1. ¿Jas kraj ri Dios kubʼan che ri uwach Ulew?

RI Dios kʼo jun jeʼlikalaj kraj kubʼan na che ri uwach Ulew: kunojisaj che winaq che e utz xuqujeʼ kekikotik. Ri Biblia kubʼij che «ri Dios xusukʼumaj jun tikonijibʼal chupam ri ulew Edén» xuqujeʼ «xeʼukʼiysaj chilaʼ ronojel kiwach jeʼlikalaj taq cheʼ ri kkiya utzalaj taq wachinik utz kitijik». Tekʼuriʼ xeʼubʼan ri e nabʼe winaq Adán rukʼ Eva xeʼuya pa ri jeʼlikalaj kʼolbʼal xuqujeʼ xubʼij wariʼ chke: «Chekʼol kʼi iwalkʼwal chinojisaj ri uwach ulew, chixtaqan puwiʼ» (Génesis 1:28; 2:8, 9, 15). Junam rukʼ ri xqilo, ri kraj chke ri winaq are che kekʼojiʼ kalkʼwal, xuqujeʼ kkibʼan che ronojel ri uwach Ulew jun kotzʼiʼj uwach xuqujeʼ kekichajij ri e chikop.

2. a) ¿Jasche kqabʼij che kbʼan na ri kraj ri Dios che ri Ulew? b)  Junam rukʼ ri kubʼij ri Biblia, ¿jas kibʼanik ri winaq ri kkiriq na jun kikʼaslemal che kʼot ukʼisik?

² ¿La kakoj at che kopan na jun qʼij che ri Jehová kubʼan na jun kotzʼiʼjalaj uwach Ulew? Xuqujeʼ areʼ utzujum: «Nubʼim je kʼu kinbʼan na» (Isaías 46:9-11; 55:11). Rumal laʼ ri Ajbʼanol qe kubʼan na ronojel ri kraj kubʼano. Areʼ xubʼij che xubʼan ri uwach Ulew ‹rech ta xaq che nijun› xuqujeʼ «xaneʼ kekʼoji winaq chuwach» (Isaías 45:18). ¿Jas kibʼanik ri  winaq kraj ri Dios kekʼojiʼ pa ri uwach Ulew, xuqujeʼ jumpaʼ junabʼ kekʼaseʼ chilaʼ? Ri Biblia kubʼij che ri e utzalaj taq winaq kkechbʼej na ri Ulew, kejeqiʼ kʼu na chuwach chbʼe qʼij saq (Salmo 37:29; Apocalipsis 21:3, 4).

3. ¿Jas kʼax taq jastaq kqil cho ri uwach Ulew, xuqujeʼ jas taq preguntas che utz kqabʼano?

³ Wariʼ, majaʼ na kbʼanik. Ri winaq kkiriq yabʼil xuqujeʼ kekamik; tekʼuriʼ kechʼojinik xuqujeʼ kkikamisaj kibʼ. Rumal wariʼ ri e jastaq utz ta kelik. Qastzij wi, che Jehová xraj taj che ri Ulew ubʼanom junam rukʼ kimik. ¿Jas xkʼulmatajik? ¿Jasche majaʼ na kbʼan ri kraj ri Dios? Wariʼ kʼot nijun wuj che ri achijabʼ kitzʼibʼam kkunik kubʼij chqe jas kraj kubʼij wariʼ rumal che wariʼ xmajtaj lo pa ri kaj.

4, 5. a) ¿Jachin laʼ ri xchʼaw rukʼ ri Eva rumal jun kumatz? b) ¿Jasche jun utz winaq kkunik kubʼan elaqʼom?

