqujeʼ ri ajchʼoj xkekoj waqibʼ junabʼ che kichʼakik 31 täq ajawinel rech ri tinamit Canaán. Bʼantaj naq chi wariʼ, Josué xubʼan che ri tinamit xujach ribʼ pa ri täq ri tribus che kajwtaj ulew chike.

Xqʼax chi kʼi täq junabʼ, tekʼuriʼ kʼisbʼal re xkam ri Josué chi kʼo 110 ujunabʼ. Chiʼ ri Josué xuqujeʼ ri täq rachiʼl majaʼ kekamik, ri winaq kkenimaj ri Jehová. Chiʼ xekamik, ri winaq xeʼok che ubʼanik ri itzelal xuqujeʼ xeqaj pa kʼäx. Tekʼuriʼ kimik kajwataj ri Ajawaxel chike rech keʼutoʼ.