RONOJEL ri utz petinäq rukʼ ri Ajawaxel. Ri Ajawaxel xubʼan ri qʼij rech kuya saq (saqil) pa qʼij, xuqujeʼ xubʼan ri ikʼ rukʼ täq chʼumil rech kkeya saq chaqe chaqʼabʼ. Ri Ajawaxel xubʼan ruwäch Ulew rech kojkʼaseʼ chuwäch.

Ri qʼij, ri ikʼ, ri täq chʼumil xuqujeʼ ruwäch Ulew, wariʼ e are ta nabʼe xubʼan ri Ajawaxel. ¿La awetaʼm sulaʼ xubʼan nabʼe? Xeʼubʼan nikʼaj junam rukʼ areʼ. Wanikʼaj riʼ kojkun täj kqilo junam che kqil ta ri Ajawaxel. Ri Loqʼalaj Pixabʼ kubʼij ángeles chike. Ri Ajawaxel xubʼan ri täq ángeles rech e kʼo rukʼ pa ri kaj.

Ri nabʼe ángel xubʼan ri Ajawaxel sibʼalaj nim ubʼanik. Are ri ukʼojol ri Ajawaxel, xuqujeʼ xchakun rukʼ utat. Xutoʼ ri Ajawaxel che ubʼanik ronojel. Xutoʼ che ubʼanik ri qʼij, ri ikʼ rukʼ täq chʼumil xuqujeʼ ruwäch Ulew.

¿Sulaʼ ubʼanon ruwäch Ulew ojer? Nabʼe kʼot jun kkunik kkʼaseʼ cho ruwäch Ulew. Xiw kʼo jun nimalaj jaʼ puwiʼ ronojel ruwäch Ulew. Ri Ajawaxel xraj che kikʼejeʼ winaq cho ruwäch Ulew. Rumal laʼ, xubʼan ubʼanik (xumaj uyubʼxik) chqe öj. ¿Sulaʼ xubʼan che?

Nabʼe rajawaxik che ruwäch Ulew kʼo saq, o chäj (luz) chuwäch. Rumal laʼ ri Ajawaxel xubʼano che ri usaqil ri qʼij kkaʼy puwiʼ ruwäch Ulew. Xubʼan wariʼ rech kʼo chaqʼabʼ (noche) xuqujeʼ pa qʼij (día). Tekʼuriʼ xubʼan che ri Ulew che xutas o xujach ribʼ che ri nimalaj jaʼ.

Nabʼe kʼot nijun winaq cho ruwäch Ulew. Junam rukʼ jun wachbʼäl kawil waral. Kʼot täq kotzʼiʼj, täq cheʼ, e kʼot chiköp. Kʼot kär chupam ri nimalaj jaʼ. Ri Ajawaxel kʼo kʼi uchak xubʼano rech ri täq chiköp xuqujeʼ ri winaq kekʼaseʼ rukʼ jun utzalaj kikʼaslemal cho ruwäch Ulew.