⁴ Ri nabʼe wuj rech ri Biblia kubʼij che pa ri Edén xkʼiy wi loq jun ukʼulel ri Dios. Kbʼix «ri kumatz» che, wariʼ qastzij taj chikop. Pa kʼisbʼal wuj rech ri Biblia «ri kbʼix Itzel xuqujeʼ Satanás che, ri keʼusubʼ [o keʼusachisaj] konojel ri winaq». Xuqujeʼ kbʼix «ojer kumatz» che (Génesis 3:1; Apocalipsis 12:9). Wariʼ are jun ángel nim uchuqʼabʼ, jun uxlabʼal che kqil taj che xukoj jun kumatz che usachik unojibʼal ri Eva, areʼ xubʼano che ri chʼabʼal pachaʼ kpe jun kumatz xchʼaw loq (Job 38:4, 7).

⁵ Kqachʼobʼo che ronojel ri xubʼan ri Jehová are sibʼalaj utz. Tekʼuriʼ, ¿jachin xubʼan ri kbʼix «Itzel» che xuqujeʼ «Satanás»? Jun ángel nim uchuqʼabʼ rech ri Dios xubʼan Itzel che ribʼ. ¿Jasche xbʼantaj wariʼ? Junam rukʼ jun winaq che kimik sibʼalaj utz tekʼuriʼ chweʼq kubʼan elaqʼom. ¿Jasche kbʼantaj wariʼ? Weneʼ ri winaq kuyaʼo che itzel taq rayinik kok pa ranimaʼ. We kuya ta kan uchomaxik wajun chomanik riʼ, wajun rayinik riʼ kubʼan nim uchuqʼabʼ, tekʼuriʼ weneʼ  xril jun kʼolbʼal che kkunik kubʼan ri tajin kuchomaj, ri winaq weneʼ kubʼan wariʼ (chasikʼij uwach Santiago 1:13-15).

6. ¿Jasche xubʼan Satanás xuqujeʼ Itzel jun ángel nim uchuqʼabʼ rech ri Dios?

⁶ Are wariʼ xukʼulmaj ri Satanás. Ri Satanás xuto chiʼ Jehová xubʼij chke Adán rukʼ Eva che rajawaxik che kekʼojiʼ kalkʼwal rech kkinojisaj ri uwach Ulew che kalkʼwal (Génesis 1:27, 28). Weneʼ xuchomaj wariʼ: «¡Konojel wa taq winaq riʼ kekunik kkiya nuqʼij in are ta che ri Dios!». Wajun rayinik riʼ qas xok pa ranimaʼ, tekʼuriʼ chiʼ xqʼax kebʼ oxibʼ qʼij, wariʼ xukʼam bʼi che usachik uwach ri Eva chiʼ xubʼij molom taq tzij chrij ri Dios (chasikʼij uwach Génesis 3:1-5). Rumal laʼ ri ángel xubʼan Itzel che ribʼ, pa chʼabʼal griego ri ubʼiʼ kraj kubʼij «ajmolol tzij» xuqujeʼ xubʼan «Satanás», wa bʼiʼaj riʼ kraj kubʼij «ajchʼoj».

7. a) ¿Jasche xekam ri Adán rukʼ Eva? b) ¿Jasche kojrijobʼik xuqujeʼ kojkam qonojel ralkʼwal ri Adán?

⁷ Rukʼ molom taq tzij xuqujeʼ rukʼ chapabʼal, ri Satanás xubʼan chke ri Adán rukʼ Eva che xeniman ta che ri Dios (Génesis 2:17; 3:6). Rumal wariʼ e kebʼ xekamik, junam rukʼ ri xuqʼaxej ubʼixik ri Dios (Génesis 3:17-19). Rumal che ri Adán xubʼan umak rukʼ wariʼ xkibʼan ajmakibʼ, xkiqʼaxej chke konojel kalkʼwal ri mak (chasikʼij uwach Romanos 5:12). Wariʼ junam rukʼ jun bʼanbʼal kaxlanwa che ubʼanom potzʼ rumal che xa xtzaqik. ¿Jas kibʼanik konojel ri e kaxlanwa kebʼan chupam? Ri mak jewaʼ xubʼano. Junam rukʼ wariʼ konojel ri winaq xojkʼojiʼ rukʼ ri «retal» ri umak ri Adán. Rumal waʼ kojrijobʼik xuqujeʼ kojkamik (Romanos 3:23).

