Kʼutunem 7

Chojqebʼ rukʼ ri Ajawaxel pa chʼawem

¿Suche rajawaxik che kqaya ta kan ubʼanik ri chʼawem? (1)

¿Chin che rajawaxik kqabʼan qachʼawem xuqujeʼ su ubʼanik? (2, 3)

¿Su puwiʼ utz wi kqabʼan ri chʼawem? (4)

¿Jampa rajawaxik kabʼan achʼawem? (5, 6)

¿La ronojel chʼawem kuta ri Ajawaxel? (7)

1. Ri chʼawem are chiʼ jun winaq che kubʼan ta nim che ribʼ, kuchʼabʼej ri Ajawaxel. Rajawaxik kqaya ta kan ubʼanik chʼawem rukʼ ri Ajawaxel. We jewaʼ kqabʼano, qanaʼo che junam che jun qachiʼl che sibʼalaj kqaj. Ri Jehová sibʼalaj nim xuqujeʼ nim uchoqʼabʼ, tekʼuriʼ xat rumal wariʼ che kojuta täj. ¿La tijan kabʼan ri achʼawem rukʼ ri Ajawaxel? (Salmo 65:2; 1 Tesalonicenses 5:17.)

2. Ri chʼawem xuqujeʼ kqakojo rech kqaya uqʼij ri Ajawaxel. Rumal waʼ, rajawaxik che xiw kqachʼabʼej ri Ajawaxel  Jehová. Chiʼ ri Jesús xkʼejeʼ cho ruwäch Ulew, areʼ qas xubʼan chʼawem che ri Utat, ma che jun winaq täj. Jewaʼ riʼ kraj kqabʼano (Mateo 4:10; 6:9). Xiw pa ubʼiʼ ri Jesús rajawaxik kqabʼan qachʼawem. Jewaʼ kqakʼutu che nim kqil ri Jesús xuqujeʼ che kqakubʼsaj qakʼuʼx chirij ri tobʼäl mak xuyaʼ pa qawiʼ (Juan 14:6; 1 Juan 2:1, 2).

3. Chiʼ kqachʼabʼej ri Ajawaxel, rajawaxik che pa qanimaʼ kel lo wi. Kraj täj che kqabʼij chike täq kqabʼim chik xuqujeʼ rumal ta jun wuj che e tzʼibʼtal täq chʼawem chuwäch (Mateo 6:7, 8). Patne ojkʼwe (jawiʼ ta neʼ ojkʼo wi), we ojkulik, ojtakʼalik, o we ojxukulik, kojkunik kqabʼan chʼawem. Ri Ajawaxel kuta ri chʼawem che kqabʼan pa qanimaʼ (1 Samuel 1:12, 13). Utz kqabʼan qachʼawem chiʼ qatikel, pa jun kʼolbʼal (lugar) pa e kʼot nikʼaj chik winaq (Marcos 1:35).

4. ¿Su täq puwiʼ katkunik kabʼan ri achʼawem? Puwiʼ ronojel che katuqebʼsaj rukʼ ri Ajawaxel (Filipenses 4:6, 7). Ri chʼawem xuya kan ri Jesús kukʼut che qawäch che rajawaxik kqabʼan qachʼawem puwiʼ rubʼiʼ xuqujeʼ puwiʼ chike kraj kubʼan ri Jehová. Xuqujeʼ kojkunik kqata che, che kuya ri kkawtaj chaqe pa qakʼaslemal, ri kuybʼal qamak xuqujeʼ che kojutoʼo rech kojqaj ta pa mak (Mateo 6:9-13). Rajawaxik che xiw ta qech öj kqata pa qachʼawem. Xiw kqataʼo chike täq utz chuwäch ri utaqoʼnik ri Ajawaxel (1 Juan 5:14).

5. Katkunik kachʼabʼej ri Ajawaxel chiʼ kpe pa awanimaʼ kamaltyoxij che o rech kaya uqʼij (1 Crónicas 29:10-13). Xa maya kanoq che kachʼabʼej ri Ajawaxel chiʼ atkʼo pa kʼäx xuqujeʼ chiʼ tijan kejorobʼ ri kubʼsal akʼuʼx (Salmo 55:22; 120:1). Xuqujeʼ utz kabʼan ri chʼawem chiʼ katok che utijawik awa (Mateo 14:19). Ri Jehová kubʼij chaqe che kqabʼan qachʼawem che «amaqʼel» (siempre) (Efesios 6:18).

6. We xqabʼan jun nim qamak, rajawaxik kqabʼan qachʼawem rech kqata che ri Jehová che kukuy qamak. Ri Ajawaxel «kʼo kuybʼal» rukʼ, chiʼ kqabʼij qamak xuqujeʼ kqakoj qachoqʼabʼ rech kqabʼan ta chik (Salmo 86:5; Proverbios 28:13).

7. Ri Jehová xiw kuta kichʼawem ri e sukʼ täq winaq. Rech kuta ri achʼawem, ri Ajawaxel kraj che kakoj achoqʼabʼ che ubʼanik jun akʼaslemal jelaʼ che Utaqon chaqe (Proverbios 15:29; 28:9). Chiʼ kabʼan achʼawem rajawaxik che kabʼan ta nim che awibʼ (Lucas 18:9-14). Rech kyaʼ lo chawe su kata pa chʼawem, rajawaxik katchakun chirij wariʼ rech kariqo. Xiw jewaʼ riʼ kakʼutu che qastzij katkojonik xuqujeʼ kakʼutu che ri achʼawem pa awanimaʼ kel lo wi. Xiw jewaʼ ri Jehová kukʼut na chawäch che kuta ri achʼawem (Hebreos 11:6).