RI Biblia kubʼij ta chqe jumpaʼ qas xalax ri Jesús. Tekʼuriʼ kuya qastzij taq kʼutbʼal rech kqachomaj che xkʼojiʼ ta pa ri ikʼ diciembre.

Pa ri tinamit Belén, jachiʼ xalax wi ri Jesús, ¿jas ubʼanik ri ikʼ diciembre? Ri wuj kbʼix calendario che kech ri judío, chupam kʼo jun ikʼ ubʼiʼ kislev, che kekʼow, o kqaj, pa noviembre xuqujeʼ diciembre, chupam wajun ikʼ riʼ kubʼan tew xuqujeʼ jabʼ. Tekʼuriʼ kʼo jun chik ubʼiʼ tebet, che kqaj pa diciembre xuqujeʼ enero, pa wajun ikʼ riʼ are kubʼan sibʼalaj tew xuqujeʼ kqaj tew pa ri nimaʼq taq juyubʼ che pachaʼ kkaʼy saqbʼach. Chqilaʼ ri kubʼij ri Biblia chrij ri ubʼanik ri tinamit jachiʼ xalax wi ri Jesús.

Esdras, jun chke ri ajtzʼibʼanelabʼ, xukʼutu che ri ikʼ kislev are jun ikʼ rech tew xuqujeʼ jabʼ. Kubʼij che «pa ri juwinaq (20) rajilabʼal ri ubʼelej (9) ikʼ [kislev]» xkimulij kibʼ e kʼi winaq pa  Jerusalén, xuqujeʼ tajin «kebʼirbʼitik rumal rech ri [...] jabʼ ri katajin kaqajik». Xuqujeʼ, xubʼij che e kʼi winaq che e kʼo chilaʼ xkibʼij che kʼo jabʼ pa wajun ikʼ riʼ rech ri junabʼ: «Man kataniʼ ta kʼut ri jabʼ, man kuya ta kʼut kujkanaj ta kan pa ri bʼe» (Esdras 10:9, 13; Jeremías 36:22, TNM). Ri qas utz, are chiʼ naqaj chik kʼo wi ri ikʼ diciembre, ri e ajyuqʼ che e kʼo pa wajun tinamit riʼ kekikʼol ri e chij rech kekʼojiʼ ta chuwach taq ja chaqʼabʼ rukʼ ri e kichij.

Tekʼuriʼ ri Biblia kubʼij che pa ri chaqʼabʼ chiʼ xalax ri Jesús e kʼo ajyuqʼ che tajin kkichajij kichij pa ri juyubʼ. Xuqujeʼ ri Lucas jun ajtzʼibʼanel rech jun chke ri wuj che kchʼaw chrij ri ukʼaslemal ri Jesús, xubʼij chrij ri Belén, ri ajyuqʼabʼ «ri kekʼojiʼ pa taq ri juyubʼ. Chaqʼabʼ katajin kekichajij ri jumulaj kichij» xchaʼ (Lucas 2:8-12). Junam rukʼ ri xqilo xaq xiw ta e kʼo pa taq juyubʼ pa qʼij, are e kibʼanom ri kachoch chilaʼ. Xuqujeʼ kesam bʼi ri e chij chuwach ri ja chaqʼabʼ. We pa diciembre kubʼan nimalaj tew xuqujeʼ jabʼ pa Belén, ¿la utz che pa wajun ikʼ riʼ ri ajyuqʼabʼ kekʼojiʼ chuwach taq ja? Utz taj. Rumal laʼ ri e bʼantajik che xbʼan chiʼ xalax ri Jesús kukʼutu che xalax ta pa diciembre. *

Ri Utzij ri Dios kubʼij rukʼ tzʼaqat taq tzij chiʼ xkam ri Jesús, tekʼuriʼ xa kebʼ oxibʼ taq kʼutbʼal kuya chiʼ xalaxik. Wariʼ kubʼano che knaʼtaj ri utzij ri ajawinel Salomón chqe chiʼ xubʼij: «Are utz na ri utzalaj tzijol chuwach ri utzalaj kʼokʼal. Are utz na ri qʼij re kamikal chuwach ri qʼij re alanik» (Eclesiastés 7:1). Rumal laʼ kqilo che ri Biblia kuya kʼi taq tzij chrij ri utzijoxik ri utzij ri Dios che xubʼan ri Jesús xuqujeʼ chrij ri ukamikal, tekʼuriʼ xaq kuya kebʼ oxibʼ chrij ri ralaxbʼal.