8, 9. a) Junam rukʼ ri xbʼanik, ¿jas itzel taq tzij xubʼij Satanás? b) ¿Jasche xeʼukamisaj ta ri Dios ri winaq chiʼ xkibʼan kimak?

⁸ Chiʼ Satanás xuya pa kijolom ri Adán rukʼ Eva che xeniman ta che ri Dios, rukʼ wariʼ xubʼan ajkʼamal bʼe chke ri keniman taj. Xubʼij itzel taq tzij chrij ri Jehová,  xubʼij che utz ta kubʼan che uqʼatbʼal tzij. Junam rukʼ xubʼij: «Che areʼ jun itzel ajawinel che xa kubʼan molom taq tzij chke ri uwinaq xuqujeʼ kuya ta chke kkiriq taq jastaq che sibʼalaj e utz xuqujeʼ xubʼij che ri winaq rajawaxik ta chke che ri Dios kuqʼattzij pa kiwiʼ, ri winaq  kekunik kkichaʼ ri utz xuqujeʼ ri utz taj, xubʼij che we kinkinimaj in xaneʼ kkiriq sibʼalaj taq utz», xchaʼ. ¿Jas xubʼan ri Dios rukʼ ri itzel taq tzij riʼ? E kʼo jujun kkichomaj che ri Dios rajawaxik xeʼukamisaj ri e winaq riʼ che xeniman taj. Tekʼuriʼ ¿la kukʼut wariʼ che Satanás are jun ajmolom tzij? ¿La kkun wariʼ che ukʼutik che utz ri uqʼatbʼal tzij ri Dios?

⁹ Jehová kʼo jun nim sukʼilal rukʼ. Rumal laʼ xraj taj xeʼukamisaj ri e ajmakibʼ. Xaneʼ, xuya kan kʼi junabʼ rech ketaʼmax chrij ri itzel taq tzij xubʼij ri Satanás xuqujeʼ kukʼutu che jun ajmolom tzij. Rumal laʼ xuchomaj che rajawaxik kuya jun tiempo chke ri winaq che kkibʼan ajqʼatal tzij pa kiwiʼ ri winaq rukʼ ri uchuqʼabʼ ri Satanás. Pa kʼutunem 11 rech ri wuj riʼ kbʼixik jasche xubʼan wariʼ xuqujeʼ jasche xuya kan kʼi junabʼ che. Tekʼuriʼ chabʼanaʼ ri e preguntas riʼ: ¿la kʼo rajawaxik chke ri Adán rukʼ ri Eva che xkikoj ri xubʼij ri Satanás, che nabʼe kanoq kʼo ta uyaʼom chke? ¿La utz ri xkibʼano chiʼ xkichomaj che Jehová ri xyaʼow ronojel chke, xkichomaj che xa jun itzel ajmolom tzij? ¿Jas xabʼan at wet at kʼo chilaʼ?

10. ¿Jas kabʼan at che katoʼ ri Jehová xuqujeʼ kakʼutu che ri xubʼij ri Satanás qastzij taj?

¹⁰ Rajawaxik kojchoman chrij ri e preguntas riʼ, rumal che kimik kojriqitaj pa taq qʼij junam rukʼ ojer. Tekʼuriʼ, at katkunik katoʼ ri Jehová xuqujeʼ katkunik kakʼutu che qastzij ta ri xubʼij ri Satanás. Kqaj che are ri Dios kubʼan Ajawinel pa qawiʼ rukʼ wariʼ kqakʼutu che Satanás are jun ajmolom tzij (Salmo 73:28; chasikʼij uwach Proverbios 27:11). Pa wajun uwach Ulew riʼ e kʼo kʼi millones winaq, tekʼuriʼ e kʼi taj kkaj che are Dios kubʼan qʼatbʼal tzij. Wariʼ kubʼan chqe che kqabʼan wajun pregunta riʼ: ¿la qas kubʼij ri Biblia che are Satanás tajin kubʼan ajqʼatbʼal tzij kimik?

