JUN chike ri tinamit chiʼ xebʼe wi ri winaq chiʼ kʼisnäq chi ri Nimalaj Jabʼ, are ri tinamit ubʼiʼ Ur. Ri Ur xubʼan jun nimalaj tinamit pa kʼo nim täq pwäq kukʼ, kʼo jeʼlik täq ja chupam. Tekʼuriʼ ri winaq e kʼo chilaʼ kkeya uqʼij täq tyox. Xuqujeʼ jewaʼ riʼ kkebʼan ri winaq pa ri tinamit Babel. Ri Noé rukʼ ri ukʼojol Sem xkepatanej ri Jehová, jet waʼ xkebʼan ri winaq aj Babel rukʼ ri aj Ur.

Kʼisbʼal re, 350 junabʼ che qʼaxnäq che ri nimalaj jabʼ, xkäm ri sukʼalaj Noé. Xiw xqʼax kebʼ junabʼ tekʼuriʼ xkʼejeʼ wajun achi che kawil pa ri wachbʼäl. Are jun winaq che ri Ajawaxel sibʼalaj xraj. Abrahán ubʼiʼ. Kʼo rukʼ ufamilia pa ri tinamit Ur.

Pa jun qʼij ri Jehová xubʼij che ri Abrahán: ‹Chaya kan ri tinamit Ur, tekʼuriʼ jat pa jun tinamit che kinkʼut chawäch›. ¿La xunimaj ri Ajawaxel xuqujeʼ la xuya kan ronojel su kʼo pa ri tinamit Ur? Jeʼ, xuya kanoq. Rumal che Abrahán xubʼan ronojel su xubʼij ri Ajawaxel che, xbʼix rachiʼl ri Ajawaxel che.

Chiʼ ri Abrahán xel bʼi pa ri Ur xebʼe nikʼaj ufamilia rukʼ. Ri utat ubʼiʼ Taré xbʼe rukʼ. Xbʼe rukʼojol ri uchaqʼ ubʼiʼ Lot. Xuqujeʼ xbʼe rixoqil ubʼiʼ Sara. Xqʼax kebʼ oxibʼ qʼij tekʼuriʼ xeʼopan pa ri tinamit ubʼiʼ Harán, tekʼuriʼ xkäm ri Taré. Naj e kʼo che ri Ur.

Tekʼuriʼ ri Abrahán xuqujeʼ ronojel ri e kʼo pa rachoch xeʼel bʼi pa tinamit Harán tekʼuriʼ xeʼopan pa ri Ulew ubʼiʼ Canaán. Chilaʼ ri Jehová xubʼij che: ‹Are waʼ ri Ulew kinya na chike ri awalkʼwal›. Ri Abrahán xkanaj kan pa ri Canaán xuqujeʼ xubʼan rachoch rukʼ täq atzʼyaq o kʼul.

Ri Ajawaxel xutoʼ ri Abrahán tekʼuriʼ areʼ xkʼejeʼ e kʼi jupuq täq chij rukʼ xuqujeʼ nikʼaj chik täq chiköp xuqujeʼ e kʼi täq ajchak e kʼo rukʼ. Ri Abrahán rukʼ ri Sara kʼot kalkʼwal.

Chiʼ ri Abrahán kʼo chi 99 ujunabʼ, ri Jehová xubʼij che: ‹Kinbʼij chawe che kabʼan kitat e kʼi täq tinamit›. Tekʼuriʼ ri Abrahán xuqujeʼ ri Sara sibʼalaj e riʼj chik ¿La xekun na xkʼejeʼ jun kalkʼwal?