RI Noé kʼo rixoqil, xuqujeʼ oxibʼ ralkʼwal. Ri kibʼiʼ kalkʼwal are Sem, Cam xuqujeʼ Jafet. Ronojel kʼo jun kixoqil. Jewaʼ riʼ che kʼo wajxaqibʼ (ocho) winaq pa rachoch ri Noé.

Kimik ri Ajawaxel xubʼij che ri Noé che kubʼan jun sutaq jun wi kkaʼyik. Xubʼij che, che kubʼan jun nimalaj jukubʼ. Wajun jukubʼ sibʼalaj nim chuwäch jun barco, junam kkaʼy rukʼ jun nimalaj koxon. Xubʼij ri Ajawaxel che: ‹Kabʼan oxibʼ piso che› ‹xuqujeʼ chabʼana alaj täq ja chupam›. Wariʼ kech ri Noé xuqujeʼ ri ufamilia, ri täq chiköp xuqujeʼ ri ktijowik kech konojel.

Ri Ajawaxel xubʼij che ri Noé che utz ubʼanik ri nimalaj jukubʼ kubʼano rech kok ta jaʼ chupam. ‹Kinqasaj na jun nimalaj jabʼ puwiʼ ri uwäch Ulew rech usachik kiwäch ronojel ri winaq. Chin kʼot chupam ri nimalaj jukubʼ kkamik.›

Ri Noé rukʼ ralkʼwal xkenimaj ri Ajawaxel tekʼuriʼ xkemaj ubʼanik ri nimalaj jukubʼ. Tekʼuriʼ ri winaq xa ketzeʼn chikij. Xekiya ta kan ubʼanik ri itzelal. Nijun xkojon che ri Noé chiʼ xubʼij chike su kukʼam lo ri Ajawaxel.

Rumal che sibʼalaj nim, xukʼam bʼi kʼi täq junabʼ che ubʼanik. Tekʼuriʼ xukʼis ubʼanik. Tekʼuriʼ ri Ajawaxel xubʼij che Noé che kukoj ri täq chiköp chupam. E kʼo nikʼaj chike xeʼok jokʼlaj, amaʼ rukʼ atiʼt. Tekʼuriʼ ri Ajawaxel xubʼij che e kʼo nikʼaj keʼok wuqubʼ (siete) chike. Xuqujeʼ xubʼij che Noé che kukʼam lo ri jaljoj täq kiwäch kerapanik. Ri Noé xubʼan ronojel ri xuta ri Ajawaxel che.

Tekʼuriʼ, ri Noé rukʼ ri ufamilia xeʼok bʼi chupam ri nimalaj jukubʼ. Tekʼuriʼ ri Ajawaxel xutzʼapij ri uchiʼ ri nimalaj jukubʼ. Ri Noé xuqujeʼ ri ufamilia xkibʼej (xkeʼej) chupam. Chachomaj (chamaymaʼ) che atkʼo chila, tijan kawibʼej o kaweʼej. ¿Xpe kʼu na ri nimalaj jabʼ che xubʼij ri Ajawaxel?