QʼAXNÄQ chi 10 junabʼ chiʼ ri ajawinel Nabucodonosor xeʼukʼam bʼi ri täq israelitas nim ketaʼmbʼäl pa ri Babilonia. ¡Chawilampeʼ! Ri Jerusalén tijan kkʼatik, tekʼuriʼ ri täq israelitas che xekam täj xekʼam bʼi Babilonia rech ketzʼapix chilaʼ.

Masach chawe, che are waʼ xkeya ubʼixik ri ajqʼaxal tzij ri kbʼan na we kkeya ta kan ri itzelal tijan kkebʼano. Tekʼuriʼ ri täq israelitas xketa ta ri xkebʼij ri ajqʼaxal tzij chike. Xkeya ta kan uyaʼik uqʼij ri täq tyox, are ta xkeya uqʼij ri Jehová. Rumal laʼ are utz che xbʼan kʼäx chike. Qetaʼm wariʼ rumal che Ezequiel ri ajqʼaxal utzij ri Ajawaxel kubʼij chaqe ri itzelal xkebʼan ri täq israelitas.

¿La awetaʼm jachin laʼ ri Ezequiel? Are jun chike ri alabʼom che ri Nabucodonosor xukʼam bʼi Babilonia 10 junabʼ nabʼe che ri usachisaxik ri Jerusalén. Daniel xuqujeʼ ri oxibʼ rachiʼl, Sadrac, Mesac xuqujeʼ Abednego, xuqujeʼ xekʼam bʼi Babilonia chiʼ xkʼam bʼi Ezequiel.

Chiʼ Ezequiel kʼo na pa Babilonia, Jehová xukʼut chuwäch ri itzelal tijan kbʼan pa ri loqʼalaj ja rech Jerusalén. Are Jehová xkʼutuw chuwäch. Qastzij che ri Ezequiel kʼo na pa ri Babilonia, tekʼuriʼ Jehová xubʼan che ri Ezequiel kril ronojel tijan kbʼan pa ri loqʼalaj ja. ¡Ri krilo sibʼalaj utz täj!

‹Chawilampeʼ ri tzʼil täq jastaq tijan kkebʼan ri winaq chupam ri loqʼalaj ja›, xchaʼ ri Jehová che ri Ezequiel. ‹Chawilampeʼ ri täq tapya nojinäq che kiwachbʼäl täq kumätz xuqujeʼ nikʼaj chik chiköp e tzʼajom chilaʼ. ¡Xuqujeʼ chawilampeʼ ri täq israelitas tijan kkeya kiqʼij wariʼ!› Ezequiel kkunik kril wa täq jastaq, xuqujeʼ xutzʼibʼaj wa täq tijan kbʼanik.

‹¿La kawil ri tijan kkebʼan ri ajkʼamal bʼe israelitas chiʼ kʼot jun winaq kilowik?› Xchaʼ ri Jehová che Ezequiel. Jeʼ, xchaʼ ri Ezequiel, xkunik xril wariʼ. Kʼo 70 achijabʼ, konojel tijan kkeya uqʼij ri täq tyox. Are xkebʼij wariʼ: ‹Jehová kojril täj. Kʼot ta chi waral pa ri tinamit›.

Tekʼuriʼ Jehová xukʼut che Ezequiel jujun täq ixoqibʼ e kʼo che jun chike ri uchiʼja rech ri loqʼalaj ja. Tijan kkeya uqʼij jun tyox ubʼiʼ Tamuz. ¡Ezequiel xril wa täq achijabʼ e kʼo pa rokbʼal ri loqʼalaj ja rech Jehová! Weneʼ e kʼo 25. ¡E xuklik, o kexekë, chuwäch ri Qʼij!

‹Wa täq winaq riʼ kinkenimaj täj›, xchaʼ Jehová. ‹¡Kkebʼan kʼi täq itzelal, xuqujeʼ kepe pa ri wachoch kkebʼan ri itzelal!› Rumal laʼ Jehová xubʼij che kubʼan wariʼ: ‹Kkenaʼ na ri uchoqʼab ri wiwal, o woyowal. Käx ta kʼut kinnaʼo chiʼ ksach kiwäch›.

Xaq (o xiw) qʼaxnäq oxibʼ junabʼ che Jehová xukʼut wa täq jastaq che Ezequiel, ri täq israelitas xkenimaj ta ri ajawinel Nabucodonosor. Rumal laʼ ri Nabucodonosor xbʼe pa chʼoj chikij. Qʼaxnäq chi jun junabʼ rukʼ nikʼaj, ri täq Babilonios xkeqasaj bʼi ri täq tapya rech Jerusalén tekʼuriʼ xkeporoj ronojel ri tinamit. Kʼi chike ri winaq xekamik ri nikʼaj chik xekʼam bʼi Babilonia rech ketzʼapixik.

¿Suche kʼot xubʼij Jehová che xpe wajun nimalaj kʼäx pa kiwiʼ ri israelitas? Rumal che xketa ta utzij xuqujeʼ xkenimaj ta ri täq utaqonik. Wariʼ kukʼutu che rajawaxik kqabʼan ronojel ri kubʼij ri Ajawaxel chaqe.

Nabʼe xyaʼ chike jun jupuq winaq kekanaj kan Israel. Ri ajawinel Nabucodonosor xukoj jun judío ubʼiʼ Gedalías rech keʼuchajej ri winaq riʼ. Tekʼuriʼ nikʼaj israelitas xkekamsaj ri Gedalías. Kimik ri winaq xkexibʼij kibʼ che ri täq Babilonios kepe che usachisaxik kiwäch e konojel. Rumal laʼ xkebʼan che Jeremías xbʼe kukʼ rech xeʼanmaj bʼi Egipto.

Rumal wariʼ kʼot nijun winaq xkanaj kan Israel. Xubʼan 70 junabʼ che nijun kʼo pa wajun tinamit. Kʼot nijun chilaʼ. Tekʼuriʼ Jehová xubʼij che kubʼan che ri uwinaq ketzalij pa kitinamit chiʼ qʼaxnäq chi 70 junabʼ. Tekʼuriʼ, ¿su xkeriq ri uwinaq ri Ajawaxel pa ri tinamit rech Babilonia? Chqilampeʼ.