CHAWILAMPEʼ ri Samuel tijan kukoj (kuya) aceite pa ujolom wajun achi. Are kbʼan ojer rech kkekʼutu chiʼ kchaʼ jun winaq che ajawinel. Jehová xubʼij che Samuel che kuya aceite pa ujolom ri Saúl. Wajun loqʼalaj aceite sibʼalaj kʼokʼ.

Saúl xukoj täj che qas kkunik kubʼan jun utzalaj ajawinel. ‹Ri in inpetinäq lo pa jun tribu rech Benjamín ri nitzʼ kʼo Israel›, xchaʼ che Samuel. ‹¿Suche kabʼij che kinbʼan ajawinel?› Jehová sibʼalaj utz kril ri Saúl rumal che kubʼan ta nim che ribʼ. Rumal laʼ xuchaʼ che ajawinel.

Tekʼuriʼ Saúl are ta jun achi che xa kʼot upwäq, xuqujeʼ che xa nitzʼ raqan. Areʼ petinäq pa jun familia nim kipwäq, xuqujeʼ jun jeʼlikalaj (tzʼoʼylaj) achi nim raqan. ¡Sibʼalaj nim raqan che kiwäch ri täq israelitas! Xuqujeʼ ri Saúl are jun achi che keʼuchʼak konojel rukʼ kbʼin chanim, xuqujeʼ nim uchoqʼabʼ kʼolik. Ri winaq kekikotik che Jehová xuchaʼ ri Saúl rech kubʼan ajawinel. Konojel xkebʼij wariʼ: ‹¡Chkʼasloq ri ajawinel!›

Ri täq kikʼulel ri israelitas kʼo na nim kichoqʼabʼ. Chiʼ qʼaxnäq chi kebʼ oxibʼ qʼij che xbʼan ajawinel che Saúl, ri täq amonitas xepe pa chʼoj kukʼ. Tekʼuriʼ Saúl xeʼumol ri e kʼi täq winaq rech kebʼe pa chʼoj, rukʼ wariʼ xeʼuchʼak ri täq amonitas. Ri tinamit xkikotik che ri Saúl xubʼan ajawinel.

Xeqʼax ri junabʼ, ri Saúl xukʼam bʼe pa kiwiʼ ri israelitas rech xechʼakanik. Saúl kʼo jun ukʼojol che kuxibʼij ta ribʼ ubʼiʼ Jonatán. Jonatán xutoʼ ri Israel che uchʼakik kʼi täq chʼoj. Ri täq filisteos sibʼalaj xkebʼan kikʼulel che ri Israel. Xopan jun qʼij, e kʼi täq miles e filisteos xepe chirij Israel.

Samuel xubʼij che Saúl che kreyej na, rech kuya tabʼal toqʼobʼ che Jehová. Tekʼuriʼ xopan ta chanim ri Samuel. Saúl xuxibʼij ribʼ che ri täq filisteos xkemaj ri chʼoj, rumal laʼ xumaj uyaʼik ri tabʼal toqʼobʼ. Chiʼ xopan ri Samuel, xubʼij che Saúl che xniman ta che ri Ajawaxel. ‹Jehová kuchaʼ chi na jun chik winaq rech kubʼan ajawinel pa kiwiʼ ri Israel›, xchaʼ Samuel.

Kʼisbʼal re, Saúl xniman ta che Jehová. Samuel xubʼij wariʼ che: ‹Are utz che katniman che Jehová, chuwäch che kaya jun utzalaj chij rech tabʼal toqʼobʼ che. Rumal che xatniman ta che ri Jehová, katresaj pa ri ajawbʼäl rech Israel›.

Che ronojel wariʼ kqetaʼmaj, che rajawaxik kojniman che ri Jehová. Xuqujeʼ, wariʼ kukʼut che qawäch che jun utzalaj winaq junam che Saúl, kkunik kubʼan itzel winaq. ¡Xaq mojqaj chupam wariʼ! ¿La qastzij?