11, 12. a) ¿Jas ukʼutik xubʼan ri Satanás che are ajqʼatal tzij puwiʼ ri uwach Ulew chiʼ xutzujuj wajun jastaq riʼ che ri Jesús? b) ¿Jas jun chik kukʼutu che are Satanás tajin kubʼan qʼatbʼal tzij pa uwiʼ ri uwach Ulew?

¹¹ Jesús qas xukojo che are Satanás tajin kubʼan ajqʼatbʼal tzij puwiʼ ri Ulew. Pa jun qʼij kanoq, ri Itzel xukʼut chuwach ri Jesús «konojel ri ajawbʼal ri e kʼo cho ri uwach ulew», xutzujuj che: «Konojel waʼ kinya chawe we katxuki chnuwach kinaqʼijilaj kʼut» (Mateo 4:8, 9; Lucas 4:5, 6). Chatchoman chrij wariʼ. We are ta Satanás kubʼan ajqʼatbʼal tzij, ¿la xkun ri Satanás xutzujuj che ri Jesús ri ajawbʼal rech ri uwach Ulew, wet rech ta areʼ? Jesús qas retaʼm che ronojel wariʼ rech ri Satanás, je ta wa xubʼij wet rech ta ri Satanás, ri ukʼulel ri Dios.

¹² Qastzij wi, ri Jehová are ri Dios che kʼo nim uchuqʼabʼ, are Ajbʼanol re ri nimalaj ubʼanik ri kajulew (Apocalipsis 4:11). Tekʼuriʼ, pa ri Biblia kubʼij taj che are tajin kubʼan qʼatbʼal tzij puwiʼ ri Ulew, xuqujeʼ kubʼij taj che are ri Jesucristo. Ri Jesús xubʼij wariʼ che ri Itzel «ri qʼatojtzij puwiʼ we uwach ulew» (Juan 12:31; 14:30; 16:11). Xuqujeʼ pa ri Biblia kubʼij chrij wajun ajchʼoj riʼ, o Satanás, are «ri dios kech ri qʼij junabʼ riʼ» (2 Corintios 4:3, 4). Ri apóstol Juan tajin kchʼaw chrij ri Satanás chiʼ xubʼij wariʼ: «Konojel kʼut ri uwach ulew kʼo pa uqʼabʼ ri Itzel» (1 Juan 5:19).

13. ¿Jasche rajawaxik jun kʼakʼ uwach Ulew?

¹³ Chiʼ keqʼax ri e junabʼ tajin kkʼiy kʼi taq kʼaxkʼolil. Nojinaq che chʼoj, e itzel taq ajqʼatbʼal tzij, ajkʼamal bʼe che kkijaluj che kkibʼan utz xuqujeʼ e itzel taq kamisanelabʼ. Ronojel waʼ, kʼot chi jachin kkunik kukʼexo. Ri Biblia kubʼij che naj ta chik che ri Dios kusachisaj na uwach pa jun chʼoj ubʼiʼ Armagedón, tekʼuriʼ kpe jun kʼakʼ uwach Ulew (Apocalipsis 16:14-16).

14. ¿Jachin xuchaʼ ri Dios che kubʼan Ajawinel rech ri Ajawbʼal, xuqujeʼ jas ubʼixik xbʼix kan ojer che kbʼan che wajun bʼantajik riʼ?

 ¹⁴ Jehová xuchaʼ ri Jesús che areʼ kubʼan Ajawinel rech Ajawbʼal. Ojer, ri Biblia xubʼij: «Rumal rech chi alam jun akʼal chqe, ri Dios uyaʼom jun kʼojolaxel chqe ri yaʼom ronojel kuʼinem pa uqʼabʼ che uqʼatik tzij re kʼu taq ubʼiʼ waʼ kabʼix na [...] ukʼojol ajawinel yaʼal jamaril [...] ri ukuʼinem aj ajawinel pa ronojel kʼolbʼal ri [u]jamaril man kakʼis ta na» (Isaías 9:6, 7). Jesús xukʼut chkiwach ri e rajtijoxelabʼ che kkiya wajun Ajawbʼal riʼ pa kichʼawem, chiʼ xubʼij: «Chpet ri ajawbʼal la, chbʼan ri rayibʼal la cho ri uwach ulew, jachaʼ ri kbʼan chikaj» (Mateo 6:10). Junam che kqil na pa ri kʼutunem 8, ri Ajawbʼal rech ri Dios kukʼis na kiwach konojel ri nikʼaj chik ajawbʼal rech ri uwach Ulew riʼ xuqujeʼ kukoj chi jun chik pa kikʼaxel (chasikʼij uwach Daniel 2:44). Tekʼuriʼ kubʼan che ri Ulew jun kotzʼiʼj uwach.

