CHIʼ Moisés xtzalij pa Egipto, xubʼij che ratz ubʼiʼ Aarón ronojel täq etal che xukʼut Jehová chuwäch. Chiʼ Moisés rukʼ Aarón xkekʼut we täq etal che kiwäch ri israelitas, ronojel xkekojo che are Jehová e utaqom bʼik.

Moisés rukʼ Aarón xebʼek xkechʼabʼej ri Faraón. Jewaʼ xkebʼij che: ‹Jehová kiDios e aj Israel kubʼij: chatzaqopij nutinamit rech kebʼe che ubʼanik jun nimqʼij oxibʼ qʼij chwe chilaʼ pa chaqiʼj täq ulew (desierto)›. Rumal wariʼ Faraón xubʼij: ‹In wetaʼm ta uwäch ri Jehová. Kinya ta che ri tinamit Israel kbʼek›.

Faraón xpe jun nimalaj riwal, rumal che kubʼij che xa qasal qʼij kkebʼana pa unimqʼij ri Jehová. Rumal wariʼ xuya chi na kʼi chak chike. Ri israelitas xkebʼij che umak ri Moisés xbʼan wariʼ chike, tekʼuriʼ ri Moisés sibʼalaj xbʼisonik. Ri Jehová xubʼij che Moisés che xa mubʼisonik. ‹In kinbʼano che ri Faraón kutzaqopij nutimait›, xchaʼ.

Moisés rukʼ Aarón xebʼe rukʼ Faraón xkila chik. Wakamik xkebʼan jun etal (maybʼäl). Aarón xuqasaj ri ucheʼ pa ulew, tekʼuriʼ ri cheʼ xubʼan jun nimalaj kumätz. Ri täq rajqʼij ri Faraón xkeqasaj kicheʼ pa ulew, xuqujeʼ xkebʼan kumätz. ¡Huy! Chawilampeʼ ri kumätz rech Aarón tijan kutij bʼi ri kumätz kech ri täq ajqʼij. Ri Faraón xril wariʼ, tekʼuriʼ xuya ta chike ri israelitas xebʼek.

Xopan ri qʼij chiʼ ri Jehová xpe riwal chirij Faraón. ¿La awetaʼm su xubʼan che? Xutaq lo 10 nimalaj täq kʼäx chirij, wariʼ e nimalaj täq kʼaxkʼolil puwiʼ ri Egipto.

Chiʼ xepe ri täq kʼäx puwiʼ Egipto, ri Faraón xusikʼij Moisés xuqujeʼ jewaʼ xubʼij che: ‹Chatakʼbʼaʼ ri kʼäx chaqij, xiw jewaʼ kinyaʼo che kbʼe ri tinamit Israel›. Tekʼuriʼ xiw kkʼis wajun kʼäx, kraj ta chik keʼutzaqopij bʼik. Kuya ta bʼaʼ chike kebʼek. Tekʼuriʼ chiʼ xekʼow ri kʼisbʼäl kʼäx, xubʼij chike che utz kebʼek.

¿La awetaʼm sulaʼ ri täq 10 kʼäx xpe puwiʼ Egipto? Chawilampeʼ ri jun chik uxaq wuj rech kawetaʼmaj.