CHIʼ Pedro xuqujeʼ ri Juan xeʼel lo pa jul jachiʼ kʼo wi ri Jesús, María xkanaj kan utikel chilaʼ. Xok pa oqʼej. ¡Xkaʼy chupam ri jul xril kebʼ ángeles! Tekʼuriʼ xketa wariʼ che: ‹¿Suche katoqʼik?›

María xubʼij wariʼ: ‹Xkekʼam bʼi ri Jesús, tekʼuriʼ wetaʼm täj jachiʼ xkeya wi›. Chiʼ xkaʼy chirij xril jun achi: ‹¿Jachin laʼ katzukuj?› Xchaʼ ri achi.

María xuchomaj che wajun achi riʼ are ajchajanel rech ri täq kotzʼiʼj, weneʼ xkʼamaw bʼik ri ubʼaqil ri Jesús. Rumal laʼ xubʼij: ‹We xakʼam bʼi ri ubʼaqil ri Jesús, chabʼij chwe jachiʼ xaya wi›. Wajun achi are ri Jesús. Kʼo jun ubʼaqil che María kuchʼobʼ ta uwäch. Chiʼ Jesús xusikʼij ri María rukʼ ubʼiʼ, xuchʼobʼo che are ri Jesús. María xbʼe chanim che ubʼixik chike ri täq ajtijoxel: ‹¡Xinwil uwäch ri Jesús!›

Tekʼuriʼ pa qʼij, chiʼ kebʼ ajtijoxel e bʼenäq pa ri tinamit Emaús, jun achi xqet kukʼ. Ri täq ajtijoxel sibʼalaj kebʼison rumal ri ukamikal ri Jesús. Chiʼ tijan kebʼinik, wajun achi kuya ubʼixik kʼi täq jastaq rech ri Loqʼalaj Pixabʼ chike, rukʼ wariʼ xubʼan utz kanimaʼ. Kʼisbʼal re, chiʼ xetakʼeʼ che utijowik kiwa, ri kebʼ ajtijoxel xkechʼobʼo che wajun achi are ri Jesús. Tekʼuriʼ ri Jesús xsach che kiwäch, tekʼuriʼ ri täq ajtijoxel xetzalij Jerusalén che ubʼixik wariʼ chike ri täq apóstoles.

Chiʼ tijan kbʼan wariʼ, ri Pedro xril uwäch ri Jesús. Ri nikʼaj chik xekikotik chiʼ xketa wariʼ. Tekʼuriʼ wa täq kebʼ ajtijoxel xebʼe Jerusalén xkeriqa ri täq apóstoles. Xkebʼij chike che ri Jesús xukʼut ribʼ che kiwäch pa ri bʼe. Chiʼ tijan kkebʼij wariʼ, ¿la awetaʼm su xbʼantajik?

Chawilampeʼ pa ri wachbʼäl. Jesús xukʼut ribʼ chilaʼ pa ri ja tzʼapal uchiʼ. ¡Jun nimalaj kikotemal chike ri ajtijoxel! ¡Sibʼalaj utzilal pa wajun qʼij riʼ! ¿Jumpaʼ mul xukʼut ribʼ ri Jesús? Chabʼij ri jobʼ mul.

Ri apóstol Tomás kʼo ta kukʼ chiʼ xkil uwäch ri Jesús. Rumal laʼ, ri täq ajtijoxel xkebʼij: ‹¡Xqil uwäch ri Jesús!› Tekʼuriʼ Tomás kubʼij che rech kukoj wariʼ rajawaxik kril na uwäch. Tekʼuriʼ, qʼaxnäq chi wajxaqibʼ qʼij ri täq ajtijoxel e kʼo chi pa ri ja tzʼapal uchiʼ, tekʼuriʼ kimik Tomás kʼo chilaʼ. Xaq kʼateʼ xkil uwäch ri Jesús, rumal wariʼ ri Tomás xukojo.