¿CHIKE qastzij (o saqalaj tzij)? Are puwiʼ ri jujun täq jastaq che sibʼalaj kʼo upatan xuqujeʼ che kkaj ri winaq kketamaj. ¿Kʼo abʼin wariʼ?

• ¿La kojraj ri Ajawaxel?

• ¿La kekʼis na ri täq qʼoxomal rukʼ ri chʼoj?

• ¿Su (o jas) kqabʼano chiʼ kojkamik?

• ¿La kekʼastaj na ri e kamnäq?

• ¿Su kqabʼan che uchʼabʼexik ri Ajawaxel rech kojuto?

• ¿Su kqabʼan che utzukuxik ri kikotemal?

¿Jawi (ni) kariq wi ri etaʼmabʼäl chirij wariʼ? E kʼo kʼi täq wuj che kkebʼij che kkeyaʼ awetaʼmabʼäl chirij wariʼ, tekʼuri jun wi kkebʼij. Nikʼaj chik kkekʼut ri etaʼmanik tekʼuriʼ xa keʼekʼowik (keqʼaxik), keʼubʼan kan qʼeʼl xuqujeʼ kjaltaj kan kiwäch.

Tekʼuriʼ kʼo jun wuj kubʼij ri qastzij chaqe puwiʼ wariʼ. Ri Jesucristo xubʼij pa chʼawem che ri Ajawaxel: «Ri atzij are ri qastzij» ( Juan 17:17). Kimik we tzij riʼ qetaʼm uwäch che are ri Loqʼalaj Pixabʼ (o Santa Biblia). Ri kqilo are jun alaj kʼutbʼäl re, che kuyaʼ ri Loqʼalaj Pixabʼ chaqe puwiʼ su kqaj kqetamaj.

¿SUCHE KQABʼIJ WARIʼ? Ruwäch Ulew nojinäq che kʼaxkʼolil xuqujeʼ itzelal. Kʼi chike täq ri kojonem (religiones) kkekʼutu che are ri Ajawaxel kuyaʼ lo ri kʼäx chaqe.

RI KUKʼUT RI LOQʼALAJ PIXABʼ. Kʼot itzelal kubʼan ri Ajawaxel. Romanos 9:14 kubʼij: «¿Jas kʼu kqabʼij? ¿La kubʼan lo ri Dios ri man sukʼ täj? ¡Man je ta riʼ!». Ri Ajawaxel sibʼalaj kojraj, rumal laʼ kʼo jun urayinik chike ri winaq. Ri Jesús xukʼut kan che qawäch pa ri chʼawem: «Qatat ri kʼo la pa ri kaj, [...]. Chpe awajawbʼäl. Chabʼana arayibʼäl cho ruwäch Ulew, jachaʼ ri kabʼan chikaj» (Mateo 6:9, 10). Rech kbʼantajik su utzujum, ri Ajawaxel xuyaʼ jun nimalaj toʼonik chaqe rumal che sibʼalaj kojraj ( Juan 3:16).

Chawila Génesis 1:26-28; Santiago 1:13, y 1 Pedro 5:6, 7.

¿SUCHE KQABʼIJ WARIʼ? Ri täq chʼoj tijan keʼukamisaj e kʼi täq winaq. Xuqujeʼ qonojel kqariq kʼäx.

RI KUKʼUT RI LOQʼALAJ PIXABʼ. Ri Ajawaxel utzujum che kukʼis na ri chʼoj cho ronojel uwäch Ulew. Pa ri Ajawbʼäl - o qʼatbʼaltzij - kʼo chikaj, ri winaq «ketijox [o kenawtzax] ta chik che ubʼanik chʼoj», xuqujeʼ «ri kichʼichʼ rech chʼoj, kkebʼan na asaron chike» (Isaías 2:4). Xuqujeʼ, ri Ajawaxel kukʼis na ri itzelal rukʼ ri qʼoxomal. Ri Loqʼalaj Pixabʼ kutzujuj wariʼ chike ri winaq: ri Ajawaxel «kusuʼ na ri uwaʼl kiwäch ri e oqʼinaq. Man kʼot chik kamikal. Man kʼot chik bʼis, man kʼo ta chi kuraq uchiʼ rumal kʼäx, ma wi kʼo chi qʼoxowem. Xeʼekʼow kʼut ri nabʼe täq jastaq [ronojel kʼäx xuqujeʼ ronojel qʼoxomal]» (Apocalipsis 21:3, 4).

