¡CHAWILAMPEʼ! Ri Daniel kʼo pa jun kʼäx. ¡Tekʼuriʼ ri täq köj kʼot kkebʼan che! ¿La awetaʼm suche? ¿Jachin laʼ xyaʼow ri Daniel che kixoʼl wa täq köj riʼ? Chqilampeʼ.

Ri ajawinel rech Babilonia kimik ubʼiʼ Darío. Darío sibʼalaj utz kril ri Daniel rumal che jun utzalaj achi xuqujeʼ nim retaʼmbʼäl, xuqujeʼ xubʼan ajqʼatbʼaltzij che pa rajawbʼäl. Rumal laʼ, nikʼaj achijabʼ itzel xkil ri Daniel, rumal laʼ xkebʼan wariʼ:

Xebʼe rukʼ Darío tekʼuriʼ xkebʼij wariʼ che: ‹Oh ajawinel, qonojel kqaj, che kakoj jun taqonik che kubʼij, che chupam 30 qʼij nijun kkunik kubʼan uchʼawem che jun udios xuqujeʼ che jun chik achi, xaq xiw chawe kkebʼan ri kichʼawem. We kʼo jun kniman täj, rajawaxik kyaʼ che kixoʼl ri täq köj›, xechaʼ. Darío retaʼm täj suche wa täq achijabʼ kkaj kekoj wajun taqonik riʼ. Rumal laʼ Darío xubʼij che utz wariʼ ri xkebʼij, rumal laʼ xutzʼibʼaj wajun taqonik. Tekʼuriʼ xkun ta chik kresaj wajun taqonik.

Chiʼ ri Daniel xuta wariʼ, xbʼe pa rachoch tekʼuriʼ xubʼan ri uchʼawem junam che kubʼan ronojel täq qʼij. Ri itzel täq achijabʼ ketaʼm che Daniel kuya ta kan ubʼanik uchʼawem rukʼ Jehová. Xekikotik, rumal che xopan ri qʼij che kekunik kkekamsaj ri Daniel.

Chiʼ ri ajawinel Darío xrilo su tijan kbʼantajik, sibʼalaj xbʼisonik. Tekʼuriʼ kkun ta chik kresaj wajun taqonik, rumal laʼ rajawaxik xutaq uyaʼik ri Daniel che kixoʼl ri täq köj. Are waʼ xubʼij ri ajawinel che Daniel: ‹Are bʼaʼ ri Ajawaxel ri kaya uqʼij katutoʼ›.

Darío sibʼalaj kbʼisonik rumal laʼ xkun täj xwar pa jun chaqʼabʼ riʼ. Chiʼ xsaqarik xbʼe chanim che urilik ri Daniel. Chawilampeʼ pa ri wachbʼäl. Darío xubʼij wariʼ: ‹¡Daniel, ri upatanel ri kʼaslik Ajawaxel! ¿La xatutoʼ ri Ajawaxel che kiwäch ri köj?›

‹Ri Ajawaxel xutaq lo jun ángel›, xchaʼ Daniel, ‹xutzʼapej kichiʼ ri täq köj rech kkebʼan ta kʼäx chwe›, xchaʼ.

Sibʼalaj xkikotik ri ajawinel rumal wariʼ. Xutaq che uresaxik ri Daniel pa ri jul. Tekʼuriʼ xeʼuya bʼi ri itzel täq achijabʼ che kixoʼl ri täq köj che xkaj xkekamsaj ri Daniel. Chiʼ majaʼ na keʼopan wa itzel täq achijabʼ chupam ri jul, ri täq köj xeʼok che kitijowik.

Rumal laʼ ri ajawinel Darío xutzʼibʼaj chike konojel ri winaq: ‹Chibʼanaʼ nim che ri rajawaxel ri Daniel. Rumal che kubʼan nim täq milagros. Xutoʼ ri Daniel rech ri täq köj xketij täj›, xchaʼ.