Chiʼ axibʼim awibʼ, ¿jas kabʼano?... Weneʼ kabʼij che ri atat o ri anan che katutoʼ. Are kʼu kʼo chi jun che kkunik katutoʼ. Areʼ sibʼalaj nim uchuqʼabʼ chuwach jun winaq. ¿La awetaʼm jachin ri más nim uchuqʼabʼ?... Je, are ri Jehová. Katkunik kabʼij che ri Jehová che katutoʼ. Are waʼ ri xubʼan ri David. Rumal che xukubʼsaj ukʼuʼx chrij ri Jehová, xubʼan ko ri ranimaʼ. Ri xubʼano tzʼibʼatal pa ri Utzij ri Dios.

Chiʼ nitzʼ na ri David, ri unan utat xkichaplej ukʼutik chuwach che kuloqʼoqʼej ri Jehová. Rumal laʼ kuxibʼij ta ribʼ. Pa neʼ xuqʼaxej kʼi kʼaxalaj jastaq che keʼuxibʼij nikʼaj chik winaq. David kuchʼobʼo che Jehová kkunik kutoʼ rumal che rachiʼl. Pa jun qʼij, chiʼ ri Divid tajin kuyuqʼuj ri uchij, ¡xril jun koj che xukʼam bʼi jun chke ri alaj taq uchij! ¿La awetaʼm jas xubʼan ri David? Xutereneʼj ri koj, weneʼ, xukamisaj rukʼ uqʼabʼ. Xuqujeʼ are chiʼ jun oso xraj xubʼan kʼax chke ri uchij, David xuqujeʼ xukamisaj. ¿Jachin xtoʼw ri David rech xkowir ri ranimaʼ?... Je qastzij, are ri Jehová.

Chqilaʼ chrij jun qʼij chik che David xukʼutu che ko ranimaʼ. Are chiʼ ri israelitas tajin kechʼojin kukʼ ri filisteos. Jun chke ri ajchʼojabʼ kech ri filisteos ubʼiʼ Goliat, wajun achi riʼ sibʼalaj nim raqan, ¡are qas jun nimalaj achi! Ri Goliat sibʼalaj tajin kuyoqʼ ri israelitas xuqujeʼ ri Jehová. Kubʼij waʼ chke ri israelitas: «¡Jachin kukochʼo kchʼojin wukʼ!». Konojel kkixibʼij kibʼ chuwach kʼo ta nijun kraj kchʼojin rukʼ. Chiʼ David xuta ri tajin kubʼij Goliat, xubʼij: «¡In kinkunik kinchʼojin awukʼ! ¡Ri Jehová kinutoʼ che achʼakik!». ¿La sibʼalaj ko ranimaʼ ri David?... Je, areʼ xuxibʼij ta ribʼ. ¿Jas chi xkʼulmatajik?

Ri David xukʼam bʼi jobʼ abʼaj xuqujeʼ jun honda, xuqujeʼ xbʼe che chʼoj rukʼ ri achi che sibʼalaj nim raqan. Chiʼ ri Goliat xrilo che ri David nitzʼ na, xtzeʼn chrij. Are kʼu ri David xubʼij waʼ che: «Ri at at petinaq che ubʼanik kʼax chwe rukʼ chʼichʼ re chʼoʼj, ¡are kʼu ri in kinbʼe che ubʼanik kʼax chawe pa ri ubʼiʼ ri Jehová!». David xbʼe chrij ri nimalaj achi. Xuya jun abʼaj pa ri uhonda xukʼaq bʼi chrij. Ri abʼaj xqaj che ri umetzʼal ri upalaj, ¡ri Goliat xtzaqik, xkamik!  Chiʼ ri filisteos xkil waʼ, sibʼalaj xkixibʼij kibʼ rumal laʼ xeʼanimaj bʼik. ¡Ri ala David xkunik xuchʼak ri nimalaj achi Goliat! ¿Jachin xtoʼw ri David?... Qastzij are ri Jehová xtowik, ¡ri Jehová are más kʼo uchʼuqʼabʼ chkiwach ri winaq, pa neʼ ri winaq kʼo uchʼuqʼabʼ o nim raqan!

¿Jas kukʼut chqawach ri xubʼan ri David pa ri ukʼaslemal?... Che are ri Jehová ri más nim uchuqʼabʼ chuwach jun winaq. Rumal laʼ, we kʼo jumul kaxibʼij awibʼ, chnaʼtaj wariʼ chawe: ri Jehová are awachiʼl xuqujeʼ katutoʼ rech kaxibʼij ta chi más awibʼ.