Chawila Salmos 37:10, 11; 46:9, y Miqueas 4:1-4.

¿SUCHE KQABʼIJ WARIʼ? Kʼi chike ri kojonem kkekʼutu che kʼo su kkʼaseʼ kan chike ri winaq chiʼ kekamik. E kʼo nikʼaj kkebʼij che ri kamnäq kekunik kkebʼan kʼäx chike ri winaq, xuqujeʼ kkebʼij che ri Ajawaxel keʼuya ri itzel täq winaq chupam jun nimalaj qʼaqʼ che kʼot ukʼisik.

RI KUKʼUT RI LOQʼALAJ PIXABʼ. Chiʼ kojkamik kʼot kkʼase kan chaqe. Eclesiastés 9:5 kubʼij che «ri kamnäq [...] kʼot ketaʼm». Kʼot kkenaʼo, kʼot kkebʼano, kʼot ketaʼm xuqujeʼ kekun täj kkebʼan kʼäx chaqe xuqujeʼ kekun täj kojketoʼo (Salmos 146:3, 4).

Chawila Génesis 3:19 y Eclesiastés 9:6, 10.

¿SUCHE KQABʼIJ WARIʼ? Qonojel kqaj kojkʼaseʼ rukʼ kikotemal kukʼ täq qachilal. Rumal waʼ xa qech wi che kqaj kqil chi na kiwäch ri täq qachilal e kamnäq.

RI KUKʼUT RI LOQʼALAJ PIXABʼ. Kʼi chike ri e kamnäq kekʼaseʼ chi na. Rumal waʼ, ri Jesús xutzujuj kanoq che «konojel ri kamnaqibʼ kketaʼ na ri uchʼabʼäl, keʼelna lo pa ri täq muqbʼäl» ( Juan 5:28, 29). Ri täq winaq ri kekʼastaj lo cho ruwäch Ulew kekʼaseʼ na xuqujeʼ kkil na chiʼ kubʼan jun kotzʼiʼjaläj uwäch che ri Ulew, jelaʼ su xraj ri Ajawaxel ojer (Isaias 65:21-25). Chupam we utzalaj täq qʼij e petinäq, ri sukʼalaj täq winaq chuwäch ri Ajawaxel kkekiriq na jun kikʼaslemal che kʼot ukʼisik xuqujeʼ kkʼis na ronojel yabʼil. Ri Loqʼalaj Pixabʼ kubʼij: «Ri e utzlaj täq winaq kkechbʼej na ri Ulew» (Salmo 37:29).

Chawila Job 14:14, 15; Lucas7:11-17, y Hechos 24:15.

¿SUCHE KQABʼIJ WARIʼ? Chupam ronojel täq kojonem ri winaq kkebʼan kichʼawem. Tekʼuriʼ e kʼi chike, kkebʼij che ktaʼ ta ri kichʼawem.

RI KUKʼUT RI LOQʼALAJ PIXABʼ. Ri Jesús xukʼut kanoq che utz täj che xaq kqabʼij tzij che kʼot upatan. Xubʼij wariʼ: «Are täq kibʼan chʼawem rukʼ Dios, mibʼij kʼi tzij che xa kʼot upatan» (Mateo 6:7). We kqaj che ri Ajawaxel kojuto, rajawaxik kqabʼan qachʼawem jelaʼ che kraj areʼ (o rë). «Are wa kqakubʼsan qakʼuʼx [qeyeʼm] chirij ri Dios, che we kʼo ri täq kqatzʼonoj jas ri ubʼeyal ri urayinik, kojutatbʼej», kubʼij 1 Juan 5:14.

Chawila Salmo 65:2; Juan 14:6, 14, y 1 Juan 3:22.

¿SUCHE KQABʼIJ WARIʼ? Ri winaq kkekojo che ri qʼinomal (o bʼiyomal) xuqujeʼ ri utzalaj kaʼybʼäl (belleza) are kukʼam lo kikotemal chike, e kʼi täq winaq kketzukuj wariʼ. Tekʼuriʼ kekun täj kekikotik.

