Kʼutunem 5

¿Su kubʼan ri Ajawaxel che ruwäch Ulew?

¿Suche ri Jehová xubʼan ruwäch Ulew? (1, 2)

¿Suche ojkʼot kimik pa jun kotzʼiʼjaläj uwäch Ulew? (3)

¿Su kbʼan na chike ri itzel täq winaq? (4)

¿Su kubʼan na ri Jesús pa kiwiʼ ri täq keriqom yabʼil?, ¿Pa kiwiʼ ri täq riʼj winaq?, ¿Pa kiwiʼ ri e kamnäq? (5, 6)

¿Su rajawaxik kabʼano rech kakʼam ri täq tewchibʼäl (bendiciones) che e petinäq? (7)

1. Ri Jehová xubʼan ri uwäch Ulew rech ri täq winaq kekikotik chupam jun kikʼaslemal che kʼot ukʼisik. Areʼ xraj che ri winaq kekʼaseʼ rukʼ kikotemal xuqujeʼ rukʼ sukʼilal (Salmo 115:16; Isaías 45:18). Ri uwäch Ulew ksach ta uwäch (Salmo 104:5; Eclesiastés 1:4).

2. Chiʼ majaʼ kubʼan ri achi, ri Ajawaxel xuchaʼ jun chʼaqap Ulew rech xubʼan jun kotzʼiʼjaläj Ulew che, xuqujeʼ «tikonijibʼal» (o jardín) rech Edén xukoj che ubʼiʼ. Chilaʼ xeʼuya ri nabʼe achi rukʼ ri nabʼe ixoq: ri Adán rukʼ ri Eva. Ri Ajawaxel are xraj che we winaq riʼ kkʼejeʼ kalkʼwal tekʼuriʼ kkenojisaj ri Ulew. Nojim kkebʼan jun kotzʼiʼjaläj uwäch che ronojel ri Ulew (Génesis 1:28; 2:8,15).

3. Ri Adán rukʼ ri Eva xemakun rukʼ ketaʼmbʼäl rumal che xkaj täj xeniman che utaqonik ri Ajawaxel. Rumal waʼ ri Jehová xeʼuresaj bʼi chuwäch ri tikonijibʼäl Edén, rukʼ waʼ xsach uwäch ri kotzʼiʼjaläj Ulew (Génesis 3:1-6, 23). Ri Jehová sachinäq ta pa ujolom su kraj kubʼan che ruwäch Ulew. Ri Ajawaxel kutzujuj che kubʼan jun kotzʼiʼjaläj uwäch che ri Ulew. ¿Su kubʼan che? (Salmo 37:29.)

4. Rech kubʼan jun kotzʼiʼjaläj uwäch we Ulew, nabʼe keʼesax na ri itzel täq winaq chuwäch (Salmo 37:38). Wariʼ kbʼan pa ri Armagedón, wariʼ are ri nimalaj uchʼoj ri Ajawaxel rech kukʼis ri itzelal. Tekʼuriʼ ktzʼapix ri Satanás jun mil junabʼ, wariʼ kraj kubʼij che kʼot nijun itzel ajbʼanol täq kʼäx kkanaj cho ruwäch Ulew. Xiw ri utinamit ri Ajawaxel kkʼaseʼ kanoq (Apocalipsis 16:14, 16; 20:​1-3).

5. Ri Jesucristo kajawin na (reinará) puwiʼ ruwäch Ulew jun mil junabʼ (Apocalipsis  20:6) xuqujeʼ nojim kresaj ri mak pa täq qajolom xuqujeʼ pa qabʼaqil. Kqabʼan tzʼaqat täq winaq junam rukʼ ri Adán rukʼ ri Eva ojer chiʼ majaʼ kkebʼanom ri mak. Tekʼuriʼ kekʼis ri yabʼil, ri riʼjobʼik xuqujeʼ ri kamikal. Ri winaq che kʼo yabʼil chike kekuntajik xuqujeʼ ri täq e riʼj chik keʼubʼan chi na kʼakʼal o akʼalabʼ täq winaq (Job 33:25; Isaías 33:24; Apocalipsis 21:3, 4).

6. Pa ri Mil Junabʼ rech Rajawbʼäl ri Jesús, ri winaq che e sukʼ, kechakunik rech kkebʼan jun kotzʼiʼjaläj uwäch che ri Ulew (Isaías 65:21-25). Xuqujeʼ, sibʼalaj e kʼi täq kamnäq kekʼastajik xuqujeʼ kekʼaseʼ kukʼ ri winaq cho ruwäch Ulew (Hechos 24:15). We kkebʼano su kuta ri Ajawaxel kekʼaseʼ na cho ruwäch Ulew rukʼ jun kikʼaslemal che kʼot ukʼisik. We kkebʼan täj, ksach na kiwäch (Juan 5:28, 29; Apocalipsis 20:11-15).

7. Jewaʼ riʼ kbʼantaj na, jelaʼ cha xraj ri Ajawaxel che xubʼan ri Ulew nabʼe. ¿La kawaj kakʼam we loqʼalaj täq tewchibʼäl che e petinäq? We jelaʼ, rajawaxik kaya ta kan uretaʼmaxik uwäch ri Jehová xuqujeʼ unimaxik ri utaqonik. We katbʼe pa täq riqbʼal ibʼ che kbʼan pa ri Ja rech Ajawbʼäl (Salón del Reino) kech ri Qʼalajsinelibʼ (Testigos) rech Jehová pa atinamit, nim katutoʼ wi rech kawetamaj uwäch (Isaías 11:9; Hebreos 10:24, 25).

[Wachbʼäl pa ri 10 uxaq wuj]

Xeʼesax cho ri kotzʼiʼjaläj Ulew

[Täq wachbʼäl pa ri 11 uxaq wuj]

We xqʼax ri Armagedón, kbʼan na jun kotzʼiʼjaläj uwäch che ri Ulew