CHIʼ kasikʼij uwach ri wuj kbʼix periódico che xuqujeʼ chiʼ kawil televisión xuqujeʼ chiʼ kata ri kubʼij ri radio, ¿jas kariq chupam? ¡Kʼo kʼi kamisanik, chʼoj xuqujeʼ itzelal che kubʼano che ri winaq kkixibʼij kibʼ! Tekʼuriʼ chachomaj ri kʼax kariqo. Weneʼ jun yabʼil, jun afamiliar xkamik o jun awachiʼl kubʼano che sibʼalaj katbʼisonik. Ri Biblia kubʼij chrij jun utzalaj achi ubʼiʼ Job, che xubʼij: in kʼo pa «kʼaxlaj bʼis» (Job 10:15, La Biblia en Quiché de Joyabaj, ortografía actualizada).

Weneʼ kachomaj wariʼ:

• ¿La are wariʼ ri kraj ri Dios chwe xuqujeʼ chke konojel ri winaq?

• ¿Jachin kintoʼw chuwach ri e kʼax kinriqo?

• ¿La kopan na jun qʼij che kʼo jororibʼal cho ri uwach Ulew?

Ri Biblia kuya ubʼixik chrij wariʼ.

«Kusuʼ na ronojel ri uwaʼl kiwach ri e oqʼinaq. Man kʼo ta chi kamikal. Man kʼo ta chi bʼis, man kʼo ta chi kuraq uchiʼ rumal kʼax, mawi kʼo chi qʼoxowem.» (Apocalipsis 21:4)

«Ri man tzʼaqat ta kaqan kiqʼabʼ kechʼopin na jachaʼ ri masat.» (Isaías 35:6)

«Kekaʼy kʼu na ri moyabʼ.» (Isaías 35:5)

 «Konojel ri kaminaqibʼ [...] kebʼel na uloq pa taq ri muqubʼal.» (Juan 5:28, 29)

«Man kʼo ta jun [...] kubʼij ta na: ‹In yawabʼ›.» (Isaías 33:24)

«Mat chkʼis ri triko [o ktijowik] pa ri Ulew.» (Salmo 72:16)

Kachomaj taj xuqujeʼ kabʼij taj che ri xqil kan pa ri nikʼaj chik uxaq wuj nabʼe che wariʼ che kbʼan taj. Ri Dios utzujum, xuqujeʼ ri Biblia kubʼij ri kubʼan na che ubʼanik wariʼ.

Ri Biblia xaq xiw ta wariʼ kubʼij. Xuqujeʼ kukʼut ri kqabʼan che uriqik jun kʼaslemal rukʼ kikotemal kimik xuqujeʼ rukʼ jororibʼal. Chachomajampeʼ ri e kʼax kariqo xuqujeʼ ri jastaq che kubʼano che katbʼisonik. Weneʼ are rumal che kʼo ta pwaq, ri familia, ri yabʼil, weneʼ jun winaq che kawaj xkamik. Rumal wariʼ, ri Biblia kubʼij chqe jas kqabʼan chuwach ri e kʼax, xuqujeʼ kuya kubʼsal kʼuʼx chqe chiʼ kubʼij chrij ri preguntas riʼ:

• ¿Jasche kqariq kʼax?

• ¿Jas kqabʼan chuwach ri kʼax kqariq pa ri qakʼaslemal?

• ¿Jas kqabʼano rech ri qakʼaslemal pa ri qafamilia sibʼalaj utz?

• ¿Jas kqariqo chiʼ kojkamik?

• ¿La kqil chi na kiwach ri winaq che e kaminaq che sibʼalaj keqaj?

• ¿Jasche kqabʼij che ronojel ri utzujum ri Dios kubʼan na?

 Rumal che tajin kasikʼij ri e tzij riʼ kukʼutu che kawaj kawetaʼmaj ri kukʼut ri Biblia. Ri wuj riʼ katutoʼ che rilik wariʼ. Chawilampeʼ ri preguntas pa jujun chke ri e uchʼaqapil ri kʼutunem. Sibʼalaj e kʼi winaq sibʼalaj utz kkilo che ri testigos rech Jehová kkikoj preguntas xuqujeʼ kkiya chke ri winaq che kkibʼij ri kkichomaj, chiʼ kkikʼut ri kʼo chupam ri Biblia, kqaj che wariʼ are achomanik. Are bʼa’ ri Dios chuya’ tewchibʼal chawe chiʼ kawetaʼmaj chrij ri qas kukʼut ri Biblia.