Kʼutunem 10

Su täq bʼantajik che itzel kril ri Ajawaxel

¿Su kabʼan che urilik chike täq utz täj kril ri Ajawaxel? (1)

¿La kachʼabʼo chike tzʼil täq mak e kʼolik? (2)

¿La utz kekil ri molon täq tzij ri cristianos? (3) ¿E ri etzʼanem puwiʼ täq pwäq? (3) ¿E ri elaqʼ? (3) ¿E ri chʼoj? (4) ¿E ri kichak ajqʼij? (5) ¿E ri qʼabʼaranik? (6)

¿Su kabʼano rech katel chupam ronojel wariʼ? (7)

1. Ri ajpatanel re ri Ajawaxel kekaj ri utz xuqujeʼ rajawaxik kkexutuj ri itzelal (Salmo 97:10). Wariʼ kraj kubʼij che kabʼan täj chike täq itzel kril ri Ajawaxel che kbʼanik. ¿Chin chike jujun täq wariʼ?

2. Tzʼil täq mak: We jun winaq kok rukʼ jun chik nabʼe chuwäch ri kʼulunem, we jun winaq che kʼulunik kok rukʼ jun chik winaq, jun winaq che kok rukʼ jun chiköp, tzʼil täq mak chekixoʼl täq kechalal kibʼ xuqujeʼ jun achi kok rukʼ jun chik achi o jun ixoq kok rukʼ jun chik ixoq, ronojel wariʼ e nim täq mak chuwäch ri Ajawaxel (Levítico 18:6; Romanos 1:26, 27; 1 Corintios 6:9, 10). We jokʼlaj winaq e kʼulun täj, rajawaxik kekʼuleʼ chuwäch qʼatbʼaltzij o we kʼo jun chike che kraj täj, rajawaxik kkejach kibʼ (Hebreos 13:4).

3. Molon täq tzij, etzʼanem puwiʼ täq pwäq, elaqʼ: ri Ajawaxel Jehová kkun täj kubʼan molon täq tzij (Tito 1:2). Rumal waʼ che chin täq kekaj che keʼutoʼ ri Ajawaxel, rajawaxik che kkebʼan ta molon täq tzij (Proverbios 6:16-19; Colosenses 3:9, 10). Ronojel etzʼanem puwiʼ täq pwäq kubʼano che karayij uwäch ri kech täq nikʼaj chik.  Rumal waʼ ri cristianos kkebʼan ta etzʼanem rech kechʼak pwäq rukʼ täq cartas (naipe), lotería xuqujeʼ nikʼaj chik (Efesios 5:3-5). Kkebʼan ta elaqʼ, kʼot kkeloqʼo che xa elqʼan loq xuqujeʼ kʼot su kkechapo we yaʼom ta chike (Éxodo 20:15; Efesios 4:28).

4. Chʼoj xuqujeʼ kiwal ri winaq: we kpe jun qiwal che kʼot utakʼbʼaxik, wariʼ kojukʼam bʼi pa chʼoj (Génesis 4:5-8). Ri winaq che xäq kkebʼan chʼoj kekun täj kkebʼan urachiʼl ri Ajawaxel (Salmos 11:5; Proverbios 22:24, 25). Utz täj che kqabʼan kʼäx che jun winaq rech kutoj umak ubʼanom chaqe (Proverbios 24:29; Romanos 12:17-21).

5. Itzinem xuqujeʼ kichak ajqʼij: e kʼo jujun täq winaq che kkechʼabʼej täq uxlabʼal xuqujeʼ täq ams (ánimas) rech kketa chike che kekunaxik. Nikʼaj chik kkebʼan kichak aj itz chikij ri ajchʼoj chike, rech kkekoj yabʼil chike o rech kkekamisaj. Chirij we täq chak riʼ kʼo ri Satanás. Rumal waʼ che ri Cristianos utz täj kkebʼan jewaʼ (Deuteronomio 18:9-13). Xiw we naqaj ojkʼo che Jehová, kojkunik kqachajej qibʼ che kichak aj itz xuqujeʼ kichak ajqʼij (Proverbios 18:10).

6. Qʼabʼaranik: Utz xa jubʼiqʼ (jbʼeʼ) cerveza, vino xuqujeʼ nikʼaj chik uwäch täq jaʼ (tzam) ktijowik (Salmo 104:15; 1 Timoteo 5:23). Ri Ajawaxel utz täj krilo che jun winaq kqʼabʼarik o we jun winaq xaq ronojel qʼij chik kutij ronojel wariʼ (1 Corintios 5:11-13; 1 Timoteo 3:8). Jun winaq che xaq kqʼabʼarik chanim kpe yabʼil pa ubʼaqil xuqujeʼ keʼuya rixoqil ralkʼwal pa kʼäx. Jun winaq che kqʼabʼarik, chanim kqaj pa mak (Proverbios 23:20, 21, 29-35).

7. Ri winaq che kkebʼano chike täq kubʼij ri Ajawaxel che e utz täj, «kkechbʼej ta rajawbʼäl ri Dios» (Gálatas 5:19-21). We qastzij kawaj ri Ajawaxel xuqujeʼ kawaj kabʼano chike utz krilo, katkunik katel chupam we täq bʼantajik riʼ (1 Juan 5:3). Chawetamaj su kabʼano rech kaxutuj chike täq kubʼij ri Ajawaxel che e utz täj (Romanos 12:9). Cheʼatzukuj e utzalaj täq winaq che kkebʼan utaqonik ri Jehová (Proverbios 13:20). Ri qachiʼl täq cristianos che nim ketaʼmbʼäl kekunik kojkitoʼo (Santiago 5:14). Chawetamaj che ri Ajawaxel katutoʼo chiʼ kachʼabʼej, are waʼ qas utz (Filipenses 4:6, 7, 13).

[Täq wachbʼäl pa ri 20 xuqujeʼ 21 uxaq wuj]

Ri Ajawaxel itzel kril ri qʼabʼaranik, ri elaqʼ, ri etzʼanem puwiʼ täq pwäq xuqujeʼ ri ajtzukul chʼoj