RI ALA kʼo rukʼ Pablo pa ri wachbʼäl are Timoteo. Timoteo kʼo rukʼ ufamilia pa Listra. Ri unan ubʼiʼ Eunice, ri unan Eunice ubʼiʼ Loida.

Weneʼ qʼaxnäq chi jun junabʼ chiʼ Pablo rukʼ Bernabé xekʼojiʼ waral nabʼe mul che uyaʼik ubʼixik ri utzalaj täq tzij. Kimik ri Pablo rukʼ rachiʼl ubʼiʼ Silas xetzalij lo Listra.

¿La awetaʼm su xubʼij Pablo che Timoteo? ‹¿La kawaj katbʼe wukʼ xuqujeʼ rukʼ Silas?› Xchaʼ Pablo. ‹Katkunik kojatoʼ che uyaʼik ubʼixik ri utzalaj täq tzij chike ri winaq e kʼo naj.›

‹Utz laʼ›, ‹kwaj kinbʼek›, xchaʼ Timoteo. Rumal laʼ xqʼax kebʼ oxibʼ qʼij ri Timoteo xuya kan ri ufamilia tekʼuriʼ xbʼe kukʼ Pablo xuqujeʼ Silas. Tekʼuriʼ rech kqetaʼmaj na chirij ri uviaje, chqilaʼ nabʼe su tijan kuriq Pablo. Qʼaxnäq chi 17 junabʼ chiʼ ri Pablo xril ri Jesús pa bʼe rech Damasco.

¡Musach chawe che Pablo xpe Damasco che ubʼanik kʼäx chike ri täq ajtijoxel rech Jesús, kimik areʼ xubʼan ajtijoxel! Tekʼuriʼ, nikʼaj ukʼulel are kkaj kkekamsaj ri Pablo, tekʼuriʼ ri täq ajtijoxel xketoʼ rech kanmajik. Pa jun chakach, xkeqasaj lo chirij ri tapya rech ri tinamit rech jelaʼ xbʼek.

Tekʼuriʼ, Pablo xqʼax Antioquía che uyaʼik ubʼixik ri utzalaj täq tzij. Waral che unabʼe mul xbʼix cristianos chike ri täq ajtijoxel. Tekʼuriʼ chiʼ e kʼo Antioquía Pablo rukʼ Bernabé xetaq bʼi che uyaʼik ubʼixik ri utzalaj täq tzij pa täq naj tinamit. Jun chike ri tinamit xbʼe wi are Listra, chilaʼ kʼo wi rachoch Timoteo.

Kimik, weneʼ qʼaxnäq chi jun junabʼ, Pablo xtzalij chi lo Listra. Chiʼ Timoteo, Pablo xuqujeʼ Silas xebʼek, ¿la awetaʼm jachiʼ xebʼe wi? Chawilampeʼ ri wachbʼäl, tekʼuriʼ chqetaʼmaj na.

Nabʼe xebʼe pa Iconio, kʼo naqaj, tekʼuriʼ xebʼe pa jun ukabʼ tinamit ubʼiʼ Antioquía. Tekʼuriʼ xebʼe Troas, tekʼuriʼ xeqʼax pa Filipos, pa Tesalónica xuqujeʼ pa Berea. ¿La kawil ri Atenas pa ri wachbʼäl? Pablo xuya ubʼixik ri utzalaj täq tzij chilaʼ. Tekʼuriʼ xkeya ubʼixik ri utzalaj täq tzij jun junabʼ rukʼ nikaʼj pa Corinto. Kʼisbʼal re xekanaj kan kebʼ oxibʼ qʼij pa Éfeso. Tekʼuriʼ xetzalij pa jun jukubʼ chiʼ xebʼe Cesarea, tekʼuriʼ xepaqiʼ Antioquía, chilaʼ xkʼojiʼ wi ri Pablo.

Timoteo xubʼan bʼi jun naj bʼe rukʼ Pablo rech kkeya ubʼixik ri ‹utzalaj tzij› xuqujeʼ xkebʼan kʼi täq congregaciones. Chiʼ at katkʼiyik, ¿la kabʼan na jun sukʼalaj ajpatanel rech ri Ajawaxel junam che xubʼan Timoteo?