Kʼutunem 6

¿Sulaʼ ri Rajawbʼäl ri Ajawaxel?

¿Jachiʼ (o ni) kʼo wi ri Rajawbʼäl ri Ajawaxel? (1)

¿Chinlaʼ ri Rajawinel? (2)

¿La e kʼo nikʼaj chik winaq che ketobʼon che ubʼanik qʼatbʼaltzij rukʼ ri Ajawinel? We jewaʼ, ¿E jampaʼ? (3)

¿Su kukʼutu che ojkʼo pa täq kʼisbʼal qʼij? (4)

¿Su kubʼan na ri Rajawbʼäl ri Ajawaxel pa kiwiʼ ri winaq? (5-7)

1. Chiʼ ri Jesús xkʼejeʼ cho ruwäch Ulew, xukʼut che kiwäch ri täq utijoxel che kketa ri Rajawbʼäl ri Ajawaxel pa chʼawem. Ri tzij «ajawbʼäl» are kraj kubʼij jun qʼatbʼaltzij kʼo pa uqʼabʼ jun ajawinel. Ri Rajawbʼäl ri Ajawaxel are jun utzalaj qʼatbʼaltzij. Kʼo pa kaj xuqujeʼ kubʼan qʼatbʼaltzij puwiʼ ruwäch Ulew. Kubʼan na jun loqʼalaj bʼiʼaj che rubʼiʼ ri Ajawaxel. Kubʼano che kbʼantaj na su kraj ri Ajawaxel cho ruwäch Ulew xuqujeʼ pa ri kaj (Mateo 6:9, 10).

2. Ri Ajawaxel xutzujuj, che are ri Jesús kubʼan Ajawinel rech ri Rajawbʼäl (Lucas 1:30-33). Chiʼ ri Jesús xkʼejeʼ cho ruwäch Ulew, xukʼutu che are jun utzalaj Ajqʼatbʼaltzij che tzʼaqat xuqujeʼ sukʼ. Chiʼ xtzalaj pa ri kaj, chanim täj xubʼan Rajawinel ri Rajawbʼäl ri Ajawaxel (Hebreos 10:12, 13). Pa ri junabʼ 1914, ri Jehová xuya ri qʼatbʼaltzij pa uqʼabʼ ri Jesús che utzujum kan che. Rukʼ waʼ, ri Jesús xubʼan Ajawinel xuqujeʼ tijan kubʼan qʼatbʼaltzij pa ri kaj (Daniel 7:13, 14).

3. Xuqujeʼ ri Jehová uchaʼom nikʼaj sukʼalaj täq achijabʼ xuqujeʼ ixoqibʼ waral cho ruwäch Ulew rech kebʼe pa kaj. We winaq riʼ kechakun rukʼ ri Jesús pa kiwiʼ ri winaq, kkebʼan kichak rech Ajqʼatbʼal täq tzij xuqujeʼ rech ajkʼamol täq bʼe (Lucas 22:28-30; Apocalipsis 5:9, 10). Ri Jesús xubij «alaj jupuq chij» chike täq winaq che kkebʼan na qʼatbʼaltzij rukʼ. E 144.000 ronojel (Lucas 12:32, N T Lengua Kʼicheʼ, Trad. de P. B. Gosse e I. Sucuquí, Diócesis de Quiché; Apocalipsis 14:1-3).

4. Chiʼ ri Jesús xubʼan Ajawinel, xeʼuresaj lo ri Satanás rukʼ ri itzel täq uxlabʼal pa ri kaj, tekʼuriʼ xeʼutaq lo cho ruwäch Ulew. Rumal waʼ, majtajnaq lo pa ri junabʼ 1914, xnimar ri kʼäx cho ruwäch Ulew (Apocalipsis 12:9, 12). Nim täq chʼoj,  wiʼjal, yabʼil, ri itzelal xnimarik..., ronojel waʼ xa jun «etal» che kukʼut che qawäch che ri Jesús tijan kubʼan uqʼatbʼaltzij xuqujeʼ kukʼutu che ronojel we täq tijan kqilo e kʼo pa ri kʼisbʼal täq qʼij (Mateo 24:3, 7, 8, 12; Lucas 21:10, 11; 2 Timoteo 3:1-5).

5. Ri Jesús kubʼan na qʼatbʼaltzij pa kiwiʼ ri winaq xuqujeʼ junam rukʼ jun ajyuqʼ che kujach kiwäch ri chij kukʼ ri kʼisikʼ. Ri Jesús kubʼij «chij» chike chin täq kkekʼutum che e sukʼ täq winaq xuqujeʼ kuya na jun kikʼaslemal che kʼot ukʼisik cho ruwäch Ulew. Ri «kʼisikʼ» are chin täq xkexutuj ri Rajawbʼäl ri Ajawaxel (Mateo 25:31-34, 46). Wariʼ petinäq, ri Jesús kusach na kiwäch ri winaq che e junam cha kʼisikʼ (2 Tesalonicenses 1:6-9). We kawaj kabʼan jun chike ri «uchij» ri Jesús, rajawaxik katatbʼej ri tzij rech ri Ajawbʼäl xuqujeʼ kabʼan chike täq tijan kawetamaj (Mateo 24:14).

6. E kʼo kʼi täq tinamit cho ruwäch Ulew, ronojel kʼo kiqʼatbʼaltzij. Ri täq tinamit kkebʼan chʼoj che kixoʼl. Tekʼuriʼ ri Rajawbʼäl ri Ajawaxel kkanaj kan pa kikʼaxel (kikʼolibʼal) we qʼatbʼaltzij kech winaq. Xiw wajun qʼatbʼaltzij kkanaj kan cho ruwäch Ulew (Daniel 2:44). Tekʼuriʼ kkʼisna ri chʼoj, ri kamisanik xuqujeʼ ri itzelal. Ronojel winaq junam kekʼaseʼ na rukʼ jororibʼäl (paz) (Miqueas 4:3, 4).

7. Pa Rajawbʼäl ri Jesús rech jun mil junabʼ, ri utzalaj täq winaq keʼubʼan na tzʼaqat kikʼaslemal xuqujeʼ kubʼan na kotzʼiʼjaläj uwäch ri Ulew. Chiʼ kkʼis ri mil junabʼ, ri Jesús ubʼanom chik ronojel chike täq xraj ri Ajawaxel che xubʼano. Tekʼuriʼ kujach Rajawbʼäl pa uqʼabʼ ri utat (1 Corintios 15:24). Chabʼij chike awachiʼl xuqujeʼ awachilal su täq kubʼan na ri Rajawbʼäl ri Ajawaxel.

[Wachbʼäl pa ri 13 uxaq wuj]

Pa ri uqʼatbʼaltzij ri Jesús, kkʼis na ri itzelal xuqujeʼ kkʼis kiwal ri winaq