JOSÉ xraj xretaʼmaj la e itzel ta chik ri täq 10 rachalal xuqujeʼ la utz chi ri kinoʼj. Rumal laʼ xubʼij wariʼ chike: ‹Ix ixpetinäq che urilik su täq e kʼo pa qatinamit›.

‹Jet laʼ›, xechaʼ. ‹Öj utzalaj täq achijabʼ. Qonojel qachalal qibʼ. Ojer oj 12. Kʼo jun qachalal kʼot chik, tekʼuriʼ ri chaqʼxel xkanaj kan rukʼ qatat.›

Ri José xubʼan che ribʼ che xukoj täj chike ri xkekibʼij che. Rumal laʼ xutzʼapij ri Simeón, tekʼuriʼ xuya chike ri nikʼaj chik xkekʼam bʼi su ktijowik tekʼuriʼ xebʼe che kichoch. Tekʼuriʼ xubʼij wariʼ chike: ‹Chiʼ kixtzelej loq, rajawaxik kikʼam lo ri ichaqʼ›.

Chiʼ xetzelej che kichoch pa tinamit Canaán, we achijabʼ xkebʼij che ri kitat su xbʼantajik. Xpe jun nimalaj bʼis pa ranimaʼ ri Jacob, xubʼij wariʼ: ‹Ri José kʼot chik›, ‹tekʼuriʼ kimik kʼot chi Simeón›. Kinya ta chiwe che kikʼam bʼi ri Benjamín ri qas alaj nukʼojol. Tekʼuriʼ chiʼ xkʼis chik su täq ktijawik, xiw jewaʼ xuya ri Jacob che xkʼam bʼi ri Benjamín pa Egipto rech jelaʼ kyaʼ lo su täq rajawaxik chike rech kketijo.

Ri José xrilo che xeʼopan chi ri rachalal. Sibʼalaj xkikotik chiʼ xril uwäch ri Benjamín. Nijun chike retaʼm che wajun achi nim ubʼantajik are ri José. Kimik ri José kraj krilo la xkejal ri kinoʼj ri täq 10 rachalal.

Rumal laʼ xeʼutaq ri umos che unojisaxik ri täq kisak o kikoxtar, tekʼuriʼ xkil täj chiʼ xbʼan wariʼ chike. Ri José xeʼutaq ri umos che uyaʼik bʼi chupam ri ukoxtar ri Benjamín jun jeʼlikalaj copa junam kkaʼy saq pwäq. Chiʼ e bʼenaq chi pa bʼe, ri José xeʼutaq ri umos che kichapik. Chiʼ xkeriqaʼ, xkebʼij wariʼ chike: ‹¿Suche xiwelqʼaj lo rucopa ri qapatron?›, xechaʼ.

‹Öj täj xojelqʼan ri tijbʼal uvino›, xechaʼ ri achijabʼ. ‹We keriqo che rukʼ jun chaqe kʼo wi, chikamsaj›, xechaʼ.

Rumal laʼ ri täq mos xeʼok che utzukixik pa täq koxtar, tekʼuriʼ xekiriqa lo pa ri ukoxtar ri Benjamín, junam che kawil pa ri wachbʼäl. Are wariʼ xekibʼij ri mos: ‹Ix kixkunik kixbʼek, tekʼuriʼ ri Benjamín rajawaxik kqakʼam bʼi qukʼ›, xechaʼ. ¿Su xkebʼan kimik ri 10 ratz José?

Ronojel xetzalij rukʼ Benjamín che rachoch José. José xubʼij wariʼ chike rachalal: ‹Kixkunik kixbʼe iwonojel, xiw ri Benjamín rajawaxik kkanaj kan wukʼ che numos›.

Xchʼaw kʼu ri Judá, are xubʼij wariʼ: ‹We in kintzalij pa wachoch tekʼuriʼ inkʼamon ta bʼi nuchaqʼ, ri nutat kkamik, rumal che sibʼalaj kraj ri Benjamín. Rumal laʼ, chabʼana toqʼobʼ (utzil), chinayaʼ kan in che amos, chayaʼ kʼu che ri nuchaqʼ kbʼek›.

Ri José xril rukʼ wariʼ che ri täq rachalal junam ta chi kinoʼj rukʼ ojer. E itzel ta chik, xkebʼan utz täq winaq. Chqilampeʼ su xubʼan ri José.