JOSÍAS xa wajxaqibʼ ujunabʼ kʼolik chiʼ xubʼan ajawinel pa ri kebʼ tribus rech Israel. Sibʼalaj alaj na che xubʼan ajawinel. Rumal laʼ, chiʼ xumajo, o xuchaplej, ri winaq che kʼo chi kʼi kijunabʼ xketo che ubʼanik ajqʼatbʼaltzij puwiʼ ri tinamit.

Chiʼ Josías ubʼanom chik ajawinel pa wuqubʼ junabʼ, xutzukuj ri Jehová. Xubʼan re, su xkebʼan ri utzalaj täq ajawinel David, Josafat xuqujeʼ Ezequías. Chiʼ alaj na, xubʼan jun jastaq, o kos, che xuxej ta ribʼ.

Pa kʼi täq junabʼ kʼi chike ri täq israelitas xkebʼan itzel täq winaq. Xkeya uqʼij täq dioses che e qastzij täj. Xexukeʼ, o xexekeʼ, che kiwäch täq tyox. Rumal laʼ Josías xuqujeʼ ri täq nikʼaj chik achijabʼ xkesaj pa tinamit ri qastzij täq uyaʼik uqʼij Ajawaxel. Wariʼ are jun nimalaj chak, rumal che kʼi winaq xkeya uqʼij täq dioses che e qastzij täj. Pa ri wachbʼäl kawilo che Josías rukʼ ri täq achijabʼ tijan kkepaxij ri täq tyox.

Tekʼuriʼ, Josías xubʼij chike oxibʼ achijabʼ che kkebʼan ubʼanik ri loqʼalaj ja rech Jehová. Rumal laʼ xumol pwäq chike konojel ri tinamit tekʼuriʼ xya chike wa täq achijabʼ riʼ rech kkebʼan ri chak, chiʼ tijan kkebʼan ri chak, ri ajkojol tabʼal toqʼobʼ ubʼiʼ Hilquías xuriq chilaʼ jun jasach nim ubʼanik: are ri wuj rech ri täq utaqonik ri Jehová xubʼij che Moisés che utzʼibʼan kan ojer, wariʼ sachinäq chik.

Chiʼ xukʼam bʼik ri wuj chuwäch Josías, Josías xubʼij che ksikʼix uwäch. Chiʼ xsikʼix uwäch wariʼ, Josías xuchʼobʼo che ri tinamit tijan täj kkebʼan ri utaqonik ri Jehová. Rumal waʼ sibʼalaj xbʼisonik, rumal laʼ xutoʼqpij ri ratzʼyaq, junam rukʼ ri kawil pa wachbʼäl. Xubʼij: ‹Jehová petinäq royowal, o riwal, qukʼ xchaʼ, rumal che ri täq qatat qanan xkebʼan täj ri taqonik ri tzʼibʼan pa wajun wuj riʼ›, xchaʼ.

Josías xutaq ri ajkojol tabʼal toqʼobʼ ubʼiʼ Hilquías che utaʼyik su kubʼij Jehová che wariʼ. Hilquías xbʼe che rilik jun ixoq ajqʼaxal utzij Ajawaxel ubʼiʼ Huldá, tekʼuriʼ xuta che su kubʼij ri Ajawaxel. Areʼ xubʼij ri ubʼim lo Jehová che rech kubʼij che Josías: ‹Jerusalén xuqujeʼ konojel ri winaq kkʼajsax na kiwäch rumal che kkeya uqʼij täq dioses che e qastzij täj xuqujeʼ nojinäq ri tinamit che itzelal. Tekʼuriʼ rumal che at, Josías, abʼanom utz, wajun kʼäx riʼ kpetik chiʼ at kamnäq chik›.