Kʼutunem 4

¿Chinlaʼ ri Itzel (Diablo)?

¿Suche xubʼan itzel ri Satanás? (1, 2)

¿Su kubʼan ri Satanás che kisachik ri winaq? (3-7)

¿Suche rajawaxik kaxutuj ri Itzel? (7)

1. Ri «Itzel» kumol itzel täq tzij chirij ri Jehová. Ri tzij «Satanás» are jun kʼulel o ajchʼoj. We tzij riʼ are kubʼij che are ri ajkʼamolbʼe chike ri ukʼulel ri Ajawaxel. Nabʼe kanoq ri Satanás are jun tzʼaqatalaj taqoʼxel ajkaj (ángel) che kʼo rukʼ ri Ajawaxel, xraj xubʼan nim che ribʼ chuwäch ri Ajawaxel xuqujeʼ xraj che ri winaq are kkeya uqʼij areʼ rech kkeya ta uqʼij ri Ajawaxel (Mateo 4:8-10).

2. Wajun taqoʼxel ajkaj, Satanás, xukoj jun kumätz rech xchʼaw rukʼ ri Eva tekʼuriʼ rukʼ ri molon täq tzij xubʼan che, ri Eva xniman ta che ri Ajawaxel. Rukʼ wariʼ ri Satanás xubʼan chʼoj chuwäch ri «unimal [uqʼatbʼaltzij]», o soberanía ri Ajawaxel che kʼo pa ri kaj. Xukoj pa kijolom che ri Ajawaxel kkun täj kubʼan qʼatbʼaltzij pa kiwiʼ ri winaq. Xuqujeʼ xubʼij che kʼot jun winaq kkunik kubʼan sukʼ chuwäch ri Ajawaxel. Chiʼ xubʼan wariʼ xubʼan ukʼulel che ri Ajawaxel. Rumal laʼ xbʼix Itzel Satanás che (Génesis 3:1-5; Job 1:8-11; Apocalipsis 12:9).

3. Ri Satanás kraj keʼusach ri winaq rech kkeya uqʼij (2 Corintios 11:3, 14). Rech kubʼan wariʼ are keʼukoj ri täq kojonem che qastzij täj, o Religión Falsa. We jun kojonem kukʼut molon täq tzij chirij ri Ajawaxel, are qas tijan kubʼano su kraj ri Satanás (Juan 8:44). E kʼo winaq che e kʼo chupam täq kojonem che e qastzij täj, che kkekojo che tijan kkeya uqʼij ri qastzij Ajawaxel tekʼuriʼ jetwaʼ, are tijan kkeya uqʼij ri Satanás, rumal che are ri ‹dios rech we uwäch ulew› (2 Corintios 4:4).

4. Ri kichak ajqʼij are jun chik su kukoj ri Satanás rech e kʼo ri winaq pa uqʼabʼ. E kʼo winaq kechʼaw kukʼ täq uxlabʼal rech ketoʼik, kkebʼan kʼäx chike nikʼaj chik, xuqujeʼ kbʼix chike su kkeriq na pa kikʼaslemal xuqujeʼ rech kekunaxik. Are ri uchoqʼabʼ ri Itzel Satanás kʼo puwiʼ ronojel wariʼ. We kqaj kqakikotemaj ri Ajawaxel, utz täj kqabʼan kichak ri ajqʼij (Deuteronomio 18:10-12; Hechos 19:18, 19).

5. Xuqujeʼ ri Satanás keʼusach ri winaq rukʼ ri xutunem che kixol täq tinamit xuqujeʼ rukʼ uyaʼik kiqʼij ri jaljoj täq qʼatbʼaltzij  rech ri täq política. E kʼo nikʼaj winaq che nim kkena che kibʼ che kiwäch nikʼaj chik xuqujeʼ kkebʼij che ri kitinamit nim che kiwäch nikʼaj chik. Wariʼ jet laʼ (Hechos 10:34, 35). Nikʼaj chik winaq kekubʼsan kikʼuʼx che are ri nimaq täq qʼatbʼaltzij kkesaj ri kʼäx chike. Rukʼ waʼ kkexutuj ri Rajawbʼäl (Reino) ri Ajawaxel, xiw ri Rajawbʼäl kresaj na ri kʼäx chaqe qonojel (Daniel 2:44).

6. Jun chik chapbʼäl kukoj ri Satanás rech keʼusach ri winaq are ri itzel täq rayinik, o deseos. Ri Jehová kubʼij chaqe che kqachajej qibʼ che we täq mak rumal che retaʼm che ri mak kojuya pa kʼäx (Gálatas 6:7, 8). E kʼo winaq kkaj che kabʼan ronojel wariʼ. Tekʼuriʼ masach pa ajolom che are ri Satanás qas kraj che kabʼan wariʼ (1 Corintios 6:9, 10; 15:33).

7. Ri Satanás kkunik keʼutaq winaq rech kkeyik chʼoj chawij rech kaya kan ri Jehová. Xaq rukʼ bʼeʼ o weneʼ e kʼo nikʼaj awachilal kkaj täj che katijosaj awibʼ chirij ri Loqʼalaj Pixabʼ xuqujeʼ nikʼaj chik ketzeʼn chawij. Chachomajampeʼ ¿Chinlaʼ uyaʼom akʼaslemal? Ri Satanás kraj katuxibʼij rech kaya kan utijosaxik awibʼ chirij ri Jehová. Xamayaʼo che kchʼakanik (Mateo 10:34-39; 1 Pedro 5:8, 9). Chiʼ kaxutuj ri ­Itzel katkunik kakikotemaj ri Jehová xuqujeʼ kakʼutu che qastzij katkojon che ri unimal uqʼatbʼaltzij (Proverbios 27:11).

[Täq wachbʼäl pa ri 9 uxaq wuj]

Ri kojonem che e qastzij täj, ri itzinem, ri ajqʼij xuqujeʼ ri chʼoj pa täq tinamit keʼusach ri winaq

[Wachbʼäl pa ri 9 uxaq wuj]

Chakojo achoqʼabʼ chuwäch ri Satanás chiʼ katijosaj awibʼ chirij ri Jehová