RI KUKʼUT RI LOQʼALAJ PIXABʼ. Ri Jesús xukʼut kanoq su uriqik ri kikotemal. Rumal laʼ xubij kanoq: «Utz ke, chin täq kkechʼabʼo che kawtaj (kejawtaj) ri Dios chike. Kkechbʼej kʼut rajawbʼäl ri Dios» (Mateo 5:3). Xiw qastzij kojkikotik we kqatzukuj ri kawtaj chaqe: kqatzukuj uretamaxik ri qastzij rech ri Ajawaxel xuqujeʼ we kqetamaj su kraj kubʼan pa qawiʼ. Ri qastzij riʼ kriqtajik pa ri Loqʼalaj Pixabʼ. Rumal laʼ, chiʼ kqetamaj wariʼ kojkunik kqilo su ri kʼo upatan xuqujeʼ ri kʼot upatan. Chiʼ kqayaʼo che ri Loqʼalaj Pixabʼ kukʼut che qawäch su kqabʼano xuqujeʼ su kqachʼabʼo, qastzij kqariq ri kikotemal pa qakʼaslemal (Lucas11:28).

Chawila Proverbios 3:5, 6, 13-18 y 1 Timoteo 6:9, 10.

 Xqil bʼaʼ, su xubʼij ri Loqʼalaj Pixabʼ chirij waqibʼ tzij xqil waral pa we wuj. ¿La kawaj kawetamaj nikʼaj chik? We atkʼo che kixoʼl chin täq «kkechʼabʼo che kawtaj ri Dios chike», qastzij kawaj kanimarisaj awetaʼmabʼäl. Chawetamaj suche che ri Ajawaxel uyaʼom che kʼo itzelal xuqujeʼ qʼoxomal, we qastzij che kojraj. Xuquje, chawetamaj su kabʼano rech kʼo kikotemal pa awachoch che kixoʼl awachilal. Ri Loqʼalaj Pixabʼ kubʼij chaqe su kqabʼan chirij wariʼ xuqujeʼ su kqabʼan chirij nikʼaj chik täq rajawaxik chaqe.

Tekʼuriʼ, e kʼo kʼi winaq che kkerayij (kekrij) ta usikʼixik uwäch. Kkebʼij che sibʼalaj nim upimal xuqujeʼ kkebʼij che kʼäx utijosaxik kibʼ chirij. ¿La kawaj che kattoʼik rech katzukuj ri qastzij kʼo pa ri Loqʼalaj Pixabʼ? Rumal wariʼ, ri qʼalajsinelibʼ (o testigos) rech Jehová kketzujuj kebʼ toʼonik chawe.

Ri nabʼe are ri wuj ¿Su qas kukʼut ri Loqʼalaj Pixabʼ?, we wuj xbʼanik rech keʼutoʼ ri winaq —chin täq latzʼ kiwäch— che utzukuxik ri qastzij kʼo chupam ri Loqʼalaj Pixabʼ. Ri ukabʼ are jun tijonik rech ri Loqʼalaj Pixabʼ (o curso bíblico) pa awachoch che kʼot katojo. We kawaj, kopan jun qʼalajsinel o testigo rech Jehová pa awachoch che nim uretaʼmabʼäl che ukʼutik chirij ri Loqʼalaj Pixabʼ rech junam kiwil upam ri wuj jun qʼij pa jun semana (wariʼ katoj täj) xuqujeʼ at kachaʼ ri hora xuqujeʼ ni kimol iwibʼ (kiriq iwibʼ). Millones täq winaq kkeriqom ri utz rumal we täq kʼutunem, xuqujeʼ e kʼi kkebʼin che maltyox che wa täq tijonik xkeriq ri qastzij.

Xuqujeʼ katkunik kawilo che sibʼalaj nim upatan uretaʼmaxik ri qastzij kʼo chupam ri Loqʼalaj Pixabʼ. Kojresaj chupam ri täq kʼutunem che kubʼan chaqe che kqaxiʼj qibʼ o kojusacho xuqujeʼ kuyaʼ jun kubʼsal kʼuʼx rukʼ kikotemal pa qakʼaslemal. Ri Jesús xubʼij: «Kiwetamaj na ri qastzij, are kʼu ri qastzij kixtzoqopin na» (Juan 8:32).