15. ¿Jas riʼ ri «kʼakʼ ulew»?

¹⁵ Ri Biblia kubʼij «are kʼu ri uj qeyeʼm ri kʼakʼ kaj xuqujeʼ ri kʼakʼ [uwach] ulew, chilaʼ kʼut kakʼoji wi na ri sukʼil jas ri ubʼim uloq ri Dios» (2 Pedro 3:13; Isaías 65:17). Chiʼ ri Biblia kchʼaw chrij ri «uwach ulew» kʼo jujun mul xa are chkij ri winaq kchʼaw wi. Rumal laʼ ri sukʼalaj «kʼakʼ ulew» are kraj kubʼij che jumulaj winaq kkiriq achilanik rukʼ ri Dios.

16. ¿Jas jun utzalaj sipanik kuya ri Dios chke ri keraj, xuqujeʼ jas rajawaxik kqabʼano rech kqariqo?

¹⁶ Jesús xutzujuj kanoq che chiʼ kbʼan wariʼ, ri Dios kuya jun utzalaj sipanik chke ri winaq che areʼ keraj: are ri ‹kʼaslemal che kʼot ukʼisik› (Marcos 10:30). Chabʼanaʼ toqʼobʼ chatzukuj pa ri Biblia ri Juan 3:16 xuqujeʼ 17:3, chasikʼij ri xubʼij ri Jesús che rajawaxik kqabʼano rech kqariq ri kʼaslemal che kʼot ukʼisik. Tekʼuriʼ chqilaʼ pa ri Biblia ri nimaʼq tewchibʼal kkikʼam ri kekʼojiʼ pa wajun kotzʼiʼjalaj uwach Ulew che petinaq, ri kkikʼam wajun utzalaj sipanik riʼ.

17, 18. ¿Jasche kqachʼobʼo che kpe na jororibʼal xuqujeʼ utzilal pa ronojel ri uwach Ulew?

 ¹⁷ Ri itzelal, ri chʼoj, ri kamisanik e kʼot chik. «Man keriqtaj ta chi ri bʼanal taq itzelal [...]. E areʼ taq kʼut re e machʼalik kakechbʼej na ri uwach ulew.» (Salmo 37:10, 11.) Kʼo na jororibʼal rumal che ri Dios kukʼis na «kitzaʼm ri chʼoj kʼa pa ri kʼisbʼal [...] uwach ulew» (Salmo 46:9; Isaías 2:4). Chiʼ kubʼan wariʼ, ri sukʼilal kubʼanaʼ kʼi xuqujeʼ kopan na «pa taq ri qʼij ri kaqʼatan tzij, kʼa kasach na uwach ri ikʼ» wariʼ kraj kubʼij, che kʼot ukʼisik (Salmo 72:7).

¹⁸ Ri kkipatanej ri Jehová kekʼaseʼ rukʼ utzilal. Ojer chiʼ ri tinamit Israel xkinimaj ri Dios sibʼalaj utz kiwach, kʼot jun kʼax xkiriqo (Levítico 25:18, 19). ¡Sibʼalaj kubʼan na utz qawach junam rukʼ ojer, jewaʼ kqabʼan pa ri Kotzʼiʼjalaj uwach Ulew! (Chasikʼij uwach Isaías 32:18; Miqueas 4:4.)

