CHKE ri cristianos xyaʼ ri taqonik che kkinaʼtasaj ri ukamikal ri Cristo. ¿Jasche sibʼalaj nim ubʼantajik wariʼ? ¿Jampaʼ kbʼan wariʼ xuqujeʼ jas kbʼan che ubʼanik?

Ri Jesucristo xumaj ubʼanik wariʼ pa ri chaqʼabʼ rech ri Pascua judía rech ri junabʼ 33. Ri Pascua are jun nimqʼij che xaq xiw jumul kbʼan pa jun junabʼ, are ri qʼij 14 rech nisán (ikʼ rech ri wuj judío). Ri ikʼ rech nisán kmajtajik chiʼ kel lo ri kʼakʼ ikʼ, chiʼ qʼaxinaq chi ri nabʼe semana rech marzo. Tekʼuriʼ ri judíos kekajilaj, o kejlaj, 14 qʼij rech kkibʼan ri nimaqʼij rech ri Pascua, chiʼ okinaq chi ri qʼequʼm.

Pa wajun aqʼabʼ riʼ, Jesús xubʼan ri nimaqʼij rech ri Pascua kukʼ ri apóstoles, tekʼuriʼ chiʼ kʼot chi ri Judas Iscariote ri Jesús xutik lo jun waʼim che xbʼix Waʼim rech ri Jesús che. Wajun waʼim riʼ are xkanaj kan che ukʼaxel ri Pascua judía, rumal wariʼ, ri naʼtabʼal xaq xiw kbʼan jumul pa jun junabʼ.

Ri wuj rech Mateo kubʼij ri xbʼanik: «Ri Jesús xukʼam jun kaxlanwa, xuya maltyoxinik che ri Dios, xupiro, xuya ke ri utijoxelabʼ, xubʼij: ‹Chikʼamaʼ, chitijaʼ. Are nucuerpo waʼ›. Xuqujeʼ xukʼam jun qumubʼal, xumaltyoxij che ri Dios, xuya ke ri utijoxelabʼ, xubʼij chke: ‹Iwonojel chitijaʼ iwe che. Are kʼu nukikʼel waʼ re ri kʼulwachinik. Ri nukikʼel katuruw na rech kasachtaj ri kimak e kʼi winaq›» (Mateo 26:26-28).

 E kʼo winaq kkichomaj che ri Jesús xubʼan kaxlanwa che ri utiʼojil, xuqujeʼ che xubʼan vino che ri ukikʼel. Tekʼuriʼ, ri ubʼaqil ri Jesús kʼot kʼax uriqom chiʼ xuya ri kaxlanwa chke ri rapóstoles. ¿La kojkunik kqabʼij che ri apóstoles qastzij xkitij ri ubʼaqil ri Jesús xuqujeʼ xkitij ri ukikʼel? Kojkun taj, rumal che wariʼ are sibʼalaj awas chuwach ri Dios ri utijik jun winaq (Génesis 9:3, 4; Levítico 17:10). Pa ri Lucas 22:20, Jesús xubʼij: «We qumubʼal riʼ are [‹jun etal re›, TNM] ri kʼakʼ kʼulwachinik pa ri nukikʼel, ri xchʼetow umak iwech». ¿La qastzij xubʼan jun «kʼakʼ kʼulwachinik» ri qumubʼal? Kkun ta kubʼan wariʼ, rumal che jun pacto are jun chomanik chkixoʼl nikʼaj winaq; kubʼij taj che are jun jastaq.

Rumal laʼ, ri kaxlanwa xuqujeʼ ri vino xa kʼo kraj kubʼij. Ri kaxlanwa are kraj kubʼij ri tzʼaqatalaj ubʼaqil ri Cristo. Ri Jesús are xukoj jun kaxlanwa che xkanaj kanoq rech ri nimqʼij pa ri waʼim rech ri Pascua, bʼanom che kʼot nijun chʼam, (o levadura) rukʼ (Éxodo 12:8). Chiʼ ri Dios kukoj ri tzij chʼam kʼi mul are kraj kubʼij che tajin kchʼaw chrij ri mak. Rumal laʼ, ri kaxlanwa are kraj kubʼij ri tzʼaqatalaj ubʼaqil ri Jesús che xuya pa kʼax, jun bʼaqil che kʼot umak (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Ri kaq vino are kraj kubʼij ri ukikʼel ri Jesús, wariʼ nim kubʼan che ri kʼakʼ pacto. Jesús xubʼij che kuya ukikʼel rumal ‹ri sachbʼal mak›. Rumal wariʼ, e kʼo winaq kkibʼan chʼajchʼoj chuwach ri Jehová xuqujeʼ kekunik kekʼojiʼ rukʼ pa ri jun kʼakʼ pacto (Hebreos 9:14; 10:16, 17). Wajun pacto riʼ, kubʼano che 144.000 e sukʼ cristianos kebʼe pa ri kaj. Chilaʼ kkibʼan ajawinelabʼ xuqujeʼ ajkojol tabʼal toqʼobʼ che kitoʼik ronojel ri winaq (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

¿Jachin taq kekunik kkitij ri kaxlanwa xuqujeʼ ri vino che kqʼaxax pa ri unaʼtabʼal ri ukamikal ri Jesús? Junam rukʼ ri qilom chik, xaq xiw kekunik kkitijo ri e kʼo chupam ri kʼakʼ pacto, wariʼ kraj kubʼij, che are ri kʼo kikubʼsal kʼuʼx che kebʼe pa ri kaj. Ri uxlabʼixel ri Dios keʼutoʼ che rilik che qastzij e chaʼom rech kkibʼan ajawinelabʼ pa ri kaj (Romanos 8:16). Ri e winaq riʼ xuqujeʼ e kʼo pa ri pacto rech ri Ajawbʼal rukʼ ri Jesús (Lucas 22:29).

 Tekʼuriʼ, ¿jas kkibʼan ri winaq ri kkaj kkiriq jun kikʼaslemal che kʼot ukʼisik pa jun kotzʼiʼjalaj uwach Ulew? Kkibʼan ri utaqonik ri Jesús, chiʼ keʼopan pa ri Uwaʼim ri Jesús, rukʼ wariʼ kkikʼutu che kenimanik, tekʼuriʼ kkitij ta ri kaxlanwa. Ri testigos rech Jehová kkinaʼtasaj jumul pa jun junabʼ ri Uwaʼim ri Jesús, chiʼ qʼequʼm chik, chiʼ kumajij ri qʼij 14 rech ri ikʼ nisán. Cho ronojel uwach Ulew e kʼi ta ri winaq kʼo ri kikubʼsal kʼuʼx che kebʼe pa ri kaj, ri bʼantajik riʼ sibʼalaj nim ubʼanik chkiwach konojel ri cristianos. Wariʼ kubʼano che kechoman chrij ri nim uloqʼoqʼenik ri Dios Jehová xuqujeʼ ri Jesucristo (Juan 3:16).