19. ¿Jasche kqakojo che ri Dios kubʼan na che kʼo kʼi ktijowik pa ri kʼakʼ uwach Ulew?

¹⁹ Kʼo kʼi ktijowik. «Mat chkʼis ri triko pa ri ulew: sibʼalaj ta chuwachin pa kiwiʼ taq ri juyubʼ», xubʼixoj ri salmista (Salmo 72:16). Jehová kuya na tewchibʼal chke ri e sukʼ chuwach, xuqujeʼ ‹ri ulew kuya na ri uwachinik› (Salmo 67:6).

20. ¿Jasche kqachʼobʼo che ronojel ri uwach Ulew kubʼan na jun kotzʼiʼj uwach?

²⁰ Ronojel ri uwach Ulew kubʼan na jun kotzʼiʼj uwach. Jeʼlikalaj taq kʼolbʼal xuqujeʼ kotzʼiʼjalaj taq kʼolbʼal kkʼojiʼ na chuwach ri e kʼolbʼal che ri winaq kibʼanom kʼax che (chasikʼij uwach Isaías 65:21-24; Apocalipsis 11:18). Chiʼ keqʼax ri e qʼij, kkibʼan kʼi ri e kʼolbʼal che ri uwach Ulew kbʼan kotzʼiʼj chke, ronojel ri uwach Ulew kubʼan na sibʼalaj utz junam rukʼ ri Edén. Tekʼuriʼ wariʼ kʼot ukʼisik, ri Dios tajin ‹kujaq ri uqʼabʼ, rukʼ kʼu utzalaj urayibʼal kutzuq na konojel ri e kʼaskʼoj› (Salmo 145:16).

21. ¿Jas kkʼutuwik che kkʼojiʼ na jororibʼal che kixoʼl ri taq chikop kukʼ ri winaq?

²¹ Kkʼojiʼ na jororibʼal chkixoʼl ri winaq kukʼ ri e chikop. Ri e  chikop rech ri juyubʼ xuqujeʼ ri ajuwo taq ja kewaʼ na junam. Kʼot chi nijun alaj akʼal che kuxibʼij ribʼ che ri e chikop che kimik kkibʼan kʼax chqe (chasikʼij uwach Isaías 11:6-9; 65:25).

22. ¿Jas kbʼan na kukʼ ri e yabʼil?

²² Kekʼis na ri e yabʼil. Ri Ajawinel rech Rajawbʼal ri Dios, Jesús, keʼukunaj na sibʼalaj kʼi taq winaq chuwach ri xubʼan ojer chiʼ kʼo cho ri uwach Ulew (Mateo 9:35; Marcos 1:40-42; Juan 5:5-9). «Man kʼot ta jun ajtinamit kubʼij ta na: ‹In yawabʼ›.» (Isaías 33:24; 35:5, 6.)

23. ¿Jasche ri kʼastajibʼal kuya na jun nimalaj kikotemal chqe?

²³ Ri e winaq che e kaminaq chik kekʼastaj na rech kekʼaseʼ chik tekʼuriʼ kekam ta chik. Kekʼastaj loq konojel jachin taq e kʼo pa ri jul xuqujeʼ che e kʼo pa ujolom ri Dios. Qastzij wi, «kekʼastaj na ri kaminaqibʼ, chi sukʼ chi man e sukʼ taj» (Hechos 24:15, El Nuevo Testamento en Quiché y Español, ortografía actualizada; chasikʼij uwach Juan 5:28, 29).

24. ¿Jas kachomaj chrij wajun bʼantajik riʼ che ri uwach Ulew kubʼan na jun kotzʼiʼj uwach?

²⁴ Jeʼlikalaj taq qʼij petinaq chke jachin kkaj kketaʼmaj kʼi chrij ri Ajbʼanol qe, Jehová, xuqujeʼ kkichaʼ upatanexik. Rajawaxik che kqetaʼmaj sibʼalaj kʼi taq jastaq chrij ri Jesús, rumal che ronojel ri e tewchibʼal riʼ kbʼantaj na rumal areʼ.